ᒪᓕᒐᓕᐅᖅᑎᑦ ᐅᑎᖁᔭᐅᔪᑦ ᑕᒪᐅᓇᑐᐃᓐᓇᖅ ᐃᒃᓯᕙᓂᕐᒧᑦ

Sep 10 2019 1:46 pm

ᐃᖃᓗᐃᑦ, ᓄᓇᕗᑦ (ᓯᑎᐱᕆ 10, 2019) - ᒪᓕᒐᓕᐅᕐᕕᒃᒥ ᑲᑎᒪᒋᐊᒃᑲᓐᓂᓛᖅᑐᑦ 1:30-ᐅᓐᓄᓴᒃᑯᑦ ᐊᐃᑉᐱᕐᒥ, ᓯᑎᐱᕆ 17, 2019, ᐅᓪᓗᒧᑦ ᐊᑕᐅᓯᕐᒧᑦ ᑕᒪᐅᓇᑐᐃᓐᓇᖅ ᐃᒃᓯᕙᓂᕐᒧᑦ.
ᒪᓕᒐᓕᐅᕐᕕᒃᒧᑦ ᐅᖃᖅᑎ ᓯᒥᐊᓐ ᒥᑭᖖᒍᐊᖅ ᐅᖃᓚᐅᖅᐳᖅ, “2017-ᖑᑎᓪᓗᒍ, ᐱᖁᔭᕐᓂᒃ ᖄᖏᖅᑎᑦᑎᔪᖃᓚᐅᕐᒪᑦ ᐊᑕᐅᑦᑎᒃᑰᖅᑕᓕᕈᑎᓂᒃ ᐊᐅᓚᑕᐅᑎᓂᖏᓐᓄᑦ ᓂᕈᐊᕐᓂᐅᔪᑦ ᕼᐊᒪᓚᐃᑦ ᑲᑎᒪᔨᖏᓐᓄᑦ ᐊᒻᒪ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᔪᓐᓇᐅᑎᖃᕐᖢᑎᒃ ᓄᓇᕗᒻᒥ ᓂᕈᐊᖅᑐᓕᕆᓂᕐᒧᑦ ᐱᖁᔭᖅ. ᐱᕙᒌᔭᖅᑕᐅᕙᓪᓕᐊᓪᓗᑎᒃ ᓂᕈᐊᖅᑎᑦᑎᓂᐅᓂᐊᖅᑐᖅ ᓄᓇᕗᓕᒫᒥ ᐊᑐᖅᑕᐅᓂᐊᖅᑐᑦ ᐊᒃᑑᕝᕙ 28, 2019-ᒥ, ᑎᑎᕋᖅᓯᒪᓂᖏᑎᒍᑦ ᐃᓱᒪᓇᖅᑐᒥᒃ ᓇᓗᓇᐃᖅᓯᔪᖃᓚᐅᕐᒪᑦ ᐱᖁᔭᖅᑎᒍᑦ ᐊᓯᔾᔨᕆᐊᖃᖅᑐᒥᒃ ᒪᓕᒐᖏᑦ ᓇᓗᓇᖏᑦᑎᐊᖁᓪᓗᒋᑦ ᐃᖅᑲᓇᐃᔭᖅᑎᓄᑦ ᓄᓇᕗᒻᒥ ᒐᕙᒪᒃᑯᓐᓄᑦ ᓂᕈᐊᒐᒃᓴᐅᔪᒪᒐᔭᖅᑐᓄᑦ. ᑕᐃᒪᐃᒻᒪᓪᓗ, ᖃᐅᔨᒋᐊᕐᕕᒋᓚᐅᖅᖢᒋᑦ ᓯᕗᓕᖅᑏᑦ ᑲᑎᒪᔨᖏᑦ ᐊᒻᒪᓗ ᒪᓕᒐᓕᐅᖅᑎᐅᖃᑕᐅᔪᑦ ᒪᓕᒐᓕᐅᕐᕕᒃᒥ, ᐋᖅᑭᒍᑎᖃᖅᓯᒪᒐᒪ ᑭᒃᑯᑐᐃᓐᓇᐃᑦ ᐱᔪᒪᔭᖏᑦ ᑕᑯᓪᓗᒋᑦ ᒪᓕᒐᓕᐅᕐᕕᒃ ᐅᑎᖅᑎᑕᐅᔭᕆᐊᖃᓕᕐᒧᑦ ᒫᓐᓇᐅᔪᖅ.”
2019 ᐅᑭᐊᒃᓵᖓᓂ ᐃᒃᓯᕙᓂᐅᔪᖅ ᐱᒋᐊᕐᓂᐊᖅᑐᖅ ᐸᕐᓇᒃᓯᒪᓂᖓ ᒪᓕᒡᓗᒍ 1:30-ᐅᓐᓄᓴᒃᑯᑦ ᑎᓴᒻᒥᕐᒥ, ᐊᒃᑑᕝᕙ 17, 2019-ᒥ.
ᐅᖃᖅᑎ ᒥᑭᖖᒍᐊᖅ ᐅᖃᕆᐊᒃᑲᓐᓂᓚᐅᖅᐳᖅ, “ᑕᐃᒪ ᑖᓐᓇ ᑕᒪᐅᓇᑐᐃᓐᓇᖅ ᐃᒃᓯᕙᓂᖅ ᑲᔪᓯᓂᐊᕐᒪᑦ ᐋᖅᑭᒃᓯᒪᕙᒌᖅᑐᑦ ᑲᑎᒪᔨᕋᓛᑦ ᑲᑎᒪᒥᓂᖏᑦ ᐊᑐᖅᑎᓪᓗᒋᑦ, ᐱᖃᓯᐅᑎᓗᒍ ᑕᓚᕖᓴᒃᑯᑦ ᓈᓚᒃᑎᑦᑎᓂᖅ ᑖᑦᓱᒧᖓ ᓄᑖᖑᓛᕐᒧᑦ ᑕᒻᒪᖅᓯᒪᔪᖅᓯᐅᖅᑎᕐᔪᐊᑦ ᐅᓂᒃᑳᖓᓄᑦ, ᑕᐃᒪᐃᒻᒪᑦ ᑮᓇᐅᔭᓂᒃ ᐊᑐᒃᑲᓐᓂᐊᕐᔪᑐᐃᓐᓇᕐᓂᐊᖅᑐᖅ ᐅᑎᖅᑎᑕᐅᒐᓗᐊᖅᑎᓪᓗᒋᑦ ᐃᔾᓗᒧᑦ.”

-30-

ᑐᓴᐅᕆᐊᒃᑲᓐᓂᕈᒪᒍᕕᑦ:
ᔮᓐ ᑯᐊᒃ, ᑎᑎᕋᖅ ᒪᓕᒐᓕᐅᕐᕕᒃᒧᑦ
ᐅᖄᓚᐅᑖ: (867) 975-5000

AttachmentSize
ᒪᓕᒐᓕᐅᖅᑎᑦ ᐅᑎᖁᔭᐅᔪᑦ ᑕᒪᐅᓇᑐᐃᓐᓇᖅ ᐃᒃᓯᕙᓂᕐᒧᑦ121.12 KB