Events

ᐃᖃᓗᐃᑦ, ᓄᓇᕗᑦ (ᕕᕗᐊᕆ 3, 2020) - ᒪᓕᒐᓕᐅᕐᕕᖕᒧᑦ ᐅᖃᖅᑎ ᓯᒥᐊᓐ ᒥᑭᓐᖑᐊᖅ ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᑳᓖᓐ ᐋᕆᐊᒃ ᑎᒃᑯᐊᖅᑕᐅᓂᖓᓂᒃ ᓄᓇᕗᒻᒥ ᐅᖃᐅᓯᓕᕆᓂᕐᒧᑦ ᑲᒥᓴᓇᐅᑉ ᐃᓂᖓᓄᑦ.

ᐊᑐᖅᖢᒍ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐱᖁᔭᕐᔪᐊᖓ, ᓄᓇᕗᒻᒥ ᐅᖃᐅᓯᓕᕆᓂᕐᒧᑦ ᑲᒥᓴᓇ ᑎᒃᑯᐊᖅᑕᐅᕙᒃᐳᑦ ᒪᓕᒃᑕᐅᓪᓗᑎᒃ ᒪᓕᒐᓕᐅᕐᕕᐅᑉ ᐊᑐᓕᖁᔭᓕᐊᖏᑦ ᐊᒻᒪ ᐃᓕᓯᒪᓲᖑᓪᓗᓂ ᑕᓪᓕᒪᓄᑦ ᐊᕐᕌᒍᓄᑦ.

ᐅᖃᖅᑎ ᒥᑭᓐᖑᐊᖅ ᐃᒪᐃᓕᖅᑲᐅᔪᖅ, “ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑦ ᑖᔅᓱᒧᖓ ᐃᓕᔪᒃᓴᒥᒃ ᐊᑭᑦᑐᕋᐅᑎᓂᒃᑰᖅᑎᑦᑎᓪᓗᑎᒃ ᓂᕈᐊᓚᐅᖅᑐᑦ. ᒥᔅ ᐋᕆᐊᒃ ᐅᖃᐅᓯᓕᕆᓂᕐᒧᑦ ᑲᒥᓴᓇᐅᑲᐃᓐᓇᖅᓯᒪᔪᖅ ᐊᒃᑑᐸ 2019−ᒥᓂᑦ, ᐊᒻᒪ ᐊᒃᓱᕉᑎᖃᓪᓚᕆᒃᓯᒪᓪᓗᓂ ᐅᖃᐅᓯᓕᕆᓂᕐᒧᑦ ᐱᔪᓐᓇᐅᑎᖃᕐᓂᕐᒥᒃ.”

ᒪᓕᒐᓕᐅᖅᑏᑦ ᐅᑭᐅᖅᓯᐅᑎᒥᖕᓂᒃ ᑲᑎᒪᕐᔪᐊᓕᖅᐸᑕ ᕕᕗᐊᕆ 18, 2020−ᒥ ᐱᖁᔨᕗᖔᖅᑎᒍᑦ ᑎᒃᑯᐊᖅᑕᐅᓂᖓ ᓇᓗᓇᐃᖅᑕᐅᓛᖅᑐᖅ.

ᐅᑯᓄᖓ ᐊᑦᑕᑕᐃᓯᒪᔪᒍᑦ ᐃᓅᓯᕆᓯᒪᔭᖓᑕ ᐅᓂᒃᑳᖏᓐᓂᒃ.

ᐱᒐᓱᐊᕈᒪᔪᑦ ᑐᓐᖓᓱᑦᑎᑕᐅᕗᑦ ᐃᖅᑲᓇᐃᔮᒧᑦ ᑐᑭᓯᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᓗᓂ ᓄᓇᕗᒧᑦ. ᑖᓐᓇ ᑕᓪᓕᒪᓄᑦ ᐊᕐᕌᒍᓄᑦ, ᒪᓕᒐᖅᑎᒍᑦ ᑎᒃᑯᐊᖅᑕᐅᓯᒪᓂᐅᔪᖅ.

ᑖᓐᓇ ᑐᑭᓯᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ ᐃᒻᒥᑰᖓᓪᓗᓂ ᐱᓕᕆᔨᐅᔪᖅ ᒪᓕᒐᓕᐅᖅᕕᒻᒧᑦ. ᑖᓐᓇ ᑲᒥᓴᓇ ᐃᓂᖓᓄᑦ ᑎᒃᑯᐊᖅᑕᐅᓲᖅ ᒪᓕᑦᑐᑎᒃ ᐊᑐᓕᖁᔭᓕᐊᒥᓂᕐᒥᒃ ᒪᓕᒐᓕᐅᖅᕕᒻᒥ, ᒪᓕᑦᑐᒋᑦ ᐃᓯᕈᓐᓇᐅᑎᑦ ᑐᑭᓯᐅᒪᔾᔪᑎᓄᑦ ᐊᒻᒪ ᓴᐳᔾᔭᐅᓂᖏᓐᓄᑦ ᑲᓐᖑᓇᖅᑐᑦ ᐱᖁᔭᖓᓂᒃ. ᑖᓐᓇ ᐃᖅᑲᓇᐃᔮᖅ ᐱᔪᓐᓇᐅᑎᖃᖅᕕᐅᔪᖅ ᐱᓕᕆᐊᖃᕆᐊᖃᕐᓂᖃᖅᑐᓂᓗ ᐱᓕᕆᐊᖑᒋᐊᓕᓐᓂᑦ ᐊᑖᓃᑦᑐᓂᒃ ᐃᓯᕈᓐᓇᐅᑎᑦ ᑐᑭᓯᐅᒪᔾᔪᑎᓄᑦ ᐊᒻᒪ ᓴᐳᔾᔭᐅᓂᖏᓐᓄᑦ ᑲᓐᖑᓇᖅᑐᑦ ᐱᖁᔭᖓᑕ. ᐊᔾᔨᖏᑦ ᐱᖁᔭᐅᑉ ᐱᔭᐅᔪᓐᓇᖅᑐᑦ ᐅᕙᓐᖓᑦ: www.nunavutlegislation.ca.

ᐃᖃᓗᐃᑦ, ᓄᓇᕗᑦ (ᐲᕝᕗᐊᕆ 25, 2020) − ᓄᓇᕗᒥ ᓯᕗᓕᖅᑎᓂᑦ ᑲᑎᒪᔾᔪᑎᖃᕐᓂᖅ ᐱᒋᐊᓛᖅᑐᖅ 09:00ᒨᖅᑲᑦ ᐱᖓᑦᓯᕐᒥ, ᕕᕗᐊᕆ 26, 2020-ᒥ, ᓂᕈᐊᕐᓗᑎᒃ ᓄᑖᒥᒃ ᐅᖃᖅᓯᐅᓂᐊᓕᖅᑐᒥᒃ ᒪᓕᒐᓕᐅᖅᕕᒻᒥ. ᑖᓐᓇ ᓄᓇᕗᒥ ᓯᕗᓕᖅᑎᓂᑦ ᑲᑎᒪᔾᔪᑎᖃᕐᓂᖅ ᐱᖃᑕᐅᕕᐅᓲᒻ ᒪᓕᒐᓕᐅᖅᑎᓕᒫᖑᔪᓄᑦ ᒪᓕᒐᓕᐅᖅᕕᒻᒥ. ᑲᑎᒪᓂᕐᒥ ᐱᖁᔨᕗᖔᕈᑎ ᓴᖅᑭᖅᑕᐅᓛᖅᑐᖅ ᐱᒋᐊᓕᖅᑲᑕ ᑭᖑᓪᓕᕐᒥ ᐃᒃᓯᕙᓂᕆᓛᖅᑕᖓᓂ ᒪᓕᒐᓕᐅᖅᕕᒃ.

ᑖᓐᓇ ᓯᕗᓕᖅᑎᓂᑦ ᑲᑎᒪᔾᔪᑎᖃᕐᓂᖅ ᒪᑐᐃᖓᓛᖅᑐᖅ ᑭᒃᑯᑐᐃᓐᓇᕐᓄᑦ ᑕᑯᓐᓈᕈᒪᔪᓄᑦ ᒪᓕᒐᓕᐅᖅᕕᐅᑉ ᐳᓛᖅᕕᖓᓂᑦ. ᑖᒃᑯᐊᓗ ᑕᓚᕕᓴᒃᑯᑦ ᑕᑯᒃᓴᐅᑦᑕᐅᑎᒋᓛᖅᑐᑦ ᓄᓇᕗᓕᒫᒥ ᓄᓇᓖᑦ ᑕᕕᓴᖃᐅᑎᖏᒍᑦ ᐊᒻᒪᓗ ᐊᖏᕐᕋᒥ ᖃᖓᑦᑕᖅᑎᑕᐅᓯᒪᔪᒃᑯᑦ ᑕᕕᓴᓕᓐᓄᑦ ᕕᐊᓪᒥ (ᓈᓴᐅᑎᖓ 513) ᐊᒻᒪᓗ ᓵᒃᑯᑦ (ᓈᓴᐅᑎᖓ 289−ᐱᑐᖃᐅᓂᖅᓴᖅ / 489 ᓄᑖᖑᓂᖅᓴᖅ). ᑖᒃᑯᐊ ᑲᑎᒪᐅᑎᖃᖅᑐᑦ ᑕᕝᕙᑦᑕᐅᑎᒋ ᖃᕋᓴᐅᔭᒃᑯᑦ ᑕᑯᒃᓴᐅᓛᕐᒥᔪᑦ ᐅᕙᓂ: http://video.isilive.ca/nunavut/.