ᑲᑎᒪᔨᕋᓛᑦ ᑐᓴᖅᑎᖅᑎᕗᑦ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᖅᑎᑦᑎᓛᕐᒪᑕ ᐱᓪᓗᒋ 2019−ᒥ ᐅᓂᒃᑳᓕᐊᒥᓂᖏᑦ ᑲᓇᑕᐅᑉ ᑕᒻᒪᖅᓯᒪᔪᖅᓯᐅᖅᑎᖓᑕ ᓄᓇᕗᒥ ᒪᓕᒐᓕᐅᖅᕕᒻᒧᑦ

Sep 10 2019 2:25 pm

ᐃᖃᓗᐃᑦ, ᓄᓇᕗᑦ (ᓰᑏᕝᕙ 10, 2019) - ᒪᓕᒐᓕᐅᖅᕕᐅᑉ ᑲᑎᒪᔨᕋᓛᖓ ᓇᐅᑦᓯᖅᑐᖅᑎᐅᔪᖅ ᒐᕙᒪᒃᑯᑦ ᐊᐅᓚᓂᖏᓐᓄᑦ ᑮᓇᐅᔭᖅᑐᕈᑎᖏᓐᓄᓪᓗ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᖅᑎᑦᑎᓛᕐᒪᑕ ᐱᓪᓗᒋᑦ 2019-ᒥ ᐅᓂᒃᑳᓕᐊᒥᓂᖏᑦ ᑲᓇᑕᐅᑉ ᑕᒻᒪᖅᓯᒪᔪᖅᓯᐅᖅᑎᖓᑕ ᓄᓇᕗᒥ ᒪᓕᒐᓕᐅᖅᕕᖓᓄᑦ ᐱᔾᔪᑎᖃᖅᑐᑦ ᐃᑲᔪᖅᓯᖅᑕᐅᒍᑎᖏᓐᓂᑦ ᖁᑦᑎᓂᖅᓴᒥ ᐃᓕᓐᓂᐊᕕᒻᒥ ᐃᓪᓕᐊᖅᑐᑦ ᐊᒻᒪᓗ ᐃᓐᓇᐃᑦ ᐃᓕᓐᓂᐊᖅᑐᑦ, ᓰᑏᕝᕙ 25 ᐊᒻᒪ 26, 2019−ᒥ.

ᐊᓪᓚᕝᕕᖓᑕ ᑲᓇᑕᐅᑉ ᑕᒻᒪᖅᓯᒪᔪᖅᓯᐅᖅᑎᖓᑕ ᐅᓂᒃᑳᓕᐊᒥᓂᖏᑦ ᐲᔭᖅᑕᐅᔪᓐᓇᖅᑐᑦ ᐅᕙᓐᖓᑦ ᖃᕋᓴᐅᔭᒃᑯᑦ ᑐᕌᕈᑎᐅᔪᓂᒃ: https://assembly.nu.ca/sites/default/files/TD-182-5(2)-IN-2019-OAG-Report-re-Support-for-High-School-Students-and-Adult-Learners.pdf ᐊᒻᒪ
http://oag-bvg.gc.ca/internet/docs/nun_201906_i_43388.pdf. ᐊᖏᔪᖅᑲᐅᑏᑦ ᓄᓇᕗᑦ ᒐᕙᒪᖓᑕ ᐃᓕᓐᓂᐊᖅᑐᓕᕆᔨᒃᑯᑦ ᐱᓕᕆᕕᖓᓂᑦ, ᐃᓄᓕᕆᔨᒃᑯᑦ ᐱᓕᕆᕕᖓᓂᑦ ᐊᒻᒪᓗ ᓄᓇᕗᑦ ᓯᓚᑦᑐᓴᖅᕕᒻᒥᑦ ᓴᖅᑭᔮᓛᖅᑐᑦ ᑭᐅᔭᖅᑐᖅᓯᒪᓗᑎᒃ ᑕᓚᕖᓴᒃᑯᑦ ᓈᓚᓐᓂᖃᖅᑎᑦᑎᔪᓂ.

“ᑲᑎᒪᔨᕋᓛᑦ ᓈᓚᓐᓂᖃᖅᑎᑦᑎᓂᖓ ᐱᒻᒪᕆᐊᓘᔪᒥᒃ ᐱᕕᖃᖅᑎᑦᑎᓛᖅᑐᖅ ᒪᓕᒐᓕᐅᖅᕕᒻᒥ ᒪᓕᒐᓕᐅᖅᑎᐅᔪᓂᒃ ᕿᒥᕐᕈᐊᕈᓐᓇᕐᓗᑎᒃ ᖃᓄᑎᒋ ᑖᓐᓇ ᓄᓇᕗᑦ ᒐᕙᒪᖓ ᐱᓕᕆᒐᓱᐊᖅᓯᒪᒻᒪᖔᖅ ᐱᐅᓯᕚᓪᓕᑎᑦᑎᒐᓱᐊᖅᑐᓂ ᐃᑲᔪᖅᓰᔾᔪᑎᓂᒃ ᐊᒻᒪᓗ ᐲᔭᐃᓪᓗᑎᒃ ᐊᐳᖅᑕᕈᑎᐅᔪᓂᒃ ᒪᒃᑯᑦᑐᓄᑦ ᐊᒻᒪᓗ ᐃᓐᓇᕐᓄᑦ ᐃᓕᓐᓂᐊᖅᑎᓄᑦ ᐊᐅᓪᓛᕆᐊᖃᖅᑎᓪᓗᒋ ᐃᓕᓐᓂᐊᕕᒻᒥᒃ ᖁᑦᑎᓂᖅᓴᒥᒃ ᑕᒪᐅᖓ ᓯᓚᑦᑐᓴᖅᕕᒻᒥ ᐃᓕᓐᓂᐊᓂᕐᓄᑦ ᐊᒻᒪᓗ ᐃᖅᑲᓇᐃᔮᓄᑦ. ᑖᓐᓇ ᑲᓇᑕᐅᑉ ᑕᒻᒪᖅᓯᒪᔪᖅᓯᐅᖅᑎᖓᑕ ᐅᓂᒃᑳᓕᐊᒥᓂᖓ ᐃᓗᓕᖃᕐᒪᑦ ᐱᒻᒪᕆᐊᓗᓐᓂᒃ ᐊᑐᓕᖁᔭᓕᐊᒥᓂᕐᓂᒃ, ᑖᒃᑯᐊᓗ ᑲᑎᒪᔨᕋᓛᓂ ᑲᑎᒪᔩᑦ ᓂᕆᐅᑉᐳᑦ ᑕᑯᓂᐊᖅᑐᒋᓪᓗᑎᒃ ᓄᑖᓂᒃ ᐱᓂᐊᕐᓂᕋᕐᓂᐅᔪᓂᒃ ᐊᒻᒪᓗ ᐱᓕᕆᓪᓚᕆᓐᓂᐅᔪᓂᒃ ᒐᕙᒪᒃᑯᓐᓄᑦ ᑭᐅᔾᔪᑎᐅᓪᓗᑎᒃ" ᐅᖃᓚᐅᖅᑐᖅ ᑲᑎᒪᔨᕋᓛᑦ ᐃᒃᓯᕙᐅᑕᖓ ᔮᓐ ᒪᐃᓐ, ᒪᓕᒐᓕᐅᖅᑎ ᐊᕐᕕᐊᑦ ᓂᒋᖓᓄᑦ.

ᑲᑎᒪᔨᕋᓛᑦ ᓈᓚᓐᓂᖃᖅᑎᑦᑎᓂᖓ ᑕᐃᑲᓃᓛᖅᑐᖅ ᒪᓕᒐᓕᐅᖅᕕᐅᑉ ᑲᑎᒪᕐᔪᐊᖅᕕᖓᓂ, ᐱᒋᐊᕐᓗᑎᒃ 1:30−ᒧᐊᖅᑎᓪᓗᒍ ᐅᓐᓄᓴᒃᑯᑦ, ᓯᑎᐱᕆ 25, 2019−ᒥ, ᒪᑐᐃᖓᓗᓂᓗ ᑭᒃᑯᑐᐃᓐᓇᕐᓄᑦ ᑕᑯᕋᓐᓈᕆᐊᕈᒪᔪᓄᑦ ᒪᓕᒐᓕᐅᖅᕕᐅᑉ ᐳᓛᖅᕕᖓᓂ. ᓈᓚᓐᓂᖅ ᑕᓚᕖᓴᒃᑯᑦ ᑕᑯᒃᓴᐅᓛᖅᑐᖅ ᓄᓇᓕᓐᓂ ᑕᓚᕖᓴᒃᑰᕈᑎᖏᒍᑦ ᐊᒻᒪᓗ ᐊᖏᕐᕋᒥ ᖃᖓᑦᑕᖅᑎᑕᐅᓯᒪᔪᒃᑯᑦ ᑕᓚᕖᓴᒃᑰᕈᑎᓄᑦ ᕕᐊᓪᑯᑦ (513) ᐊᒻᒪ ᓵᒃᑯᑦ (289 – ᐱᑐᖃᖅ/ 489 ᓄᑖᓂ). ᓈᓚᓐᓂᖅ ᐅᕙᓂ ᖃᕋᓴᐅᔭᒃᑯᑦ ᑕᑯᒃᓴᐅᑦᑕᐅᑎᒋᓛᕐᒥᔪᖅ: http://video.isilive.ca/nunavut/.


-30-


ᑐᑭᓯᒋᐊᕈᒪᒍᒃᓯ:ᔮᓐ ᑯᕘᒃ, ᓄᓇᕗᒥ ᒪᓕᒐᓕᐅᕕᐅᑉ ᑎᑎᕋᖅᑎᖓ
ᐅᖄᓚᐅᑖ: (867) 975-5000

 

AttachmentSize
ᑲᑎᒪᔨᕋᓛᑦ ᑐᓴᖅᑎᖅᑎᕗᑦ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᖅᑎᑦᑎᓛᕐᒪᑕ ᐱᓪᓗᒋ 2019−ᒥ ᐅᓂᒃᑳᓕᐊᒥᓂᖏᑦ ᑲᓇᑕᐅᑉ ᑕᒻᒪᖅᓯᒪᔪᖅᓯᐅᖅᑎᖓᑕ ᓄᓇᕗᒥ ᒪᓕᒐᓕᐅᖅᕕᒻᒧᑦ149.29 KB