ᒪᓕᒐᓕᐅᕐᕕᒃ ᐊᑐᓕᖁᔨᕗᑦ ᑎᒃᑯᐊᖅᑕᐅᓂᖓᓂᒃ ᑐᓴᐅᒪᖃᑦᑕᐅᑎᓂᕐᒧᑦ ᑲᖖᒍᓇᖅᑐᓕᕆᓂᕐᒧᓪᓗ ᑲᒥᓯᓇᒧᑦ ᓄᓇᕗᒻᒥ

Nov 3 2020

ᐃᖃᓗᐃᑦ, ᓄᓇᕗᑦ (ᓄᕕᐱᕆ 3, 2020) - ᒪᓕᒐᓕᐅᕐᕕᖕᒥ ᐊᖏᖅᓯᓚᐅᖅᐳᑦ ᐱᖁᔨᕗᖔᕈᑎᒥᒃ ᑲᑎᒪᕐᔪᐊᖅᑎᓪᓗᒋᑦ ᓄᕕᐱᕆ 2, 2020-ᒥ, ᐊᑐᓕᖁᔨᓪᓗᑎᒃ ᒥᔅᑕ ᒍᕌᒻ ᔅᑎᐅᓪ ᑎᒃᑯᐊᖅᑕᐅᖁᓪᓗᒍ ᓄᓇᕗᒻᒥ ᓄᑖᖑᓪᓗᓂ ᑐᓴᐅᒪᖃᑦᑕᐅᑎᓂᕐᒧᑦ ᑲᖖᒍᓇᖅᑐᓕᕆᓂᕐᒧᓪᓗ ᑲᒥᓯᓇᐅᑦ ᐃᓂᖓᓄᑦ. ᑖᓐᓇ ᐱᖁᔨᕗᖔᕈᑦ ᐊᑕᖏᕐᑐᑎᒃ ᐊᑐᓕᖅᑎᑕᐅᓚᐅᖅᑐᖅ ᒪᓕᒐᓕᐅᕐᕕᖕᒥ.

ᐃᓗᓕᖓ 61 ᑕᕝᕙᓂ ᐊᑐᐃᓐᓇᖃᕐᓂᕐᒧᑦ ᑐᓴᐅᒪᔾᔪᑎᓂᒃ ᐊᒻᒪᓗ ᐃᒻᒥᒨᖅᑐᑦ ᓴᐳᒻᒥᔭᐅᓂᖏᓐᓄᑦ ᐱᖁᔭᖅ ᐱᔪᓐᓇᖅᑎᑦᑎᖕᒪᑦ ᓄᓇᕗᒻᒥ ᑲᒥᓯᓇᒥᒃ, ᐊᑐᓕᖁᔭᐅᓚᐅᖅᑎᓪᓗᒍ ᒪᓕᒐᓕᐅᕐᕕᖕᒥᑦ, ᑎᒃᑯᐊᖅᓯᔭᕆᐊᖃᖅᐳᖅ ᑐᓴᐅᒪᖃᑦᑕᐅᑎᓂᕐᒧᑦ ᑲᖖᒍᓇᖅᑐᓕᕆᓂᕐᒧᓪᓗ ᑲᒥᓯᓇᒥᒃ ᑕᐃᒪᐃᓕᖓᓂᐅᕐᓗᓂ ᐊᕐᕌᒍᓄᑦ ᑕᓪᓕᒪᓄᑦ (5). ᑖᓐᓇ ᐃᓂᐅᔪᖅ ᐃᓚᒋᔭᐅᖕᒪᑦ ᖃᔅᓯᑲᓪᓚᖕᓄᑦ ᐃᒻᒥᒃᑰᖅᑐᓂᒃ ᐃᖅᑲᓇᐃᔭᖅᑐᓄᑦ ᐅᓂᒃᑳᑲᐅᑎᒋᓲᖑᓪᓗᑎᒃ ᒪᓕᒐᓕᐅᕐᕕᖕᒧᑦ. ᑖᒃᑯᐊ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑦ ᒪᓕᒐᓕᐅᕐᕕᖕᒧᑦ ᑕᖅᑳᖖᒐᑦ ᑐᖖᒐᓱᒃᑎᑦᑎᒪᐅᕐᒪᑕ ᐱᓇᓱᒍᒪᔪᓂᒃ ᑖᔅᓱᒧᖓ ᐃᓂᐅᔪᒧᑦ. ᑎᒃᑯᐊᖅᑕᐅᓂᖓ ᒥᔅᑕ ᔅᑎᐅᓪ ᐊᑐᓕᕐᓂᐊᖅᐳᖅ ᔮᓐᓄᐊᕆ 11, 2021.

ᑖᓐᓇ ᑐᓴᐅᒪᖃᑦᑕᐅᑎᓂᕐᒧᑦ ᑲᖖᒍᓇᖅᑐᓕᕆᓂᕐᒧᓪᓗ ᑲᒥᓯᓇ ᐊᔾᔨᒌᖏᑦᑐᓂᒃ ᑲᒪᒋᔭᒃᓴᖃᕐᒪᑦ ᐱᖁᔭᐅᑦ ᐃᓗᐊᓂ, ᐱᖃᓯᐅᑎᓪᓗᒍ ᓇᐅᑦᑎᖅᓱᕐᓂᖅ ᒐᕙᒪᒃᑯᑦ ᒪᓕᑦᑎᐊᕋᓗᐊᕐᒪᖔᑕ ᐱᖁᔭᕐᓂᒃ. ᑖᓐᓇ ᑐᓴᐅᒪᖃᑦᑕᐅᑎᓂᕐᒧᑦ ᑲᖖᒍᓇᖅᑐᓕᕆᓂᕐᒧᓪᓗ ᑲᒥᓯᓇ ᑐᓂᓯᖃᑦᑕᖅᐳᖅ ᐊᕐᕌᒍᑕᒫᕐᓯᐅᑦ ᐅᓂᒃᑳᒥᒃ ᒪᓕᒐᓕᐅᕐᕕᖕᒧᑦ.

ᐅᖃᖅᑎ ᒪᓕᒐᓕᐅᕐᕕᖕᒧᑦ ᐹᓪ ᖁᐊᓴ ᐅᖃᓚᐅᖅᐳᖅ, “ᒍᕌᒻ ᔅᑎᐅᓪ ᐱᓕᒻᒪᒃᓯᒪᓂᕐᒧᑦ ᐊᑐᖃᑦᑕᖅᓯᒪᔭᖓ ᒪᓕᒐᖅᑎᒍᑦ, ᐃᓕᓐᓂᐊᖅᓯᒪᓂᒃᑯᑦ ᐊᒻᒪᓗ ᒐᕙᒪᒃᑯᑎᒍᑦ ᐱᔨᑦᑎᕋᖅᓯᒪᓂᖓ ᐱᔪᓐᓇᐅᑎᖃᕈᑎᒋᑦᑎᐊᕐᒪᒍ ᑖᔅᓱᒧᖓ ᐱᒻᒪᕆᐅᔪᒧᑦ ᐃᓂᒧᑦ”

ᐅᖃᖅᑎ ᖁᐊᓴ ᐃᓚᒋᐊᖅᓯᓚᐅᖅᐳᖅ, “ᐱᕕᖃᕐᓂᓐᓂ ᐅᖃᓯᒪᔭᖏᑦ ᒪᓕᒐᓕᐅᕐᕕᐅᑦ ᖁᔭᓕᓂᖓᓂᒃ ᒥᔅ ᐃᓚᐃᓐ ᑮᓇᓐ ᕕᐊᓐᑦ ᐱᔨᑦᑎᕋᕐᓂᕆᓚᐅᖅᑕᖓ ᑐᓴᐅᒪᖃᑕᐅᑎᑦᑎᓂᕐᒧᑦ ᑲᖖᒍᓇᖅᑐᓕᕆᓂᕐᒧᓪᓗ ᑲᒥᓯᓇᐅᓪᓗᓂ ᐊᕐᕌᒍᓂᒃ ᐊᕙᑎᐅᕋᑖᖅᑐᓂ (20) ᐊᒻᒪᓗ ᓄᖅᑲᖓᑦᑎᐊᖁᕙᕋ.”

ᑭᓇᐅᓂᖓᑕ ᒥᒃᓵᓄᑦ ᐱᖃᓯᐅᑎᓯᒪᕗᖅ.

-30-

ᖃᐅᔨᒋᐊᒃᑲᓐᓂᕈᒪᒍᕕᑦ:
ᔮᓐ ᑯᐊᒃ, ᑎᑎᕋᖅᑎ ᒪᓕᒐᓕᐅᕐᕕᖕᒧᑦ0
ᐅᖄᓚᐅᑎᖓ: (867) 975-5000

 


 

ᑮᓇᐅᓂᖓᓂᒃ

ᒍᕌᒻ ᔅᑎᐅᓪ

ᒍᕌᒻ ᔅᑎᐅᓪ ᐱᖃᖅᐳᖅ ᑎᓴᒪᓂᒃ ᐸᐃᑉᐹᓂᒃ ᓯᓚᑦᑐᖅᓴᕐᕕᒡᔪᐊᒥᑦ, ᐱᖃᓯᐅᑎᓪᓗᒋᑦ ᐳᖅᑐᓛᒥᒃ ᐸᐃᑉᐹᖃᕐᓂᖅ ᐱᖁᔭᕐkᑦ ᑕᐃᑲᖖᒐᑦ ᑕᐅᓪᕼᐊᐅᓯ ᓯᓚᑦᑐᖅᓴᕐᕕᒡᔪᐊᖓᓂᑦ. ᒥᔅᑕ ᔅᑎᐅᓪ ᐅᕉᑦᔅ ᐱᒃᑲᐅᓛᖑᔾᔪᑎᒥᒃ ᐋᒃᔅᕗᑦ ᓯᓚᑦᑐᖅᓴᕐᕕᒡᔪᖓᓂᑦ. ᒥᔅᑕ ᔅᑎᐅᓪ ᖃᔅᓯᑲᓪᓚᖕᓂᒃ ᐃᖅᑲᓇᐃᔮᖃᖅᓯᒪᕗᖅ ᐃᖅᑲᓇᐃᔭᖅᖢᓂ ᐊᕐᕌᒍᓂᒃ 30-ᓂᒃ, ᐱᖃᓯᐅᑎᓪᓗᒋᑦ ᐱᖁᔭᕐᑎᒍᑦ ᑎᑎᕋᖅᑎᐅᓪᓗᓂ ᑲᓇᑕᒥ ᐅᓐᓂᕐᓗᒃᓴᕐᕕᖕᒧᑦ ᐃᖅᑲᑐᐃᕕᖕᒧᑦ; ᐃᒃᓯᕙᐅᑕᐅᓪᓗᓂ ᑲᓇᑕᒥ ᐱᖁᔭᕐᓂᒃ ᐊᐅᓚᑦᑎᓂᕐᒧᑦ ᑲᓇᑕᒥ ᒪᓕᒐᕐᓂᐊᖅᑎᑦ ᑲᑐᔾᔨᖃᑎᒌᖏᓐᓄᑦ; ᒪᓕᒐᕐᓂᐊᖅᑎᐅᓪᓗᓂ ᐃᖅᑲᓇᐃᔭᖅᑏᑦ ᓇᓪᓕᐅᒃᑯᒫᓕᕆᔨᖏᓐᓄᑦ ᓅᕙ ᓯᑰᓴᒥ; ᐃᓕᓴᐃᔨᒧᑦ ᐃᑲᔪᖅᑎᐅᓪᓗᓂ ᐱᓯᓇᓯᓄᑦ ᐱᖁᔭᕐᓄᑦ ᑕᐅᓪᕼᐊᐅᓯ ᓯᓚᑦᑐᖅᓴᕐᕕᒃᔪᐊᖓᑕ ᐃᓕᓐᓂᐊᕐᕕᖓᓄᑦ ᐱᓯᓇᓯᑦ ᒥᒃᓵᓄᑦ; ᐃᓚᒋᔭᐅᓪᓗᓂ ᓅᕙ ᓯᑰᓴ ᒪᓕᒐᓕᐅᕐᕕᖓᓂ ᒥᓂᔅᑕᐅᓪᓗᓂ ᑮᓇᐅᔭᓕᕆᓂᕐᒧᑦ. ᒥᔅᑕ ᔅᑎᐅᓪ ᑎᑎᕋᖅᓯᒪᓪᓗᓂ ᖃᔅᓯᑲᓪᓚᖕᓄᑦ ᑐᓴᐅᑎᓂᒃ ᐅᖃᓕᒫᒐᕐᓂᒡᓗ, ᐊᒻᒪᓗ 2014-ᒥ ᐳᖅᑐᓛᓂᖃᑕᐅᓪᓗᓂ ᓵᓇᓯ ᑰᕼᐃᓐ ᐱᑖᒃᓴᖁᑎᖓᓄᑦ ᒐᕙᒪᓕᕆᓂᕐᒧᑦ ᑎᑎᕋᖅᓯᒪᔭᖏᓐᓄᑦ.

AttachmentSize
ᒪᓕᒐᓕᐅᕐᕕᒃ ᐊᑐᓕᖁᔨᕗᑦ ᑎᒃᑯᐊᖅᑕᐅᓂᖓᓂᒃ ᑐᓴᐅᒪᖃᑦᑕᐅᑎᓂᕐᒧᑦ ᑲᖖᒍᓇᖅᑐᓕᕆᓂᕐᒧᓪᓗ ᑲᒥᓯᓇᒧᑦ ᓄᓇᕗᒻᒥ133.89 KB