ᒪᓕᒐᓕᐅᖅᑏᑦ ᐅᐱᕐᖔᖅᓯᐅᒻᒥᒃ ᑲᑎᒪᕐᔪᐊᕐᓂᕆᓂᐊᖅᑕᖓ ᓄᖅᑲᖅᑎᑕᐅᕗᖅ

ᐊᐃᕐᕆᓕ 1 2020

ᐃᖃᓗᐃᑦ, ᓄᓇᕗᑦ (ᒪᐃ 1, 2020) - ᐅᖃᖅᑎ ᐸᐅᓕ ᖁᐊᓴ ᐅᓪᓗᒥ ᓇᓗᓇᐃᖅᓯᕗᖅ 2020−ᒥ ᑕᓪᓕᒪᖓᓐᓂ ᒪᓕᒐᓕᐅᖅᑏᑦ ᑐᒡᓕᐊᓂ ᑲᑎᒪᕐᔪᐊᕐᓂᕆᓂᐊᖅᑕᖓᑕ ᓄᖅᑲᖅᑎᑕᐅᓂᖓᓂᒃ.

ᐅᖃᖅᑎ ᖁᐊᓴ ᐃᒪᐃᓕᕗᖅ, “ᐃᓱᒪᒋᓪᓗᑎᒍᑦ ᓄᓇᕗᒻᒦᑦᑐᓕᒫᑦ ᑎᒥᓐᖑᖅᑎᑕᐅᓯᒪᔪᑦ ᓄᓇᕗᒻᒥᐅᓪᓗ ᒫᓐᓇ ᐃᖏᕐᕋᔭᖁᔭᐅᓐᖏᓐᓂᖏᓐᓄᑦ ᐊᒻᒪ ᐅᓄᓗᐊᖅᑐᑦ ᐊᑕᐅᓯᕐᒦᖃᑦᑕᖁᔭᐅᓐᖏᓐᓂᖏᓐᓄᑦ, ᐊᐅᓚᔾᔭᐃᒋᐊᖅᓯᒪᓕᖅᑐᒍᑦ ᑕᒪᑐᒪᓂ ᑲᑎᒪᕐᔪᐊᕐᓇᐅᓂᐊᓚᐅᖅᑑᒐᓗᐊᖅ ᑭᖑᕙᕆᐊᖅᑕᐅᖁᓪᓗᒍ. ᓇᓗᖅᑯᑎᓐᖏᒃᑲᓗᐊᖅᑎᓪᓗᖓ ᐅᑭᐊᒃᓵᖅᓯᐅᑦ ᑲᑎᒪᕐᔪᐊᕐᓇᖅ ᑲᔪᓯᑎᑕᐅᓂᐊᕐᓂᖓᓂᒃ, ᐊᑐᕆᐊᖃᖅᐸᑦ, ᐊᒻᒪ ᑕᐃᒪᐃᑦᑕᕆᐊᖃᖅᐸᑦ, ᒪᓕᒐᓕᐅᖅᑏᑦ ᑲᑎᒪᕐᔪᐊᕆᐊᖅᑎᑕᐅᑐᐃᓐᓇᕆᐊᓖᑦ ᓯᑎᐱᕆᒥ ᑮᓇᐅᔭᑦ ᐃᓚᒋᐊᕈᑎᓂᒃ ᐊᒻᒪ ᐊᓯᖏᓐᓂᒃ ᑐᐊᕕᕐᓇᖅᑐᓂᒃ ᐱᓕᕆᐊᖃᖁᓪᓗᒋᑦ ᓄᕙᒡᔪᐊᕐᓈᓗᒃ 19 ᐱᔾᔪᑎᒋᓪᓗᒍ. ᒥᓂᔅᑕᐃᑦ ᐊᒻᒪ ᒪᓕᒐᓕᐅᖅᑎᑐᐃᓐᓇᐃᑦ ᐊᔭᐅᖅᑐᖅᐸᒃᑲ ᐱᓕᕆᐊᒃᓴᖅᑖᕆᓯᒪᔭᒥᖕᓂᒃ ᐱᓕᕆᐊᖃᐃᓐᓇᖁᓪᓗᒋᑦ ᐊᒻᒪ ᓂᕈᐊᖅᑕᐅᓯᒪᕕᐊᓂ ᐱᔭᒃᓴᖅᑖᕆᓯᒪᔭᒥᓂᒃ, ᐊᒻᒪ ᐃᖅᑲᐃᑎᑦᑎᒋᐊᒃᑲᓐᓂᕈᒪᕗᖓ ᖃᒪᓂᑦᑐᐊᕐᒥ ᐊᒻᒪ ᖁᕐᓗᖅᑐᕐᒥ ᒪᐅᓇᑐᐃᓐᓇᖅ ᓂᕈᐊᕐᓂᖃᕐᓂᐊᖅᑐᑦ ᐊᐅᒡᒍᓯ 24, 2020−ᒥ. ᓂᕆᐅᒃᐳᖓ ᑕᒪᑐᒪᓂ ᐊᕐᕌᒍᒥ ᐊᒡᒋᖅᑐᒥ ᒪᓕᒐᓕᐅᖅᑎᑖᓵᕐᓂᒃ ᑐᓐᖓᓱᒃᑎᑦᑎᓂᐊᕐᓂᑦᑎᓐᓂᒃ.”

ᐅᖃᖅᑎ ᖁᐊᓴ ᓄᓇᕗᒻᒥᐅᓕᒫᓂᒃ ᐃᖅᑲᐃᑎᑦᑎᒋᐊᒃᑲᓐᓂᕈᒪᔪᖅ ᖃᓂᒌᓗᐊᖃᑦᑕᖁᔨᓐᖏᖢᓂ, ᐊᖏᕐᕋᖅᓯᒪᒋᑦ ᐊᓂᔭᕆᐊᖃᓪᓚᕆᓐᖏᒃᑯᕕᑦ ᐊᒻᒪ ᐊᒡᒐᑎᑦ ᐅᐊᓴᕋᔪᒡᓗᒋᑦ, ᑕᐃᒪᓐᓇ ᑭᓯᐊᓂ ᓄᕙᒡᔪᐊᕐᓇᖅ 19−ᒥᑦ ᓴᐳᒻᒥᐅᑎᓯᒪᔪᓐᓇᕋᑦᑕ ᐅᕙᑦᑎᓐᓂᒃ, ᐃᓚᑦᑎᓐᓂᒃ ᐊᒻᒪ ᓄᓇᖅᑲᑎᑦᑎᓐᓂᒃ ᐊᒻᒪ ᓄᓇᕗᒻᒥᐅᓂᒃ.

-30-


ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒋᔪᓐᓇᖅᑕᐃᑦ:
ᔮᓐ ᑯᐊᒃ, ᒪᓕᒐᓕᐅᕐᕕᖕᒧᑦ ᑎᑎᕋᖅᑎ
(867) 975-5000

AttachmentSize
ᒪᓕᒐᓕᐅᖅᑏᑦ ᐅᐱᕐᖔᖅᓯᐅᒻᒥᒃ ᑲᑎᒪᕐᔪᐊᕐᓂᕆᓂᐊᖅᑕᖓ ᓄᖅᑲᖅᑎᑕᐅᕗᖅ104.07 KB