ᑲᑎᒪᔨᕋᓛᑦ ᓴᖅᑮᕗᑦ ᖃᖓᒃᑰᓂᕆᓛᖅᑕᖏᓐᓂᑦ ᑕᓚᕖᓴᒃᑰᕐᓗᑎᒃ ᓈᓚᓐᓂᐅᓛᖅᑐᑦ

Mar 26 2019

ᐃᖃᓗᐃᑦ, ᓄᓇᕗᑦ (ᒫᑦᓯ 26, 2019) - ᒪᓕᒐᓕᐅᖅᕕᐅᑉ ᑲᑎᒪᔨᕋᓛᖓ ᓇᐅᑦᓯᖅᑐᖅᑎᐅᔪᖅ ᒐᕙᒪᒃᑯᑦ ᐊᐅᓚᓂᖏᓐᓂᑦ ᑮᓇᐅᔭᖅᑐᕈᑎᒥᓂᖏᓐᓂᓪᓗ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᓛᕐᒪᑕ ᐄᐳᕈ 9-11, 2019−ᒥ, ᐱᔾᔪᑎᖃᕐᓗᑎᒃ ᒫᓐᓇᓕᓴᐅᓛᖑᔪᓂᑦ ᐊᕐᕋᒍᑕᒫᖅᓯᐅᑎᓂᒃ ᐅᓂᒃᑳᓕᐊᒥᓂᖏᓐᓂᒃ ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᑉ ᐊᒻᒪᓗ ᐊᓪᓚᕝᕕᖓᑕ ᑭᒡᒐᑐᖅᑎᐅᔪᖅ ᓱᕈᓯᕐᓄᑦ ᒪᒃᑯᑦᑐᓄᓪᓗ. ᑕᒪᒃᑮᒃ ᐃᖅᑲᓇᐃᔮᒃ ᐃᒻᒥᒃᑰᖅᑐᑎᒃ ᐊᐅᓚᓲᖑᔪᑦ ᐱᓕᕆᔨᐅᓪᓗᑎᒃ ᒪᓕᒐᓕᐅᖅᕕᒻᒧᑦ.

ᑭᒡᒐᑐᖅᑎᐅᔪᖅ ᓱᕈᓯᕐᓄᑦ ᒪᒃᑯᑦᑐᓄᓪᓗ ᓴᖅᑭᔮᕐᓂᖓ ᑲᑎᒪᔨᕋᓛᑦ ᓵᖓᓂ ᐱᒋᐊᓛᖅᑐᖅ 0:900-ᒥ ᐅᓪᓛᒃᑯᑦ ᐊᐃᑉᐱᕐᒥ, ᐄᐳᕈ 9, 2019. ᒫᓐᓇᓕᓴᐅᓛᖁᑎᖓ ᐊᕐᕌᒍᑕᒫᖅᓯᐅᑎ ᐅᓂᒃᑳᓕᐊᒥᓂᖅ ᐲᖅᑕᐅᔪᓐᓇᖅᑐᖅ ᐅᕙᓐᖓᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᓐᓂᑦ: https://assembly.nu.ca/sites/default/files/TD-70-5(2)-IN-RCYO-2017-2018-Annual-Report.pdf ᐊᒻᒪᓗ http://rcynu.ca/sites/rcynu.ca/files/RCYO%202017-2018%20Annual%20Report_.... ᐱᓕᕆᔩᑦ ᐊᖏᔪᖅᑲᐅᑏᑦ ᓄᓇᕗᑦ ᒐᕙᒪᖓᑕ ᐱᓕᕆᕕᖏᓐᓃᖔᖅᑐᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂᑦ, ᐃᓕᓐᓂᐊᖅᑐᓕᕆᔨᒃᑯᓐᓂᑦ, ᐊᒻᒪᓗ ᒪᓕᒐᓕᕆᔨᒃᑯᓐᓂᑦ ᓴᖅᑭᔮᓛᕐᒥᔪᑦ ᑕᓚᕖᓴᒃᑰᖅᑐᑎᒃ ᓈᓚᓐᓂᕐᒥ.

“ᑲᑎᒪᔨᕋᓛᑦ ᑕᓚᕖᓴᒃᑰᕐᓗᑎᒃ ᓈᓚᓐᓂᖓ ᐱᒻᒪᕆᐊᓘᔪᒥᒃ ᐱᕕᒃᓴᖃᖅᑎᑦᑎᓛᕐᒪᑦ ᖃᐅᔨᒐᓱᒍᓐᓇᓂᕐᒥᒃ ᖃᓄᑎᒋ ᐱᓕᕆᓂᕆᓯᒪᔭᖓ ᐊᒻᒪᓗ ᑮᓇᐅᔭᖅᑐᕐᓂᕆᓯᒪᔭᖓ ᑕᑯᒃᓴᐅᔪᒃᑯᑦ ᐊᑦᑐᐃᓂᖃᖅᓯᒪᒻᒪᖔᑕ ᖃᓄᐃᓐᖏᑦᑎᑕᐅᒐᓱᐊᕐᓂᖏᓐᓂᑦ ᓄᓇᕗᒥ ᓱᕈᓰᑦ ᒪᒃᑯᑦᑐᓪᓗ,” ᐅᖃᓚᐅᖅᑐᖅ ᑲᑎᒪᔨᕋᓛᑦ ᐃᒃᓯᕙᐅᑕᖓ ᔮᓐ ᒪᐃᓪ, ᒪᓕᒐᓕᐅᖅᑎᐅᔪᖅ ᐊᕐᕕᐊᑦ ᐅᐊᓐᓇᖓᓄᑦ− ᑎᑭᕋᕐᔪᐊᕐᒧᓪᓗ. "ᒪᓕᒐᓕᐅᖅᑏᑦ ᐃᓱᒪᒃᓴᖅᓯᐅᕈᑎᖃᓛᕐᒥᔪᑦ ᖃᓄᖅ ᑕᒪᒃᑯᐊ ᒐᕙᒪᒃᑯᑦ ᐱᓕᕆᕕᓪᓗᐊᑕᖏᑕ ᐊᐅᓚᓂᕆᕙᑦᑕᖏᑦ ᓯᕗᓪᓕᐅᑎᑉᐸᑦᑕᖏᓪᓗ ᐃᓱᒪᖃᕆᐊᖅᓯᒪᕙᒻᒪᖔᑕ ᑖᒃᓱᒪ ᐊᓪᓚᕝᕕᐅᑉ ᐱᓕᕆᓂᕆᔭᖏᓐᓂᑦ."

ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᑉ ᓴᖅᑭᔮᕐᓂᖓ ᑲᑎᒪᔨᕋᓛᑦ ᓵᖓᓂ ᐱᒋᐊᓛᖅᑐᖅ 1:30−ᒥ ᐅᓐᓄᓴᒃᑯᑦ ᐱᖓᑦᓯᕐᒥ, ᐄᐳᕈ 10, 2019. ᑖᒃᓱᒪ ᐊᓪᓚᕝᕕᐅᑉ ᒫᓐᓇᓕᓴᐅᓛᖁᑎᖓ ᐊᕐᕌᒍᑕᒫᖅᓯᐅᑎ ᐅᓂᒃᑳᓕᐊᒥᓂᖅ ᐲᖅᑕᐅᔪᓐᓇᖅᑐᖅ ᐅᕙᓐᖓᑦ ᖃᕋᓴᐅᔭᒃᑯᑦ ᐃᑭᐊᖅᑭᕕᓐᓂᑦ: https://assembly.nu.ca/sites/default/files/TD-66-5(2)-IN-IPC-Annual-Report-2017-18.pdf and https://atipp-nu.ca/documents/annual-reports/download-info/annual-report.... ᐱᓕᕆᔩᑦ ᐊᖏᔪᖅᑲᐅᑏᑦ ᓄᓇᕗᑦ ᒐᕙᒪᖓᑕ ᐱᓕᕆᕕᖏᓐᓃᖔᖅᑐᑦ ᓯᕗᓕᖅᑎᓂᒃ ᒐᕙᒪᐅᖃᑎᒌᓂᓪᓗ ᐱᓕᕆᐊᖃᖅᑎᓂᒃ ᐊᒻᒪᓗ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓂᑦ ᓴᖅᑭᔮᓛᕐᒥᔪᑦ ᑕᓚᕖᓴᒃᑰᖅᑐᑎᒃ ᓈᓚᓐᓂᕐᒥ.

"ᐱᒻᒪᕆᐅᔪᓂᒃ ᐊᓯᔾᔩᒍᑎᐅᔪᓂᒃ ᐃᓯᕈᓐᓇᐅᑎᓄᑦ ᑐᑭᓯᐅᒪᔾᔪᑎᓄᑦ ᐊᒻᒪᓗ ᓴᐳᔾᔨᒍᑎᐅᔪᓄᑦ ᑲᓐᖑᓇᖅᑐᓄᑦ ᐱᖁᔭᖓᓂᒃ ᑲᔪᓯᑎᑕᐅᓯᒪᔪᖃᕐᒪᑦ ᒪᓕᒐᓕᐅᖅᕕᒻᒥ ᐊᕐᕌᒍᓂ ᒪᕐᕉᓐᓂ ᐊᓂᒍᕋᑖᖅᓯᒪᔫᓐᓂ," ᔮᓐ ᒪᐃ ᐅᖃᓚᐅᖅᑐᖅ. "ᑲᑎᒪᔨᕋᓛᑦ ᑕᓚᕖᓴᒃᑰᕐᓗᑎᒃ ᓈᓚᓐᓂᕆᓛᖅᑕᖓ ᐊᒥᓱᑲᓪᓚᓐᓂᒃ ᐃᓱᒫᓘᑎᓂᒃ ᐃᓱᒪᒃᓴᖅᓯᐅᕈᑎᖃᖅᕕᐅᓛᖅᑐᖅ, ᐃᓚᖃᖅᑐᓂᒃ ᒐᕙᒪᒃᑯᑦ ᖃᓄᐃᓕᒋᐊᖅᓯᒪᓕᕐᒪᖔᑕ ᐱᓪᓗᒋᑦ ᐊᑐᓕᖁᔭᓕᐊᕆᕙᑦᑕᖏᑦ ᐊᕐᕌᒍᑕᖅᓯᐅᑎᓂ ᐅᓂᒃᑳᓕᐊᕆᕙᑦᑕᖏᓐᓂ ᑖᒃᓱᒪ ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᔫᑉ."

ᑲᑎᒪᔨᕋᓛᑦ ᓈᓚᓐᓂᖃᕐᓂᖓ ᑕᐃᑲᓃᓛᖅᑐᖅ ᒪᓕᒐᓕᐅᖅᕕᐅᑉ ᑲᑎᒪᕐᔪᐊᖅᕕᖓᓂ ᐊᒻᒪᓗ ᑭᒃᑯᓕᒫᓄᑦ ᒪᑐᐃᖓᓛᖅᑐᓂ ᑕᑯᕋᓐᓈᕆᐊᕈᒪᔪᓄᑦ ᒪᓕᒐᓕᐅᖅᕕᒻᒧᑦ ᐳᓛᕆᐊᖅᓯᒪᔪᑦ ᐃᓂᖏᓐᓂᑦ. ᓈᓚᓐᓃᑦ ᓄᓇᓕᓐᓂ ᑕᑯᒃᓴᐅᓛᖅᑐᑦ ᑲᓱᖅᑎᑕᐅᓯᒪᔪᒃᑯᑦ ᐊᒻᒪᓗ ᑲᖓᑦᑕᖅᑎᑕᐅᓯᒪᔪᒃᑯᑦ ᑕᒪᐅᓇ ᕕᐊᓪ (ᓇᓴᐅᑎᖓ 513) ᐊᒻᒪᓗ ᓵ (ᓈᓴᐅᑎᖓ 289 − ᐱᑐᖃᑦ / ᓈᓴᐅᑎᖓ 489 - ᓄᑖᑦ ᓴᖅᑭᔮᕈᑎ) ᓴᖅᑭᔮᕈᑎᑎᒍᑦ.

-30-

ᑐᑭᓯᒃᑲᓐᓂᕈᑎᓂᒃ ᐅᕙᓐᖓᑦ ᐱᔪᓐᓇᖅᑐᓯ:
ᔮᓐ ᑯᕘᒃ, ᑎᑎᕋᖅᑎ ᓄᓇᕗᑦ ᒪᓕᒐᓕᐅᖅᕕᖓᓄᑦ
Tel: (867) 975-5000

AttachmentSize
ᑲᑎᒪᔨᕋᓛᑦ ᓴᖅᑮᕗᑦ ᖃᖓᒃᑰᓂᕆᓛᖅᑕᖏᓐᓂᑦ ᑕᓚᕖᓴᒃᑰᕐᓗᑎᒃ ᓈᓚᓐᓂᐅᓛᖅᑐᑦ161.54 KB