ᐱᒐᓱᐊᕈᒪᔪᓄᑦ ᑐᓐᖓᓱᑦᑎᑎᔾᔪᑎ ᑐᑭᓯᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ

Feb 3 2020

ᐱᒐᓱᐊᕈᒪᔪᑦ ᑐᓐᖓᓱᑦᑎᑕᐅᕗᑦ ᐃᖅᑲᓇᐃᔮᒧᑦ ᑐᑭᓯᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᓗᓂ ᓄᓇᕗᒧᑦ. ᑖᓐᓇ ᑕᓪᓕᒪᓄᑦ ᐊᕐᕌᒍᓄᑦ, ᒪᓕᒐᖅᑎᒍᑦ ᑎᒃᑯᐊᖅᑕᐅᓯᒪᓂᐅᔪᖅ.

ᑖᓐᓇ ᑐᑭᓯᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ ᐃᒻᒥᑰᖓᓪᓗᓂ ᐱᓕᕆᔨᐅᔪᖅ ᒪᓕᒐᓕᐅᖅᕕᒻᒧᑦ. ᑖᓐᓇ ᑲᒥᓴᓇ ᐃᓂᖓᓄᑦ ᑎᒃᑯᐊᖅᑕᐅᓲᖅ ᒪᓕᑦᑐᑎᒃ ᐊᑐᓕᖁᔭᓕᐊᒥᓂᕐᒥᒃ ᒪᓕᒐᓕᐅᖅᕕᒻᒥ, ᒪᓕᑦᑐᒋᑦ ᐃᓯᕈᓐᓇᐅᑎᑦ ᑐᑭᓯᐅᒪᔾᔪᑎᓄᑦ ᐊᒻᒪ ᓴᐳᔾᔭᐅᓂᖏᓐᓄᑦ ᑲᓐᖑᓇᖅᑐᑦ ᐱᖁᔭᖓᓂᒃ. ᑖᓐᓇ ᐃᖅᑲᓇᐃᔮᖅ ᐱᔪᓐᓇᐅᑎᖃᖅᕕᐅᔪᖅ ᐱᓕᕆᐊᖃᕆᐊᖃᕐᓂᖃᖅᑐᓂᓗ ᐱᓕᕆᐊᖑᒋᐊᓕᓐᓂᑦ ᐊᑖᓃᑦᑐᓂᒃ ᐃᓯᕈᓐᓇᐅᑎᑦ ᑐᑭᓯᐅᒪᔾᔪᑎᓄᑦ ᐊᒻᒪ ᓴᐳᔾᔭᐅᓂᖏᓐᓄᑦ ᑲᓐᖑᓇᖅᑐᑦ ᐱᖁᔭᖓᑕ. ᐊᔾᔨᖏᑦ ᐱᖁᔭᐅᑉ ᐱᔭᐅᔪᓐᓇᖅᑐᑦ ᐅᕙᓐᖓᑦ: www.nunavutlegislation.ca.

ᓄᓇᕗᑦ ᑲᓇᑕᓕᒫᒥ ᐊᕕᑦᑐᖅᓯᒪᓂᖏᓐᓂ ᓄᑖᖑᓛᖑᒻᒪᑦ ᑕᐃᒫᓪᓗ ᑕᒫᓂ ᐃᖅᑲᓇᐃᔭᕐᓂᖅ ᖁᕕᐊᓇᖅᑐᐊᓘᔪᓐᓇᖅᑐᖅ. ᑖᓐᓇ ᓂᕈᐊᖅᑕᐅᔪᖅ ᐱᓕᕆᓚᐅᖅᓯᒪᒋᐊᓕᒃ ᒪᓕᒐᕐᓂᐊᖅᑎᐅᓂᕐᒥᒃ ᖃᐅᔨᒪᓂᖃᑦᑎᐊᕐᓗᓂ ᐊᓪᓚᕝᕕᓕᕆᓂᐅᑉ ᒪᓕᒐᖏᓐᓂᑦ, ᐱᖃᓯᐅᑎᓗᒋᑦ ᑲᓇᑕᒥ ᓇᓕᐊᓐᓄᑐᐃᓐᓇᖅ ᓴᖑᕙᓪᓕᐊᓂᐅᔪᓂᑦ ᐱᔾᔪᑎᖃᖅᑐᓂᒃ ᑐᓴᐅᒪᔾᔪᑎᓕᕆᓂᕐᒥᒃ ᐊᒻᒪᓗ ᑲᓪᖑᓇᖅᑐᓕᕆᓂᕐᒥᒃ ᐱᓕᒐᕐᓂᒃ. ᐱᓕᕆᓚᐅᖅᓯᒪᓂᖏᑦ ᐃᓚᖃᕆᐊᖃᕐᒥᔪᑦ ᐅᑉᐱᓇᕐᒪᖔᑕ ᖃᐅᔨᓴᕋᒃᓴᐅᓗᑎᒃ ᑮᓇᐅᔭᓕᕆᓂᕐᒥ ᐊᒻᒪᓗ ᐃᖅᑲᓇᐃᔭᖅᑎᓕᕆᓂᕐᒥ. ᓄᓇᕗᒥ ᐊᓪᓚᕝᕕᖏᑦ ᒐᕙᒪᖓᑕ ᒥᑭᔫᑕᐅᓂᖅᓴᐅᒐᓗᐊᑦ ᐊᓯᐊᓂ ᑲᓇᑕᒥ ᒐᕙᒪᖃᖅᕕᐅᔪᓂᑦ, ᑕᐃᒫᓪᓗ ᐱᒐᓱᐊᖅᑐᑦ ᖃᐅᔨᒪᒋᐊᓖᑦ ᐊᔾᔨᐅᖏᑦᑐᒃᑯᑦ ᖃᓄᖅᑑᖃᑦᑕᕆᐊᖃᕋᔭᕐᒪᑕ.

ᓇᓗᓇᐃᖅᑐᖅᓯᒪᔪᑦ ᐃᖅᑲᓇᐃᔮᑉ ᓇᓗᓇᐃᖅᑐᕈᑎᖓ ᐱᔭᐅᔪᓐᓇᖅᑐᖅ ᐊᓪᓚᕝᕕᖓᓂᑦ ᒪᓕᒐᓕᐅᖅᕕᐅᑉ ᐊᒻᒪᓗ ᐲᖅᑕᐅᔪᓐᓇᖅᑐᓂ ᒪᓕᒐᓕᐅᖅᕕᐅᑉ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓂᒃ ᐅᕙᓂ www.assembly.nu.ca. ᐊᕐᕌᒍᑕᒫᖅᓯᐅᑎᑦ ᐅᓂᒃᑳᓕᐊᒥᓃᑦ ᐊᓯᖏᓪᓗ ᐅᖃᓕᒫᒐᓕᕆᓯᒪᔭᖏᑦ ᐊᓪᓚᕝᕕᖓᑕ ᑐᑭᓯᐅᒪᔾᔪᑎᓕᕆᓂᕐᒧᑦ ᐊᒻᒪᓗ ᑲᓐᖑᓇᖅᑐᓕᕆᓂᕐᒧᑦ ᑲᒥᓴᓇᐅᑉ ᐊᑐᐃᓐᓇᐅᒻᒥᔪᑦ ᐅᕙᓂ: www.atipp-nu.ca.

ᑐᒃᓯᕋᐅᑎᑦ ᓇᓗᓇᐃᖅᓯᓯᒪᑦᑎᐊᕆᐊᓖᑦ ᖃᓄᖅ ᐱᓯᒪᒻᒪᖔᕐᒥᒃ ᐱᒋᔭᐅᖅᑳᕆᐊᓕᓐᓂᒃ ᐊᔪᓐᖏᓐᓂᐅᔭᕆᐊᓕᓐᓂᓪᓗ ᓇᓗᓇᐃᖅᓯᒪᔪᓂᒃ ᐃᖅᑲᓇᐃᔮᑉ ᓇᓗᓇᐃᖅᑐᕈᑎᖓᓂ. ᑮᓇᐅᔾᔭᓵᒃᓴᖏ ᑕᒫᓃᑦᑐᑦ $129,468-ᒥᑦ ᑕᒪᐅᖓ $184,955−ᒧᑦ ᐊᕐᕌᒍᑕᒫᖅ. ᑖᓐᓇᓕ ᓂᕈᐊᖅᑕᐅᔪᖅ ᐃᖃᓗᒻᒥᐅᑕᐅᓐᖏᑉᐸᑦ ᐅᓪᓗᕐᓂ ᓂᕈᐊᖅᑕᐅᕕᖓᓂ, ᐊᐅᓪᓛᖅᑎᕈᑎᒃᓴᓄᑦ ᐃᑲᔪᖅᑕᐅᒐᔭᖅᑐᖅ. ᐃᑲᔫᓯᐊᖅᑕᖅᑐᒥᒃ ᐃᓪᓗᒃᓴᖃᖅᑎᑕᑕᐅᒐᔭᖅᑐᖅ. ᐱᒐᓱᐊᕈᑏᑦ ᐱᔭᐅᖃᑦᑕᕈᓐᓇᓂᐊᖅᑐᑦ ᐃᓱᖃᕐᓗᒍ 5:00 ᐅᓐᓄᓴᒃᑯᑦ ᑕᓪᓕᕐᒥ, ᒫᑦᓯ 6, 2020. ᖃᐅᔨᒪᓂᐊᖅᑯᓯ ᑕᐃᒃᑯᐊᑐᐊᖅ ᐱᒐᓱᐊᖅᑐᑦ ᐊᐱᖅᓱᖅᑕᐅᓂᐊᕐᓂᕐᒧᑦ ᓂᕈᐊᖅᑕᐅᔪᑦ ᖃᐅᔨᑦᑲᖅᑕᑐᐊᖑᓛᕐᒪᑕ.

ᑐᒃᓯᕋᐅᑎᑦ ᐊᐱᖅᑯᑎᓪᓗ ᐅᕗᖓ ᑐᕌᖅᑎᑕᐅᔪᓐᓇᖅᑐᑦ:

ᐊᓪᓚᑦᑎᖓ ᑲᑎᒪᔨᓕᕆᔨᑦ ᑲᑎᒪᔨᖏᓐᓄᑦ

ᐊᔾᓚᕝᕕᖓ ᒪᓕᒐᓕᐅᖅᕕᐅᑉ

ᑎᑎᖅᑲᖃᐅᑎᖓ 1200, ᐃᖃᓗᐃᑦ, ᓄᓇᕗᑦ, X0A 0H0

ᐅᖄᓚᐅᑎᖓ: (867) 975-5000

ᓱᑲᔪᒃᑯᑦ: (867) 975-5191

ᖃᕋᓴᐅᔭᒃᑯᑦ: submissions [at] assembly [dot] nu [dot] ca

AttachmentSize
ᐱᒐᓱᐊᕈᒪᔪᓄᑦ ᑐᓐᖓᓱᑦᑎᑎᔾᔪᑎ ᑐᑭᓯᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ142.3 KB
ᐃᓂᐅᑉ ᖃᓄᐃᓕᖓᓂᖓ210.63 KB