ᐃᖃᓗᐃᑦ, ᓄᓇᕗᑦ (ᓯᑎᐱᕆ 10, 2024) - ᒪᓕᒐᓕᐅᖅᕕᐅᑉ ᑲᑎᒪᔨᕋᓛᖁᑎᖓ ᓇᐅᑦᓯᖅᑐᖅᑎᐅᔪᖅ ᒐᕙᒪᒃᑯᑦ ᐊᐅᓚᓂᖏᓐᓂᑦ ᑮᓇᐅᔭᖅᑐᕈᑎᖏᓐᓂᓪᓗ ᓈᓚᓐᓂᖃᖅᑎᑦᑎᓛᕐᒪᑕ ᑕᓚᕖᓴᒃᑰᕐᓗᑎᒃ ᓯᑎᐱᕆ 19ᒥᑦ−20−ᒧᑦ, 2024-ᒥ, ᐱᔾᔪᑎᖃᕐᓗᑎᒃ ᒫᓐᓇᓕᓴᐅᓛᖑᔪᓂᑦ ᓄᓇᕗᑦ ᒐᕙᒪᖓᑕ ᑮᓇᐅᔭᓕᕆᔾᔪᑎᒥᓂᖏᓐᓂᑦ ᐊᒻᒪᓗ ᓯᑎᐱᕆ 20-ᒥᑦ−21-ᒧᑦ, 2024-ᒥ, ᐱᔾᔪᑎᖃᕐᓗᑎᒃ ᒫᓐᓇᓕᓴᐅᓛᖑᔪᓂᑦ ᐊᕐᕌᒍᑕᒫᖅᓯᐅᑎᓂᑦ ᐅᓂᒃᑲᓕᐊᒥᓂᐅᔪᓂᑦ ᐅᖃᐅᓯᕐᓄᑦ ᑲᒥᓴᓇᐅᔪᒧᑦ ᓄᓇᕗᒻᒥ.
ᐊᖏᔪᖅᑳᒡᒍᑎᐅᔪᑦ ᑕᐃᑲᓐᖓᖅᑐᑦ ᐊᓪᓚᕝᕕᖓᓂᑦ ᑲᓇᑕᐅᑉ ᑕᒻᒪᖅᓯᒪᔪᖅᓯᐅᖅᑎᖓᑕ ᐊᒻᒪᓗ ᓄᓇᕗᑦ ᒐᕙᒪᖓᓂᑦ ᓴᖅᑭᔮᓛᕐᒪᑕ ᑭᐅᖃᑦᑕᕆᐊᖅᑐᖅᓯᒪᓗᑎᒃ ᑕᓚᕖᓴᒃᑰᕐᓗᑎᒃ ᓈᓚᓐᓂᐊᖅᑎᑦᑎᓂᐅᔪᓂ.
“ᑕᓚᕖᓴᒃᑰᖅᑐᑕ ᓈᓚᓐᓂᖃᖅᑎᑦᑎᓂᕗᑦ ᐱᕕᖃᖅᕕᐅᓛᕐᒪᑦ ᒪᓕᒐᓕᐅᖅᑎᐅᖃᑕᐅᔪᓄᑦ ᒪᓕᒐᓕᐅᖅᕕᒻᒥ ᐃᓱᒪᒃᓴᖅᓯᐅᕈᑎᖃᕈᓐᓇᕐᓗᑎᒃ ᖃᓄᑎᒋ ᓄᓇᕗᑦ ᒐᕙᒪᖓ ᐊᐅᓚᔾᔭᐃᒋᐊᖅᓯᒪᒻᒪᖔᖅ ᐱᓕᕆᐊᖃᕋᓱᐊᖅᑐᑎᒃ ᐊᑐᓕᖁᔭᓕᐊᒥᓂᐅᔪᓂᑦ ᑕᒪᒃᑯᓄᖓ ᐃᒻᒥᒃᑰᖅᑐᑎᒃ ᐱᓕᕆᔨᐅᔪᓄᑦ ᐊᒻᒪᓗ ᑖᒃᑯᐊ ᑲᑎᒪᔨᕋᓛᑦ ᐊᑐᓕᖁᓯᒪᔭᖏᓐᓂᑦ,” ᐅᖃᓚᐅᖅᑐᖅ ᑲᑎᒪᔨᕋᓛᑦ ᐃᒃᓯᕙᐅᑕᖓ ᔪᐊᔾ ᕼᐃᒃᔅ, ᒪᓕᒐᓕᐅᖅᑎᐅᔪᖅ ᐃᖃᓗᐃᑦ−ᑕᓯᓗᒃᒧᑦ.
ᑕᐃᒃᑯᐊ ᒫᓐᓇᓕᓴᐅᓛᖑᔪᑦ ᓄᓇᕗᑦ ᒐᕙᒪᖓᑕ ᑮᓇᐅᔭᓕᕆᔾᔪᑎᒥᓂᖏᑦ ᐱᔭᐅᔪᓐᓇᖅᑐᑦ ᐅᕙᓐᖓᑦ ᖃᕋᓴᐅᔭᒃᑯᑦ ᑐᕌᕈᑎᓂᑦ:
www.assembly.nu.ca ᐊᒻᒪᓗ www.gov.nu.ca
ᐅᖃᐅᓯᕐᓄᑦ ᑲᒥᓴᓇᐅᑉ ᒫᓐᓇᓕᓴᐅᓛᖁᑎᖏᑦ ᐊᕐᕌᒍᑕᒫᖅᓯᐅᑎᑦ ᐅᓂᒃᑳᓕᐊᒥᓃᑦ ᐱᔭᐅᔪᓐᓇᖅᑐᑦ ᐅᕙᓐᖓᑦ ᖃᕋᓴᐅᔭᒃᑯᑦ ᑐᕌᕈᑎᓂᑦ:
ᑲᑎᒪᔨᕋᓛᑦ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᖅᑎᑦᑎᓂᖓ ᐱᒋᐊᓛᖅᑐᖅ 3:00−ᒨᖅᑲᑦ ᒪᓕᒐᓕᐅᖅᕕᐅᑉ ᑲᑎᒪᕐᔪᐊᖅᕕᖓᓂ ᑎᓴᒻᒥᐅᓕᖅᑲᑦ, ᓯᑎᐱᕆ 19, 2024. ᑖᒃᑯᐊ ᓈᓚᓐᓂᖃᖅᑎᑦᑎᓃᑦ ᑕᓚᕖᓴᒃᑯᑦ ᑕᑯᒃᓴᐅᓛᖅᑐᑦ ᓄᓇᓕᓐᓂ ᑲᓱᖅᓯᒪᔪᓂᑦ ᑕᓚᕖᓴᓕᓐᓂ ᐊᒻᒪᓗ ᐊᖏᕐᕋᒥ ᖃᖓᑦᑕᖅᑎᑕᐅᓯᒪᔪᒃᑯᑦ ᑕᓚᕖᓴᓕᓐᓂ ᕕᐊᓪᑯᑎᒍᑦ (ᓈᓴᐅᑖ 513) ᐊᒻᒪᓗ ᓵᒃᑯᑎᒍᑦ (ᓈᓴᐅᑎᖏᑦ 289−ᐱᑐᖃᐅᓂᖅᓴᐃᑦ /ᓈᓴᐅᑖ 489 − ᓄᑖᖑᓂᖅᓴᓂ).
ᓈᓚᓐᓂᖃᖅᑎᑦᑎᓂᐅᔪᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᒃᑯᑦ ᑕᑯᒃᓴᐅᑦᑕᐅᑎᒋᓛᕐᒥᔪᑦ ᐅᕙᓂ ᑐᕌᕈᑎᒥ: https://assembly.nu.ca/webcasts.
ᐃᖃᓗᒻᒥᐅᑕᐃᑦ ᓈᓚᒍᓐᓇᓛᕐᒥᔪᑦ ᓈᓚᐅᑎᒃᑯᑦ ᑐᓴᖅᓴᐅᑦᑕᐅᑎᒋᔪᓂᑦ ᓈᓚᓐᓂᖃᖅᑎᑦᑎᔪᓂᑦ ᐅᑯᓇᓂ ᓈᓚᐅᑎᒃᑯᑦ ᑐᓴᖅᓴᐅᕕᓐᓂ FM-ᒥ: ᑲᑎᒪᕐᔪᐊᕕᒻᒥ ᐃᓄᒃᑐᑦ ᖃᓪᓗᓈᑎᑐᓪᓗ ᐅᖃᖅᑐᓕᒫᓂᑦ: 92.5−ᒥ / ᐃᓄᑦᑑᖅᑐᓂᑦ 94.7 / ᖃᓪᓗᓈᑎᑑᖅᑐᓂᑦ: 102.1.
-30-
ᑐᑭᓯᒃᑲᓐᓂᕈᒪᒍᒃᓯ:
ᖃᕋᓴᐅᔭᒃᑯᑦ: LegInfo@assembly.nu.ca
| Attachment | Size |
|---|---|
| ᑲᑎᒪᔨᕋᓛᑦ ᑐᓴᖅᑕᐅᑎᑦᑎᕗᑦ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᖅᑎᑦᑎᓛᕐᒪᑕ | 113.26 KB |