ᐃᖃᓗᐃᑦ, ᓄᓇᕗᑦ (ᓄᕕᐱᕆ 10, 2023) – ᒪᓕᒐᓕᐅᖅᕕᒻᒥ ᐅᖃᖅᑎ ᐊᒻᒪᓗ ᐃᒃᓯᕙᐅᑕᖓ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᑕᖅᓯᔾᔪᑎᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᓐᓄᑦ, ᑑᓂ ᐋᖁᐊᖅ, ᐅᓪᓗᒥ ᐅᖃᖅᑲᐅᒻᒪᑎᒃ ᓄᓇᕗᒥ ᐱᓕᕆᑦᑎᐊᓂᖁᓄᑦ ᐃᓕᑕᖅᓯᔾᔪᑎᓄᑦ ᓂᕈᐊᕋᒃᓴᓕᐅᕐᓃᑦ ᒪᑐᐃᒃᑲᓂᕐᒥᒻᒪᑕᒎᖅ.
ᔮᓐᓄᐊᓕ 1, 2010−ᒥ, ᑖᓐᓇ ᓄᓇᕗᒥ ᐱᓕᕆᑦᑎᐊᕐᓂᑯᓂᑦ ᐃᓕᑕᖅᓯᔾᔪᑎ ᐊᑐᓕᓚᐅᖅᓯᒪᒻᒪᑦ. ᑖᓐᓇ ᒪᓕᒐᖅᑎᒍᑦ ᐱᔾᔪᓯᐊᕐᓂᐅᔪᖅ ᓴᖅᑭᔮᖅᑎᑕᐅᕗᖅ “ᐅᐱᒍᓱᔾᔪᑎᐅᓂᐊᕐᒪᑦ ᑭᒃᑯᑐᐃᓐᓇᕐᓂᒃ ᐃᑲᔪᕐᓂᖃᓪᓗᐊᑲᓪᓚᒃᓯᒪᔪᓂᒃ ᐱᖅᑯᓯᓕᕆᓂᕐᒧᑦ, ᐃᓅᓯᔨᕆᓂᕐᒧᑦ, ᐅᕝᕙᓘᓐᓃᑦ ᒪᑭᒪᐅᑎᓕᕆᓂᕐᒧᑦ ᓄᓇᕗᒥ.” ᑖᓐᓇ ᐃᓕᑕᕆᔭᐅᓪᔪᑎ ᖁᑦᑎᓂᖅᐹᖑᔪᖅ ᓄᓇᕗᒥ ᐱᔾᔪᓯᐊᖑᔪᓐᓇᖅᑐᓂᒃ, ᐊᒻᒪᓗ ᓴᓐᖏᓂᖅᓴᐅᓪᓗᓂ ᐃᓘᓐᓇᖏᓐᓂᑦ ᐊᓯᖏᓐᓂᑦ ᐱᔾᔪᓯᐊᖑᓲᓂᒃ, ᐅᔭᒥᑦᑕᐅᓲᓂᒃ, ᐃᓕᑕᕆᔭᐅᓂᐅᓲᓂᒃ ᓄᓇᕗᑦ ᒐᕙᒪᖓᓄᑦ. ᐃᓚᒋᔭᐅᓕᕐᓂᖓ ᓄᓇᕗᒻᒥ ᐱᓕᕆᑦᑎᐊᕐᓂᑯᓂᒃ ᐃᓕᓴᖅᓯᔾᔪᑎᐅᑦ ᑕᕝᕗᖓ ᑲᓇᑕᒥ ᐃᓕᓴᖅᓯᖃᑦᑕᕐᓂᕐᒧᑦ ᐋᖅᑭᒃᓯᒪᓂᖓᓄᑦ ᑎᑎᕋᖅᓯᒪᔪᓅᖅᑕᐅᓚᐅᕐᒪᑦ 2018-ᒥ ᐊᑐᕐᑐᑎᒃ ᑲᕙᒪᑐᖃᒃᑯᓐᓂ ᒥᓂᔅᑕᐃᑦ ᑲᑎᒪᔨᖏᑦᑕ ᑎᓕᔾᔪᑎᖓᓐᓂᒃ ᐊᖏᖅᑕᐅᓪᓗᓂᓗ ᑭᖕ ᑭᒡᒐᖅᑐᖅᑎᖓᑕ.
ᑖᒃᑯᐊ ᓄᓇᕗᒥ ᐱᓕᕆᑦᑎᐊᕐᓂᑯᓂᒃ ᐅᖃᐅᔾᔨᒋᐊᖅᑏᑦ ᑲᑎᒪᔩᑦ ᐃᓱᒪᒃᓴᖅᓯᐅᕈᑎᖃᓲᑦ ᓂᕈᐊᕋᒃᓴᓕᐊᖑᓯᒪᔪᓂᒃ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᑕᕆᔭᐅᔾᔪᑎᒧᑦ, ᐊᑐᓕᖁᔭᓕᐅᓕᖅᑐᑎᓪᓗ ᓄᓇᕗᑦ ᑲᒥᓴᓇᖓᓄᑦ, ᑖᓐᓇᐃᓛᒃ ᑲᒥᓴᓇ ᑖᔅᓱᒧᖓ ᐱᔾᔪᓯᐊᒧᑦ ᐊᖏᔪᖅᑳᖑᒻᒪᑦ. ᑖᒃᑯᐊ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᑦ ᐃᓄᖃᖅᑐᑦ ᒪᓕᒐᓕᐅᖅᑎᐅᑉ ᐅᖃᖅᑎᖓᓂᑦ, ᐃᖅᑲᖅᑐᐃᔩᑦ ᐊᖓᔪᖅᑳᖓᑦ ᓄᓇᕗᒥ ᐃᖅᑲᖅᑐᐃᕕᖕᒥ ᐊᒻᒪᓗ ᓄᓇᕗᑦ ᑐᓐᖓᕕᒃᑯᑦ ᑎᒥᑯᑖᑕ ᐊᖏᔪᖅᑳᖓᓂᑦ.
ᓂᕈᐊᕋᒃᓴᓕᐅᕈᑏᑦ ᑕᑕᑎᕆᐊᓖᑦ ᐊᑐᐃᓐᓇᐅᔪᑦ ᒪᓕᒐᖠᐅᖅᑏᑦ ᐊᓪᓚᕝᕕᖏᓐᓂ ᐊᒻᒪᓗ ᐲᔭᖅᑕᐅᔪᓐᓇᕐᒥᔪᑦ ᒪᓕᒐᓕᐅᖅᕕᐅᑉ ᖃᕋᓴᐅᔭᒃᑯᑦ ᐃᑭᐊᖅᓯᕕᖓᓂᑦ ᐅᕙᓐᖓᑦ www.assembly.nu.ca. ᓂᕈᐊᕋᒃᓴᓕᐅᕈᑏᑦ ᐱᔭᐅᓯᒪᔭᕆᐊᓖᑦ ᐃᓱᓕᕕᖃᖅᑐᓂ 5:00 ᐅᓐᓄᓴᒃᑯᑦ (ᑲᓇᓐᓇᒥ) ᑎᓴᒻᒥᕐᒥ, ᕖᕝᕗᐊᕆ 29, 2024. ᐱᔾᔪᓯᐊᖅᑎᑦᑎᓃᑦ ᐃᓕᑕᕆᔭᐅᔾᔪᑎᓂᒃ ᐊᑐᖅᑕᐅᓛᖅᑐᑦ ᐅᓪᓗᕐᒥ ᑕᐃᔭᐅᓛᑐᐃᓐᓇᖅᑐᒥ.
ᐅᓪᓗᒥᒧᑦ, ᑲᑎᑦᑐᒋᑦ 21 ᐱᑎᑕᐅᓯᒪᕗᑦ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᑕᕆᔭᐅᔾᔪᑎᒥᒃ ᐃᑲᔪᖅᓯᒪᓂᖏᓐᓄᑦ ᑭᒃᑯᑐᐃᓐᓇᕐᓂᒃ ᓄᓇᓕᓐᓂᓪᓗ ᐱᔨᑦᑎᕋᕐᓂᖏᓐᓄᑦ, ᓴᓇᖃᑦᑕᓂᕐᒧᑦ, ᐃᓕᓐᓂᐊᖅᑐᓕᕆᓂᕐᒧᑦ, ᐅᖃᐅᓯᕐᓂᒃ ᓴᖅᑭᔮᖅᑎᑦᑎᓂᕐᒧᑦ, ᐅᑉᐱᖅᑐᓕᕆᓂᕐᓄᑦ ᐊᒻᒪᓗ ᓇᒻᒥᓂᖃᐅᑎᓂᒃ ᐱᕙᓪᓕᐊᑎᑦᑎᓂᕐᒧᑦ.
ᐅᖃᖅᑎ ᐋᖁᐊᖅ ᐅᖃᓚᐅᖅᐳᖅ, “ᑎᑭᐅᑎᕙᓪᓕᐊᓕᖅᑎᓪᓗᑕ ᓄᓇᕘᑉ 25−ᓂᑦ ᐊᕐᕌᒍᓂᑦ ᓇᓪᓕᐅᓂᖅᓴᐅᕐᓂᖓᓄᑦ, ᑲᔪᖏᖅᓴᖅᐸᒃᑲ ᓄᓇᕗᒻᒥᐅᑕᓕᒫᑦ ᐃᓱᒪᒃᓴᖅᓯᐅᖁᓪᓗᒋᑦ ᓂᕈᐊᕋᒃᓴᓕᐅᕐᓕᕐᒥᒃ ᑭᓇᑐᐃᓐᓇᕐᒥᒃ ᐱᐅᔪᓂᒃ ᑲᔪᓰᓐᓇᖅᑐᓂᒡᓗ ᐃᑲᔫᑎᖃᖅᓯᒪᔪᒥᒃ ᓄᓇᕗᑦᑎᓐᓂ.”
-30-
ᑐᑭᓯᒋᐊᕈᒪᒍᕕᑦ ᖃᐅᔨᒋᐊᕐᕕᒋᔪᓐᓇᖅᑕᐃᑦ:
ᐊᓪᓚᑦᑎᖓᓄᑦ ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐱᔾᔪᓯᐊᖅᑎᑦᑎᓂᕐᒧᑦ ᐅᖃᐅᔾᔨᒋᐊᖅᑎᐅᔪᓄᑦ ᑲᑎᒪᔨᓄᑦ
ᖃᕋᓴᐅᔭᒃᑯᑦ ᑐᕌᕈᑎᖓ: LegInfo@assembly.nu.ca
| Attachment | Size |
|---|---|
| 2023−ᒥ ᓂᕈᐊᒐᒃᓴᓕᐅᕐᓂᖅ ᓄᓇᕗᒥ ᐱᓕᕆᑦᑎᐊᕐᓂᑯᓂᒃ ᐃᓕᑕᖅᓯᔾᔪᑎᒧᑦ ᒪᑐᐃᖅᐳᖅ | 131.67 KB |
| 2023−ᒥ ᓂᕈᐊᒐᒃᓴᓐᖑᖅᑎᑦᑎᓂᕐᒧᑦ ᑎᑎᕋᕐᕕᒃᓴᖅ | 180.64 KB |