ᑐᓐᖓᓱᑦᑎᑎᔾᔪᑎ ᐃᕐᕐᑲᓇᐃᔮᒥᑦ ᐱᓇᓱᐊᕈᒪᔪᓄᑦ - ᑎᑎᕋᖅᑎᐅᑉ ᑐᖏᓕᖓ ᓄᓇᕗᑦ ᒪᓕᒐᓕᐅᖅᕕᖓᓂ

ᐃᕐᕐᑲᓇᐃᔮᒥᑦ ᐱᓇᓱᐊᕈᒪᔪᑦ ᑐᓐᖓᓱᑦᑎᑕᐅᕗᑦ ᑎᑎᕋᖅᑎᐅᑉ ᑐᖏᓕᖓᑕ ᐃᓂᖓᓂᑦ ᓄᓇᕗᑦ ᒪᓕᒐᓕᐅᖅᕕᖓᓂ. ᑖᓐᓇ ᐃᕐᕐᑲᓇᐃᔮᖅ ᐅᓪᓗᓕᒫᖅ ᐃᕐᕐᑲᓇᐃᔭᖃᑦᑕᕐᓂᐅᔪᖅ, ᐊᒻᒪᓗ  ᐃᓱᓕᒃᕕᒃᓴᖃᕋᓂ.

ᑎᑎᕋᖅᑎᐅᑉ ᑐᖏᓕᖓᑕ ᐃᕐᕐᑲᓇᐃᔮᖓ ᐃᓚᒋᔭᐅᕗᖅ ᐊᒥᓱᑲᓪᓚᓐᓄᑦ ᑯᑦᑎᓂᖅᓴᓂᑦ ᐃᕐᕐᑲᓇᐃᔮᓕᓐᓄᑦ ᐊᐅᓚᑦᑎᔨᐅᔪᓄᑦ ᑎᑎᕋᖅᕕᖓᓂ ᓄᓇᕗᑦ ᒪᓕᒐᓕᐅᖅᕕᖓᑕ. ᑖᓐᓇ ᑎᑎᕋᖅᕕᒃ ᓴᕐᕐᑭᖅᑕᐅᓯᒪᔪᖅ ᐊᑐᖅᑐᑎᒃ ᒪᓕᒐᓕᐅᖅᕕᐅᑉ ᐊᒻᒪᓗ ᐊᐅᓚᑦᑎᔩᑦ ᑲᑎᒪᔨᖏᑕ ᐱᖁᔭᕐᔪᐊᖓᓂᑦ. ᑖᒃᓱᒥᖓ ᐃᖅᑲᓇᐃᔮᓖᑦ ᐱᓕᕆᐊᖃᖃᑦᑕᖁᔭᐅᓲᖑᔪᑦ ᒪᓕᒐᓕᐅᖅᕕᒻᒥ ᑎᑎᕋᖅᑎᐅᑉ ᐃᕐᕐᑲᓇᐃᔮᖓᓂᑦ ᑎᑎᕋᖅᑎ ᐅᐸᒍᓐᓇᑎᓐᓇᒍ.

ᑕᐃᓐᓇ ᓂᕈᐊᖅᑕᐅᔪᖅ ᐱᓕᕆᓚᐅᖅᓯᒪᒋᐊᖃᖅᑐᖅ ᖁᑦᑎᑦᑐᒥ ᐃᓂᖃᕐᓗᓂ ᐊᐅᓚᑦᑎᔨᐅᓗᓂ ᐃᕐᕐᑲᓇᐃᔮᕆᖃᑦᑕᖅᓯᒪᔭᖏᓪᓗ ᓇᓗᓇᐃᖅᑕᐅᔪᓐᓇᕐᓗᑎᒃ ᐱᓕᕆᐊᕆᑦᑎᐊᖅᓯᒪᒻᒪᒋᑦ ᐱᔭᕆᐊᑐᒐᓗᐊᖅ-ᑎᓪᓗᒋᑦ ᑎᑎᕋᖅᕖᑦ ᐊᐅᓚᑕᐅᓂᕆᒋᐊᓕᖏᑦ. ᐃᓗᓕᖏᓐᓂᑦ ᖃᐅᔨᒪᑦᑎᐊᕐᓗᓂ ᒪᓕᒐᓕᐅᖅᕕᕐᔪᐊᑦ ᒪᓕᒋᐊ-ᖃᓲᕆᔭᖏᓐᓂᑦ ᐊᒻᒪᓗ ᑕᒪᑐᒧᖓ ᐊᑦᑐᐊᓂᖃᖅᑐᓂᑦ ᐱᖁᔭᕐᓂᑦ ᐊᓯᐊᒎᖅᕕᖃᕋᓂ ᖃᐅᔨᒪᒋᐊᖃᓪᓚᕆᑦᑐᑦ. ᑖᓐᓇ ᐃᖅᑲᓇᐃᔮᖅ ᖃᓄᓕᒫᖅ ᓱᓇᓕᒫᓂᑦ ᖃᐅᔨᒪᑦᑎᐊᕋᓱᒋᐊᖃᕐᓂᐅᔪᖅ ᒪᓕᑦᑕᐅᑦᑎᐊᕋᓗᐊᕐᒪᖔᑕ, ᐱᖃᓯᐅᑎᓗᒍ ᑕᐃᒫᑦᑎᐊᖅ ᑐᑭᒋᔭᖏᓐᓂᑦ ᑎᑭᓯᖃᑦᑕᕈᓐᓇᕐᓗᓂ, ᐊᐅᓚᑦᑎᔪᓐᓇᕐᓗᓂ ᑕᒪᒃᑯᓂᖓ, ᐅᓂᒃᑳᖃᕈᓐᓇᕐᓗᓂᓗ ᓇᓗᓇᐃᖅᑐᐃᓗᓂ ᑐᑭᓯᔭᕐᓂᖏᑦᑐᓂᑦ ᐱᖁᔭᕐᓂᑦ, ᒪᓕᒐᕐᓂᑦ ᐊᒻᒪᓗ ᐊᓯᖏᓐᓂᑦ ᒪᓕᑦᑕᐅᔭᕆᐊᓕᓐᓂᑦ ᐱᔪᓐᓇᐅᑎᑖᖑᓯᒪᔪᓂᑦ ᒪᓕᒐᓕᐅᖅᑎᐅᖃᑕᐅᔪᓄᑦ ᒪᓕᒐᓕᐅᖅᕕᒻᒥ ᐊᒻᒪᓗ ᐊᓯᖏᓐᓄᑦ. ᑎᑎᕋᕈᓐᓇᑎᐊᓪᓚᕆᓪᓗᓂ, ᐊᒻᒪᓗ ᑎᑎᕋᕈᓐᓇᕆᐊᖃᓪᓚᕆᑦᑐᓂ ᐱᔭᕆᐊᑐᔪᓂᑦ ᑐᑭᓯᔭᐅᒋᐊᖏᑕ ᒪᓕᑦᑕᐅᔭᕆᐊᓕᓐᓂᑦ. ᑐᑭᓯᓯᒪᓂᖓ ᐃᓄᐃᑦ ᐃᓅᖃᑎᒌᓐᓂᕐᒥ ᐅᑉᐱᕆᔭᖏᓐᓂᑦ, ᐅᖃᐅᓯᖏᓐᓂᑦ ᐊᒻᒪᓗ ᐃᓕᖅᑯᓯᖏᓐᓂᑦ ᐃᑲᔪᕐᓂᖃᓪᓚᕆᒃᑲᔭᖅᑐᖅ ᓂᕈᐊᖅᑕᐅᓇᓱᐊᓕᖅᑲᑦ.  

ᑎᑎᕋᖅᕕᖓ ᒪᓕᒐᓕᐅᖅᕕᐅᑉ ᐃᖃᓗᓐᓃᑦᑐᖅ ᓄᓇᕗᒻᒥ. ᐃᓗᓕᖅᑐᔪᖅ ᐃᖅᑲᓇᐃᔮᒥᑦ ᓇᓗᓇᐃᖅᑐᐃᔾᔪᑎ ᐱᔭᐅᔪᓐᓇᖅᑐᖅ ᒪᓕᒐᓕᐅᖅᕕᐅᑉ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓂᑦ ᐅᕙᓐᖓᑦ: www.assembly.nu.ca.

ᐃᖅᑲᓇᐃᔮᒥᑦ ᐱᓇᓱᐊᖅᑐᑦ ᓇᓗᓇᐃᖅᑐᐃᑦᑎᐊᕆᐊᓖᑦ ᖃᓄᖅ ᐊᔪᓐᖏᓐᓂᐅᔭᕆᐊᓕᓐᓂᑦ ᐊᔪᓐᖏᔾᔪᑎ-ᖃᕐᒪᖔᕐᒥᓂᒃ ᐱᓕᕆᔪᓐᓇᕆᐊᖃᕐᓂᐅᔪᓂᓪᓗ ᓇᓗᓇᐃᖅᑐᖅᑕᐅᓯᒪᔪᓂᑦ ᐃᖅᑲᓇᐃᔮᑉ ᓇᓗᓇᐃᖅᑐᕈᑎᖏᓐᓂ.   ᖃᓄᖅ ᓂᕈᐊᖅᑕᐅᓇᓱᐊᓛᕐᒪᖔᑕ ᐱᓇᓱᐊᖅᑐᓕᒫᑦ ᐊᐱᕆᔪᓐᓇᖅᑐᑦ. ᑮᓇᐅᔾᔭᒃᓵᖏᑦ ᑖᒃᓱᒪ ᐃᕐᕐᑲᓇᐃᔮᑉ ᐃᒪᓐᓇᐅᕗᑦ $138,044.00−ᓂᑦ ᑕᑉᐸᐅᖓ$197,206.00−ᓄᑦ ᐊᕐᕌᒍᑕᒫᖅ. ᑕᐃᓐᓇ ᓂᕈᐊᖅᑕᖅ ᐃᖃᓗᒻᒥᐅᑕᐅᓐᖏᑉᐸᑦ ᐃᖅᑲᓇᐃᔮᒧᑦ ᑎᒃᑯᐊᖅᑕᐅᕕᖓᓂ ᐅᓪᓗᕐᒥ, ᐊᐅᓪᓛᖅᑐᕈᑎᖏᓐᓄᑦ ᐃᑲᔪᖅᑕᐅᔾᔪᑎᓂᑦ ᐱᑎᑕᐅᒐᔭᖅᑐᖅ. ᐃᑲᔫᓯᐊᖅᑕᖅᑐᒥᑦ ᐃᖅᑲᓇᐃᔭᖅᑎᓄᑦ ᑐᕌᖓᔪᒥᑦ ᐃᓪᓗᒃᓴᓕᒃ. 

ᐃᕐᕐᑲᓇᐃᔮᒥᑦ ᐱᒐᓱᐊᕈᑏᑦ ᐱᔭᐅᖃᑦᑕᓂᐊᖅᑐᑦ ᑎᑭᒐᓱᐊᕐᓗᒍ 5:00 ᐅᓐᓄᓴᒃᑯᑦ (ᑲᓇᓐᓇᕐᒥ) ᑕᓪᓕᕐᒥ, ᓯᑎᐱᕆ 29, 2023. ᑖᓐᓇ ᐃᖅᑲᓇᐃᔮᖅ ᑕᑎᒋᔭᐅᔭᕆᐊᖃᕐᓂᐅᒻᒪᑦ ᑕᐃᒫᓪᓗ ᐱᕋᔭᓚᐅᖅᓯᒪᓐᖏᒻᒪᖔᖅ ᖃᐅᔨᓴᖅᑕᐅᓂᕐᒥᑦ ᐊᓂᒍᐃᑦᑎᐊᕆᐊᖃᖅᐳᖅ. ᖃᐅᔨᒪᓂᐊᖅᐳᓯ ᑕᐃᒃᑯᐊᑐᐊᖅ ᐱᓇᓱᐊᖅᑐᑦ ᓂᕈᐊᖅᑕᐅᔪᑦ ᐊᐱᖅᓱᖅᑕᐅᔪᒪᓪᓗᑎᒃ ᖃᐅᔨᒃᑲᖅᑕᑑᓚᕐᒪᑕ. ᐃᕐᕐᑲᓇᐃᔮᒥᑦ ᐱᓇᓱᐊᕈᑏᑦ ᖃᐅᔨᒋᐊᕐᓃᓪᓗ ᐅᕗᖓ ᑐᕌᖅᑎᑕᐅᔭᕆᐊᓖᑦ:

ᐊᓪᓚᑦᑎᖓ ᑲᑎᒪᔨᓕᕆᔩᑦ ᑲᑎᒪᔨᖏᑕ
ᑎᑎᕋᖅᕕᖓ ᒪᓕᒐᓕᐅᖅᕕᖓᑕ ᓄᓇᕗᑦ
ᑎᑎᕐᕐᑲᖃᐅᑎᖓ 1200, ᐃᖃᓗᐃᑦ, ᓄᓇᕗᑦ, X0A 0H0
ᐃᖄᓚᐅᑎᖓ: (867) 975-5100 / ᓱᑲᔪᒃᑯᑦ: (867) 975-5191
ᖃᕋᓴᐅᔭᒃᑯᑦ: submissions@assembly.nu.ca