2019−ᒥ ᓂᕈᐊᒐᒃᓴᓕᐅᕐᓂᖅ ᓄᓇᕗᒥ ᐱᓕᕆᑦᑎᐊᕐᓂᑯᓂᒃ ᐃᓕᑕᖅᓯᒍᑎᒧᑦ ᒪᑐᐃᖅᐳᖅ

Dec 13 2019

ᐃᖃᓗᐃᑦ, ᓄᓇᕗᑦ (ᑎᓯᐱᕆ 13, 2019) – ᒪᓕᒐᓕᐅᖅᕕᒻᒥ ᐅᖃᖅᑎ ᐊᒻᒪᓗ ᐃᒃᓯᕙᐅᑕᖓ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᑕᖅᓯᔾᔪᑎᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᓐᓄᑦ, ᔫ ᐃᓄᒃ, ᐅᓪᓗᒥ ᐅᖃᖅᑲᐅᒻᒪᑎᒃ ᓄᓇᕗᒥ ᐱᓕᕆᑦᑎᐊᓂᖁᓄᑦ ᐃᓕᑕᖅᓯᔾᔪᑎᓄᑦ ᓂᕈᐊᕋᒃᓴᓕᐅᕐᓃᑦ ᒪᑐᐃᒃᑲᓂᕐᒥᒻᒪᑕᒎᖅ.

ᔮᓐᓄᐊᓕ 1, 2010−ᒥ, ᑖᓐᓇ ᓄᓇᕗᒥ ᐱᓕᕆᑦᑎᐊᕐᓂᑯᓂᑦ ᐃᓕᑕᖅᓯᔾᔪᑎ ᐊᑐᓕᓚᐅᖅᓯᒪᒻᒪᑦ. ᑖᓐᓇ ᒪᓕᒐᖅᑎᒍᑦ ᐱᔾᔪᓯᐊᕐᓂᐅᔪᖅ ᓴᖅᑭᔮᖅᑎᑕᐅᕗᖅ “ᐅᐱᒍᓱᔾᔪᑎᐅᓂᐊᕐᒪᑦ ᑭᒃᑯᑐᐃᓐᓇᕐᓂᒃ ᐃᑲᔪᕐᓂᖃᓪᓗᐊᑲᓪᓚᒃᓯᒪᔪᓂᒃ ᐱᖅᑯᓯᓕᕆᓂᕐᒧᑦ, ᐃᓅᓯᔨᕆᓂᕐᒧᑦ, ᐅᕝᕙᓘᓐᓃᑦ ᒪᑭᒪᐅᑎᓕᕆᓂᕐᒧᑦ ᓄᓇᕗᒥ.” ᑖᓐᓇ ᐃᓕᑕᕆᔭᐅᓪᔪᑎ ᖁᑦᑎᓂᖅᐹᖑᔪᖅ ᓄᓇᕗᒥ ᐱᔾᔪᓯᐊᖑᔪᓐᓇᖅᑐᓂᒃ, ᐊᒻᒪᓗ ᓴᓐᖏᓂᖅᓴᐅᓪᓗᓂ ᐃᓘᓐᓇᖏᓐᓂᑦ ᐊᓯᖏᓐᓂᑦ ᐱᔾᔪᓯᐊᖑᓲᓂᒃ, ᐅᔭᒥᑦᑕᐅᓲᓂᒃ, ᐃᓕᑕᕆᔭᐅᓂᐅᓲᓂᒃ ᓄᓇᕗᑦ ᒐᕙᒪᖓᓄᑦ. ᐃᓚᒋᔭᐅᓕᕐᓂᖓ ᓄᓇᕗᒻᒥ ᐱᓕᕆᑦᑎᐊᕐᓂᑯᓂᒃ ᐃᓕᓴᖅᓯᔾᔪᑎᐅᑦ ᑕᕝᕗᖓ ᑲᓇᑕᒥ ᐃᓕᓴᖅᓯᖃᑦᑕᕐᓂᕐᒧᑦ ᐋᖅᑭᒃᓯᒪᓂᖓᓄᑦ ᑎᑎᕋᖅᓯᒪᔪᓅᖅᑕᐅᓚᐅᕐᒪᑦ 2018-ᒥ ᐊᑐᕐᑐᑎᒃ ᑲᕙᒪᑐᖃᒃᑯᓐᓂ ᒥᓂᔅᑕᐃᑦ ᑲᑎᒪᔨᖏᑦᑕ ᑎᓕᔾᔪᑎᖓᓐᓂᒃ ᐊᖏᖅᑕᐅᓪᓗᓂᓗ ᑯᐃᓐ ᑭᒡᒐᖅᑐᖅᑎᖓᑕ.

ᑖᒃᑯᐊ ᓄᓇᕗᒥ ᐱᓕᕆᑦᑎᐊᕐᓂᑯᓂᒃ ᐅᖃᐅᔾᔨᒋᐊᖅᑏᑦ ᑲᑎᒪᔩᑦ ᐃᓱᒪᒃᓴᖅᓯᐅᕈᑎᖃᓲᑦ ᓂᕈᐊᕋᒃᓴᓕᐊᖑᓯᒪᔪᓂᒃ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᑕᕆᔭᐅᔾᔪᑎᒧᑦ, ᐊᑐᓕᖁᔭᓕᐅᓕᖅᑐᑎᓪᓗ ᓄᓇᕗᑦ ᑲᒥᓴᓇᖓᓄᑦ, ᑖᓐᓇᐃᓛᒃ ᑲᒥᓴᓇ ᑖᔅᓱᒧᖓ ᐱᔾᔪᓯᐊᒧᑦ ᐊᖏᔪᖅᑳᖑᒻᒪᑦ. ᑖᒃᑯᐊ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᑦ ᐃᓄᖃᖅᑐᑦ ᒪᓕᒐᓕᐅᖅᑎᐅᑉ ᐅᖃᖅᑎᖓᓂᑦ, ᐃᖅᑲᖅᑐᐃᔩᑦ ᐊᖓᔪᖅᑳᖓᑦ ᓄᓇᕗᒥ ᐃᖅᑲᖅᑐᐃᕕᖕᒥ ᐊᒻᒪᓗ ᓄᓇᕗᑦ ᑐᓐᖓᕕᒃᑯᑦ ᑎᒥᑯᑖᑕ ᐊᖏᔪᖅᑳᖓᓂᑦ.

ᓂᕈᐊᕋᒃᓴᓕᐅᕈᑏᑦ ᑕᑕᑎᕆᐊᓖᑦ ᐊᑐᐃᓐᓇᐅᔪᑦ ᒪᓕᒐᖠᐅᖅᑏᑦ ᐊᓪᓚᕝᕕᖏᓐᓂ ᐊᒻᒪᓗ ᐲᔭᖅᑕᐅᔪᓐᓇᕐᒥᔪᑦ ᒪᓕᒐᓕᐅᖅᕕᐅᑉ ᖃᕋᓴᐅᔭᒃᑯᑦ ᐃᑭᐊᖅᓯᕕᖓᓂᑦ ᐅᕙᓐᖓᑦ www.assembly.nu.ca. ᓂᕈᐊᕋᒃᓴᓕᐅᕈᑏᑦ ᐱᔭᐅᓯᒪᔭᕆᐊᓖᑦ ᐃᓱᓕ ᕕᖃᖅᑐᓂ 5:00 ᐅᓐᓄᓴᒃᑯᑦ ᑕᓪᓕᕐᒥᕐᒥ, ᕖᕝᕗᐊᕆ 28, 2020. ᐱᔾᔪᓯᐊᖅᑎᑦᑎᓃᑦ ᐃᓕᑕᕆᔭᐅᔾᔪᑎᓂᒃ ᐊᑐᖅᑕᐅᓛᖅᑐᑦ ᐅᓪᓗᕐᒥ ᑕᐃᔭᐅᓛᑐᐃᓐᓇᖅᑐᒥ.

ᐅᓪᓗᒥᒧᑦ, ᑲᑎᑦᑐᒋᑦ 18 ᐱᓯᒪᕗᑦ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᑕᕆᔭᐅᔾᔪᑎᒥᒃ ᐃᑲᔪᖅᓯᒪᓂᖏᓐᓄᑦ ᑭᒃᑯᑐᐃᓐᓇᕐᓂᒃ ᓄᓇᓕᓐᓂᓪᓗ ᐱᔨᑦᑎᕋᕐᓂᖏᓐᓄᑦ, ᓴᓇᖃᑦᑕᓂᕐᒧᑦ, ᐃᓕᓐᓂᐊᖅᑐᓕᕆᓂᕐᒧᑦ, ᐅᖃᐅᓯᕐᓂᒃ ᓴᖅᑭᔮᖅᑎᑦᑎᓂᕐᒧᑦ, ᐅᑉᐱᖅᑐᓕᕆᓂᕐᓄᑦ ᐊᒻᒪᓗ ᓇᒻᒥᓂᖃᐅᑎᓂᒃ ᐱᕙᓪᓕᐊᑎᑦᑎᓂᕐᒧᑦ.

ᐅᖃᖅᑎ ᒥᑭᖖᒍᐊᖅ ᐅᖃᓚᐅᖅᐳᖅ, “ᑕᐃᒪᓕ ᓂᕆᐅᓕᖅᑎᓪᓗᑕ ᖁᕕᐊᓲᑎᖃᕐᓂᐊᕐᓂᕐᒥᒃ ᐊᕐᕌᒍᑦ ᖁᓕᓄᑦ ᓇᓪᓕᐊᕐᓂᖅᓯᐅᕐᓗᒍ ᓄᓇᕗᒻᒥ ᐱᓕᕆᑦᑎᐊᖅᓯᒪᔪᓄᑦ ᐱᖁᔭᖅ ᐊᑐᓕᖅᑎᑕᐅᓚᐅᕐᓂᖓ, ᓄᓇᕗᒻᒥᐅᓕᒫᑦ ᑲᔪᖏᖅᓴᕐᐸᒃᑲ ᓂᕈᐊᒐᒃᓴᓕᐅᖁᓪᓗᒋᑦ ᑭᓇᑐᐃᓐᓇᕐᒥᒃ ᐊᑲᐅᔪᒃᑯᑦ ᑲᔪᓰᓐᓇᖅᑐᒥᒡᓗ ᐃᑲᔫᑎᖃᖅᓯᒪᔪᒥᒃ ᓄᓇᕗᑦᑎᓐᓂ.”

-30-

ᑐᑭᓯᒋᐊᕈᒪᒍᕕᑦ ᖃᐅᔨᒋᐊᕐᕕᒋᔪᓐᓇᖅᑕᐃᑦ:

ᔮᓐ ᑯᐊᒃ, ᒪᓕᒐᓕᐅᖅᕕᐅᑉ ᑎᑎᕋᖅᑎᖓ
ᐊᒻᒪᓗ ᑎᑎᕋᖅᑎᐅᓪᓗᓂ ᓄᓇᕗᒥ ᐱᓕᕆᑦᑎᐊᕐᓂᑯᓂᒃ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᓐᓄᑦ
ᐅᖄᓚᐅᑖ: (867) 975-5000

AttachmentSize
2019−ᒥ ᓂᕈᐊᒐᒃᓴᓕᐅᕐᓂᖅ ᓄᓇᕗᒥ ᐱᓕᕆᑦᑎᐊᕐᓂᑯᓂᒃ ᐃᓕᑕᖅᓯᒍᑎᒧᑦ ᒪᑐᐃᖅᐳᖅ126.56 KB
ᓂᕈᐊᒐᒃᓴᓐᖑᖅᑎᑦᑎᓂᕐᒧᑦ ᑎᑎᕋᕐᕕᒃᓴᖅ220.86 KB