ᐊᑐᖅᑕᐅᓯᒪᓐᖏᑦᑐᖅ ᐊᕗᑎᓯᒪᓪᓗᑎᒃ ᑲᑎᒪᓂᖅ ᓇᓗᓇᐃᖅᓯᕗᖅ ᐊᑕᐅᓯᕐᒥᒃ ᓂᐱᖃᕐᓗᑎᒃ ᐱᔭᒃᓴᖅᑖᒥᒍᑦ ᓯᕗᓪᓕᐅᑎᓯᒪᔭᑦ ᐱᓕᕆᐊᖑᓂᐊᕐᓂᖏᓐᓂᒃ

Dec 13 2021 11:33 am

ᐃᖃᓗᒃᑑᑦᑎᐊᖅ, ᓄᓇᕗᑦ (ᑎᓯᐱᕆ 13, 2021) - ᓄᓇᕗᑦ ᒪᓕᒐᓕᐅᕐᕕᐊᑕ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᐊᕗᑎᓯᒪᓪᓗᑎᒃ ᐸᕐᓇᐃᓂᕐᒧᑦ ᑲᑎᒫᓂᑦᑎᐊᓚᐅᖅᐳᑦ ᑎᓯᐱᕆ 10, 2021−ᒥ.

“ᐊᕗᑎᓯᒪᓪᓗᑕ ᑲᑎᒪᓂᕗᑦ ᐱᒋᐊᕈᑎᖃᓚᐅᖅᐳᑦ ᐊᑐᖅᑕᐅᓚᐅᖅᓯᒪᓐᖏᑦᑐᓂᒃ ᐅᖃᖃᑎᒌᖕᓂᖃᖅᖢᑎᒃ ᒪᓕᒐᓕᐅᖅᑏᑦ ᐊᒻᒪ ᓯᕗᒃᑲᖅᑕᖅᑎᒋᔭᐅᔪᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖁᑕᓄᑦ ᐊᒻᒪ ᐃᓚᐅᔪᓕᒫᖑᓪᓗᑎᒃ ᐊᕕᒃᑐᖅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖏᑦᑕ ᓯᕗᒃᑲᖅᑕᖅᑎᖏᑦ,” ᑕᐃᒪᓐᓇ ᐅᖃᓚᐅᖅᐳᖅ ᓯᕗᓕᖅᑎ ᐸᐅᓗᓯ ᐊᕿᐊᕈᖅ. “ᐊᖏᖅᓯᒪᑦᑎᐊᖅᐳᒍᑦ ᓄᑖᓐᖑᕆᐊᖅᑎᑦᑎᔪᒪᓂᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒥᒡᓗ ᐃᖅᑲᓇᐃᔭᖃᑎᒌᖕᓂᕐᒥᒃ ᐅᐱᒌᒡᓗᑕ ᐊᒻᒪ ᐊᖏᖃᑎᒌᒃᓯᒪᓗᑕ ᑲᑐᔾᔨᖃᑎᒌᖕᓂᒃᑯᓪᓗ ᐱᓯᒋᐊᓯᖅᑎᑦᑎᓇᓱᒡᓗᑕ ᐱᕐᔪᐊᓂᒃ, ᓲᕐᓗ ᐃᒡᓗᓕᕆᓂᕐᒥᒃ.”

ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᑕᓪᓕᒪᓪᓗᐊᑕᕐᓂᒃ ᓯᕗᓪᓕᐅᔾᔨᓯᒪᕗᑦ ᓄᑖᑦ ᒐᕙᒪᒃᑯᑦ ᐱᓕᕆᐊᓪᓗᐊᑕᕆᓂᐊᖅᑕᖏᓐᓂᒃ:

  • ᐊᑐᓕᖅᑎᑦᑎᓂᖅ ᐃᓗᐃᒃᑲᓂᒃ ᐃᓐᓇᕐᓄᑦ ᐸᖅᑭᓂᕐᒧᑦ ᑐᑭᒧᐊᕈᑎᓂᒃ;
  • ᐃᓕᓐᓂᐊᕐᓂᓕᕆᓂᖅ ᐱᓕᕆᐊᕆᔭᐅᑦᑎᐊᒃᑲᓐᓂᕐᓂᖓ;
  • ᐋᓐᓂᐊᖃᕐᓇᓐᖏᑦᑐᓕᕆᓂᖅ, ᐃᓱᒪᓕᕆᓂᖅ ᐅᐃᕆᓯᒪᓂᕐᒧᓪᓗ ᐱᔨᑦᑎᕈᑏᑦ ᐱᐅᓯᒋᐊᒃᑲᓐᓂᕐᓗᒋᑦ;
  • ᐃᒡᓗᓕᕆᓂᕐᒧᑦ ᑐᕌᖓᔪᑦ ᐊᖏᒡᓕᑎᒋᐊᒃᑲᓐᓂᕐᓗᒋᑦ; ᐊᓪᒻᒪ
  • ᑮᓇᐅᔭᓕᐅᕋᓱᐊᕈᑏᑦ ᐊᔾᔨᒌᓐᖏᑦᑐᓄᑦ ᑐᕌᖓᓕᖅᑎᓪᓗᒋᑦ.

ᑐᕌᒐᕆᔭᑦ ᐅᖃᐅᓯᖅᑕᖏᑦ ᒪᓕᒐᓕᐅᕐᕕᖕᒧᑦ ᓴᖅᑭᑕᐅᓛᖅᑐᑦ ᓯᕗᓕᖅᑎ ᐊᕿᐊᕈᕐᒧᑦ ᒫᔾᔨᐅᓕᖅᐸᑦ ᑲᒥᓴᓇᐅᑉ ᐅᖃᐅᓯᕐᖓᐅᑎᖏᑦ ᐅᖃᐅᓯᕆᔭᐅᓕᖅᐸᑦ ᒪᑐᐃᖅᓯᒋᐊᖅᑎᓪᓗᒍ ᐊᕐᕕᓂᓕᕆᔭᑦ ᒪᓕᒐᓕᐅᖅᑏᑦ ᑐᒡᓕᐊᓂ ᑲᑎᒪᕐᔪᐊᕐᓂᖃᓯᒋᐊᖅᐸᑕ.

ᔭᓄᐊᕆ 2022 ᐱᒋᐊᓕᓵᕐᓂᖓᓂ, ᒥᓂᔅᑕᐃᑦ ᑲᑎᒪᔨᖏᑦ ᐊᕗᑎᓯᒪᒃᑲᓐᓂᕐᓗᑎᒃ ᑲᑎᒫᖅᑐᑦ ᐅᖃᐅᓯᖃᕐᓂᐊᕐᓗᑎᒃ ᓇᓗᓇᐃᖅᑕᐅᓯᒪᔪᓂᒃ ᑐᕌᒐᕆᔭᐅᓂᐊᖅᑑᑉ ᐃᓗᓕᖏᓐᓂᒃ. ᓯᕗᓪᓕᖅᐹᖅᓯᐅᑏᑦ ᐅᖃᐅᓯᕆᔭᐅᓂᐊᖅᑐᑦ ᒪᓕᒐᓕᐅᖅᑎᓕᒫᑦ ᑲᑎᒪᓕᖅᐸᑕ ᔭᓗᐊᕆᐅᑉ ᓄᓐᖑᐸᓗᐊᓂ ᐱᖃᑎᒋᔭᐅᓗᑎᒃ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ, ᐊᒻᒪ ᑭᖑᓪᓕᖅᐹᖅᓯᐅᑏᑦ ᐱᔭᕇᖅᑕᐅᓗᑎᒃ ᕕᕗᐊᕆᐅᑉ ᑕᖅᑭᖓᑕ ᐱᒋᐊᕐᓂᖓᓂ.

ᒪᓕᒐᓕᐅᖅᑎᑐᐃᓐᓇᐃᑦ ᑲᑎᒪᔨᖏᑦᑕ ᐃᒃᓯᕙᐅᑕᖓᑦ ᐊᒻᒪ ᐊᐃᕕᓕᖕᒧᑦ ᒪᓕᒐᓕᐅᖅᑎ ᓵᓚᒪᓐ ᒥᑭ ᐃᒪᐃᓕᓚᐅᖅᑐᖅ, “ᒪᓕᒐᓕᐅᖅᑎᐅᖃᑎᒃᑲ ᐊᒻᒪ ᐅᕙᖓ ᓂᕆᐅᒃᐳᒍᑦ ᒪᓕᒐᓕᐅᕐᕕᖕᒧᑦ ᓴᖅᑭᑕᐅᓛᕐᓂᐊᕐᓂᖓᓂ ᓄᑕᑦ ᒐᕙᒪᑦ ᑐᕌᒐᕆᓂᐊᖅᑕᖓᑦ, ᑖᓐᓇ ᐊᑐᖅᑕᐅᓗᓂ ᑐᑭᒧᐊᒍᑎᒋᓂᐊᖅᑕᕗᑦ ᐊᑐᓕᖅᑎᑕᐅᓂᐊᕐᓂᖓ ᑕᑯᓐᓇᓐᖑᐊᖅᑕᕗᑦ ᓄᓇᕗᒻᒥ, ᐊᖅᑯᑎᒋᓗᒋᑦ ᑮᓇᐅᔭᑦ ᐊᑐᕈᒫᕐᓂᐊᖅᑐᑦ ᐊᒻᒪ ᐱᖁᔭᒃᓴᓕᕆᓂᐅᑉ ᐱᕙᓪᓕᐊᔾᔪᓯᖏᑦ.”

ᒪᓕᒐᓕᐅᖅᑏᑦ ᓇᓗᓇᐃᖅᓯᓚᐅᕐᒥᔪᑦ ᓂᕈᐊᕐᕖᑦ ᑭᒡᓕᓕᐅᖅᑕᐅᓯᒪᓂᖏᓐᓄᑦ ᑲᒥᓴᓂᒃ ᓴᖅᑭᑦᑎᓛᕐᓂᐊᕐᓂᕐᒥᖕᓂᒃ 2022−ᒥ, ᐊᑐᕐᓗᒍ ᓄᓇᕗᒻᒥ ᓂᕈᐊᕐᓂᓕᕆᓂᕐᒧᑦ ᐱᖁᔭᕐᔪᐊᖅ. ᐅᖃᖅᑎ ᑑᓂ ᐋᖁᐊᖅ ᐃᒪᐃᓕᓚᐅᖅᑐᖅ, “ᒪᓕᒐᓕᐅᕐᕕᒃ ᓴᖅᑭᑦᑎᓛᖅᑐᖅ ᑲᒥᓴᓄᑦ ᐃᓕᔪᒪᔪᓂᒃ ᐊᑎᕐᒥᓂᒃ ᓴᒡᕙᐃᖁᓪᓗᒋᑦ ᑲᒥᓴᒃᑯᓐᓄᑦ ᐃᓕᔪᒪᑐᐊᕈᑎᒃ.”

ᐃᖃᓗᒃᑑᑦᑎᐊᕐᒦᓐᓂᕐᒥᓂᒃ, ᒪᓕᒐᓕᐅᖅᑏᑦ ᑐᓐᖓᓱᒃᑎᑕᐅᓚᐅᖅᑐᑦ ᓯᕗᓕᖅᑎᐅᑉ ᑐᖏᓕᐊᓄᑦ ᐊᒻᒪ ᐃᖃᓗᒃᑑᑦᑎᐊᑉ ᒪᓕᒐᓕᐅᖅᑎᐊᓄᑦ ᐹᒥᓚ ᕼᐋᖁᕐᖔᖅ ᒍᕌᔅᒧᑦ. ᒪᓕᒐᓕᐅᖅᑏᑦ ᐊᑕᐅᓯᐅᓐᖏᑦᑐᓄᑦ ᑐᓐᖓᓱᒃᑎᑕᐅᖃᑦᑕᓚᐅᖅᑐᑦ, ᐃᓚᓕᐅᓪᓗᒍ ᓄᓇᕗᑦ ᓯᓚᑦᑐᖅᓴᕐᕕᐅᑉ ᕿᑎᕐᒥᐅᓂ ᐃᓕᓐᓂᐊᕐᕕᐊ ᐊᒻᒪ ᐃᓕᓴᖅᑐᓄᑦ ᑐᔪᕐᒥᕖᑦ ᐃᒡᓗᕐᔪᐊᑦ, ᒪᑐᐃᖅᑕᐅᓂᖓ ᐊᕐᓇᑦ ᕿᒫᕕᒃ, ᐊᒻᒪ ᑕᑯᔭᖅᑐᖅᑎᑕᐅᓚᐅᕆᓪᓗᑎᒃ ᐃᖃᓗᒃᑑᑦᑎᐊᕐᒥ ᐱᒡᒐᖅᑐᓄᑦ ᐸᖅᑭᕕᖕᒥᒃ ᐊᒻᒪ ᑲᓇᑕᐅᑉ ᖁᑦᑎᖕᓂᖅᐹᖓᓂ ᖃᐅᔨᓴᐃᕕᖕᒥᒃ.

ᐊᕐᕕᓂᓕᒋᔭᑦ ᒪᓕᒐᓕᐅᖅᑏᑦ ᓯᕗᓪᓕᖅᐹᒥᒃ ᑲᑎᒪᕐᔪᐊᕐᓂᖃᕆᐊᓛᖅᑐᑦ ᕕᕗᐊᕆ 21, 2022-ᒥ.

-30-

ᑐᑭᓯᒋᐊᕐᕕᒋᔪᓐᓇᖅᑕᐃᑦ:

ᔮᓐ ᑯᐊᒃ
ᒪᓕᒐᓕᐅᕐᕕᖕᒧᑦ ᑎᑎᕋᖅᑎ
ᖃᕆᓴᐅᔭᒃᑯᑦ ᑐᕌᕈᑖ: LegInfo [at] assembly [dot] nu [dot] ca

ᓯᒪ ᓴᕼᐋ ᔨᐅᕋᑭ
ᐱᕙᓪᓕᐊᔪᓕᕆᔨ ᓯᕗᓕᖅᑎᐅᑉ ᑎᑎᕋᕐᕕᐊᓂ
ᖃᕆᓴᐅᔭᒃᑯᑦ ᑐᕌᕈᑖ: szerehi6 [at] gov [dot] nu [dot] ca

AttachmentSize
ᐊᑐᖅᑕᐅᓯᒪᓐᖏᑦᑐᖅ ᐊᕗᑎᓯᒪᓪᓗᑎᒃ ᑲᑎᒪᓂᖅ ᓇᓗᓇᐃᖅᓯᕗᖅ ᐊᑕᐅᓯᕐᒥᒃ ᓂᐱᖃᕐᓗᑎᒃ ᐱᔭᒃᓴᖅᑖᒥᒍᑦ ᓯᕗᓪᓕᐅᑎᓯᒪᔭᑦ ᐱᓕᕆᐊᖑᓂᐊᕐᓂᖏᓐᓂᒃ153.64 KB