FAQs

ᓄᓇᕗᑦ ᐱᓐᖑᖅᑎᑕᐅᓚᐅᖅᓯᒪᕗᖅ ᐊᒃᓱᕉᑎᒋᔭᐅᓪᓗᓂ ᐊᕐᕌᒍᑦ 30 ᐅᖓᑖᓄᑦ, ᑭᓯᐊᓂ ᐱᓕᕆᐊᕆᔭᐅᖏᓐᓇᕋᒥ ᐃᓄᖕᓄᑦ, ᑎᒥᓐᖑᖅᑎᑕᐅᓯᒪᔪᓄᑦ ᐊᒻᒪᓗ ᒐᕙᒪᓄᑦ, ᑕᒪᕐᒥᒃ ᑕᑯᓐᓇᓐᖑᐊᒐᖃᓚᐅᖅᓯᒪᖕᒪᑕ ᐊᒻᒪᓗ ᐊᒃᓱᕉᑎᖃᓚᐅᖅᓯᒪᖕᒪᑕ ᐱᓐᖑᖅᑎᑦᑎᔪᒪᓂᕐᒥᒃ ᓯᓐᓇᒃᑑᒪᑐᐃᓐᓇᐅᖅᑰᔨᔪᒥᒃ.

ᓄᓇᑦᓯᐊᖅ ᐊᕕᒃᑕᐅᔪᒪᓂᖓ ᐃᓱᒪᒋᔭᐅᕙᓪᓕᐊᓕᓚᐅᖅᓯᒪᔪᖅ 1950 ᐊᑐᖅᑎᓪᓗᒋᑦ, ᓄᓇᑦᓯᐊᑉ ᐅᐊᓕᓂᖓᓂᕐᒥᐅᑦ ᒪᑲᓐᔨ ᕚᓕᒥᐅᑦ ᖃᓪᓗᓈᖏᑦ ᐊᕕᒃᓯᔪᒪᓕᖅᑎᓪᓗᒋᑦ, ᐊᐃᕙᐅᑖ ᑐᑭᑖᖅᑎᑕᐅᓯᒪᓪᓗᓂ ᐊᕕᒃᑕᐅᒃᐸᑦ ᐅᐊᓕᓂᕐᒥᐅᑦ ᓇᖕᒥᓂᖅ ᒐᕙᒪᑖᖅᓴᕋᐃᓐᓂᖅᓴᐅᓂᐊᕐᓂᕋᖅᑕᐅᓪᓗᓂ.

ᓄᓇᑦᓯᐊᖅ ᒪᕐᕈᐃᓕᑎᑕᐅᔪᒪᓂᖓ ᓯᕗᓪᓕᖅᐹᒥ ᓴᖅᑭᑕᐅᓚᐅᖅᓯᒪᔪᖅ ᐱᖁᔭᒃᓴᐅᓪᓗᓂ ᑲᓇᑕᐅᑉ ᒐᕙᒪᒃᑯᖏᑦᑕ ᒪᓕᒐᓕᐅᕐᕕᒡᔪᐊᖓᓂ 1963-ᖑᑎᓪᓗᒍ.  ᑕᐃᒪᐃᒃᑲᓗᐊᖅᑎᓪᓗᒍ, ᑖᓐᓇ ᐱᖁᔭᒃᓴᖅ ᐲᖅᑕᐅᓚᐅᖅᓯᒪᔪᖅ ᓯᕗᓪᓕᖅᐹᒥᒃ ᐅᖃᓕᒫᖅᑕᐅᓯᒪᓕᕋᓗᐊᖅᑎᓪᓗᒍ.

1971-ᖑᑎᓪᓗᒍ, ᐃᓄᐃᑦ ᑕᐱᕇᒃᓴᑦ ᑲᓇᑕᒥ ᑎᒥᓐᖑᖅᑎᑕᐅᓚᐅᖅᓯᒪᔪᖅ ᐱᔭᒃᓴᖃᕐᓂᐊᕐᒪᑕ ᐊᒻᒪᓗ ᐋᔩᖅᑎᒋᔭᐅᓂᐊᕐᒪᑕ ᓄᓇᑖᕐᓂᕐᒧᑦ ᐊᖏᕈᑎᓕᐊᕆᔭᐅᔪᒪᔪᒥᒃ ᑲᓇᑕᐅᑉ ᒐᕙᒪᒃᑯᓐᓄᑦ, ᑭᒡᒐᖅᑐᕐᓗᒋᑦ ᐃᓄᓪᓚᕇᑦ ᑲᓇᑕᐅᑉ ᐅᑭᐅᖅᑕᖅᑐᖓᓂᕐᒥᐅᑕᐃᑦ.  1973-ᒥ, ᐃᓄᐃᑦ ᑕᐱᕇᒃᓴᒃᑯᑦ ᑲᓇᑕᒥ ᖃᐅᔨᓴᓯᒋᐊᓚᐅᖅᓯᒪᔪᑦ ᐃᓄᐃᑦ ᓄᓇᓂᒃ ᐊᑐᖃᑦᑕᕈᓯᖏᓐᓂᒃ ᐊᒻᒪᓗ ᓇᔪᒐᖃᕐᓂᖏᓐᓂᒃ, ᑖᒃᑯᐊᓗ ᖃᐅᔨᔭᖏᑦ ᑐᓐᖓᕕᒋᔭᐅᓪᓗᑎᒃ ᓄᓇᑖᕋᓱᓕᓚᐅᖅᓯᒪᓪᓗᑎᒃ ᓄᓇᕗᒻᒥᒃ.  ᐱᖓᓱᑦ ᐊᕐᕌᒍᑦ ᐊᓂᒍᖅᑎᓪᓗᒋᑦ, ᐃᓄᐃᑦ ᑕᐱᕇᓴᒃᑯᑦ ᑲᓇᑕᒥ ᑐᒃᓯᕋᐅᓯᐅᓕᓚᐅᖅᓯᒪᔪᑦ ᓴᖅᑭᑦᑎᔪᒪᓂᕐᒥᒃ ᓄᓇᕗᒻᒥᒃ.

ᑲᓇᑕᐅᑉ ᐅᑭᐅᖅᑕᖅᑐᖓᓂ ᒐᕙᒪᖃᕐᕖᒃ ᒪᕐᕈᓐᖑᖅᑎᑕᐅᔪᒪᓕᖅᑎᓪᓗᒍ ᐊᐃᕙᐅᑎᖃᓪᓗᐊᑕᓚᐅᖅᓯᒪᔪᑦ ᓄᓇᕗᒻᒥᐅᑦ ᓇᖕᒥᓂᖅ ᒐᕙᒪᑖᕈᒪᓂᖏᓐᓂᒃ, ᐃᓄᖕᓄᑦ ᖃᓂᓐᓂᖅᓴᐅᓂᐊᖅᑐᓂᒃ ᐊᒻᒪᓗ ᐱᖅᑯᓯᑐᖃᖏᓐᓂᒃ ᑐᓐᖓᕕᖃᕋᔭᖅᑐᓂᒃ, ᐃᓚᓕᐅᖢᒍ ᐃᓄᐃᑦ ᐅᖃᐅᓯᖓᑦ ᐊᑐᖅᑕᐅᖃᑦᑕᕐᓂᐊᕐᓂᖓ ᒐᕙᒪᑖᓵᑦ ᐃᓗᐊᓂ.

1982-ᒥ, ᓄᓇᕗᑦ ᑐᓐᖓᕕᒃᑯᑦ ᑎᒥᓐᖑᖅᑎᑕᐅᓚᐅᖅᓯᒪᔪᖅ ᓄᓇᑖᕋᓱᖕᓂᕐᒥᒃ ᐋᔩᕈᑎᖃᖅᑎᐅᔪᓐᓇᕐᓂᐊᕐᒪᑕ ᑭᒡᒐᖅᑐᕐᓗᒋᑦ ᓄᓇᕗᒻᒥᐅᑦ ᐃᓄᓪᓚᕆᖁᑎᖏᑦ, ᐃᓄᐃᑦ ᑕᐱᕇᒃᓴᒃᑯᑦ ᑲᓇᑕᒥ ᐱᔭᒃᓴᖅᑖᕆᓯᒪᓚᐅᖅᓯᒪᔭᕋᓗᐊᖓᑦ ᑎᒍᖔᖅᖢᓂᔾᔪᒃ.

ᓄᓇᕗᑦ ᓇᐅᒃᑯᑦ ᑭᒡᓕᖃᕐᓂᐊᕐᒪᖔᖓ ᓂᕈᐊᕈᑕᐅᑎᓪᓗᒍ, 56 ᐳᓴᓐᑏᑦ ᓄᓇᑦᓯᐊᕐᒥᐅᑦ ᓂᕈᐊᓚᐅᖅᓯᒪᔪᑦ ᐱᓐᖑᖅᑎᑦᑎᖁᔨᓪᓗᑎᒃ ᓄᓇᕗᒻᒥᒃ ᐊᐃᕐᕆᓕ 14, 1982-ᒥ, ᐊᒻᒪᓗ ᑕᕝᕙᓂᔅᓴᐃᓐᓇᖅ ᐊᕐᕌᒍᒥ ᓄᕕᐱᕆᐅᓕᖅᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᓇᓗᓇᐃᖅᓯᓚᐅᖅᓯᒪᔪᑦ ᓄᓇᕗᑦ ᐱᓐᖑᖅᑎᑕᐅᓂᐊᕐᓂᕋᖅᑕᐅᓪᓗᓂ.

ᒪᐃ 14, 1992-ᒥ, ᐅᓄᕐᓂᖅᓴᐃᑦ ᓄᓇᑦᓯᐊᕐᒥᐅᑦ ᓂᕈᐊᓚᐅᖅᓯᒪᔪᑦ ᓄᓇᕗᑦ ᐊᒻᒪᓗ ᐅᐊᓕᓂᕐᒥᐅᑦ ᓄᓇᖏᑦᑕ ᑭᒡᓕᖓ ᓇᐅᒃᑰᕐᓂᐊᕐᒪᖓᖓᓂᒃ.

ᓄᓇᕗᒻᒥᐅᑦ ᐃᓄᓪᓚᕆᖏᑦ ᐊᖏᓚᐅᖅᓯᒪᔪᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ ᓄᕕᐱᕆ 1992-ᖑᑎᓪᓗᒍ.  ᑭᖑᕐᖓᓂ, ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᐊᑎᓕᐅᖅᑕᐅᓕᓚᐅᖅᓯᒪᔪᑦ ᑲᓇᑕᐅᑉ ᐳᕋᐃᒻ ᒥᓂᔅᑕᖓᓐᓄᑦ ᒪᐃ 25, 1993-ᒥ ᐃᖃᓗᖕᓂ, ᐊᒻᒪᓗ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓐᓄᑦ ᐱᖁᔨᕗᖔᒃᑯᑦ ᑲᔪᓯᑎᑕᐅᓚᐅᖅᓯᒪᓪᓗᓂ ᔫᓂᐅᓕᖅᑎᓪᓗᒍ ᑕᕝᕙᓂᔅᓴᐃᓐᓇᖅ ᐊᕐᕌᒍᒥ.  $1.1 ᐱᓕᐊᓐ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᓇᓗᓇᐃᖅᑕᐅᓚᐅᖅᓯᒪᔪᑦ ᖁᕕᐊᓲᑎᒋᔭᐅᓂᒃᑯᑦ ᖁᕐᓗᖅᑐᕐᒥ ᔪᓚᐃ 9, 1993-ᒥ.  ᓄᓇᕗᑦ ᐱᖁᔭᕐᔪᐊᖓᓄᑦ ᐃᓚᒋᔭᐅᓪᓗᓂ, ᑲᓇᑕᐅᑉ ᒐᕙᒪᒃᑯᖏᑦ ᐊᖏᓚᐅᖅᓯᒪᔪᑦ ᐊᑐᐃᓐᓇᕈᐃᓂᐊᕐᓂᕋᖅᖢᑎᒃ $150 ᒥᓕᐊᓐᓂᒃ ᐊᑭᓕᖅᑕᐅᔪᓐᓇᕐᓂᐊᕐᒪᑕ ᑮᓇᐅᔭᖅᑐᕈᑎᕕᓃᑦ ᓄᓇᕗᑦ ᐱᓐᖑᖅᑎᑕᐅᔾᔪᑎᖏᓐᓄᑦ.

ᓄᓇᕗᑦ ᐱᓐᖑᖅᑎᑕᐅᓚᐅᖅᓯᒪᔪᖅ ᐊᐃᕐᕆᓕ 1, 1999-ᒥ.  ᑲᓇᑕᐅᑉ ᐅᑭᐅᖅᑕᖅᑐᖓ ᒪᕐᕈᓐᖑᖅᑎᑕᐅᓚᐅᖅᓯᒪᔪᑦ, ᓄᑖᕐᒥᒃ ᓄᓇᑦᓯᐊᖅᑕᖃᓕᖅᖢᓂ ᐊᒻᒪᓗ ᓗᓄᓇᕗᑦᑕᖃᓕᖅᖢᓂ.  ᓄᓇᕗᑦ ᐊᕗᑎᖕᒪᑦ, ᑲᓇᑕᐅᑉ ᓄᓇᓐᖑᐊᖓ ᓴᓇᔭᐅᒃᑲᓐᓂᓕᑕᐃᓐᓇᓚᐅᖅᓯᒪᔪᖅ ᑕᐃᒪᓐᖓᓂᑦ 1949-ᒥᑦ, ᓂᐅᕙᐅᓐᓛᓐ ᐃᓚᓕᐅᑎᖕᒪᑦ ᑯᐃᓐ ᓄᓇᖁᑎᖏᓐᓄᑦ.

ᐃᓄᒃᑎᑐᑦ, ᐃᓄᐃᓐᓇᖅᑐᑦ ᐊᒻᒪᓗ ᖃᓪᓗᓈᑦ ᐅᖃᐅᓯᖓᑦ ᐊᑐᖅᑕᐅᓪᓗᐊᑕᖃᑦᑕᖅᑐᑦ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᖓᓂ.  ᐅᐃᕖᑦ ᐅᖃᐅᓯᖓᑦ ᓄᓇᕗᒻᒥ ᐃᓕᓴᕆᔭᐅᖃᑕᐅᓯᒪᔪᖅ ᐊᒻᒪᓗ ᐊᑐᖅᑕᐅᔪᓐᓇᕆᓪᓗᓂ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᖓᓂ.

ᓇᓕ ᑯᓱᒐᖅ, ᑲᒥᓯᓇ ᓄᓇᕘᒧᑦ. ᑲᓇᑕᐅᑉ ᒐᕙᒪᒃᑯᖏᓐᓄᑦ ᑎᒃᑯᐊᖅᑕᐅᓯᒪᓪᓗᓂ, ᑲᒥᓯᓇᒋᔭᖅ ᐃᓄᓕᕆᔨᑐᖃᒃᑯᑦ ᒥᓂᔅᑕᖓᑦᑕ ᑎᓕᖃᑦᑕᖅᐹ ᖃᓄᐃᓕᐅᕐᓗᓂᐅᒃ.

AttachmentSize
ᐱᓕᕆᐊᒃᓴᖏᑦ ᑲᒥᓴᓇᖓᑦᑕ ᓄᓇᕗᑦ53.8 KB

ᐃᒻᒪᑲᓪᓛᓗᒃ 1200-ᖏᓐᓃᓱᖓᖅᑎᓪᓗᒍ, ᐃᖅᓱᒃᑎ ᓴᐳᒻᒥᔨᐅᓚᐅᖅᓯᒪᕗᖅ ᑭᖕᒥᒃ ᑯᐃᓐᒥᒡᓘᓐᓃᑦ, ᑖᓐᓇ ᐃᖅᓱᒐᓂ ᓱᒋᐊᕈᑎᒋᓪᓗᓂᐅᒃ.  ᐅᓪᓗᒥᐅᓕᖅᑐᖅ, ᐃᖅᓱᒃᑎ ᐊᒡᔭᖅᓯᓲᖑᕗᖅ ᐃᖅᓱᒐᕐᒥᓂᒃ ᑲᑎᒪᕐᔪᐊᕐᕕᖕᒧᑦ ᑲᑎᒪᕐᔪᐊᕐᓂᖅ ᐱᒋᐊᕐᓂᐊᓕᖅᑎᓪᓗᒍ, ᐊᒻᒪᓗ ᐊᓐᓂᑎᕙᒃᖢᓂᐅᒃ ᐱᔭᕇᕌᖓᑕ.  ᑖᓐᓇ ᐃᖅᓱᒃᑎ ᐱᔭᒃᓴᖅᑖᖅᑎᑕᐅᓯᒪᖕᒥᕗᖅ ᓴᐳᒻᒥᔨᐅᓪᓗᓂ ᐃᖅᓱᒐᕐᒥᒃ, ᑲᑎᒪᕐᔪᐊᖅᑐᓂᒡᓗ ᑕᑯᓐᓇᕆᐊᖅᑐᓂᒃ ᓇᐅᑦᑎᖅᓱᖅᑎᐅᓪᓗᓂ ᐱᑦᑎᐊᕋᓗᐊᕐᒪᖔᖏᓐᓂᒃ, ᑎᓕᓯᖃᑦᑕᖅᖢᓂ ᐱᔨᑲᑖᖕᓂᒃ, ᓇᐅᑦᑎᖅᓱᖅᑎᒋᔭᐅᓪᓗᓂ ᑲᑎᒪᕐᔪᐊᕐᕕᖕᒥᒃ, ᐊᒻᒪᓗ ᓴᐳᒻᒥᔨᐅᓪᓗᓂ ᒪᓕᒐᓕᐅᖅᑎᓂᒃ ᐊᒻᒪᓗ ᐃᖅᑲᓇᐃᔭᖅᑎᓂᒃ.

AttachmentSize
ᐱᓕᕆᐊᒃᓴᖏᑦ ᑲᑎᒪᕐᔪᐊᕐᕕᖕᒥ ᐃᖅᑲᓇᐃᔭᖅᑎᑦ38.52 KB

ᓄᓇᕗᑦ ᒪᓕᒐᓕᐅᕐᕕᐊᑕ ᑎᑎᕋᖅᑎᖓ ᔮᓐ ᑯᐊᒃᖑᕗᖅ.

AttachmentSize
ᐱᓕᕆᐊᒃᓴᖏᑦ ᒪᓕᒐᓕᐅᖅᑎᑦ ᑎᑎᕋᖅᑎᖓᑕ40.86 KB

ᓄᓇᕗᑦ ᒪᓕᒐᓕᐅᕐᕕᐊᑕ ᐅᖃᖅᑎᖓᑦ ᒥᓂᔅᑕ ᕼᐊᑐᓐ ᑐᑐ, ᒪᓕᒐᓕᐅᖅᑎ ᐃᖃᓗᐃᑦ ᕿᑎᐊᓄᑦ.

AttachmentSize
ᐱᓕᕆᐊᒃᓴᖏᑦ ᐅᖃᖅᑎᖓᑦᑕ ᒪᓕᒐᓕᐅᖅᑎᑦ ᑲᑎᒪᔨᖏᑕ49.74 KB

ᓄᓇᕗᒻᒥ ᓯᕗᓕᖅᑎᒋᔭᐅᕗᖅ ᒥᓂᔅᑕ ᐄᕙ ᐋᕆᐊᖅ.  ᒪᓕᒐᓕᐅᖅᑎᒋᔭᐅᔪᖅ ᐃᖃᓗᐃᑦ east-ᒧᑦ, ᒥᓂᔅᑕᕆᔭᐅᓪᔪᖅ ᒐᕙᒪᓕᕆᔨᒃᑯᓐᓄᑦ, ᒥᓂᔅᑕᕆᔭᐅᔪᖅ ᐊᕐᓇᐃᑦ ᑲᑎᒪᔨᖏᓐᓄᑦ, ᐊᒻᒪᓗ ᒥᓂᔅᑕᕆᔭᐅᒋᓪᓗᓂ ᑲᓇᑕᐅᑉ ᓯᓚᑖᓂᓐᖔᖅᑐᓄᑦ ᓄᓇᑖᕆᐊᖅᑐᖅᓯᒪᔪᓄᑦ ᑲᓇᑕᒥ.  ᓯᕗᓕᖅᑎ ᓂᕈᐊᖅᑕᐅᕙᒃᐳᖅ ᒪᓕᒐᓕᐅᖅᑎᐅᖃᑎᒥᓄᑦ.

AttachmentSize
ᐱᓕᕆᐊᒃᓴᖏᑦ ᓯᕗᓕᖅᑎᖓᑦᑕ ᓄᓇᕗᑦ40.98 KB

ᐅᖃᐅᓯᖃᓕᕌᖓᑦᑕ ‘ᒐᕙᒪᓂᒃ’, ᐅᖃᐅᓯᖃᒡᒍᔪᒍᑦ ᒥᓂᔅᑕᐃᑦ ᑲᑎᒪᔨᖏᓐᓂᒃ.

ᒥᓂᔅᑕᐃᑦ ᑲᑎᒪᔨᖏᑦ ᓯᕗᒃᑲᖅᑕᖅᑎᒋᔭᐅᕗᑦ, ᑭᓯᐊᓂᓗ ᑕᐃᒪᐃᒃᑲᓗᐊᖅᑎᓪᓗᒍ, ᒪᓕᒐᓕᐅᕐᕕᖕᒧᑦ ᓂᕈᐊᖅᑕᐅᓯᒪᔪᓂᓐᖔᕋᒥᒃ, ᒥᓂᔅᑕᐃᑦ ᐊᒻᒪᓗ ᒪᓕᒐᓕᐅᖅᑏᑦ ᐊᒡᒍᖅᑐᖅᓯᒪᓂᖏᑦᑎᒍᑦ ᐱᔭᒃᓴᖏᑦ ᐸᔾᔭᕐᓗᒃᐳᑦ.

ᒥᓂᔅᑕᐃᑦ ᑲᑎᒪᔨᖏᑦ ᖁᓪᓕᖅᐹᖑᓪᓗᑎᒃ ᐃᓱᒪᓕᐅᖅᑎᒋᔭᐅᕗᑦ ᓄᓇᕗᑦ ᒐᕙᒪᒃᑯᓐᓄᑦ, ᐊᒻᒪᓗ ᐅᑯᐊᖑᓪᓗᑎᒃ, ᓯᕗᓕᖅᑎ ᐊᒻᒪᓗ 7 ᒥᓂᔅᑕᐃᑦ, ᑕᒪᕐᒥᒃ ᓂᕈᐊᖅᑕᐅᓯᒪᔪᐃᓐᓇᐅᓪᓗᑎᒃ ᒪᓕᒐᓕᐅᕐᕕᐅᑉ ᒪᓕᒐᓕᐅᖅᑎᖏᓐᓄᑦ.

ᒪᓕᒐᓕᐅᖅᑏᑦ ᑲᑎᒪᕐᔪᐊᕋᓗᐊᖅᐸᑕ ᐅᕝᕙᓘᓐᓃᑦ ᑲᑎᒪᕐᔪᐊᓐᖏᒃᑲᓗᐊᖅᑎᓪᓗᒍ, ᒥᓂᔅᑕᐃᑦ ᑲᑎᒪᔨᖏᑦ ᐱᔭᒃᓴᖅᑖᖅᑎᑕᐅᓯᒪᕗᑦ ᒐᕙᒪᒃᑯᑦ ᖃᐅᑕᒫᖅᓯᐅᑎᖏᓐᓂᒃ ᐊᐅᓚᑦᓯᔨᐅᓂᕐᒥᒃ.  ᑕᒪᑐᒥᖓ ᐊᑐᖅᑎᓪᓗᒋᑦ, ᒥᓂᔅᑕᐃᑦ ᐃᖅᑲᓇᐃᔭᖃᑎᖃᖃᑦᑕᖅᑐᑦ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᓐᓂᒃ, ᒥᓂᔅᑕᐅᖃᑎᒥᖕᓂᒃ, ᐅᕝᕙᓘᓐᓃᑦ ᐃᒻᒥᒃᑰᖅᖢᑎᒃ.

ᐊᕐᕌᒎ ᐃᓗᐊᓂ, ᑲᑎᒪᔾᔪᑎᖃᓲᑦ ᐊᑐᐊᒐᓄᑦ ᑐᕌᖓᔪᓂᒃ, ᐃᓱᒪᒃᓴᖅᓯᐅᕈᑎᖃᖃᑦᑕᕐᓂᕐᒥᒃ ᓄᑖᓂᒃ ᐱᖁᔭᒃᓴᓂᒃ, ᐊᒻᒪᓗ ᐃᖅᑲᓇᐃᔮᖃᖃᑦᑕᖅᖢᑎᒃ ᑮᓇᐅᔭᑦ ᐊᑐᕈᒫᕐᓂᐊᖅᑐᒃᓴᓂᒃ.  ᐃᒻᒥᒃᑰᖅᖢᑎᒃ, ᓂᐊᖁᕆᔭᐅᕗᑦ ᐊᕕᒃᑐᖅᓯᒪᔪᓂ, ᐊᒻᒪᓗ ᐱᓕᕆᕝᕕᖏᑦᑕ ᑐᕌᒐᖏᑦ ᓴᖅᑭᑕᐅᕙᓪᓕᐊᑦᑎᐊᕋᓗᐊᕐᒪᖔᖏᓐᓂᒃ.

ᐱᓕᕆᕝᕕᖕᓄᑦ ᓂᐊᖁᕆᔭᐅᔪᑦ ᑕᐃᔭᐅᖃᑦᑕᖅᐳᑦ ᒥᓂᔅᑕᐃᑦ ᑐᖏᓕᖏᓐᓂᒃ, ᑖᒃᑯᐊᓗ ᒥᓂᔅᑕᒧᑦ ᑐᕌᖅᖢᑎᒃ ᐅᓂᒃᑳᓕᐅᓲᖑᓪᓗᑎᒃ.  ᒥᓂᔅᑕ ᐱᔭᒃᓴᖅᑕᖅᑎᑕᐅᓯᒪᕗᖅ ᒪᓕᒐᓕᐅᕐᕕᐅᑉ ᑐᕌᒐᒃᓴᓕᐊᖏᓐᓂᒃ ᒪᓕᒋᐊᖃᕐᓂᕐᒥᒃ, ᐋᖅᑭᒃᓱᐃᖃᑦᑕᕐᓂᕐᒥᒃ ᐊᑐᐊᒐᓂᒃ ᐊᖏᖅᑕᐅᔭᕆᐊᓕᖕᓂᒃ ᒥᓂᔅᑕᐃᑦ ᑲᑎᒪᔨᖏᓐᓄᑦ, ᐃᓱᒪᓕᐅᖅᑎᐅᓪᓗᑎᒡᓗ ᖃᓄᖅ ᐊᑐᐊᒐᐃᑦ ᐊᐅᓚᔾᔭᒃᑕᐅᓂᐊᕐᒪᖔᖏᑦ ᐊᒻᒪᓗ ᑎᑎᕋᕐᕕᖕᒥ ᐃᖅᑲᓇᐃᔭᖅᑏᑦ ᑕᒪᒃᑯᓂᖓ ᒪᓕᒃᑲᓗᐊᕐᒪᖔᖏᓐᓂᒃ ᓇᐅᑦᑎᖅᓱᖅᑎᒋᔭᐅᓪᓗᑎᒃ.

ᑕᖅᑲᒃᑯᐊ ᑭᓐᖒᒪᔭᖏᑦ ᒪᓕᒡᓗᒋᑦ, ᒥᓂᔅᑕᐃᑦ ᓴᖅᑭᑦᑎᔨᐅᕗᑦ ᐱᖁᔭᒃᓴᓂᒃ ᐱᓕᕆᕝᕕᖏᑦᑕ ᐃᓗᐊᒍᑦ ᐱᔭᒃᓴᖅᑖᕆᓯᒪᔭᖏᓐᓅᖓᔪᓂᒃ.  ᒪᓕᒐᓕᐅᕐᕕᖕᒥ ᐊᐱᖅᓱᖅᑕᐅᔪᓄᑦ ᑭᐅᑦᑕᕆᐊᖃᖅᐳᖅ ᐱᓕᕆᕝᕕᖏᑦᑕ ᖃᓄᐃᓕᐅᖅᓯᒪᔭᖏᓐᓅᖓᔪᓂᒃ ᐊᒻᒪᓗ ᐊᑐᕈᒫᕐᓂᐊᖅᑐᓕᐊᕆᓯᒪᔭᖏᓐᓂᒃ.    

ᓯᕗᓕᖅᑎᐅ ᐱᔭᒃᓴᖏᑦᑕ ᐃᓚᖏᑦ ᐃᒃᓯᕙᐅᑕᐅᕗᖅ ᒥᓂᔅᑕᐃᑦ ᑲᑎᒪᓂᖃᖅᑎᓪᓗᒋᑦ, ᒥᓂᔅᑕᓄᑦ ᐱᔭᒃᓴᕆᔭᐅᓂᐊᖅᑐᓂᒃ ᑐᓂᐅᖅᑲᐃᔨᐅᓪᓗᓂ ᐊᒻᒪᓗ ᐃᓂᖅᑎᕆᔨᐅᓪᓗᓂ ᒥᓂᔅᑕᓂᒃ.  ᓯᕗᓕᖅᑎ ᐋᖅᑭᒃᓱᐃᓲᖑᒋᕗᖅ ᐊᖏᖃᑎᒌᒃᑐᐃᓐᓇᐅᔪᓐᓇᕐᓂᐊᕐᒪᑕ ᒥᓂᔅᑕᐃᑦ ᐊᒻᒪᓗ ᐅᖃᖅᑎᒋᔭᐅᓪᓗᓂ ᐅᖃᐅᓯᐅᔭᕆᐊᓖᑦ ᒥᓂᔅᑕᑦ ᐱᔭᒃᓴᖏᑦᑕ ᐃᓗᐊᒎᓐᖏᑐᐊᖅᐸᑕ.

AttachmentSize
ᐱᓕᕆᐊᒃᓴᖏᑦ ᒥᓂᔅᑕᐃᑦ ᑲᑎᒪᔨᖏᑦ ᐊᒻᒪ ᑮᓇᐅᔭᓕᕆᓂᕐᒧᑦ ᑲᑎᒪᔨᑦ47.48 KB

ᒥᓂᔅᑕᐃᑦ ᑲᑎᒪᔨᖏᑦ ᓂᕈᐊᖅᑕᐅᖃᑦᑕᖅᐳᑦ ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑎᓂᑦ.  ᒪᓕᒐᓕᐅᖅᑏᑦ ᓂᕈᐊᖅᑕᐅᓵᓚᐅᖅᑎᓪᓗᒋᑦ ᑲᑎᑦᑐᐃᓐᓇᐅᓲᖑᕗᑦ, ᑕᐃᒪᓐᓇᓗ ᑲᑎᓐᖓᑎᓪᓗᒋᑦ ᑲᑎᒪᓂᖓᑦ ᑕᐃᔭᐅᖃᑦᑕᖅᖢᓂ ᓄᓇᕗᒻᒥ ᓯᕗᒃᑲᖅᑕᖅᑏᑦ ᑲᑎᒪᓂᖓᓐᓂᒃ.  ᑕᐃᒪᓐᓇ ᑲᑎᒪᓂᖃᖅᑎᓪᓗᒋᑦ, ᒪᓕᒐᓕᐅᖅᑏᑦ ᒪᓕᒐᓕᐅᖅᑎᐅᖃᑎᒥᖕᓂᒃ ᓂᕈᐊᒐᒃᓴᓐᖑᖅᑎᑦᑎᓲᖑᕗᑦ ᒥᓂᔅᑕᐃᑦ ᑲᑎᒪᔨᖏᓐᓄᑦ ᐃᓕᔪᒪᔭᕐᒥᓂᒃ.  ᐊᑐᓂ ᓂᕈᐊᒐᒃᓴᓐᖑᖅᑎᑕᐅᔪᑦ ᐱᕕᖃᖅᑎᑕᐅᔪᐃᓐᓇᐅᓲᖑᕗᑦ ᓂᓪᓕᕈᓐᓇᕐᓂᕐᒥᒃ.  ᐸᐃᑉᐹᑎᒍᑦ ᓂᕈᐊᖅᖢᑎᒃ ᓂᕈᐊᖅᖠᓲᖑᕗᑦ ᒥᓂᔅᑕᐃᑦ ᑲᑎᒪᔨᒃᓴᖏᓐᓂᒃ.

ᒪᓕᒐᓕᐅᕐᕕᐅᑉ ᑲᑎᒪᔨᕋᓛᖑᐃᓐᓇᖅᑐᖁᑎᖏᑦ ᑲᑎᒪᔨᕋᓛᖑᑲᐃᓐᓇᖅᑐᖁᑎᖏᓪᓗ ᓴᖅᑭᑕᐅᓯᒪᕗᑦ ᕿᒥᕐᕈᓇᒃᑎᐅᓂᐊᕐᒪᑕ ᐊᔾᔨᒌᓐᖏᑦᑐᓂᒃ ᕿᒥᕐᕈᐊᖅᑕᐅᔭᕆᐊᓕᖕᓂᒃ, ᐅᓄᓐᖏᓐᓂᖅᓴᐅᓪᓗᑎᒡᓗ ᑲᑎᒪᔾᔪᑎᖃᖃᑦᑕᕈᓐᓇᕐᓂᐊᕐᒪᑕ ᑭᓱᑐᐃᓐᓇᕐᓂᒃ ᐃᓗᓕᑯᓘᔭᖏᑦ ᓈᓗᒋᑦ.  ᑲᑎᒪᔨᕋᓛᑦ ᒪᓕᒐᖏᑦ ᓇᓖᕌᕐᕕᒃᓴᖃᐅᕐᓂᖅᓴᐅᕗᑦ ᒪᓕᒐᓕᐅᖅᑏᑦ ᑲᑎᒪᕐᔪᐊᕐᓂᖏᓐᓂᑦ, ᐊᒻᒪᓗ ᑲᑎᒪᔨᕋᓛᑦ ᓈᓚᒍᓐᓇᖅᖢᑎᒃ ᐅᓂᒃᑲᐅᔾᔭᐅᔪᓐᓇᖅᖢᑎᒡᓗ ᒥᓂᔅᑕᓄᑦ, ᐊᖓᔪᖅᑲᐅᑎᓄᑦ ᐊᒻᒪᓗ ᐊᓯᖏᓐᓄᑦ ᐱᖁᔭᒃᓴᓄᑦ ᐊᒃᑐᖅᑕᐅᓗᐊᓐᖑᐊᕐᓂᐊᖅᑐᓄᑦ.

ᑲᑎᒪᔨᕋᓛᖑᐃᓐᓇᖅᑐᑦ ᐱᖓᓱᐃᓕᖓᓪᓗᐊᑕᖅᑐᓂᒃ ᐱᔭᒃᓴᖅᑖᖅᑎᑕᐅᓯᒪᕗᑦ:  ᐱᖁᔭᕐᔪᐊᕐᓂᒃ ᕿᒥᕐᕈᓂᖅ, ᐊᑐᐊᒐᕐᓄᑦ ᑐᕌᖓᔪᓂᒃ ᕿᒥᕐᕈᓇᖕᓂᖅ, ᐊᒻᒪᓗ ᕿᒥᕐᕈᔨᐅᓪᓗᑎᒃ ᒐᕙᒪᒃᑯᑦ ᑮᓇᐅᔭᖅᑐᕈᑎᒋᔪᒪᔭᖏᓐᓂᒃ.  ᑲᑎᒪᔨᕋᓛᖑᐃᓐᓇᖅᑐᑦ ᒪᓕᒐᓕᐅᕐᕕᐅᑉ ᐱᔭᒃᓴᖏᓐᓂᒃ ᐱᓕᕆᐊᖃᐃᓐᓇᖃᑦᑕᖅᐳᑦ ᑕᐃᒪᓐᖓᓕᒫᖅ.

ᑲᑎᒪᔨᕋᓛᖑᑲᐃᓐᓇᖅᑐᑦ ᓴᖅᑭᑕᐅᔪᓐᓇᖅᐳᑦ ᐊᑕᐅᓯᕐᒥᒃ ᐱᔭᒃᓴᖅᑖᖅᑎᑕᐅᓯᒪᓂᐊᕐᓗᑎᒃ.  ᑲᑎᒪᔨᕋᓛᖑᑲᐃᓐᓇᖅᑐᑦ ᑐᓴᐅᒪᔾᔪᑎᓂᒃ ᓄᐊᑦᑎᓲᖑᕗᑦ ᐊᒻᒪᓗ ᑕᖅᑳᓐᖓᑦ ᖃᓄᖅ ᐃᓱᒪᒋᔭᖃᕐᒪᖔᖏᓐᓂᒃ ᑐᑭᓯᓇᓱᖃᑦᑕᖅᐳᑦ ᐊᑕᐅᓯᕐᒥᒃ ᐱᔾᔪᑎᖃᖅᑐᓂᒃ, ᐊᒻᒪᓗ ᐅᓂᒃᑲᐅᓯᕆᔭᕆᐊᖃᖅᖢᓂᔾᔪᒃ ᑐᑭᓯᔭᓂ ᒪᓕᒐᓕᐅᕐᕕᖕᒧᑦ, ᒪᓕᒐᓕᐅᕐᕕᖕᒧᐊᖅᑕᐅᖕᒪᑕᓗ ᑲᑎᒪᔾᔪᑕᐅᓕᖅᖢᑎᒃ ᐊᒻᒪᓗ ᐊᖏᖅᑕᐅᓪᓗᑎᒃ ᐅᕝᕙᓘᓐᓃᑦ ᐋᖅᑭᒋᐊᖅᑕᐅᓪᓗᑎᒃ ᐊᑐᓕᖁᔭᓕᐊᕕᓂᖏᑦ.

AttachmentSize
ᐱᓕᕆᐊᒃᓴᖏᑦ ᑲᑎᒪᔨᕋᓛᖑᐃᓐᓇᖅᑐᑦ ᐊᒻᒪ ᑲᑎᒪᔨᕋᓛᖑᑲᐃᓐᓇᖅᑐᑦ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ51.1 KB

ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑎ ᒪᕐᕈᐃᓕᖓᓗᒍ ᐅᖃᐅᓯᕆᔭᐅᔪᓐᓇᖅᑐᖅ.  ᓯᕗᓪᓕᖅ, ᒪᓕᒐᓕᐅᖅᑏᑦ ᓂᕈᐊᖅᑎᒥᖕᓂᒃ ᑭᒡᒐᖅᑐᐃᓪᓗᑎᒃ ᐅᖃᖅᑎᒋᔭᐅᖃᑦᑕᖅᐳᑦ ᒪᓕᒐᓕᐅᕐᕕᖕᒥ, ᐊᐃᑉᐸᖓ, ᒪᓕᒐᓕᐅᖅᑎ ᑭᒡᒐᖅᑐᐃᔨᒋᔭᐅᕗᖅ ᓂᕈᐊᖅᑕᐅᕝᕕᒋᓯᒪᔭᒥᓄᑦ, ᑭᓐᖒᒪᔭᖏᑦ ᓴᐳᒻᒥᐅᓯᖅᓯᒪᓪᓗᓂᒋᑦ.  ᒪᓕᒐᓕᐅᖅᑏᑦ ᐊᖅᑯᑎᒋᔭᐅᓪᓚᕆᒃᐳᑦ ᓂᕈᐊᖅᑎᒥᖕᓂᒃ ᑐᓴᐅᒪᑎᑦᑎᔨᐅᓪᓗᑎᒃ ᖃᓄᐃᓕᐅᓕᕋᓗᐊᕐᒪᖔᖏᑦ ᒐᕙᒪᒃᑯᑦ, ᐊᒻᒪᓗ ᐃᒡᓗᖔᖓᒍᑦ ᑕᑯᓇᕐᓗᒍ, ᑐᓴᐅᒪᑎᑕᐅᒋᓪᓗᑎᒃ ᓂᕈᐊᖅᑎᒥᒃᑕ ᑭᓐᖒᒪᔭᖏᓐᓂᒃ ᐊᒻᒪᓗ ᖃᓄᖅ ᒐᕙᒪᒃᑯᑦ ᐱᕙᓪᓕᐊᑎᑕᖏᓐᓂᒃ ᐃᓱᒪᒋᔭᐅᖕᒪᖔᖏᑦ.

ᒪᓕᒐᓕᐅᕐᕕᖕᒥ ᒪᓕᒐᓕᐅᖅᑏᑦ ᐱᖁᔭᒃᓴᓕᐅᕐᓂᕐᒥᒃ ᐃᓚᐅᓲᖑᕗᑦ ᑲᑎᒪᔾᔪᑕᐅᑎᓪᓗᒋᑦ ᒪᓕᒐᓕᐅᕐᕕᖕᒥ, ᓴᖅᑭᑦᑎᓂᒃᑯᑦ ᓇᖕᒥᓂᖅ ᐱᖁᔭᒃᓴᓕᐊᕆᔪᒪᔭᕐᒥᓂᒃ, ᐊᒻᒪᓗ ᑲᑎᒪᔨᕋᓛᒃᑰᖅᑎᑕᐅᑎᓪᓗᒋᑦ.  ᑲᑎᒪᔨᕋᓛᖑᑲᐃᓐᓇᖅᑐᑦ ᐊᒻᒪᓗ ᑲᑎᒪᔨᕋᓛᖑᐃᓐᓇᖅᑐᑦ ᐱᓕᕆᓂᖓᑦ ᐱᓕᕆᐊᒃᓴᖅᑖᕆᔭᐅᓯᒪᓪᓗᐊᖅᐳᖅ ᒪᓕᒐᓕᐅᖅᑏᑦ ᐱᔭᒃᓴᖏᓐᓂ.

AttachmentSize
ᐱᓕᕆᐊᒃᓴᖏᑦ ᑲᑎᒪᔨᐅᖃᑕᐅᔫᑉ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ58.05 KB
ᐱᓕᕆᐊᒃᓴᖏᑦ ᒪᓕᒐᓕᐅᖅᑎᓕᒫᖅ ᑲᑎᒪᔨᖏᑕ ᐊᒻᒪᓗ ᒪᓕᒐᓕᐅᖅᑎᑐᐃᓐᓇᐃᑦ ᑲᑎᒪᔨᖏᑕ68.25 KB

ᑲᑎᒪᔾᔪᑎᒃᓴᑦ ᒪᓕᒐᓕᐅᖅᑏᑦ ᑲᑎᒪᕐᔪᐊᖅᑎᓪᓗᒋᑦ ᐊᑐᖅᑕᐅᓲᖑᕗᑦ, ᑲᑎᒪᕐᔪᐊᕐᓂᑕᒫᖅ ᖃᐅᑕᒫᖅ ᑎᑎᕋᖅᑎᐅᑉ ᑎᑎᕋᕐᕕᖓᓐᓄᑦ ᑲᑎᒪᔾᔪᑎᒃᓴᑦ ᐋᖅᑭᒃᓱᖅᑕᐅᖃᑦᑕᖅᑐᑦ, ᑲᑎᒪᕐᔪᐊᖅᑎᓪᓗᒋᓪᓗ ᑲᑎᒪᔾᔪᑕᐅᕙᓪᓕᐊᔪᑦ ᖃᓄᐃᑉᐸᓪᓕᐊᓂᖏᑦ ᓇᓗᓇᐃᖅᑕᐅᓯᒪᖃᑦᑕᕆᓪᓗᑎᒃ.  ᑕᕝᕗᖓ ᐅᓪᓗᕐᒥ ᑲᑎᒪᔾᔪᑕᐅᓂᐊᖅᑐᑦ ᒪᓕᒃᑕᐅᓂᐊᕐᓂᖏᑦ ᑐᖏᓕᕇᒃᓱᖅᑎᑕᐅᓯᒪᓪᓗᑎᒃ ᑎᑎᕋᖅᑕᐅᓯᒪᖃᑦᑕᖅᐳᑦ.  ᐆᒃᑑᑎᒋᓗᒍ, ᑲᑎᒪᕐᔪᐊᕐᓂᖅ ᐱᒋᐊᕈᑎᖃᒡᒍᔪᖅ ᑐᒃᓯᐊᕐᓂᕐᒥᒃ, ᐅᖃᐅᓯᒃᓴᑦ ᒪᑐᐃᖅᓯᔾᔪᑏᑦ, ᒥᓂᔅᑕᐃᑦ ᐊᒻᒪᓗ ᒪᓕᒐᓕᐅᖅᑏᑦ ᐅᖃᐅᓯᖏᑦ, ᐅᖃᐅᓯᒃᑯᑦ ᑎᑎᕋᖅᓯᒪᔪᒃᑯᓪᓗ ᐊᐱᖅᑯᑏᑦ, ᐅᓂᒃᑲᐅᓯᖃᕐᓂᖅ ᕿᒥᕐᕈᓂᕐᓗ ᐱᖁᔭᒃᓴᓂᒃ, ᐱᖁᔨᕗᖔᕈᑏᑦ ᐊᒻᒪᓗ ᐊᓯᖏᑦ.

ᓄᓇᕗᑦ ᒪᓕᒐᓕᐅᖅᑎᖏᑦ ᑲᑎᒪᕐᔪᐊᖅᑎᓪᓗᒋᑦ ᑲᑎᒪᔾᔪᑎᕕᓃᑦ ᑎᑎᕋᖅᑕᐅᕙᓪᓕᐊᓲᖑᕗᑦ, ᑖᓐᓇᓗ ᐊᑐᖅᑕᐅᓪᓗᐊᑕᖃᑦᑕᖅᖢᓂ.  ᒪᓕᒐᓕᐅᖅᑏᑦ ᑲᑎᒪᔾᔪᑎᒋᕙᓪᓕᐊᔭᖏᑦ ᑎᑎᕋᖅᑕᐅᖃᑦᑕᖅᑐᑦ ᐱᔭᕇᕐᓂᑕᒫᖏᓐᓂ ᖃᐅᑕᒫᖅ.  ᑎᑎᕋᖅᑕᐅᓯᒪᖃᑦᑕᖅᑐᑦ ᖃᓪᓗᓈᑎᑐᑦ ᐊᒻᒪᓗ ᐃᓄᒃᑎᑐᑦ.

ᐃᓐᓂᕐᕕᒃᑯᑦ ᐃᖃᓗᖕᓃᑦᑐᑦ ᖁᓕᓄᑦ ᑎᑭᑦᑐᒋᑦ ᐃᖅᑲᓇᐃᔭᖅᑎᑦᑎᖃᑦᑕᖅᑐᑦ ᑲᑎᒪᔾᔪᑎᕕᓂᕐᓂᒃ ᑎᙱᕋᖅᐸᓪᓕᐊᔨᐅᔪᓂᒃ.  ᓄᓇᕗᑦ, ᐊᒻᒪᓗ ᓂᐅᐳᕋᓐᓱᕕᒃ ᐊᒻᒪᓗ ᑲᓇᑕᒥ ᒪᓕᒐᓕᐅᕐᕕᒡᔪᐊᖓᓂ ᐋᑐᕚ, ᑲᓇᑕᒥ ᐱᖓᓱᐃᓐᓇᐅᓪᓗᑎᒃ ᑖᒃᑯᐊ ᒪᕐᕈᐃᖕᓂᒃ ᐅᖃᐅᓰᖕᓂᒃ ᐊᑐᖅᖢᑎᒃ ᑲᑎᒪᔾᔪᑎᕕᓂᕐᓂᒃ ᑎᑎᕋᖅᑕᐅᑎᑦᑎᓲᑦ.

AttachmentSize
ᐱᓕᕆᐊᒃᓴᑦ ᐊᒃᑐᐊᓂᖃᖅᑐᑦ ᑲᑎᒪᕐᔪᐊᖅᑎᓪᓗᒋᑦ ᑲᑎᒪᔾᔪᑎᕕᓂᕐᓄᑦ65.63 KB

ᖃᖓᑐᐃᓐᓇᓕᒫᖅ ᐊᐅᔭᐅᒐᓗᐊᖅᐸᑦ ᐅᑭᐅᖑᒐᓗᐊᖅᐸᓪᓘᓐᓃᑦ ᐊᑭᖃᓐᖏᓪᓗᒍ ᒪᓕᒐᓕᐅᕐᕕᒃ ᕿᒥᕐᕈᐊᖅᑕᐅᔭᖅᑐᕈᓐᓇᖅᑐᖅ ᐅᖄᓚᖅᑳᖅᓯᒪᓗᓂ.  ᑐᑭᓯᒋᐊᒃᑲᓐᓂᕈᒪᒍᕕᑦ ᐅᖄᓚᕕᒋᔪᓐᓇᖅᑕᐃᑦ 975-5000.

ᑭᒃᑯᑐᐃᓐᓇᑦ ᖃᖓᑐᐃᓐᓇᖅ ᐃᓯᕈᓐᓇᖅᑐᑦ.  ᒪᓕᒐᓕᐅᕐᕕᒃ ᐃᖃᓗᐃᑦ ᕿᑎᐊᓃᑦᑐᖅ, ᐃᒡᓗᖓᑕ ᓇᓴᐅᑖ 926.

ᑭᒃᑯᑐᐃᓐᓇᑦ ᖃᖓᑐᐃᓐᓇᖅ ᒪᓕᒐᓕᐅᖅᑏᑦ ᑲᑎᒪᕐᔪᐊᖅᑎᓪᓗᒋᑦ ᑕᑯᓐᓇᕆᐊᕈᓐᓇᖅᑐᑦ ᑲᑎᒪᕐᔪᐊᕐᕕᖕᒧᑦ.  ᑐᑭᓯᒋᐊᕐᕕᒋᓂᐊᖅᐸᐃᑦ ᐱᕙᓪᓕᐊᔪᓕᕆᔨ ᐅᖄᓚᕕᒋᓗᒍ (867) 975-5000-ᒧᑦ ᐅᕝᕙᓘᓐᓃᑦ ᖃᕆᓴᐅᔭᒃᑯᑦ ᑐᑭᓯᒋᐊᕐᕕᒋᓗᒍ ᐅᕗᖓ leginfor [at] assembly [dot] nu [dot] ca, ᑐᑭᓯᑎᑕᐅᓂᐊᕋᕕᑦ ᖃᖓ ᑲᑎᒪᕐᔪᐊᒃᑲᓐᓂᕐᓂᐊᕐᒪᖔᖏᑦ.

ᒪᓕᒐᓕᐅᖅᑎᑦ ᑐᕌᕈᑎᖏᑦ ᐅᖄᓚᐅᑎᖏᓪᓗ (ᓂᕈᐊᖅᑕᐅᓯᒪᕝᕕᒋᔭᖏᓐᓃᑦᑐᑦ ᐊᒻᒪᓗ ᑎᑎᕋᕐᕕᖓᓂ), ᓱᒃᑲᔪᒃᑰᕈᑎᖏᑦ, ᖃᕆᓴᐅᔭᒃᑯᑦ ᑐᕌᕈᑎᖏᑦ ᐊᒻᒪᓗ ᑭᒃᑰᖕᒪᖔᖏᓐᓂᒃ ᓇᓗᓇᐃᔭᐃᓯᒪᔪᑦ ᑕᑯᒋᐊᕈᓐᓇᖅᑕᑎᑦ, ᐊᑕᖏᖅᖢᑎᒃ ᓇᓗᓇᐃᔭᖅᑕᐅᓯᒪᖕᒪᑕ.

AttachmentSize
ᐱᓕᕆᐊᒃᓴᖏᑦ ᓂᕈᐊᖅᑕᐅᒪᕕᖕᒥ ᑎᑎᕋᖅᑎᐅᑉ41.42 KB