ᑲᑎᒪᔾᔪᑎᕕᓂᕐᓂᒃ ᐋᖅᑭᒃᓱᐃᖃᑦᑕᕈᒪᔪᓂᒃ ᕿᓂᖅᑐᒍᑦ

ᓄᓇᕗᒻᒥ ᒪᓕᒐᓕᐅᕐᕕᐅᑉ ᑎᑎᕋᕐᕕᐊ ᕿᓂᖅᑐᑦ ᑲᑎᒪᔾᔪᑎᕕᓂᕐᓂᒃ ᐋᖅᑭᒃᓱᐃᔨᐅᔪᒪᔪᓂᒃ.  ᐋᖅᑭᒃᓱᐃᔨᐅᔪᒪᒍᕕᑦ ᓇᓗᓇᐃᖅᓯᕕᒋᔪᓐᓇᖅᑕᑎᑦ.

ᑲᑎᒪᔾᔪᑎᕕᓃᑦ ᐃᓗᓕᖃᐅᓲᖒᕗᑦ ᒪᓕᒐᓕᐅᖅᑏᑦ ᑲᑎᒪᕐᔪᐊᖅᑎᓪᓗᒋᑦ ᑲᑎᒪᔨᕋᓛᓪᓗ ᑲᑎᒪᑎᓪᓗᒋᑦ ᐅᖃᖅᑕᐅᕙᓪᓕᐊᔪᓕᒫᑦ ᑎᑎᕋᖅᑕᐅᕙᓪᓕᐊᖃᑦᑕᖅᖢᑎᒃ.  ᓄᓇᕗᒻᒥ ᑲᑎᒪᔾᔪᑎᕕᓃᑦ ᑎᑎᕋᖅᑕᐅᕙᒃᐳᑦ ᐃᓄᒃᑎᑐᑦ ᖃᓪᓗᓈᑎᑐᓪᓗ ᑕᒪᒃᑭᖅᑕᐅᓪᓗᑎᒃ.

ᑕᐃᒃᑯᐊ ᑲᑎᒪᔾᔪᑎᕕᓂᕐᓂᒃ ᐋᖅᑭᒃᓱᐃᖃᑦᑕᕈᒪᔪᑦ ᖃᓄᐃᓕᐅᖃᑦᑕᕐᓂᕐᒥᓂᒃ ᐃᓗᓕᖃᐅᑯᓘᔭᖅᑐᓂᒃ ᑎᑎᖅᑲᓂᒃ ᖃᐃᑦᑎᔪᓐᓇᖅᑐᑦ, ᐊᕐᕌᒍᓄᓪᓗ ᑕᓪᓕᒪᓄᑦ ᑳᓐᑐᕌᒃᑕᐅᓯᒪᓇᔭᖅᖢᑎᒃ, ᐱᒋᐊᕐᓗᑎᒃ ᐊᐃᕐᕆᓕ 1, 2024−ᒥ.

ᑕᐃᒃᑯᐊ ᑲᑎᒪᔾᔪᑎᕕᓂᕐᓂᒃ ᐋᖅᑭᒃᓱᐃᖃᑦᑕᕈᒪᔪᑦ ᐱᓕᒻᒪᒃᓯᒪᓂᕐᒥᓂᒃ ᓇᓗᓇᐃᔭᐃᑦᑎᐊᕆᐊᖃᖅᑐᑦ ᐊᒻᒪ ᖃᔅᓯᓂᒃ ᐃᖅᑲᓇᐃᔭᖅᑎᖃᕐᒪᖔᖏᑦ ᐃᓄᐃᑦ ᐊᒻᒪ ᖃᓪᓗᓈᑦ ᐅᖃᐅᓯᖏᓐᓂᒃ ᑎᑎᕋᖅᐸᓪᓕᐊᔪᓐᓇᖅᑐᓂᒃ, ᐋᖅᑭᒋᐊᖅᓯᔨᐅᔪᓐᓇᖅᑐᓂᒃ ᐊᒻᒪ ᐅᖃᓕᒫᒐᓐᖑᖅᑎᑦᑎᔪᓐᓇᖅᑐᓂᒃ.

ᑕᐃᒃᑯᐊ ᐱᔪᒪᔪᑦ ᑎᑎᕋᖅᑕᖏᑦ ᕿᒥᕐᕈᓇᒃᑕᐅᕌᓂᒃᐸᑕ, ᒪᓕᒐᓕᐅᕐᕕᐅᑉ ᑎᑎᕋᕐᕕᐊ ᑳᓐᑐᕌᒃᓴᓂᒃ ᓴᖅᑭᑦᑎᑐᐃᓐᓇᕆᐊᓖᑦ.

ᓄᓇᕗᒻᒥ ᑲᑎᒪᔾᔪᑎᕕᓃᑦ ᐊᔾᔨᖏᓐᓂᒃ ᐱᔪᒪᒍᕕᑦ ᒪᓕᒐᓕᐅᕐᕕᐅᑉ ᐃᑭᐊᖅᑭᕕᖏᑦᑎᒍᑦ ᐱᔪᓐᓇᖅᑕᑎᑦ, ᑐᕌᕈᑖ https://www.assembly.nu.ca/hansard. ᑲᑎᒪᔾᔪᑎᕕᓃᑦ ᐊᒻᒪ ᑕᒪᒃᑯᓄᖓ ᑐᕌᖓᔪᑦ ᑎᑎᖅᑲᑦ ᖃᓄᖅ ᐋᖅᑭᒃᓱᖅᑕᐅᖃᑦᑕᕐᓂᖏᑦ ᐱᐅᓯᕆᔭᐅᔪᑐᖃᐃᓪᓗ ᐋᖅᑭᒃᓱᖅᑕᐅᖃᑦᑕᖅᑐᑦ ᑲᓇᑕᒥ ᑲᑎᒪᔾᔪᑎᕕᓂᕐᓂᒃ ᐱᓕᕆᔩᑦ ᑲᑐᔾᔨᖃᑎᒌᖏᓐᓄᑦ, ᑐᕌᕈᑖ: https://www.hansard.ca/.

ᐱᔪᒪᔪᑦ ᑎᑎᕋᖅᑕᖏᓐᓂᒃ ᑐᓐᖓᓱᒃᑎᑦᑎᓂᐊᖅᑐᒍᑦ ᐅᓪᓗᑐᐃᓐᓇᓐᖑᕋᓱᖕᓂᖓᓄᑦ, ᓯᑎᐱᕆ 1, 2023−ᒧᑦ ᑎᑭᓪᓗᒍ, 5−ᒧᐊᖅᓰᓗᒍ ᐃᖃᓗᐃᑦ ᓯᕿᕐᖑᔭᖓ ᒪᓕᒡᓗᒍ.

ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑕ ᑎᑎᕋᖅᑎᐊ
ᓄᓇᕗᑦ ᒪᓕᒐᓕᐅᕐᕕᐊᑕ ᑎᑎᕋᕐᕕᐊᓂ
ᑎᑎᖅᑲᒃᑯᕕᐊ 1200, ᐃᖃᓗᐃᑦ, ᓄᓇᕗᑦ, X0A 0H0
ᐅᖄᓚᐅᑖ: (867) 975-5000
ᓱᒃᑲᔪᒃᑰᕈᑖ: (867) 975-5190
submissions@assembly.nu.ca