ᒪᓕᒐᓕᐅᕐᕕᖕᒧᑦ ᐅᖃᖅᑎ ᑎᒃᑯᐊᖅᓯᕗᖅ ᐅᖃᐅᓯᓕᕆᓂᕐᒧᑦ ᑲᒥᓴᓇᒥᒃ

Feb 3 2020

ᐃᖃᓗᐃᑦ, ᓄᓇᕗᑦ (ᕕᕗᐊᕆ 3, 2020) - ᒪᓕᒐᓕᐅᕐᕕᖕᒧᑦ ᐅᖃᖅᑎ ᓯᒥᐊᓐ ᒥᑭᓐᖑᐊᖅ ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᑳᓖᓐ ᐋᕆᐊᒃ ᑎᒃᑯᐊᖅᑕᐅᓂᖓᓂᒃ ᓄᓇᕗᒻᒥ ᐅᖃᐅᓯᓕᕆᓂᕐᒧᑦ ᑲᒥᓴᓇᐅᑉ ᐃᓂᖓᓄᑦ.

ᐊᑐᖅᖢᒍ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐱᖁᔭᕐᔪᐊᖓ, ᓄᓇᕗᒻᒥ ᐅᖃᐅᓯᓕᕆᓂᕐᒧᑦ ᑲᒥᓴᓇ ᑎᒃᑯᐊᖅᑕᐅᕙᒃᐳᑦ ᒪᓕᒃᑕᐅᓪᓗᑎᒃ ᒪᓕᒐᓕᐅᕐᕕᐅᑉ ᐊᑐᓕᖁᔭᓕᐊᖏᑦ ᐊᒻᒪ ᐃᓕᓯᒪᓲᖑᓪᓗᓂ ᑕᓪᓕᒪᓄᑦ ᐊᕐᕌᒍᓄᑦ.

ᐅᖃᖅᑎ ᒥᑭᓐᖑᐊᖅ ᐃᒪᐃᓕᖅᑲᐅᔪᖅ, “ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑦ ᑖᔅᓱᒧᖓ ᐃᓕᔪᒃᓴᒥᒃ ᐊᑭᑦᑐᕋᐅᑎᓂᒃᑰᖅᑎᑦᑎᓪᓗᑎᒃ ᓂᕈᐊᓚᐅᖅᑐᑦ. ᒥᔅ ᐋᕆᐊᒃ ᐅᖃᐅᓯᓕᕆᓂᕐᒧᑦ ᑲᒥᓴᓇᐅᑲᐃᓐᓇᖅᓯᒪᔪᖅ ᐊᒃᑑᐸ 2019−ᒥᓂᑦ, ᐊᒻᒪ ᐊᒃᓱᕉᑎᖃᓪᓚᕆᒃᓯᒪᓪᓗᓂ ᐅᖃᐅᓯᓕᕆᓂᕐᒧᑦ ᐱᔪᓐᓇᐅᑎᖃᕐᓂᕐᒥᒃ.”

ᒪᓕᒐᓕᐅᖅᑏᑦ ᐅᑭᐅᖅᓯᐅᑎᒥᖕᓂᒃ ᑲᑎᒪᕐᔪᐊᓕᖅᐸᑕ ᕕᕗᐊᕆ 18, 2020−ᒥ ᐱᖁᔨᕗᖔᖅᑎᒍᑦ ᑎᒃᑯᐊᖅᑕᐅᓂᖓ ᓇᓗᓇᐃᖅᑕᐅᓛᖅᑐᖅ.

ᐅᑯᓄᖓ ᐊᑦᑕᑕᐃᓯᒪᔪᒍᑦ ᐃᓅᓯᕆᓯᒪᔭᖓᑕ ᐅᓂᒃᑳᖏᓐᓂᒃ.

-30-

ᖃᐅᔨᒋᐊᒃᑲᓐᓂᕈᒪᒍᕕᑦ ᑐᑭᓯᒋᐊᕐᕕᒋᔪᓐᓇᖅᑕᐃ:
ᔮᓐ ᑯᐊᒃ, ᒪᓕᒐᓕᐅᕐᕕᖕᒧᑦ ᑎᑎᕋᖅᑎ
ᐅᖄᓚᐅᑖ: (867) 975-5000

 


ᐃᓅᓯᕆᓯᒪᔭᖓ

ᑳᓖᓐ ᐋᕆᐊᒃ

ᑳᓖᓐ ᐋᕆᐊᒃ ᐃᓱᓕᑦᑎᓯᒪᔪᖅ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ. ᐱᓕᕆᓯᒪᓂᖓ ᐱᖃᓯᐅᔾᔨᕗᖅ ᐃᖅᑲᓇᐃᔭᖅᓯᒪᓪᓗᓂ ᑐᓴᒐᒃᓴᓕᕆᔨ/ᓇᑲᑎᕆᔨ, ᐅᖃᖅᑎᐅᓪᓗᓂ ᐊᐅᓚᑦᑎᔨᐅᓪᓗᓂᓗ ᓰᐲᓰᒃᑯᓐᓄᑦ, ᐊᑐᐊᒐᕐᓂᒃ ᕿᒥᕐᕈᔨᐅᓪᓗᓂ ᓄᓇᕗᑦ ᑐᖖᒐᕕᒃᑯᑦ ᑎᒥᖓᓐᓄᑦ, ᖃᐅᔨᓴᖅᑎᐅᓪᓗᓂ ᐅᖃᐅᓯᓕᕆᓂᕐᒧᑦ ᑲᒥᓯᓇᐅᑦ ᑎᑎᕋᕐᕕᖓᓄᑦ ᓄᓇᕗᒻᒥ, ᑕᐃᒎᓯᓕᕆᔨ ᐃᓄᐃᑦ ᐅᖃᐅᓯᖏᓐᓄᑦ ᑕᐃᒎᓯᓕᐅᖅᑎᒃᑯᓐᓄᑦ ᐊᒻᒪᓗ ᐊᐅᓚᑦᑎᔨᐅᑲᐃᓐᓇᕐᖢᓂ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᒃᑯᓐᓄᑦ. ᒥᔅ ᐋᕆᐊᒃ ᐃᒃᓯᕙᐅᑕᕐᒧᑦ ᑐᖓᓕᐅᓯᒪᔪᖅ ᑏᕖ ᓄᓇᕗᒻᒧᑦ ᐃᓕᓐᓂᐊᕐᓂᕐᒧᑦ ᑕᑯᒃᓴᐅᑎᑦᑎᔨᒃᑯᑦ ᑲᑎᒪᔨᖏᓐᓄᑦ, ᐃᓚᒋᔭᐅᓯᒪᓪᓗᓂ ᑐᒥᑯᓗᐃᑦ ᓴᐃᕚᕿᕕᒃ ᑎᒥᖓᓐᓄᑦ, ᐃᓚᒋᔭᐅᓯᒪᔪᖅ ᐊᔾᔩᑦ ᓄᓇᕗᒻᒥ ᑐᓴᐅᑎᓕᕆᔩᑦ ᑲᑐᔾᔨᖃᑎᒌᖏᓐᓄᑦ, ᐃᓚᒋᔭᐅᓯᒪᔪᖅ ᕿᑭᖅᑖᓗᖕᒥ ᓇᖕᒥᓂᖃᖅᑐᑦ ᑲᑐᔾᔨᖃᑎᒌᖏᓐᓄᑦ ᐊᒻᒪᓗ ᐃᓚᒋᔭᐅᓯᒪᔪᖅ ᐃᖃᓗᐃᑦ ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᖏᓐᓄᑦ.

AttachmentSize
ᒪᓕᒐᓕᐅᕐᕕᖕᒧᑦ ᐅᖃᖅᑎ ᑎᒃᑯᐊᖅᓯᕗᖅ ᐅᖃᐅᓯᓕᕆᓂᕐᒧᑦ ᑲᒥᓴᓇᒥᒃ178.96 KB