ᑐᓐᖓᓱᑦᑎᑎᔾᔪᑎ ᐃᖅᑲᓇᐃᔮᒥᒃ ᐱᒐᓱᐊᕈᒪᔪᓄᑦ - ᓂᕈᐊᖅᑐᓕᕆᔨᒻᒪᕆᒃ ᓄᓇᕗᒻᒥ ᐃᖅᑲᓇᐃᔮᒃᓴᐅᔪᒥᒃ ᓂᕈᐊᖅᑐᓕᕆᔨᒻᒪᕆᐅᑉ ᐃᓂᖓᓂᑦ ᓄᓇᕗᒻᒥ

Legislative Assembly of Nunavut Coat of Arms
ᐱᒐᓱᐊᕈᒪᔪᑦ ᑐᓐᖓᓱᑦᑎᑕᐅᕗᑦ ᐃᖅᑲᓇᐃᔮᒃᓴᐅᔪᒥᒃ ᓂᕈᐊᖅᑐᓕᕆᔨᒻᒪᕆᐅᑉ ᐃᓂᖓᓂᑦ ᓄᓇᕗᒻᒥ. ᑖᓐᓇ 7-ᓄᑦ ᐊᕐᕌᒍᓄᑦ, ᑖᓐᓇ ᖃᐅᑕᒫᑦ ᐃᖅᑲᓇᐃᔮᖑᓪᓗᓂ ᒪᓕᒐᖅᑎᒍᑦ ᑎᒃᑯᐊᖅᑕᐅᓯᒪᒋᐊᖑᔪᖅ.

ᓂᕈᐊᖅᑐᓕᕆᔨᒻᒪᕆᒃ ᐃᒻᒥᒃᑰᖓᓪᓗᓂ ᐱᓕᕆᔨᐅᔪᖅ ᒪᓕᒐᓕᐅᖅᕕᒻᒥ. ᑖᒃᓱᒥᖓ ᐊᓪᓚᕕᒻᒥᑦ−ᑎᒍᒥᐊᖅᑐᖅ ᑎᒃᑯᐊᖅᑕᐅᓲᖑᔪᖅ ᒪᓕᑦᑐᑎᒃ ᐊᑐᓕᖁᔭᓕᐊᖑᓯᒪᔪᒥᒃ ᒪᓕᒐᓕᐅᖅᕕᒻᒥ, ᐊᑐᐊᖅᑐᒍ ᑕᑯᔪᓐᓇᕈᑎᓕᕆᓂᕐᒧᑦ ᑐᑭᓯᐅᒪᔾᔪᑎᓂᑦ ᓴᐳᒻᒥᔭᐅᓂᖏᓐᓄᓪᓗ ᑲᓐᖑᓇᖅᑐᑦ ᐱᖁᔭᕐᔪᐊᖓᓂᑦ. ᑖᓐᓇ ᐃᖅᑲᓇᐃᔮᖅ ᑎᒍᒥᐊᖅᑐᖅ ᐊᒥᓱᑲᓪᓚᓐᓂᒃ ᓴᓐᖏᓂᐅᔪᓂᒃ ᐱᓕᕆᐊᖃᕆᐊᖃᕐᓂᐅᔪᓂᓪᓗ ᐊᑖᓃᑦᑐᓂᒃ ᓄᓇᕗᒻᒥ ᓂᕈᐊᖅᑐᓕᕆᓂᕐᒧᑦ ᐱᖁᔭᕐᔪᐊᖓᑕ ᐊᒻᒪᓗ ᐊᐱᖅᑯᑎᓄᑦ ᓂᕈᐊᖅᑎᑦᑎᓃᑦ ᐱᖁᔭᕐᔪᐊᖓᑕ. ᑖᒃᓱᒪ ᐱᖁᔭᕐᔪᐊᑉ ᐊᔾᔨᖏᑦ ᐅᖃᓕᒫᖅᑕᐅᔪᓐᓇᖅᑐᑦ ᖃᕋᓴᐅᔭᒃᑯᑦ ᐅᕙᓂ: www.nunavutlegislation.ca. ᑖᓐᓇ ᓂᕈᐊᖅᑐᓕᕆᔨᒻᒪᕆᒃ ᑲᒪᐅᔪᖅ ᐊᐅᓚᑕᐅᓂᖏᓐᓂᑦ ᓄᓇᕗᓕᒫᒥ ᓂᕈᐊᕕᔾᔪᐊᖅᑐᓂᒃ ᐊᒻᒪᓗ ᓂᕈᐊᕕᔾᔪᐊᕐᓇᐅᑉ ᐊᑯᓐᓂᖓᒍᑦ ᓂᕈᐊᖅᑐᓂᑦ, ᐊᒻᒪᓗᑦᑕᐅᖅ ᓂᕈᐊᖅᓂᖏᓐᓂᑦ ᓄᓇᓖᑦ ᒐᕙᒪᕋᓛᖏᑕ ᑲᑎᒪᔨᖏᓐᓂᑦ ᐊᒻᒪᓗ ᐊᓯᖏᓐᓂᑦ ᑎᒥᐅᔪᓂᑦ. ᑭᖑᓪᓕᕐᒥ ᓄᓇᕗᓕᒫᒥ ᓂᕈᐊᕕᔾᔪᐊᕐᓂᐅᓛᖅᑐᖅ ᐋᖅᑦᑕᐅᓯᒪᔪᖅ ᐊᑐᖅᑕᐅᓛᕐᓗᓂ ᐅᑐᐱᕆ 27, 2025−ᒥ.

ᑕᐃᓐᓇ ᐃᖅᑲᓇᐃᔮᒃᓴᒧᑦ ᓂᕈᐊᖅᑕᐅᔪᖅ ᐃᒪᓐᓇᐃᑦᑑᔭᕆᐊᓕᒃ ᐱᓕᕆᓚᐅᖅᓯᒪᓗᓂ ᑯᑦᑎᓂᖅᓴᒥ ᐃᓂᖃᖅᑐᓂ ᐊᐅᓚᑦᑎᔨᐅᓯᒪᓗᓂ ᐊᒻᒪᓗ ᐅᑉᐱᓇᕈᑎᖃᖅᑐᓂᒃ ᐊᐅᓚᑦᑎᑎᐊᖅᓯᒪᓂᖃᕐᓗᓂ ᐱᔭᕆᐊᑐᔪᓂᒃ ᐊᓪᓚᕕᓐᓂ ᐊᐅᓚᑦᑎᓂᐅᔪᓂᒃ. ᖃᐅᔨᒪᓂᖃᕆᐊᖃᓪᓚᕆᑦᑐᖅ ᓂᕈᐊᖅᑐᓕᕆᓂᐅᑉ ᐊᐅᓚᑕᐅᓂᖏᓐᓂᑦ ᒪᓕᒐᖏᓐᓂᓪᓗ. ᑖᓐᓇ ᐃᖅᓇᐃᔮᖅ ᑭᓱᑐᐃᓐᓇᐃᑦ ᐃᓗᓕᖏᓐᓂᑦ ᕿᒥᕐᕈᑦᑎᐊᕈᓐᓇᕆᐊᓕᒃ, ᐱᖃᓯᐅᑎᓗᒍ ᑐᑭᓯᔪᓐᓇᕐᓂᖅ, ᐊᓪᓚᕕᒻᒥ ᐊᐅᓚᑦᑎᔪᓐᓇᕐᓂᖅ ᐊᒻᒪᓗ ᐅᓂᒃᑳᖃᕈᓐᓇᕐᓗᓕ ᑐᑭᓯᔭᕐᓂᖏᑦᑐᓂᒃ ᐱᖁᔭᕐᓂᒃ ᐊᒻᒪᓗ ᒪᓕᒐᕐᓂᑦ. ᑖᓐᓇ ᓂᕈᐊᖅᑕᐅᔪᓐᓇᕋᔭᖅᑐᖅ ᐊᔪᓐᖏᑉᐸᑦ ᑐᑭᓯᐅᒪᔭᐅᑦᑎᐊᕈᓐᓇᕐᓗᓂ ᑕᐃᒫᒃᓴᐃᓇᕐᓗ ᐊᔾᔨᒌᒥᒃ ᑐᑭᓯᐊᔭᐅᓗᓂ ᑭᒃᑯᑐᐃᓐᓇᕐᓄᑦ, ᐊᐅᓚᑦᑎᔨᐅᖃᑕᐅᔪᓄᑦ ᑎᒥᐅᔪᓄᑦ ᐊᒻᒪᓗ ᑐᓴᕋᒃᓴᓕᕆᔨᓄᑦ ᐱᕙᓪᓕᐊᔪᓕᕆᔨᓄᑦ. ᑎᑎᕋᕈᓐᓇᑎᐊᓪᓚᕆᓐᓂᖅ, ᐊᒻᒪᓗ ᐃᓗᓕᖅᑐᔪᓂᒃ ᐊᕐᕌᒍᑕᒫᖅᓯᐅᑎᓂᑦ ᐅᓂᒃᑳᓂᒃ ᓴᓇᖃᑦᑕᕈᓐᓇᕐᓂᖅ ᒪᓕᒐᓕᐅᖅᕕᒻᒧᑦ, ᐊᔪᕆᐊᖃᓐᖏᓚᐃᑦ. ᑐᑭᓯᐅᒪᓂᖃᕐᓂᖅ ᐃᓄᐃᑦ ᐃᓅᖃᑎᒌᓐᓂᕐᒥ ᐅᑉᐱᕆᔭᖏᓐᓂᑦ, ᐅᖃᐅᓯᖏᓐᓂᑦ ᐊᒻᒪᓗ ᐃᓕᖅᑯᓯᖏᓐᓂᑦ ᐃᑲᔪᕐᓂᖃᓪᓚᕆᒃᑲᔭᖅᑐᖅ ᐱᒐᓱᐊᕈᑎᖓᓄᑦ.

ᐊᓪᓚᕝᕕᖓ ᓂᕈᐊᖅᑐᓕᕆᔨᒻᒪᕆᖓᑕ ᓄᓇᕘᑉ (ᓂᕈᐊᖅᑐᓕᕆᔨᒃᑯᑦ ᓄᓇᕗᒻᒥ) ᐊᓪᓚᒃᕕᖃᖅᑐᑦ ᑲᖏᖅᖠᓂᕐᒥ ᓄᓇᕗᒻᒥ. ᓇᓗᓇᐃᖅᑐᑎᐊᖅᓯᒪᔪᖅ ᐃᖅᑲᓇᐃᔮᒧᑦ ᓇᓗᓇᐃᖅᑐᕈᑎᑦ ᐊᑐᐃᓐᓇᐅᔪᖅ ᒪᓕᒐᓕᐅᖅᕕᐅᑉ ᐊᓪᓚᕝᕕᖓᓂ ᐊᒻᒪᓗ ᐲᖅᑕᐅᔪᓐᓇᕆᓪᓗᓂ ᒪᓕᒐᓕᐅᖅᕕᐅᑉ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓂ ᐅᕙᓐᖓᑦ: www.assembly.nu.ca ᐊᕐᕌᒍᑕᒫᖅᓯᐅᑏᑦ ᐅᓂᒃᑳᓕᐊᒥᓃᑦ ᐊᒻᒪᓗ ᐊᓯᖏᑦ ᓂᕈᐊᖅᑐᓕᕆᔨᒻᒪᕆᐅᑉ ᓴᖅᑭᖅᓯᒪᔭᖏᑦ ᐅᖃᓕᒫᒐᒃᓴᐃᑦ ᐊᑐᐃᓐᓇᐅᒻᒥᔪᑦ ᐅᕙᓂ: https://www.elections.nu.ca/

ᐃᖅᑲᓇᐃᔮᒥᑦ ᐱᓇᓱᐊᖅᑐᑦ ᓇᓗᓇᐃᖅᑐᐃᑦᑎᐊᕆᐊᓖᑦ ᖃᓄᖅ ᐱᔪᓐᓇᕐᓂᖃᕐᒪᖔᕐᒥᓂᒃ ᐃᖅᑲᓇᐃᔮᒥ ᐊᔪᓐᖏᓐᓂᐅᔭᕆᐊᓕᓐᓂᒃ ᓇᓗᓇᐃᖅᑐᖅᑕᐅᓯᒪᔪᓂᑦ ᐃᖅᑲᓇᐃᔮᒧᑦ ᓇᓗᓇᐃᖅᑐᕈᑎᒥ. ᓄᓇᕗᒻᒥ ᓄᓇᖃᖅᑐᑦᑐᐊᑦ ᑖᒃᓱᒧᖓ ᓂᕈᐊᖅᑕᐅᒐᓱᐊᕈᓐᓇᖅᑐᑦ. ᑮᓇᐅᔾᔭᒃᓵᖏᑦ ᑕᒫᓃᑦᑐᑦ $140,187.00−ᒥᑦ ᑕᑉᐸᐅᖓ $200,268.00−ᒧᑦ ᐊᕐᕌᒍᑕᒫᖅ. ᑕᐃᓐᓇ ᓂᕈᐊᖅᑕᐅᔪᖅ ᑲᖏᖅᖠᓂᕐᒥ ᓄᓇᖃᓐᖏᑉᐸᑦ ᐅᓪᓗᕐᒥ ᐃᖅᑲᓇᐃᔮᒧᑦ ᑎᒃᑯᐊᖅᑕᐅᕕᖓᓂ, ᐊᐅᓪᓛᕈᑎᖏᓐᓄᑦ ᐃᑲᔪᖅᑕᐅᒐᔭᖅᑐᖅ. ᐃᑲᔫᓯᐊᖅᑕᖅᖅᑐᒥᒃ ᐃᖅᑲᓇᐃᔭᖅᑎᓄᑦ ᑐᕌᖓᔪᒥᒃ
ᐃᓪᓗᖃᖅᑎᑕᐅᒐᔭᖅᑐᖅ. ᐃᖅᑲᓇᐃᔮᒥᑦ ᐱᒐᓱᐊᕈᑏᑦ ᐱᔭᐅᖃᑦᑕᓂᐊᖅᑐᑦ ᐃᓱᖃᕐᓗᒍ 5:00 ᐅᓐᓄᓴᒃᑯᑦ (ᑲᓇᓐᓇᒥ) ᐊᐃᑉᐱᖅ, ᔮᓐᓄᐊᕆ 31, 2023. ᖃᐅᔨᒪᓂᐊᖅᑯᓯ ᑕᐃᒃᑯᐊᑐᐊᖅ ᐱᒐᓱᐊᖅᓯᒪᔪᑦ ᓂᕈᐊᖅᑕᐅᓯᒪᔪᑦ ᐊᐱᖅᓱᖅᑕᐅᔪᒪᓪᓗᑎᒃ ᖃᐅᔨᒃᑲᖅᑕᐅᒐᔭᕐᒪᑕ. ᐃᖅᑲᓇᐃᒥᒃ ᐱᒐᓱᐊᕈᑏᑦ ᑕᑕᑎᕆᐊᓖᑦ ᐊᒻᒪᓗ ᑐᑭᓯᒋᐊᕐᓂᐅᔪᑦ ᑐᕌᖅᑎᑕᐅᔭᕆᐊᓖᑦ ᐅᕗᖓ:

ᑎᑎᕋᖅᑎᖓ ᑲᑎᒪᔨᓕᕆᔩᑦ ᑲᑎᒪᔨᖏᓐᓄᑦ
ᐊᓪᓚᕝᕕᖓ ᒪᓕᒐᓕᐅᖅᕕᐅᑉ ᓄᓇᕗᒻᒥ
ᑎᑎᖅᑲᖃᐅᑎᖓ 1200, ᐃᖃᓗᐃᑦ, ᓄᓇᕗᑦ, X0A 0H0
ᐅᖄᓚᐅᑎᖓ: (867) 975-5100 / Fax: (867) 975-5191
ᖃᕋᓴᐅᔭᒃᑯᑦ ᑐᕌᕈᑎᖓ: submissions@assembly.nu.ca