Nunavunmi Maligaliurviani Aulapkaiyiat Ikayuqtuiyullu Katimayia angiqhimayaat makipkainikhakkut haffumani Ilikkuuqtuq Katimayitkut Qimilruuqhiyukhaq Maligaliuqtit Ikayuuhiakhait, Akiliuhiakhait, Maniktuutait Ikayuutaillu.
Uigua 37 haffumani Maligaliurvingmi Ministait Atannguvianilu Katimayia Maligaryuanga piviqaqtuq katimayitkut “qimilruurlugit pitquiniqarlutiglu Uqaqtittiyimut haffumap mikhaagut ikayuuhiakhait, akiliuhiakhait, maniktuutait ikayuutaillu.”
Katimayiqarniaqtut amigaitqiyaunngittumik tallimanik. Katimayikhat tikkuaqtaunikhaat niriugiyauyuq September 2018-mi. Katimayitkut kingulliittuq tuhaqtittijjutikhaat tuniyauniaqtuq Uqaqtittiyimut qaangiqtinnagu March 31, 2019-mi. Katimayitkut naunaipkutiqutikhaani piviqaqtuq havauhiriyumayaat pitquiniqarluni ihumagiblugu atuqtauqattaqpaktut akituvallaanngittumiglu ikayuqtuiniqaqtukhaq havauhiannik Maligaliuqtit Maligaliurvingmi nutaraqaqtut ukiuqqukittunik pamiqhiyut.
Ihumagiyauyumaguvit tikkuaqtaunikhakkut katimayitkunnut, uukturumayut inuuhiqattiaqtukhaq nalunaqtunik ilihimattiaqtukhaq titiraqhimayut tuhagakhanik, ukuninngalu maligauyunik, maniliqijjutit naunaipkutainnik ahiillu titiravalungnik. Uqayuttiaqtukhaq Inuit Uqauhiannik ihumagiyaulluarniaqtut.
Katimayiuyut akiliuhiarutiqarniaqtut malikhugu piviqarnianni Uiguani 810 haffumani Kavamatkuat Nunavutip Maniliqinikkut Makpiraaryuangani. Aullaaqattaqpangniaqtuq imaaqaak.
Uuktuutit piyauyungnaqtut tikitinnagu 5:00 unnulihaami (EST) uvani August 17, 2018-mi. Uuktuutikhat apiqqutikhallu turaaqtitauyungnaqtut uvunga:
Titiraqti Aulapkaiyuni Ikayuqtuiyuni Katimayiat
Havagvia Nunavunmi Maligaliurvia
P.O. Box 1200, Iqaluit, NU, X0A 0H0
Uqautikkut: (867) 975-5000 Kayumiktukkut: (867) 975-5191
Qaritauyakkut: submissions@assembly.nu.ca