Events

ᐃᖃᓗᐃᑦ, ᓄᓇᕗᑦ (ᓯᑎᐱᕆ 10, 2019) - ᒪᓕᒐᓕᐅᕐᕕᒃᒥ ᑲᑎᒪᒋᐊᒃᑲᓐᓂᓛᖅᑐᑦ 1:30-ᐅᓐᓄᓴᒃᑯᑦ ᐊᐃᑉᐱᕐᒥ, ᓯᑎᐱᕆ 17, 2019, ᐅᓪᓗᒧᑦ ᐊᑕᐅᓯᕐᒧᑦ ᑕᒪᐅᓇᑐᐃᓐᓇᖅ ᐃᒃᓯᕙᓂᕐᒧᑦ.

ᐃᖃᓗᐃᑦ, ᓄᓇᕗᑦ (ᓰᑏᕝᕙ 10, 2019) - ᒪᓕᒐᓕᐅᖅᕕᐅᑉ ᑲᑎᒪᔨᕋᓛᖓ ᓇᐅᑦᓯᖅᑐᖅᑎᐅᔪᖅ ᒐᕙᒪᒃᑯᑦ ᐊᐅᓚᓂᖏᓐᓄᑦ ᑮᓇᐅᔭᖅᑐᕈᑎᖏᓐᓄᓪᓗ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᖅᑎᑦᑎᓛᕐᒪᑕ ᐱᓪᓗᒋᑦ 2019-ᒥ ᐅᓂᒃᑳᓕᐊᒥᓂᖏᑦ ᑲᓇᑕᐅᑉ ᑕᒻᒪᖅᓯᒪᔪᖅᓯᐅᖅᑎᖓᑕ ᓄᓇᕗᒥ ᒪᓕᒐᓕᐅᖅᕕᖓᓄᑦ ᐱᔾᔪᑎᖃᖅᑐᑦ ᐃᑲᔪᖅᓯᖅᑕᐅᒍᑎᖏᓐᓂᑦ ᖁᑦᑎᓂᖅᓴᒥ ᐃᓕᓐᓂᐊᕕᒻᒥ ᐃᓪᓕᐊᖅᑐᑦ ᐊᒻᒪᓗ ᐃᓐᓇᐃᑦ ᐃᓕᓐᓂᐊᖅᑐᑦ, ᓰᑏᕝᕙ 25 ᐊᒻᒪ 26, 2019−ᒥ.

ᐃᖃᓗᐃᑦ, ᓄᓇᕗᑦ (ᓯᑎᐱᕆ 25, 2019) - ᒪᓕᒐᓕᕆᓂᕐᒧᑦ ᑲᑎᒪᔨᕋᓛᑦ ᐅᓪᓗᒥ ᑐᓴᖅᑎᑦᑎᕗᑦ ᐊᑐᖅᑕᐅᒃᑲᓐᓂᕐᓂᐊᖅᑐᓂᒃ ᐃᓱᒪᒃᓴᖅᓯᐅᕈᑕᐅᑎᓪᓗᒍ ᐱᖁᔭᒃᓴᖅ 25, ᐱᖁᔭᖅ ᐊᓯᔾᔨᕆᐊᕈᑕᐅᔪᖅ ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᕐᒧᑦ ᐊᒻᒪ ᐃᓄᐃᑦ ᐅᖃᐅᓯᖏᑦᑕ ᓴᐳᒻᒥᔭᐅᓂᖏᓐᓄᑦ ᐱᖁᔭᖅ. ᐱᖁᔭᒃᓴᖅ 25 ᓴᖅᑭᑕᐅᕚᓪᓗᓚᐅᖅᑐᖅ ᐃᓕᓐᓂᐊᖅᑐᓕᕆᓂᕐᒧᑦ ᒥᓂᔅᑕᒧᑦ ᔫᓂ 4, 2019-ᖑᑎᓪᓗᒍ, ᑭᖑᓂᖓᒍᓪᓗ ᑐᓂᔭᐅᓚᐅᕐᖢᓂ ᑲᑎᒪᔨᕋᓛᓄᑦ ᐃᓱᒪᒃᓴᖅᓯᐅᕈᑕᐅᓂᐊᕐᒪᑦ.

ᐃᖃᓗᐃᑦ, ᓄᓇᕗᑦ (ᐅᑐᐱᕆ 7, 2019) - ᐅᖃᖅᑎ ᓯᒥᐊᓐ ᒥᑭᓐᖑᐊᖅ ᐅᓪᓗᒥ ᐃᒫᒃ ᑐᓴᖅᑕᐅᑎᑦᑎᖅᑲᐅᔪᖅ:

“ᖁᓲᒥᖅᑲᐅᔪᖓ ᐅᑉᓗᒥ ᑐᓴᕋᒪ ᐃᓅᔪᓐᓃᕐᓂᖓᓂᒃ, ᐊᑯᓂ ᐋᓐᓂᐊᖃᓚᐅᖅᑐᓂ, ᒪᓕᒐᓕᐅᖅᕕᒻᒥ ᒪᓕᒐᓕᐅᖅᑎᐅᓚᐅᖅᓯᒪᔪᖅ ᐆᕕᑦ ᐊᓚᑲᓐᓂᐊᖅ, ᑖᓐᓇ ᑭᒡᒐᖅᑐᐃᖃᑦᑕᔪᔪᖅ ᐊᑯᓪᓕᖅ ᓂᕈᐊᖅᑕᐅᓯᒪᕕᖓᓂᒃ ᓯᕗᓪᓕᖅᐹᖑᔪᒥ ᓄᓇᕗᑦ ᒪᓕᒐᓕᐅᖅᕕᖓᓂ. ᐆᕕᑦ ᐊᓚᒃᑲᓐᓄᐊᖅ ᐃᓐᓇᒻᒪᕆᐅᓚᐅᖅᑐᖅ ᐅᒃᐱᕆᔭᐅᑦᑎᐊᖅᑐᓂ ᑰᒑᕐᔪᒻᒥ, ᐊᒻᒪᓗ ᓴᓐᖏᔪᐊᓗᓐᓂᒃ ᐅᖃᐅᓯᖃᖃᑦᑕᓚᐅᖅᑐᖅ ᐃᑲᔪᖅᓰᓪᓗᓂ ᐃᓄᐃᑦ ᐱᖅᑯᓯᖏᓐᓂᑦ, ᐅᖃᐅᓯᖏᓐᓂᑦ ᐅᒃᐱᕆᔭᖏᓐᓂᓪᓗ ᑲᑎᒪᔨᐅᖃᑦᑕᓂᕐᒥᓂ. ᒪᓕᒐᓕᐅᖅᑎᓕᒫᑦ ᒪᓕᒐᓕᐅᖅᕕᒻᒥ ᐅᖃᕈᑎᓪᓗᒋᑦ, ᐅᖃᕈᒪᔪᖓ ᐃᓱᒪᒋᔭᐅᓂᐊᕐᒪᑕ ᐃᓚᒋᔭᖏᑦ ᐊᒻᒪᓗ ᑭᒡᒐᑐᖅᐸᓚᐅᖅᑕᖏᑦ.”

ᓴᐃᒻᒪᑎᖓ ᒥᔅᑕ ᐊᓚᒃᑲᓐᓄᐊᑉ ᓄᓇᖓᓂ ᐊᑉᐸᕆᐊᖅᑕᐅᓯᒪᕗᖅ ᐃᔪᓐᓃᕐᓂᖓᓂᒃ ᐃᓕᑕᖅᓯᔾᔪᑎᐅᓪᓗᓂ.

-30-