ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᑎᒥᒃ ᑲᒪᔪᑦ ᑲᑎᒪᔨᖏᑦ ᑐᓴᖅᑎᑦᑎᕗᑦ ᑎᒃᑯᐊᖅᑕᐅᓂᖓᓂᒃ ᐃᓕᓴᖅᓯᔾᔪᑎᑖᕐᓂᐊᖅᑐᖅ

Mar 12 2019

ᐃᖃᓗᐃᑦ, ᓄᓇᕗᑦ (ᒫᔾᔨ 12, 2019) - ᐅᖃᖅᑎ ᒪᓕᒐᓕᐅᖅᑏᑦ ᑲᑎᒪᔨᖏᓐᓄᑦ ᐊᒻᒪᓗ ᐃᒃᓯᕙᐅᑕᖅ ᓄᓇᕗᒥ ᐃᓕᓴᕆᔭᐅᔾᔪᑎᓄᑦ ᑲᒪᔪᑦ ᑲᑎᒪᔨᖏᓐᓄᑦ ᔫ ᐃᓄᒃ ᐅᓪᓗᒥ ᑐᓴᖅᑎᑦᑎᖅᑲᐅᔪᖅ ᒥᔅᑕ ᓴᖅᑲᓕᐊᓯ ᑯᓄᒃ, ᑲᓇᑕᒥ ᐃᓕᓴᕆᔭᐅᔾᔪᑎᑖᖅᓯᒪᔪᖅ, ᐊᕐᕌᒍᒋᔭᑦᑎᓐᓂ ᑐᓂᔭᐅᓂᐊᕐᓂᖓᓂᒃ ᐃᓕᓴᕆᔭᐅᔾᔪᑎᖓᓂᒃ ᐱᓕᕆᑦᑎᐊᖅᓯᒪᓂᑯᖓᓄᑦ ᓄᓇᕗᒥ.

ᐅᓪᓗᐊᓂ ᔮᓐᓄᐊᕆ 1, 2010, ᐃᓕᓴᖅᓯᔾᔪᑎ ᐱᓕᕆᑦᑎᐊᖅᓯᒪᔪᓄᑦ ᓄᓇᕗᒥ ᐱᖁᔭᕐᔪᐊᖅ ᐊᑐᓕᖅᑎᑕᐅᓚᐅᖅᓯᒪᕗᖅ. ᑐᕌᒐᒃᓴᖓ ᐃᓕᓴᖅᓯᔾᔪᑎᐅᑉ ᐃᓕᓴᖅᓯᔾᔪᑎᐅᖁᓪᓗᒍ ᑭᓇᒃᑯᑐᐃᓐᓇᕐᓂᒃ ᐃᑲᔪᖅᓯᓂᖃᑦᑎᐊᖅᑐᓂᒃ ᐱᓕᕆᓯᒪᔪᓄᑦ ᓄᓇᕗᒧᑦ. ᑖᓐᓇ ᐃᓕᓴᖅᓯᔾᔪᑎᐅᔪᖅ ᖁᑦᑎᖕᓂᖅᐹᖑᓪᓗᓂ ᐅᐱᒍᓱᒍᑎᐅᔪᖅ ᓄᓇᕗᒥ ᐊᒻᒪᓗ ᖁᕝᕙᓯᓂᖅᐹᖑᓪᓗᓂ ᐊᓯᖏᓐᓂᑦ ᐃᓕᓴᖅᓯᔾᔪᑎᐅᔪᓂ, ᓴᒡᕕᖕᒥᖕᓂᑦ ᐅᕝᕙᓘᓐᓂᑦ ᐅᔭᒥᖕᓂᑦ ᑐᓂᕙᒃᑕᖏᓐᓂᑦ ᓄᓇᕗᑦ ᒐᕙᒪᒃᑯᖏᑕ.

ᒥᔅᑕ ᑯᓄᒃ, ᑕᕐᕆᔭᓕᐅᖅᑎᐅᔪᖅ ᐊᒻᒪᓗ ᓴᖅᑭᑦᑎᖃᑕᐅᓂᑰᓪᓗᓂ ᐃᒡᓗᓕᒃ ᐃᓱᒪ ᑕᕐᕆᔭᓕᐅᖅᑎᐅᔪᓄᑦ ᑖᓐᓇᓗ 2001-ᖑᑎᓪᓗᒍ ᑕᕐᕆᔭᓕᐊᖓᑦ, ᐊᑕᓈᕐᔪᐊᑦ: ᐅᕿᓚᔪᖅ, ᐅᐱᒋᔭᐅᓚᐅᖅᑐᖅ ᐊᔾᔨᓕᐅᖅᓯᒪᔭᖓᓄᑦ ᑐᓂᔭᐅᓪᓗᓂ ᑕᐃᔭᐅᔪᒥᒃ Caméra d'Or ᑕᐃᑲᓂ 54-ᖓᓂ ᖁᕕᐊᓱᒍᑎᖃᖅᑎᓪᓗᒋᑦ ᑕᕐᕆᔭᓕᐅᖅᑕᐅᕙᒃᑐᓂᒃ. ᒥᔅᑕ ᑯᓄᒃ ᑐᓂᔭᐅᓯᒪᖕᒥᔪᖅ ᐃᓕᓴᕆᔭᐅᔾᔪᑎᒥᒃ ᑲᓇᑕᒥ, ᑐᓂᔭᐅᓯᒪᖕᒥᔪᖅ ᑯᐃᓐ ᐃᓕᓴᐱ II ᐊᕐᕌᒍᓄᑦ 50-ᓄᑦ ᐊᒻᒪ 60-ᓄᑦ ᑯᐃᓐᖑᓕᕐᓂᖓᓄᑦ ᖁᕕᐊᓱᒍᑕᐅᓪᓗᓂ ᐃᓕᓴᕆᔭᐅᔾᔪᑎᖏᓐᓂᒃ ᐊᒻᒪ ᐃᓚᒋᔭᐅᔪᖅ ᐃᓕᓐᓂᐊᕐᕕᖓᓐᓄᑦ ᑕᕐᕆᔭᒐᒃᓴᓕᐅᖅᑏᑦ ᐊᒻᒪ ᑭᒡᓕᓯᓂᐊᖅᑏᑦ ᖃᓪᓗᓈᑐᑦ ᑕᐃᔭᐅᔪᒥ Academy of Motion Picture Arts and Sciences.

“ᐊᕐᕌᒍᒋᔭᑦᑎᓐᓂ ᑐᓂᔭᐅᔪᖅ ᐃᓕᓴᕆᔭᐅᔾᔪᑎᒥᒃ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᓄᓇᕗᒥ ᖃᐅᔨᒪᔭᐅᑦᑎᐊᖅᑐᖅ ᓴᓇᓯᒪᔭᖏᑦ ᐃᓱᒪᒐᔪᒃᑑᓪᓗᓂ ᑕᑯᒃᓴᕈᖅᑎᑦᑎᒪᖕᒪᑕ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪᓗ ᐅᖃᐅᓯᖏᓐᓂᒃ ᓄᓇᕐᔪᐊᕐᒥ ᓄᓇᖅᑲᑎᖏᓐᓄᑦ ᑕᕐᕆᔭᕐᓂᒃᑯᑦ,” ᑕᐃᒪᓐᓇ ᐅᖃᓚᐅᖅᑐᖅ ᐅᖃᖅᑎ ᐃᓄᒃ.

ᐃᓕᓴᖅᓯᓂᐊᖅᑐᑦ ᒥᔅᑕ ᑯᓄᖕᒥᒃ ᐅᐱᕐᖔᖓᓂ 2019 ᑲᑎᒪᕐᔪᐊᖅᑎᓪᓗᒋᑦ ᒪᓕᒐᓕᐅᖅᑏᑦ ᑲᑎᒪᔨᖏᑦ ᐅᓪᓗᐊ ᑐᓴᖅᑎᑦᑎᔾᔪᑕᐅᓛᖅᑐᖅ. ᐃᓕᓴᖅᓯᓂᖃᓛᖅᑐᑦ ᒪᓕᒐᓕᐅᖅᑏᑦ ᑲᑎᒪᕐᔪᐊᕐᕕᖓᓐᓂ ᐊᒻᒪᓗ ᑕᑯᒃᓴᐅᑲᐅᑎᒋᓗᓂ ᓴᖅᑭᔮᖅᑎᑕᐅᓛᖅᑐᑦ ᑕᓚᕖᓴᒃᑯᑦ ᓄᓇᕗᓕᒫᒥ. ᑲᒥᓴᓇᖓ ᓄᓇᕗᑦ ᓇᓕ ᑯᓱᒐᖅ ᐃᒃᓯᕙᐅᑕᕆᔭᐅᓛᖅᑐᖅ ᐃᓕᓴᖅᓯᓂᖃᖅᑎᓪᓗᒋᑦ ᐊᑐᕐᓗᓂᐅᒃ ᐸᐸᑦᓯᔨᐅᓂᓂ ᐃᓕᓴᖅᓯᔾᔪᑎᓂᒃ ᓄᓇᕗᒥ.

-30-

ᑐᓴᕆᐊᒃᑲᓐᓂᕈᒪᒍᕕᑦ ᐅᓇ ᑐᓴᖅᑎᓪᓗᒍ:
ᔮᓐ ᑯᐊᒃ, ᑎᑎᕋᖅᑎ ᒪᓕᒐᓕᐅᖅᑏᑦ ᑲᑎᒪᔨᖏᓐᓄᑦ
ᐊᒻᒪᓗ ᑎᑎᕋᖅᑎ ᐃᓕᓴᕆᔭᐅᔾᔪᑎᓄᑦ ᓄᓇᕗᒥ ᑲᒪᔨᑦ ᑲᑎᒪᔨᖏᓐᓄᑦ
(867) 975-5000

AttachmentSize
ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᑎᒥᒃ ᑲᒪᔪᑦ ᑲᑎᒪᔨᖏᑦ ᑐᓴᖅᑎᑦᑎᕗᑦ ᑎᒃᑯᐊᖅᑕᐅᓂᖓᓂᒃ ᐃᓕᓴᖅᓯᔾᔪᑎᑖᕐᓂᐊᖅᑐᖅ131.45 KB