ᓄᓇᕗᒻᒥ ᐱᓕᕆᑦᑎᐊᖅᓯᒪᔪᓂᒃ ᐃᓕᓴᖅᓯᔾᔪᑎᒥᒃ ᐅᔭᒥᒃᑕᐅᖁᔭᐅᔪᓂᒃ ᓂᕈᐊᕋᒃᓴᓕᐅᖅᕕᒃᓴᐅᑉ ᒪᑐᕕᒃᓴᖓ ᐅᖓᕙᕆᐊᖅᑕᐅᔪᖅ

Mar 1 2022 2:35 pm

ᐃᖃᓗᐃᑦ, ᓄᓇᕗᑦ (ᒫᔾᔨ 1, 2022) – ᒪᑐᕕᒃᓴᖓ ᓂᕈᐊᕋᒃᓴᓕᐅᕈᒪᔪᓄᑦ ᓄᓇᕗᒻᒥ ᐱᓕᕆᑦᑎᐊᖅᓯᒪᔪᓂᒃ ᐃᓕᑕᖅᓯᔾᔪᑎᒧᑦ ᐅᔭᒥᑦᑕᐅᖁᔨᓂᕐᒧᑦ ᐅᖓᕙᕆᐊᖅᑕᐅᓯᒪᓕᖅᑯᖅ ᑕᐃᑯᖓ ᒫᑦᓯ 31, 2022.

ᔮᓐᓄᐊᕆ 1, 2010−ᒥ, ᓄᓇᕗᒻᒥ ᐃᓕᓴᖅᓯᔾᔪᑦ ᐅᔭᒥᐅᑉ ᐱᖁᔭᕐᔪᐊᖓᑦ ᐊᑐᓕᓚᐅᖅᓯᒪᕗᖅ. ᑖᓐᓇ ᐃᓕᓴᖅᓯᔾᔪᑦ ᒪᓕᒐᖅᑎᒍᑦ ᑐᕌᒐᖃᖅᑎᑕᐅᔪᖅ ᐅᑯᓂᖓ “ᐅᐱᓗᒋᑦ ᐃᓄᐃᑦ ᐃᑲᔪᕐᓂᖃᓪᓚᕆᒃᓯᒪᔪᑦ ᐱᖅᑯᓯᑐᖃᖅᑎᒍᑦ, ᐃᓅᓯᓕᕆᓂᒃᑯᑦ ᐅᕝᕙᓘᓐᓃᑦ ᑮᓇᐅᔭᓕᐅᕋᓱᐊᕐᓂᒃᑯᑦ ᓄᓇᕗᒻᒥ.” ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᑦ ᓄᓇᕗᒻᒥ ᖁᕝᕙᓯᖕᓂᖅᐹᖑᕗᖅ ᐊᒻᒪ ᖁᑦᑎᓂᖅᐹᖑᓪᓗᓂ ᐃᓘᓐᓇᖏᓐᓂᒃ ᐊᓯᖏᓐᓂᒃ ᐃᓕᓴᖅᓯᔾᔪᑎᓂᒃ, ᐅᔭᒥᖕᓂᒃ ᐅᕝᕙᓘᓐᓃᑦ ᓴᕝᕕᒻᒥᐅᑕᕐᓂᒃ ᑐᓐᓂᖅᑯᑕᕕᓂᕐᓂᒃ ᓄᓇᕗᑦ ᒐᕙᒪᒃᑯᓐᓂᑦ. ᐃᓚᒋᔭᐅᓕᕐᓂᖓ ᓄᓇᕗᒻᒥ ᐱᓕᕆᑦᑎᐊᕐᓂᑯᓂᒃ ᐃᓕᓴᖅᓯᔾᔪᑎᑦ ᑕᕝᕙᓂ ᑲᓇᑕᒥ ᐃᓕᓴᕆᔭᐅᖃᑦᑕᖅᓯᒪᔪᓄᑦ ᓇᓗᓇᐃᖅᑕᐅᓚᐅᖅᓯᒪᒻᒪᑦ 2018-ᒥ ᒐᕙᒪᑐᖃᒃᑯᑦ ᒪᓕᑦᑕᐅᖁᔭᖓᒍᑦ ᑲᑎᒪᓂᕐᒥ ᐊᖏᖅᑕᐅᔪᔪᒧᑦ ᑯᐃᓐ ᑭᒡᒐᑐᖅᑎᖓᓄᑦ.

ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᒻᒧᑦ ᐅᖃᐅᔾᔨᒋᐊᖅᑎᑦ ᑲᑎᒪᔨᖏᑦ ᐊᑐᓕᖁᔭᓕᐊᒃᑯᑦ ᓇᓗᓇᐃᖅᓯᔨᐅᕗᑦ ᑭᒃᑯᑦ ᐅᔭᒥᒃᑕᐅᖁᔭᐅᒻᒪᖔᑕ ᓄᓇᕗᑦ ᑲᒥᓴᓇᖓᓄᑦ ᐊᖏᔪᖅᑳᖑᔪᒧᑦ ᐃᓕᑕᕆᔭᐅᔾᔪᑎᓕᕆᓂᕐᒧᑦ. ᐅᖃᐅᔾᔨᒋᐊᖅᑏᑦ ᑲᑎᒪᔨᖏᑦ ᐅᑯᐊᖑᕗᑦ, ᒪᓕᒐᓕᐅᕐᕕᐅᑉ ᐅᖃᖅᑎᖓ, ᓄᓇᕗᒻᒥ ᐃᖅᑲᖅᑐᐃᕕᓕᕆᔨᒃᑯᑦ ᐃᖅᑲᖅᑐᐃᔨᕐᔪᐊᖓ ᐊᒻᒪ ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓ.

ᓂᕈᐊᕋᒃᓴᓕᐅᕈᑏᑦ ᐊᑐᐃᓐᓇᐅᔪᑦ ᐊᓪᓚᕝᕕᖏᓐᓂᑦ ᓄᓇᕗᒻᒥ ᒪᓕᒐᓕᐅᖅᑎᐅᖃᑕᐅᔪᑦ ᐊᒻᒪᓗ ᐲᔭᖅᑕᐅᔪᓐᓇᕆᓪᓗᑎᒃ ᒪᓕᒐᓕᐅᖅᕕᐅᑉ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓂᑦ ᐅᕙᓐᖓᑦ www.assembly.nu.ca. ᓂᕈᐊᕋᒃᓴᓕᐅᕈᑏᑦ ᑎᑭᓯᒪᔭᕆᐊᓖᑦ ᐅᖓᑖᓂᐅᓐᖏᑦᑐᖅ 5:00 ᐅᓐᓄᓴᒃᑯᑦ (ᑲᓇᓐᓇᒥ) ᑎᓴᒻᒥᕐᒥ, ᒫᑦᓯ 31, 2022. ᐃᓕᑕᖅᓯᓃᑦ ᐊᑐᖅᑕᐅᓛᖅᑐᑦ ᐅᓪᓗᕐᒥ ᐅᐊᑦᑎᐊᕈ ᓇᓗᓇᐃᖅᑕᐅᓛᖅᑐᒥ.

ᐅᓪᓗᒥ, ᑲᑎᑦᑐᒋᑦ 19 ᓄᓇᕗᒻᒥᐅᑕᐃᑦ ᐅᔭᒥᑦᑕᐅᓯᒪᓕᖅᑐᑦ ᐱᓕᕆᑦᑎᐊᖅᓯᒪᔪᓄᑦ ᐃᓕᑕᕆᔭᐅᔾᔪᑎᒥᒃ ᐃᑲᔪᖅᓯᒪᓂᖏᓐᓄᑦ ᒐᕙᒪᒃᑯᓐᓂ ᓄᓇᓕᓐᓂᓗ ᐱᔨᑦᑎᕋᕐᓂᕐᒥ, ᑕᑯᒥᓇᖅᑐᓂᒃ ᓴᓇᖃᑦᑕᓂᕐᒥ, ᐃᓕᓐᓂᐊᖅᑐᓕᕆᓂᕐᒥ, ᐅᖃᐅᓯᕐᒥᒃ ᓴᖅᑭᔮᖅᑎᑦᑎᓂᕐᒥ, ᐅᑉᐱᓂᕐᒧᑦ ᓯᕗᓕᖅᑎᐅᓂᕐᒥ, ᐊᒻᒪᓗ ᓇᒻᒥᓂᖃᐅᑎᓂᒃ ᐱᕙᓪᓕᐊᑎᑦᑎᓂᕐᒥ.

-30-

ᑐᑭᓯᒋᐊᒃᑲᓐᓂᕈᒪᒍᒃᓯ:

ᔮᓐ ᑯᕘᒃ, ᑎᑎᕋᖅᑎ ᒪᓕᒐᓕᐅᖅᕕᒻᒥ
ᐊᒻᒪᓗ ᑎᑎᕋᖅᑎᖓ ᓄᓇᕗᒻᒥ ᐱᓕᕆᑦᑎᐊᖅᓯᒪᔪᓄᑦ ᐅᖃᐅᔾᔨᒋᐊᖅᑎᑦ ᑲᑎᒪᔨᖏᓐᓂ
ᖃᕋᓴᐅᔭᒃᑯᑦ: LegInfo [at] assembly [dot] nu [dot] ca

AttachmentSize
ᓄᓇᕗᒻᒥ ᐱᓕᕆᑦᑎᐊᖅᓯᒪᔪᓂᒃ ᐃᓕᓴᖅᓯᔾᔪᑎᒥᒃ ᐅᔭᒥᒃᑕᐅᖁᔭᐅᔪᓂᒃ ᓂᕈᐊᕋᒃᓴᓕᐅᖅᕕᒃᓴᐅᑉ ᒪᑐᕕᒃᓴᖓ ᐅᖓᕙᕆᐊᖅᑕᐅᔪᖅ132.83 KB