ᒪᓕᒐᓕᐅᕐᕕᖕᒥ ᐊᑐᓕᖁᔨᕗᖔᖅᐳᑦ ᑎᒃᑯᐊᖅᑕᐅᓂᖓᓂᒃ ᓱᓕᔪᕐᓇᕆᐊᖃᕐᓂᕐᒧᑦ ᑲᒥᓯᓇᒥᒃ ᓄᓇᕗᒻᒧᑦ

Oct 23 2018 3:53 pm

ᐃᖃᓗᐃᑦ, ᓄᓇᕗᑦ (ᐅᑐᐱᕆ 23, 2018) - ᐅᓪᓗᒥ ᒪᓕᒐᓕᐅᕐᕕᒃᒥ ᐊᖏᖅᑕᐅᖃᐅᕗᖅ ᐱᖁᔨᕗᖔᕈᑦ ᐊᑐᓕᖁᔨᕗᖔᕈᑕᐅᔪᖅ ᑖᓐᓇ ᒥᔅ ᑳᑐᕆᓐ ᐲᑐᓴᓐ, ᑯᐃᓐ ᒪᓕᒐᕐᓂᐊᖅᑎᖓ, ᑎᒃᑯᐊᖅᑕᐅᖁᓪᓗᒍ ᓄᓇᕗᒻᒧᑦ ᓱᓕᔪᕐᓇᕆᐊᖃᕐᓂᕐᒧᑦ ᑲᒥᓯᓇᒧᑦ. ᑖᓐᓇ ᐱᖁᔨᕗᖔᕈᑦ ᐊᑕᖏᕐᖢᑎᒃ ᐊᑐᓕᖅᑎᑕᐅᖅᑲᐅᕗᖅ ᒪᓕᒐᓕᐅᕐᕕᖕᒥ.

ᓄᓇᕗᒻᒥ ᓱᓕᔪᕐᓇᕆᐊᖃᕐᓂᕐᒧᑦ ᐱᖁᔭᖅ ᐱᔭᕆᐊᖃᖅᑎᑦᑎᖕᒪᑦ ᑖᓐᓇ ᓱᓕᔪᕐᓇᕆᐊᖃᕐᓂᕐᒧᑦ ᑲᒥᓯᓇ ᐃᓕᓯᒪᓂᐊᖅᐳᖅ ᐅᑭᐅᓄᑦ ᑕᓪᓕᒪᓄᑦ (5). ᒥᔅ ᐲᑐᓴᓐ ᑎᒃᑯᐊᖅᑕᐅᓯᒪᓂᖓ ᐊᑐᓕᖅᐳᖅ ᒫᓐᓇᑲᐅᑎᒋᒃ.

ᔫᓂᐅᑎᓪᓗᒍ ᑕᒫᓂ ᐊᕐᕌᒍᒥ, ᑲᑎᒪᔨᓕᕆᓂᕐᒧᑦ ᑲᑎᒪᔩᑦ ᑕᕝᕙᖖᒐᑦ ᒪᓕᒐᓕᐅᕐᕕᖕᒥᑦ ᑭᒃᑯᓕᒫᓂᒃ ᑐᖖᒐᓱᒃᑎᑦᑎᓚᐅᖅᐳᑦ ᐱᔪᒪᔾᔪᑎᓂᒃ ᓱᓕᔪᕐᓇᕆᐊᖃᕐᓂᕐᒧᑦ ᑲᒥᓯᓇᐅᑉ ᐃᓂᖓᓄᑦ.

ᐅᖃᖅᑎ ᒪᓕᒐᓕᐅᕐᕕᖕᒧᑦ ᔫᓯᐱ ᐃᓄᒃ ᐅᖃᓚᐅᖅᐳᖅ, “ᒥᔅ ᐲᑐᓴᓐ ᐊᑯᓂᐅᓕᖅᑐᖅ ᐃᒃᐱᒋᔭᐅᑦᑎᐊᖅᖢᓂᓗ ᐃᓚᒋᔭᐅᕗᖅ ᐅᑭᐅᖅᑕᕐᑐᒥ ᒪᓕᒐᓂᐊᕐᑎᐅᖃᑎᒌᒃᑐᓂ ᐊᕐᕌᒍᐃᑦ 40-ᐅᓕᖅᑐᑦ ᐱᓕᕆᒋᐊᓚᐅᖅᓯᒪᓂᖓᓂᑦ. ᐊᑐᖅᓯᒪᔭᖏᑦ ᐅᓄᖅᑑᓪᓗᑎᒃ ᐊᔾᔨᒌᖏᑦᑐᒻᒪᕆᖕᓂ ᐱᓕᕆᖃᑦᑕᕐᓂᕐᓂ ᐊᑑᑎᖃᕆᑦᑎᐊᕐᓂᕐᐊᖅᐹ ᑕᕝᕙᓂ ᐱᒻᒪᕆᐅᓪᓗᓂ ᐃᓂᐅᔪᒥ.”

ᐅᖃᖅᑎ ᐃᓄᒃ ᐅᖃᕆᐊᒃᑲᓐᓂᓚᐅᖅᐳᖅ, “ᐅᖃᕈᑎᓪᓗᒋᑦ ᒪᓕᒐᓕᐅᖅᑎᐅᖃᑎᒃᑲ, ᐅᖃᐅᓯᕆᔪᒪᖕᒥᔭᕋ ᖁᔭᓕᓯᒪᓂᖅᐳᑦ ᑎᐊᑦ ᕆᓵᑦ ᐱᔨᑦᑎᕋᑦᑎᐊᖅᑐᒻᒪᕆᐅᓚᐅᕐᓂᖓᓄᑦ ᓱᓕᔪᕐᓇᕆᐊᖃᕐᓂᕐᒧᑦ ᑲᒥᓯᓇᐅᓪᓗᓂ ᐊᕐᕌᒍᓂ ᑕᔾᓕᓚᐅᕋᑖᖅᑐᓂ ᐊᒻᒪᓗ ᓄᖅᑲᖓᓕᕐᓂᕐᒥᓂ ᖃᓄᐃᖏᑦᑎᐊᖁᕙᕗᑦ.”

ᐃᓅᓯᖓᑕ ᒥᒃᓵᓅᖓᔪᖅ ᐱᖃᓯᐅᑎᓯᒪᕗᖅ.

-30-

ᖃᐅᔨᒋᐊᒃᑲᓐᓂᕈᒪᒍᕕᑦ:
ᔮᓐ ᑯᐊᒃ, ᑎᑎᕋᖅᑎ ᒪᓕᒐᓕᐅᕐᕕᒃᒧᑦ
ᐅᖄᓚᐅᑖ: (867) 975-5000

----------------------------------------

ᐃᓅᓯᖓᑕ ᒥᒃᓵᓄᑦ

ᑳᑐᕆᓐ ᐲᑐᓴᓐ, ᑯᐃᓐ ᒪᓕᒐᕐᓂᐊᖅᑎᖓ.

ᒥᔅ ᑳᑐᕆᓐ ᐲᑐᓴᓐ ᐃᓯᖅᑎᑕᐅᓚᐅᖅᐳᖅ ᓄᓇᑦᑎᐊᕐᒥ ᒪᓕᒐᕐᓂᐊᖅᑏᑦ ᑎᒥᖓᓐᓄᑦ 1978-ᖑᑎᓪᓗᒍ, ᐊᒻᒪᓗ ᓄᓇᕗᒻᒥ ᒪᓕᒐᕐᓂᐊᖅᑏᑦ ᑎᒥᖓᓐᓄᑦ 1999-ᒥ. ᒥᔅ ᐲᑐᓴᓐ ᐃᓕᔭᐅᓯᒪᖃᑦᑕᖅᓯᒪᕗᖅ ᐅᓄᖅᑐᓂᒃ ᑎᒃᑯᐊᖅᑕᐅᓯᒪᓪᓗᓂ ᐊᒻᒪ ᐃᓂᖃᐅᖅᐸᒃᖢᓂ ᐃᖅᑲᓇᐃᔭᕐᓂᕐᒥᓂ, ᐱᖃᓯᐅᑎᓪᓗᒋᑦ:

  • ᒪᓕᒐᓕᕆᓂᕐᒧᑦ ᑎᑎᕋᖅᑎ ᒪᓕᒐᓕᐅᖅᑎᓄᓪᓗ ᒪᓕᒐᕐᓂᐊᖅᑎ ᓄᓇᑦᑎᐊᕐᒥ ᒪᓕᒐᓕᐅᕐᕕᖓᓄᑦ;
  • ᐊᖓᔪᖅᑳᖅ ᓄᓇᑦᑎᐊᕐᒥ ᒪᓕᒐᕐᓂᐊᖅᑏᑦ ᑎᒥᖓᓐᓄᑦ;
  • ᓇᖕᒥᓂᖃᖃᑕᐅᓪᓗᓂ ᐲᑐᓴᓐ, ᔅᑕᐃᖕ ᐊᒻᒪᓗ ᒪᓚᑰ ᒪᓕᒐᕐᓂᐊᖅᑎᖏᓐᓄᑦ;
  • ᐃᒃᓯᕙᐅᑕᖅ ᐃᓚᔮᕇᒃᑐᓄᑦ ᒪᓕᒐᕐᓂᐊᕐᓂᕐᒧᑦ ᐊᕕᒃᓯᒪᓂᖏᓐᓂ ᔭᓗᓇᐃᒥ ᑎᑎᕋᕐᕕᖓᓐᓂ ᑲᓇᑕᒥ ᒪᓕᒐᕐᓂᐊᖅᑏᑦ ᑲᑐᔾᔨᖃᑎᒌᖏᑦᑕ;
  • ᐅᖃᐅᔾᔨᒋᐊᖅᑎ ᐊᔾᔨᐅᖏᑦᑐᒃᑯᑦ ᒪᓕᒐᓕᕆᓂᕐᒧᑦ ᒥᓂᔅᑕᒧᑦ ᒪᑐᒧᖓ ᐊᖑᑏᑦ ᐊᕐᓇᐃᓪᓗ ᐊᔾᔨᒌᒃᑎᑕᐅᔭᕆᐊᖃᕐᓂᖏᓐᓄᑦ ᐱᖁᔭᕐᓂᒃ ᒪᓕᒃᑎᑕᐅᓂᒃᑯᑦ;
  • ᖃᐅᔨᓇᓱᒃᑎᐅᓪᓗᓂ ᐊᑐᓪᓚᑦᑖᖅᑐᕕᓂᕐᓂᒡᓗ ᕿᓂᖅᑎᐅᓪᓗᓂ ᐃᒡᓗᓕᒑᕐᔪᒃᒧᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᑐᕕᓃᑦ ᖃᐅᔨᓴᖅᑕᐅᑎᓪᓗᒋᑦ; ᐊᒻᒪᓗ
  • ᓯᓚᑖᓂᑦ ᕿᒥᕐᕈᔨᐅᓪᓗᓂ ᑕᐃᔅᓱᒧᖓ ᓄᓇᕗᑦ ᒐᕙᒪᖏᑦᑕ ᐱᓕᕆᐊᖃᕐᓂᖏᓐᓄᑦ ᓄᑕᕈᑯᓗᒃ ᒪᑭᕝᕕ ᐃᓅᔪᓐᓃᓚᐅᖅᑎᓪᓗᒍ ᑭᖖᒐᕐᓂ.

ᒦᔅ ᐲᑐᓴᓐ ᑎᒃᑯᐊᖅᑕᐅᓚᐅᖅᐳᖅ ᑯᐃᓐ ᒪᓕᒐᕐᓂᐊᖅᑎᖏᓐᓄᑦ 1989-ᒥ ᐊᒻᒪᓗ ᑐᓂᔭᐅᓚᐅᕐᖢᓂ ᑯᐃᑦ ᐃᓕᓴᐱ II ᐊᕐᕌᒍᑦ 25-ᓄᑦ ᑯᐃᖑᓕᕐᓂᖓᓄᑦ ᓂᕕᖓᑖᕐᒥᒃ 2002-ᖑᑎᓪᓗᒍ.

AttachmentSize
ᒪᓕᒐᓕᐅᕐᕕᖕᒥ ᐊᑐᓕᖁᔨᕗᖔᖅᐳᑦ ᑎᒃᑯᐊᖅᑕᐅᓂᖓᓂᒃ ᓱᓕᔪᕐᓇᕆᐊᖃᕐᓂᕐᒧᑦ ᑲᒥᓯᓇᒥᒃ ᓄᓇᕗᒻᒧᑦ143.86 KB