ᓇᓗᓇᐃᖅᑕᐅᓂᖓ ᒪᓕᒐᓕᐅᖅᕕᒻᒥ ᐃᒃᓯᕙᓂᐅᓂᐊᖅᑐᑦ

Sep 10 2020

ᐃᖃᓗᐃᑦ, ᓄᓇᕗᑦ (ᓯᑎᐱᕆ 10, 2020) - ᐅᖃᖅᑎ ᐹᐅᓕ ᖁᐊᓴ ᐅᓪᓗᒥ ᐅᖃᐅᔾᔨᖅᑲᐅᕗᖅ ᐃᓪᓗᕐᔪᐊᖅ ᒪᑐᐃᖁᔭᐅᓯᒪᓕᕐᒪᑦ ᐃᒃᓯᕙᓐᓂᖃᓛᕐᓗᑎᒃ ᐱᒋᐊᕐᓗᑎᒃ 1:30−ᐸᑦ ᐅᓐᓄᓴᒃᑯᑦ ᓇᒡᒐᔾᔭᐅᒥ, ᓯᑎᐱᕆ 21, 2020-ᒥ.

ᐅᖃᖅᑎ ᖁᐊᓴ ᐅᖃᖅᑐᖅ, “ᓯᑎᐱᕆᒥ ᐃᒃᓯᕙᓐᓇᐅᓕᖅᑲᑦ ᓵᓐᖓᑦᑎᓗᐊᓛᖅᑐᑦ ᐃᓱᒪᒃᓴᖅᓯᐅᕈᑎᖃᕐᓂᕐᓂᒃ ᑐᒃᓯᕌᖑᔪᓂᑦ ᑮᓇᐅᔭᓂᒃ ᐃᓚᒋᐊᖅᓯᒍᒪᔾᔪᑎᓂᑦ ᓴᖅᑭᖅᓯᒪᔪᓂᒃ ᑰᕕᑦ−19 ᓄᕙᓐᓇᕐᔪᐊᖅ ᓯᐊᒻᒪᒃᓯᒪᓂᖓᓄᑦ ᐊᒻᒪᓗ ᐊᓯᖏᓐᓂᑦ ᐱᓕᕆᐊᒃᓴᖏᓐᓂᑦ. ᖁᕕᐊᓱᓪᓚᕆᑦᑐᖓ ᒪᓕᒐᓕᐅᖅᕕᑦᑕ ᐃᓚᑖᕆᓂᐊᖅᑕᖏᒃ ᒪᕐᕈᕐᒃ ᒪᓕᒐᓕᐅᖅᑏᑦ ᑭᒡᒐᖅᑐᐃᔫᒃ ᖃᒪᓂᑦᑐᐊᕐᒥᒃ ᖁᕐᓗᑦᑑᒥᓪᓗ ᐃᖏᖃᑕᐅᓛᓕᕐᒪᑎᒃ ᐃᒃᓯᕙᐅᑕᒥᓄᑦ ᐃᒃᓯᕙᓕᖅᐸᑕ. ᐅᓪᓗᓚᑦᑖᕆᓛᖅᑕᖏᑦ ᐅᑭᐊᒃᓵᒃᑯᑦ ᐃᒃᓯᕙᓐᓇᐅᑉ ᐅᖃᐅᓯᐅᓛᖅᑐᑦ ᑭᖑᓂᑦᑎᐊᖓᒍᑦ ᐃᓪᓗᕐᔪᐊᖅ ᒪᑐᐃᓚᐅᖅᑎᓪᓗᒍ ᐅᐊᑦᑎᐊᕈᒃᑲᓐᓂᖅ ᑕᕝᕙᓂ ᑕᖅᑭᑎᓐᓂ.”

ᐅᖃᖅᑎ ᖁᐊᓴ ᐃᓚᓯᓚᐅᕐᒥᔪᖅ, “ᐱᔾᔪᑎᒋᓪᓗᒍ ᑰᕕᑦ−19 ᓄᕙᓐᓇᕐᔪᐊᖅ ᓯᐊᒻᒪᒃᓯᒪᓂᖓᑕ ᑲᔪᓰᓐᓇᕐᓂᖓ, ᖃᓂᒌᓗᐊᖅᑕᐃᓕᒪᓂᕐᒧᑦ ᒪᓕᑦᑕᐅᔭᕆᐊᓖᑦ ᒪᓕᑦᑕᐅᔭᕆᐊᖃᓛᕐᒪᑕ ᐊᒻᒪᓗ ᐊᐅᓪᓚᕆᐊᖃᓗᐊᕋᑎᒃ ᐊᐅᓪᓚᖃᑦᑕᖁᔭᐅᓐᖏᓐᓂᐅᔪᑦ. ᑕᒪᓐᓇ ᐱᔾᔪᑎᒋᓪᓗᒍ, ᑭᒃᑯᑐᐃᓐᓇᕐᓄᑦ ᐃᓯᖅᑕᐅᔪᓐᓇᕐᓂᖓ ᒪᓕᒐᓕᐅᖅᕕᐅᑉ ᐱᕕᑐᓂᖓ ᐊᒻᒪᓗ ᐳᓛᕆᐊᖅᑐᓄ ᐃᒃᓯᕙᐅᑕᑦ ᒪᓕᒐᓕᐅᖅᕕᒻᒥ ᐃᓱᒪᖅᓱᓇᔾᔮᓛᓐᖏᑦᑐᑦ ᐱᒋᐊᕐᓗᑎᒃ ᓰᑏᕝᕙ 14, 2020−ᒥ, ᐊᒻᒪᓗ ᑕᕝᕙᓂ ᐊᕐᕌᒍᑦᑎᓐᓂ ᒪᒃᑯᑦᑐᑦ ᒪᓕᒐᓕᐅᖅᕕᖓ ᓄᖅᑲᖅᑎᑕᐅᓯᒪᕗᖅ. ᑐᓐᖓᓱᑦᑎᐸᒃᑲ ᓄᓇᕗᒻᒥᐅᑕᓕᒫᑦᑎᐊᑦ ᒪᓕᒃᓱᐊᖁᓪᓗᒋᑦ ᐱᕙᓪᓕᐊᓂᖏᓐᓂᒃ ᒪᓕᒐᓕᐅᖅᕕᐅᑉ ᐃᒃᓯᕙᓐᓇᐅᓂᐊᖅᑐᒥ ᑕᓚᕕᓴᒃᑯᑦ, ᓈᓚᐅᑎᒃᑯᑦ ᐊᒻᒪᓗ ᐅᕙᒍᑦ ᖃᕋᓴᐅᔭᒃᑯᑦ ᐃᑭᐊᖅᓯᕕᖓᒍᑦ ᑕᑯᒃᓴᐅᑦᑕᐅᑎᒋᔪᒃᑯᑦ.” ᓄᓇᕗᒻᒥᐅᑕᐃ ᓱᓕ ᖃᐅᔨᒪᖃᑎᖃᕈᓐᓇᖅᑐᑦ ᒪᓕᒐᓕᐅᖅᑎᒥᓂᒃ ᐃᒃᓯᕙᓐᓇᐅᑎᓪᓗᒍ ᖃᕋᓴᐅᔭᒃᑯᑦ ᑎᑎᕋᖅᕕᒋᓗᒋᑦ ᐅᕝᕙᓘᓐᓃᑦ ᐊᑭᖃᓐᖏᑦᑐᖅ ᐅᖄᓚᐅᑎᕗᑦ ᐊᑐᕐᓗᒍ 1-877-334-7266.”

ᐅᖃᖅᑎ ᖁᐊᓴ ᓇᓗᓇᐃᖅᓯᒻᒥᔪᖅ ᐊᖏᖅᑎᑕᐅᓂᖏᒃ ᒪᓕᒐᓕᐅᖅᑎᑖᖅᑲᐅᒃ ᖃᒪᓂᑦᑐᐊᕐᒧᑦ ᐊᒻᒪᓗ ᖁᕐᓗᑦᑑᕐᒧᑦ ᑕᓚᕕᓴᒃᑯᑦ ᑕᑯᒃᓴᐅᑦᑕᐅᑎᒋᓛᕐᒪᑦ 11:30−ᒥ (ᑲᓇᓐᓇ) ᐅᓪᓛᒃᑯᑦ ᓇᒡᒐᔾᔭᐅᒥ, ᓯᑎᐱᕆ 14, 2020. ᐅᖃᖅᑎ ᖁᐊᓴ ᐅᖃᖅᑐᖅ, “ᑕᕝᕙᓂ ᐊᖏᖅᑎᑕᐅᔪᓄᑦ ᖃᐃᖅᑯᔭᐅᓯᒪᔪᑐᐊᖑᔪᓄᑦ ᐅᐸᑦᑕᐅᔪᓐᓇᕋᓗᐊᖅᑎᓪᓗᒍ, ᑐᓐᖓᓱᑦᑎᑉᐸᒃᑲ ᖃᒪᓂᑦᑐᐊᕐᒥᐅᑕᐃᑦ ᖁᕐᓗᑦᑑᕐᒥᐅᑕᐃᓪᓗ ᐊᖏᕐᕋᒥᓂ ᑖᒃᑯᓂᖓ ᑕᐅᑐᖁᓪᓗᒋᑦ.” ᒪᓕᒐᓕᐅᖅᕕᐅᑉ ᐊᔾᔨᓐᖑᐊᖁᑎᖏᑦ ᐊᔾᔨᓕᐊᒥᓃᑦ ᐊᖏᖅᑎᑕᐅᔪᖃᖅᑎᓪᓗᒍ ᑐᓂᔭᐅᓛᕐᒥᔪᑦ ᐱᕙᓪᓕᐊᔪᓕᕆᔨᓄᑦ ᑭᖑᓂᑦᑎᐊᖓᒍᑦ.

ᐃᒃᓯᕙᓂᖏᑦ ᒪᓕᒐᓕᐅᖅᕕᐅᑉ ᑕᓚᕕᓴᒃᑯᑦ ᑕᑯᒃᓴᐅᕙᑦᑐᑦ ᓄᓇᓖᑦ ᑕᓚᕕᓴᓕᕆᔨᖏᑎᒍᑦ ᐊᒻᒪᓗ ᐊᖏᕐᕋᒥ ᖃᖓᑦᑕᖅᑎᑕᐅᓯᒪᔪᒃᑯᑦ ᑕᓚᕕᓴᓕᓐᓄᑦ ᕕᐊᓪᑯᑎᒍᑦ (ᓈᓴᐅᑎᓕᒃ 513) ᐊᒻᒪᓗ ᓵᒃᑯᑦ (ᓈᐅᑎᓕᒃ 289 ᐱᑐᖃᖅ / ᓈᓴᐅᑎᓕᒃ 489 ᓄᑖᑦ). ᐃᒃᓯᕙᓐᓇᐃᑦ ᑕᑯᒃᓴᐅᑦᑕᐅᑎᒋᓲᑦ ᐅᕘᓇ: http://video.isilive.ca/nunavut/. ᐃᖃᓗᒻᒥᐅᑕᐃᑦ ᓈᓚᒍᓐᓇᕐᒥᔪᑦ ᑐᓴᖅᓴᐅᑦᑕᐅᑎᒋᔪᓂᒃ ᑲᑎᒪᕐᔪᐊᖅᑐᓂᒃ ᐅᕘᓇ FM ᓈᓚᐅᑎᒃᑯᑦ: ᐅᖃᖅᑐᓕᒫᑦ 92.5 / ᐃᓄᒃᑎᑐᑦ: 94.7 / ᖃᓪᓗᓈᑎᑐᑦ 102.1.

-30-

ᑐᑭᓯᒋᐊᕈᒪᒍᒃᓯ:
ᔮᓐ ᒃᕘᒃ, ᑎᑎᕋᖅᑎ ᒪᓕᒐᓕᐅᖅᕕᒻᒥ
(867) 975-5000

AttachmentSize
ᓇᓗᓇᐃᖅᑕᐅᓂᖓ ᒪᓕᒐᓕᐅᖅᕕᒻᒥ ᐃᒃᓯᕙᓂᐅᓂᐊᖅᑐᑦ120.76 KB