Frequently Asked Questions

ᒪᓕᒐᓕᐅᖅᑎᒐ ᖃᓄᖅ ᖃᐅᔨᒋᐊᕐᕕᒋᔪᓐᓇᖅᐸᕋ?

Submitted by webadmin on Thu, 05/27/2010 - 13:43

ᒪᓕᒐᓕᐅᖅᑎᑦ ᑐᕌᕈᑎᖏᑦ ᐅᖄᓚᐅᑎᖏᓪᓗ (ᓂᕈᐊᖅᑕᐅᓯᒪᕝᕕᒋᔭᖏᓐᓃᑦᑐᑦ ᐊᒻᒪᓗ ᑎᑎᕋᕐᕕᖓᓂ), ᓱᒃᑲᔪᒃᑰᕈᑎᖏᑦ, ᖃᕆᓴᐅᔭᒃᑯᑦ ᑐᕌᕈᑎᖏᑦ ᐊᒻᒪᓗ ᑭᒃᑰᖕᒪᖔᖏᓐᓂᒃ ᓇᓗᓇᐃᔭᐃᓯᒪᔪᑦ ᑕᑯᒋᐊᕈᓐᓇᖅᑕᑎᑦ, ᐊᑕᖏᖅᖢᑎᒃ ᓇᓗᓇᐃᔭᖅᑕᐅᓯᒪᖕᒪᑕ.

Attachment Size
ᐱᓕᕆᐊᒃᓴᖏᑦ ᓂᕈᐊᖅᑕᐅᒪᕕᖕᒥ ᑎᑎᕋᖅᑎᐅᑉ 41.42 KB
Back to Top
ᒪᓕᒐᓕᐅᕐᕕᖕᒧᑦ ᐳᓛᕆᐊᕈᓐᓇᖅᐳᖔ?

Submitted by webadmin on Thu, 05/27/2010 - 14:18

ᑭᒃᑯᑐᐃᓐᓇᑦ ᖃᖓᑐᐃᓐᓇᖅ ᐃᓯᕈᓐᓇᖅᑐᑦ.  ᒪᓕᒐᓕᐅᕐᕕᒃ ᐃᖃᓗᐃᑦ ᕿᑎᐊᓃᑦᑐᖅ, ᐃᒡᓗᖓᑕ ᓇᓴᐅᑖ 926.

ᑭᒃᑯᑐᐃᓐᓇᑦ ᖃᖓᑐᐃᓐᓇᖅ ᒪᓕᒐᓕᐅᖅᑏᑦ ᑲᑎᒪᕐᔪᐊᖅᑎᓪᓗᒋᑦ ᑕᑯᓐᓇᕆᐊᕈᓐᓇᖅᑐᑦ ᑲᑎᒪᕐᔪᐊᕐᕕᖕᒧᑦ.  ᑐᑭᓯᒋᐊᕐᕕᒋᓂᐊᖅᐸᐃᑦ ᐱᕙᓪᓕᐊᔪᓕᕆᔨ ᐅᖄᓚᕕᒋᓗᒍ (867) 975-5000-ᒧᑦ ᐅᕝᕙᓘᓐᓃᑦ ᖃᕆᓴᐅᔭᒃᑯᑦ ᑐᑭᓯᒋᐊᕐᕕᒋᓗᒍ ᐅᕗᖓ leginfor@assembly.nu.ca, ᑐᑭᓯᑎᑕᐅᓂᐊᕋᕕᑦ ᖃᖓ ᑲᑎᒪᕐᔪᐊᒃᑲᓐᓂᕐᓂᐊᕐᒪᖔᖏᑦ.

Back to Top
ᒪᓕᒐᓕᐅᕐᕕᖕᒥᒃ ᕿᒥᕐᕈᐊᕐᓂᖅ

Submitted by webadmin on Thu, 05/27/2010 - 14:26

ᖃᖓᑐᐃᓐᓇᓕᒫᖅ ᐊᐅᔭᐅᒐᓗᐊᖅᐸᑦ ᐅᑭᐅᖑᒐᓗᐊᖅᐸᓪᓘᓐᓃᑦ ᐊᑭᖃᓐᖏᓪᓗᒍ ᒪᓕᒐᓕᐅᕐᕕᒃ ᕿᒥᕐᕈᐊᖅᑕᐅᔭᖅᑐᕈᓐᓇᖅᑐᖅ ᐅᖄᓚᖅᑳᖅᓯᒪᓗᓂ.  ᑐᑭᓯᒋᐊᒃᑲᓐᓂᕈᒪᒍᕕᑦ ᐅᖄᓚᕕᒋᔪᓐᓇᖅᑕᐃᑦ 975-5000.

Back to Top
ᑲᑎᒪᔾᔪᑎᕕᓃᑦ ᑭᓲᖕᒪᑕ?

Submitted by webadmin on Thu, 05/27/2010 - 14:35

ᓄᓇᕗᑦ ᒪᓕᒐᓕᐅᖅᑎᖏᑦ ᑲᑎᒪᕐᔪᐊᖅᑎᓪᓗᒋᑦ ᑲᑎᒪᔾᔪᑎᕕᓃᑦ ᑎᑎᕋᖅᑕᐅᕙᓪᓕᐊᓲᖑᕗᑦ, ᑖᓐᓇᓗ ᐊᑐᖅᑕᐅᓪᓗᐊᑕᖃᑦᑕᖅᖢᓂ.  ᒪᓕᒐᓕᐅᖅᑏᑦ ᑲᑎᒪᔾᔪᑎᒋᕙᓪᓕᐊᔭᖏᑦ ᑎᑎᕋᖅᑕᐅᖃᑦᑕᖅᑐᑦ ᐱᔭᕇᕐᓂᑕᒫᖏᓐᓂ ᖃᐅᑕᒫᖅ.  ᑎᑎᕋᖅᑕᐅᓯᒪᖃᑦᑕᖅᑐᑦ ᖃᓪᓗᓈᑎᑐᑦ ᐊᒻᒪᓗ ᐃᓄᒃᑎᑐᑦ.

ᐃᓐᓂᕐᕕᒃᑯᑦ ᐃᖃᓗᖕᓃᑦᑐᑦ ᖁᓕᓄᑦ ᑎᑭᑦᑐᒋᑦ ᐃᖅᑲᓇᐃᔭᖅᑎᑦᑎᖃᑦᑕᖅᑐᑦ ᑲᑎᒪᔾᔪᑎᕕᓂᕐᓂᒃ ᑎᙱᕋᖅᐸᓪᓕᐊᔨᐅᔪᓂᒃ.  ᓄᓇᕗᑦ, ᐊᒻᒪᓗ ᓂᐅᐳᕋᓐᓱᕕᒃ ᐊᒻᒪᓗ ᑲᓇᑕᒥ ᒪᓕᒐᓕᐅᕐᕕᒡᔪᐊᖓᓂ ᐋᑐᕚ, ᑲᓇᑕᒥ ᐱᖓᓱᐃᓐᓇᐅᓪᓗᑎᒃ ᑖᒃᑯᐊ ᒪᕐᕈᐃᖕᓂᒃ ᐅᖃᐅᓰᖕᓂᒃ ᐊᑐᖅᖢᑎᒃ ᑲᑎᒪᔾᔪᑎᕕᓂᕐᓂᒃ ᑎᑎᕋᖅᑕᐅᑎᑦᑎᓲᑦ.

Attachment Size
ᐱᓕᕆᐊᒃᓴᑦ ᐊᒃᑐᐊᓂᖃᖅᑐᑦ ᑲᑎᒪᕐᔪᐊᖅᑎᓪᓗᒋᑦ ᑲᑎᒪᔾᔪᑎᕕᓂᕐᓄᑦ 65.63 KB
Back to Top
ᐱᖁᔭᒃᓴᑦ ᑭᓲᖕᒪᑕ?
Back to Top
ᑲᑎᒪᔾᔪᑎᒃᓴᑦ ᑭᓲᖕᒪᑕ?

Submitted by webadmin on Thu, 05/27/2010 - 14:47

ᑲᑎᒪᔾᔪᑎᒃᓴᑦ ᒪᓕᒐᓕᐅᖅᑏᑦ ᑲᑎᒪᕐᔪᐊᖅᑎᓪᓗᒋᑦ ᐊᑐᖅᑕᐅᓲᖑᕗᑦ, ᑲᑎᒪᕐᔪᐊᕐᓂᑕᒫᖅ ᖃᐅᑕᒫᖅ ᑎᑎᕋᖅᑎᐅᑉ ᑎᑎᕋᕐᕕᖓᓐᓄᑦ ᑲᑎᒪᔾᔪᑎᒃᓴᑦ ᐋᖅᑭᒃᓱᖅᑕᐅᖃᑦᑕᖅᑐᑦ, ᑲᑎᒪᕐᔪᐊᖅᑎᓪᓗᒋᓪᓗ ᑲᑎᒪᔾᔪᑕᐅᕙᓪᓕᐊᔪᑦ ᖃᓄᐃᑉᐸᓪᓕᐊᓂᖏᑦ ᓇᓗᓇᐃᖅᑕᐅᓯᒪᖃᑦᑕᕆᓪᓗᑎᒃ.  ᑕᕝᕗᖓ ᐅᓪᓗᕐᒥ ᑲᑎᒪᔾᔪᑕᐅᓂᐊᖅᑐᑦ ᒪᓕᒃᑕᐅᓂᐊᕐᓂᖏᑦ ᑐᖏᓕᕇᒃᓱᖅᑎᑕᐅᓯᒪᓪᓗᑎᒃ ᑎᑎᕋᖅᑕᐅᓯᒪᖃᑦᑕᖅᐳᑦ.  ᐆᒃᑑᑎᒋᓗᒍ, ᑲᑎᒪᕐᔪᐊᕐᓂᖅ ᐱᒋᐊᕈᑎᖃᒡᒍᔪᖅ ᑐᒃᓯᐊᕐᓂᕐᒥᒃ, ᐅᖃᐅᓯᒃᓴᑦ ᒪᑐᐃᖅᓯᔾᔪᑏᑦ, ᒥᓂᔅᑕᐃᑦ ᐊᒻᒪᓗ ᒪᓕᒐᓕᐅᖅᑏᑦ ᐅᖃᐅᓯᖏᑦ, ᐅᖃᐅᓯᒃᑯᑦ ᑎᑎᕋᖅᓯᒪᔪᒃᑯᓪᓗ ᐊᐱᖅᑯᑏᑦ, ᐅᓂᒃᑲᐅᓯᖃᕐᓂᖅ ᕿᒥᕐᕈᓂᕐᓗ ᐱᖁᔭᒃᓴᓂᒃ, ᐱᖁᔨᕗᖔᕈᑏᑦ ᐊᒻᒪᓗ ᐊᓯᖏᑦ.

Back to Top
ᒪᓕᒐᓕᐅᕐᕕᖕᒥ ᒪᓕᒐᓕᐅᖅᑎ ᖃᓄᐃᓕᐅᖃᑦᑕᕐᒪᑦ?

Submitted by webadmin on Thu, 05/27/2010 - 14:53

ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑎ ᒪᕐᕈᐃᓕᖓᓗᒍ ᐅᖃᐅᓯᕆᔭᐅᔪᓐᓇᖅᑐᖅ.  ᓯᕗᓪᓕᖅ, ᒪᓕᒐᓕᐅᖅᑏᑦ ᓂᕈᐊᖅᑎᒥᖕᓂᒃ ᑭᒡᒐᖅᑐᐃᓪᓗᑎᒃ ᐅᖃᖅᑎᒋᔭᐅᖃᑦᑕᖅᐳᑦ ᒪᓕᒐᓕᐅᕐᕕᖕᒥ, ᐊᐃᑉᐸᖓ, ᒪᓕᒐᓕᐅᖅᑎ ᑭᒡᒐᖅᑐᐃᔨᒋᔭᐅᕗᖅ ᓂᕈᐊᖅᑕᐅᕝᕕᒋᓯᒪᔭᒥᓄᑦ, ᑭᓐᖒᒪᔭᖏᑦ ᓴᐳᒻᒥᐅᓯᖅᓯᒪᓪᓗᓂᒋᑦ.  ᒪᓕᒐᓕᐅᖅᑏᑦ ᐊᖅᑯᑎᒋᔭᐅᓪᓚᕆᒃᐳᑦ ᓂᕈᐊᖅᑎᒥᖕᓂᒃ ᑐᓴᐅᒪᑎᑦᑎᔨᐅᓪᓗᑎᒃ ᖃᓄᐃᓕᐅᓕᕋᓗᐊᕐᒪᖔᖏᑦ ᒐᕙᒪᒃᑯᑦ, ᐊᒻᒪᓗ ᐃᒡᓗᖔᖓᒍᑦ ᑕᑯᓇᕐᓗᒍ, ᑐᓴᐅᒪᑎᑕᐅᒋᓪᓗᑎᒃ ᓂᕈᐊᖅᑎᒥᒃᑕ ᑭᓐᖒᒪᔭᖏᓐᓂᒃ ᐊᒻᒪᓗ ᖃᓄᖅ ᒐᕙᒪᒃᑯᑦ ᐱᕙᓪᓕᐊᑎᑕᖏᓐᓂᒃ ᐃᓱᒪᒋᔭᐅᖕᒪᖔᖏᑦ.

ᒪᓕᒐᓕᐅᕐᕕᖕᒥ ᒪᓕᒐᓕᐅᖅᑏᑦ ᐱᖁᔭᒃᓴᓕᐅᕐᓂᕐᒥᒃ ᐃᓚᐅᓲᖑᕗᑦ ᑲᑎᒪᔾᔪᑕᐅᑎᓪᓗᒋᑦ ᒪᓕᒐᓕᐅᕐᕕᖕᒥ, ᓴᖅᑭᑦᑎᓂᒃᑯᑦ ᓇᖕᒥᓂᖅ ᐱᖁᔭᒃᓴᓕᐊᕆᔪᒪᔭᕐᒥᓂᒃ, ᐊᒻᒪᓗ ᑲᑎᒪᔨᕋᓛᒃᑰᖅᑎᑕᐅᑎᓪᓗᒋᑦ.  ᑲᑎᒪᔨᕋᓛᖑᑲᐃᓐᓇᖅᑐᑦ ᐊᒻᒪᓗ ᑲᑎᒪᔨᕋᓛᖑᐃᓐᓇᖅᑐᑦ ᐱᓕᕆᓂᖓᑦ ᐱᓕᕆᐊᒃᓴᖅᑖᕆᔭᐅᓯᒪᓪᓗᐊᖅᐳᖅ ᒪᓕᒐᓕᐅᖅᑏᑦ ᐱᔭᒃᓴᖏᓐᓂ.

Attachment Size
ᐱᓕᕆᐊᒃᓴᖏᑦ ᑲᑎᒪᔨᐅᖃᑕᐅᔫᑉ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ 58.05 KB
ᐱᓕᕆᐊᒃᓴᖏᑦ ᒪᓕᒐᓕᐅᖅᑎᓕᒫᖅ ᑲᑎᒪᔨᖏᑕ ᐊᒻᒪᓗ ᒪᓕᒐᓕᐅᖅᑎᑐᐃᓐᓇᐃᑦ ᑲᑎᒪᔨᖏᑕ 68.25 KB
Back to Top
ᒪᓕᒐᓕᐅᕐᕕᐅᑉ ᑲᑎᒪᔨᕋᓛᖑᐃᓐᓇᖅᑐᖁᑎᖏᑦ ᑲᑎᒪᔨᕋᓛᖑᑲᐃᓐᓇᖅᑐᖁᑎᖏᓪᓗ ᑭᓲᖕᒪᑕ?

Submitted by webadmin on Thu, 05/27/2010 - 15:01

ᒪᓕᒐᓕᐅᕐᕕᐅᑉ ᑲᑎᒪᔨᕋᓛᖑᐃᓐᓇᖅᑐᖁᑎᖏᑦ ᑲᑎᒪᔨᕋᓛᖑᑲᐃᓐᓇᖅᑐᖁᑎᖏᓪᓗ ᓴᖅᑭᑕᐅᓯᒪᕗᑦ ᕿᒥᕐᕈᓇᒃᑎᐅᓂᐊᕐᒪᑕ ᐊᔾᔨᒌᓐᖏᑦᑐᓂᒃ ᕿᒥᕐᕈᐊᖅᑕᐅᔭᕆᐊᓕᖕᓂᒃ, ᐅᓄᓐᖏᓐᓂᖅᓴᐅᓪᓗᑎᒡᓗ ᑲᑎᒪᔾᔪᑎᖃᖃᑦᑕᕈᓐᓇᕐᓂᐊᕐᒪᑕ ᑭᓱᑐᐃᓐᓇᕐᓂᒃ ᐃᓗᓕᑯᓘᔭᖏᑦ ᓈᓗᒋᑦ.  ᑲᑎᒪᔨᕋᓛᑦ ᒪᓕᒐᖏᑦ ᓇᓖᕌᕐᕕᒃᓴᖃᐅᕐᓂᖅᓴᐅᕗᑦ ᒪᓕᒐᓕᐅᖅᑏᑦ ᑲᑎᒪᕐᔪᐊᕐᓂᖏᓐᓂᑦ, ᐊᒻᒪᓗ ᑲᑎᒪᔨᕋᓛᑦ ᓈᓚᒍᓐᓇᖅᖢᑎᒃ ᐅᓂᒃᑲᐅᔾᔭᐅᔪᓐᓇᖅᖢᑎᒡᓗ ᒥᓂᔅᑕᓄᑦ, ᐊᖓᔪᖅᑲᐅᑎᓄᑦ ᐊᒻᒪᓗ ᐊᓯᖏᓐᓄᑦ ᐱᖁᔭᒃᓴᓄᑦ ᐊᒃᑐᖅᑕᐅᓗᐊᓐᖑᐊᕐᓂᐊᖅᑐᓄᑦ.

ᑲᑎᒪᔨᕋᓛᖑᐃᓐᓇᖅᑐᑦ ᐱᖓᓱᐃᓕᖓᓪᓗᐊᑕᖅᑐᓂᒃ ᐱᔭᒃᓴᖅᑖᖅᑎᑕᐅᓯᒪᕗᑦ:  ᐱᖁᔭᕐᔪᐊᕐᓂᒃ ᕿᒥᕐᕈᓂᖅ, ᐊᑐᐊᒐᕐᓄᑦ ᑐᕌᖓᔪᓂᒃ ᕿᒥᕐᕈᓇᖕᓂᖅ, ᐊᒻᒪᓗ ᕿᒥᕐᕈᔨᐅᓪᓗᑎᒃ ᒐᕙᒪᒃᑯᑦ ᑮᓇᐅᔭᖅᑐᕈᑎᒋᔪᒪᔭᖏᓐᓂᒃ.  ᑲᑎᒪᔨᕋᓛᖑᐃᓐᓇᖅᑐᑦ ᒪᓕᒐᓕᐅᕐᕕᐅᑉ ᐱᔭᒃᓴᖏᓐᓂᒃ ᐱᓕᕆᐊᖃᐃᓐᓇᖃᑦᑕᖅᐳᑦ ᑕᐃᒪᓐᖓᓕᒫᖅ.

ᑲᑎᒪᔨᕋᓛᖑᑲᐃᓐᓇᖅᑐᑦ ᓴᖅᑭᑕᐅᔪᓐᓇᖅᐳᑦ ᐊᑕᐅᓯᕐᒥᒃ ᐱᔭᒃᓴᖅᑖᖅᑎᑕᐅᓯᒪᓂᐊᕐᓗᑎᒃ.  ᑲᑎᒪᔨᕋᓛᖑᑲᐃᓐᓇᖅᑐᑦ ᑐᓴᐅᒪᔾᔪᑎᓂᒃ ᓄᐊᑦᑎᓲᖑᕗᑦ ᐊᒻᒪᓗ ᑕᖅᑳᓐᖓᑦ ᖃᓄᖅ ᐃᓱᒪᒋᔭᖃᕐᒪᖔᖏᓐᓂᒃ ᑐᑭᓯᓇᓱᖃᑦᑕᖅᐳᑦ ᐊᑕᐅᓯᕐᒥᒃ ᐱᔾᔪᑎᖃᖅᑐᓂᒃ, ᐊᒻᒪᓗ ᐅᓂᒃᑲᐅᓯᕆᔭᕆᐊᖃᖅᖢᓂᔾᔪᒃ ᑐᑭᓯᔭᓂ ᒪᓕᒐᓕᐅᕐᕕᖕᒧᑦ, ᒪᓕᒐᓕᐅᕐᕕᖕᒧᐊᖅᑕᐅᖕᒪᑕᓗ ᑲᑎᒪᔾᔪᑕᐅᓕᖅᖢᑎᒃ ᐊᒻᒪᓗ ᐊᖏᖅᑕᐅᓪᓗᑎᒃ ᐅᕝᕙᓘᓐᓃᑦ ᐋᖅᑭᒋᐊᖅᑕᐅᓪᓗᑎᒃ ᐊᑐᓕᖁᔭᓕᐊᕕᓂᖏᑦ.

Attachment Size
ᐱᓕᕆᐊᒃᓴᖏᑦ ᑲᑎᒪᔨᕋᓛᖑᐃᓐᓇᖅᑐᑦ ᐊᒻᒪ ᑲᑎᒪᔨᕋᓛᖑᑲᐃᓐᓇᖅᑐᑦ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ 51.1 KB
Back to Top
ᒥᓂᔅᑕᐃᑦ ᑲᑎᒪᔨᖏᑦ ᖃᓄᖅ ᓂᕈᐊᖅᑕᐅᖃᑦᑕᕐᒪᑕ?

Submitted by webadmin on Thu, 05/27/2010 - 15:10

ᒥᓂᔅᑕᐃᑦ ᑲᑎᒪᔨᖏᑦ ᓂᕈᐊᖅᑕᐅᖃᑦᑕᖅᐳᑦ ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑎᓂᑦ.  ᒪᓕᒐᓕᐅᖅᑏᑦ ᓂᕈᐊᖅᑕᐅᓵᓚᐅᖅᑎᓪᓗᒋᑦ ᑲᑎᑦᑐᐃᓐᓇᐅᓲᖑᕗᑦ, ᑕᐃᒪᓐᓇᓗ ᑲᑎᓐᖓᑎᓪᓗᒋᑦ ᑲᑎᒪᓂᖓᑦ ᑕᐃᔭᐅᖃᑦᑕᖅᖢᓂ ᓄᓇᕗᒻᒥ ᓯᕗᒃᑲᖅᑕᖅᑏᑦ ᑲᑎᒪᓂᖓᓐᓂᒃ.  ᑕᐃᒪᓐᓇ ᑲᑎᒪᓂᖃᖅᑎᓪᓗᒋᑦ, ᒪᓕᒐᓕᐅᖅᑏᑦ ᒪᓕᒐᓕᐅᖅᑎᐅᖃᑎᒥᖕᓂᒃ ᓂᕈᐊᒐᒃᓴᓐᖑᖅᑎᑦᑎᓲᖑᕗᑦ ᒥᓂᔅᑕᐃᑦ ᑲᑎᒪᔨᖏᓐᓄᑦ ᐃᓕᔪᒪᔭᕐᒥᓂᒃ.  ᐊᑐᓂ ᓂᕈᐊᒐᒃᓴᓐᖑᖅᑎᑕᐅᔪᑦ ᐱᕕᖃᖅᑎᑕᐅᔪᐃᓐᓇᐅᓲᖑᕗᑦ ᓂᓪᓕᕈᓐᓇᕐᓂᕐᒥᒃ.  ᐸᐃᑉᐹᑎᒍᑦ ᓂᕈᐊᖅᖢᑎᒃ ᓂᕈᐊᖅᖠᓲᖑᕗᑦ ᒥᓂᔅᑕᐃᑦ ᑲᑎᒪᔨᒃᓴᖏᓐᓂᒃ.

Back to Top
ᒥᓂᔅᑕᐃᑦ ᑲᑎᒪᔨᖏᑦ ᖃᓄᐃᓕᐅᖃᑦᑕᕐᒪᑕ?

Submitted by webadmin on Thu, 05/27/2010 - 15:16

ᐅᖃᐅᓯᖃᓕᕌᖓᑦᑕ ‘ᒐᕙᒪᓂᒃ’, ᐅᖃᐅᓯᖃᒡᒍᔪᒍᑦ ᒥᓂᔅᑕᐃᑦ ᑲᑎᒪᔨᖏᓐᓂᒃ.

ᒥᓂᔅᑕᐃᑦ ᑲᑎᒪᔨᖏᑦ ᓯᕗᒃᑲᖅᑕᖅᑎᒋᔭᐅᕗᑦ, ᑭᓯᐊᓂᓗ ᑕᐃᒪᐃᒃᑲᓗᐊᖅᑎᓪᓗᒍ, ᒪᓕᒐᓕᐅᕐᕕᖕᒧᑦ ᓂᕈᐊᖅᑕᐅᓯᒪᔪᓂᓐᖔᕋᒥᒃ, ᒥᓂᔅᑕᐃᑦ ᐊᒻᒪᓗ ᒪᓕᒐᓕᐅᖅᑏᑦ ᐊᒡᒍᖅᑐᖅᓯᒪᓂᖏᑦᑎᒍᑦ ᐱᔭᒃᓴᖏᑦ ᐸᔾᔭᕐᓗᒃᐳᑦ.

ᒥᓂᔅᑕᐃᑦ ᑲᑎᒪᔨᖏᑦ ᖁᓪᓕᖅᐹᖑᓪᓗᑎᒃ ᐃᓱᒪᓕᐅᖅᑎᒋᔭᐅᕗᑦ ᓄᓇᕗᑦ ᒐᕙᒪᒃᑯᓐᓄᑦ, ᐊᒻᒪᓗ ᐅᑯᐊᖑᓪᓗᑎᒃ, ᓯᕗᓕᖅᑎ ᐊᒻᒪᓗ 7 ᒥᓂᔅᑕᐃᑦ, ᑕᒪᕐᒥᒃ ᓂᕈᐊᖅᑕᐅᓯᒪᔪᐃᓐᓇᐅᓪᓗᑎᒃ ᒪᓕᒐᓕᐅᕐᕕᐅᑉ ᒪᓕᒐᓕᐅᖅᑎᖏᓐᓄᑦ.

ᒪᓕᒐᓕᐅᖅᑏᑦ ᑲᑎᒪᕐᔪᐊᕋᓗᐊᖅᐸᑕ ᐅᕝᕙᓘᓐᓃᑦ ᑲᑎᒪᕐᔪᐊᓐᖏᒃᑲᓗᐊᖅᑎᓪᓗᒍ, ᒥᓂᔅᑕᐃᑦ ᑲᑎᒪᔨᖏᑦ ᐱᔭᒃᓴᖅᑖᖅᑎᑕᐅᓯᒪᕗᑦ ᒐᕙᒪᒃᑯᑦ ᖃᐅᑕᒫᖅᓯᐅᑎᖏᓐᓂᒃ ᐊᐅᓚᑦᓯᔨᐅᓂᕐᒥᒃ.  ᑕᒪᑐᒥᖓ ᐊᑐᖅᑎᓪᓗᒋᑦ, ᒥᓂᔅᑕᐃᑦ ᐃᖅᑲᓇᐃᔭᖃᑎᖃᖃᑦᑕᖅᑐᑦ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᓐᓂᒃ, ᒥᓂᔅᑕᐅᖃᑎᒥᖕᓂᒃ, ᐅᕝᕙᓘᓐᓃᑦ ᐃᒻᒥᒃᑰᖅᖢᑎᒃ.

ᐊᕐᕌᒎ ᐃᓗᐊᓂ, ᑲᑎᒪᔾᔪᑎᖃᓲᑦ ᐊᑐᐊᒐᓄᑦ ᑐᕌᖓᔪᓂᒃ, ᐃᓱᒪᒃᓴᖅᓯᐅᕈᑎᖃᖃᑦᑕᕐᓂᕐᒥᒃ ᓄᑖᓂᒃ ᐱᖁᔭᒃᓴᓂᒃ, ᐊᒻᒪᓗ ᐃᖅᑲᓇᐃᔮᖃᖃᑦᑕᖅᖢᑎᒃ ᑮᓇᐅᔭᑦ ᐊᑐᕈᒫᕐᓂᐊᖅᑐᒃᓴᓂᒃ.  ᐃᒻᒥᒃᑰᖅᖢᑎᒃ, ᓂᐊᖁᕆᔭᐅᕗᑦ ᐊᕕᒃᑐᖅᓯᒪᔪᓂ, ᐊᒻᒪᓗ ᐱᓕᕆᕝᕕᖏᑦᑕ ᑐᕌᒐᖏᑦ ᓴᖅᑭᑕᐅᕙᓪᓕᐊᑦᑎᐊᕋᓗᐊᕐᒪᖔᖏᓐᓂᒃ.

ᐱᓕᕆᕝᕕᖕᓄᑦ ᓂᐊᖁᕆᔭᐅᔪᑦ ᑕᐃᔭᐅᖃᑦᑕᖅᐳᑦ ᒥᓂᔅᑕᐃᑦ ᑐᖏᓕᖏᓐᓂᒃ, ᑖᒃᑯᐊᓗ ᒥᓂᔅᑕᒧᑦ ᑐᕌᖅᖢᑎᒃ ᐅᓂᒃᑳᓕᐅᓲᖑᓪᓗᑎᒃ.  ᒥᓂᔅᑕ ᐱᔭᒃᓴᖅᑕᖅᑎᑕᐅᓯᒪᕗᖅ ᒪᓕᒐᓕᐅᕐᕕᐅᑉ ᑐᕌᒐᒃᓴᓕᐊᖏᓐᓂᒃ ᒪᓕᒋᐊᖃᕐᓂᕐᒥᒃ, ᐋᖅᑭᒃᓱᐃᖃᑦᑕᕐᓂᕐᒥᒃ ᐊᑐᐊᒐᓂᒃ ᐊᖏᖅᑕᐅᔭᕆᐊᓕᖕᓂᒃ ᒥᓂᔅᑕᐃᑦ ᑲᑎᒪᔨᖏᓐᓄᑦ, ᐃᓱᒪᓕᐅᖅᑎᐅᓪᓗᑎᒡᓗ ᖃᓄᖅ ᐊᑐᐊᒐᐃᑦ ᐊᐅᓚᔾᔭᒃᑕᐅᓂᐊᕐᒪᖔᖏᑦ ᐊᒻᒪᓗ ᑎᑎᕋᕐᕕᖕᒥ ᐃᖅᑲᓇᐃᔭᖅᑏᑦ ᑕᒪᒃᑯᓂᖓ ᒪᓕᒃᑲᓗᐊᕐᒪᖔᖏᓐᓂᒃ ᓇᐅᑦᑎᖅᓱᖅᑎᒋᔭᐅᓪᓗᑎᒃ.

ᑕᖅᑲᒃᑯᐊ ᑭᓐᖒᒪᔭᖏᑦ ᒪᓕᒡᓗᒋᑦ, ᒥᓂᔅᑕᐃᑦ ᓴᖅᑭᑦᑎᔨᐅᕗᑦ ᐱᖁᔭᒃᓴᓂᒃ ᐱᓕᕆᕝᕕᖏᑦᑕ ᐃᓗᐊᒍᑦ ᐱᔭᒃᓴᖅᑖᕆᓯᒪᔭᖏᓐᓅᖓᔪᓂᒃ.  ᒪᓕᒐᓕᐅᕐᕕᖕᒥ ᐊᐱᖅᓱᖅᑕᐅᔪᓄᑦ ᑭᐅᑦᑕᕆᐊᖃᖅᐳᖅ ᐱᓕᕆᕝᕕᖏᑦᑕ ᖃᓄᐃᓕᐅᖅᓯᒪᔭᖏᓐᓅᖓᔪᓂᒃ ᐊᒻᒪᓗ ᐊᑐᕈᒫᕐᓂᐊᖅᑐᓕᐊᕆᓯᒪᔭᖏᓐᓂᒃ.    

ᓯᕗᓕᖅᑎᐅ ᐱᔭᒃᓴᖏᑦᑕ ᐃᓚᖏᑦ ᐃᒃᓯᕙᐅᑕᐅᕗᖅ ᒥᓂᔅᑕᐃᑦ ᑲᑎᒪᓂᖃᖅᑎᓪᓗᒋᑦ, ᒥᓂᔅᑕᓄᑦ ᐱᔭᒃᓴᕆᔭᐅᓂᐊᖅᑐᓂᒃ ᑐᓂᐅᖅᑲᐃᔨᐅᓪᓗᓂ ᐊᒻᒪᓗ ᐃᓂᖅᑎᕆᔨᐅᓪᓗᓂ ᒥᓂᔅᑕᓂᒃ.  ᓯᕗᓕᖅᑎ ᐋᖅᑭᒃᓱᐃᓲᖑᒋᕗᖅ ᐊᖏᖃᑎᒌᒃᑐᐃᓐᓇᐅᔪᓐᓇᕐᓂᐊᕐᒪᑕ ᒥᓂᔅᑕᐃᑦ ᐊᒻᒪᓗ ᐅᖃᖅᑎᒋᔭᐅᓪᓗᓂ ᐅᖃᐅᓯᐅᔭᕆᐊᓖᑦ ᒥᓂᔅᑕᑦ ᐱᔭᒃᓴᖏᑦᑕ ᐃᓗᐊᒎᓐᖏᑐᐊᖅᐸᑕ.

Attachment Size
ᐱᓕᕆᐊᒃᓴᖏᑦ ᒥᓂᔅᑕᐃᑦ ᑲᑎᒪᔨᖏᑦ ᐊᒻᒪ ᑮᓇᐅᔭᓕᕆᓂᕐᒧᑦ ᑲᑎᒪᔨᑦ 47.48 KB
Back to Top
ᓯᕗᓕᖅᑎ ᖃᓄᐃᓕᐅᖃᑦᑕᕐᒪᑦ?

Submitted by webadmin on Thu, 05/27/2010 - 15:23

ᓄᓇᕗᑦ ᓯᕗᓕᖅᑎᐊ, ᔫ ᓴᕕᑲᑖᖑᕗᖅ, ᒪᓕᒐᓕᐅᖅᑎ ᐊᕐᕕᐊᑦ ᓂᒋᐊᓄᑦ. ᐅᑯᓂᖓ ᐱᔭᒃᓴᖅᑖᖅᑎᑕᐅᓯᒪᔪᖅ:

  • ᒐᕙᒪᓕᕆᔨᒃᑯᑦ ᒥᓂᔅᑕᖓᑦ
  • ᐊᕙᑎᓕᕆᔨᒃᑯᑦ ᒥᓂᔅᑕᖓᑦ
  • ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᔪᖅ ᓄᓇᖃᖅᑳᖅᓯᒪᔪᓅᖓᔪᓂᒃ
  • ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᔪᖅ ᐃᓐᓇᑐᖃᕐᓂᒃ
  • ᒥᓂᔅᑕ ᐱᔭᒃᓴᖅᑖᖅᑎᑕᐅᓯᒪᔪᖅ ᐆᒻᒪᖅᑯᑏᑦ ᐊᑭᖏᓐᓂᒃ ᕿᒥᕐᕈᔩᑦ ᑲᑎᒪᔨᖏᓐᓂᒃ
Attachment Size
ᐱᓕᕆᐊᒃᓴᖏᑦ ᓯᕗᓕᖅᑎᖓᑦᑕ ᓄᓇᕗᑦ 40.98 KB
Back to Top
ᐅᖃᖅᑎ ᖃᓄᐃᓕᐅᖃᑦᑕᕐᒪᑦ?
Back to Top
ᒪᓕᒐᓕᐅᕐᕕᖕᒥ ᑎᑎᕋᖅᑎ ᖃᓄᐃᓕᐅᖃᑦᑕᕐᒪᑦ?
Back to Top
ᐃᖅᓱᒃᑎ ᖃᓄᐃᓕᐅᖃᑦᑕᕐᒪᑦ?

Submitted by webadmin on Thu, 05/27/2010 - 15:43

ᐃᒻᒪᑲᓪᓛᓗᒃ 1200-ᖏᓐᓃᓱᖓᖅᑎᓪᓗᒍ, ᐃᖅᓱᒃᑎ ᓴᐳᒻᒥᔨᐅᓚᐅᖅᓯᒪᕗᖅ ᑭᖕᒥᒃ ᑯᐃᓐᒥᒡᓘᓐᓃᑦ, ᑖᓐᓇ ᐃᖅᓱᒐᓂ ᓱᒋᐊᕈᑎᒋᓪᓗᓂᐅᒃ.  ᐅᓪᓗᒥᐅᓕᖅᑐᖅ, ᐃᖅᓱᒃᑎ ᐊᒡᔭᖅᓯᓲᖑᕗᖅ ᐃᖅᓱᒐᕐᒥᓂᒃ ᑲᑎᒪᕐᔪᐊᕐᕕᖕᒧᑦ ᑲᑎᒪᕐᔪᐊᕐᓂᖅ ᐱᒋᐊᕐᓂᐊᓕᖅᑎᓪᓗᒍ, ᐊᒻᒪᓗ ᐊᓐᓂᑎᕙᒃᖢᓂᐅᒃ ᐱᔭᕇᕌᖓᑕ.  ᑖᓐᓇ ᐃᖅᓱᒃᑎ ᐱᔭᒃᓴᖅᑖᖅᑎᑕᐅᓯᒪᖕᒥᕗᖅ ᓴᐳᒻᒥᔨᐅᓪᓗᓂ ᐃᖅᓱᒐᕐᒥᒃ, ᑲᑎᒪᕐᔪᐊᖅᑐᓂᒡᓗ ᑕᑯᓐᓇᕆᐊᖅᑐᓂᒃ ᓇᐅᑦᑎᖅᓱᖅᑎᐅᓪᓗᓂ ᐱᑦᑎᐊᕋᓗᐊᕐᒪᖔᖏᓐᓂᒃ, ᑎᓕᓯᖃᑦᑕᖅᖢᓂ ᐱᔨᑲᑖᖕᓂᒃ, ᓇᐅᑦᑎᖅᓱᖅᑎᒋᔭᐅᓪᓗᓂ ᑲᑎᒪᕐᔪᐊᕐᕕᖕᒥᒃ, ᐊᒻᒪᓗ ᓴᐳᒻᒥᔨᐅᓪᓗᓂ ᒪᓕᒐᓕᐅᖅᑎᓂᒃ ᐊᒻᒪᓗ ᐃᖅᑲᓇᐃᔭᖅᑎᓂᒃ.

Attachment Size
ᐱᓕᕆᐊᒃᓴᖏᑦ ᑲᑎᒪᕐᔪᐊᕐᕕᖕᒥ ᐃᖅᑲᓇᐃᔭᖅᑎᑦ 38.52 KB
Back to Top
ᓄᓇᕗᒻᒥ ᑲᒥᓴᓇ ᖃᓄᐃᓕᐅᖃᑦᑕᕐᒪᑦ?

Submitted by webadmin on Thu, 05/27/2010 - 15:49
ᓇᓕ ᑯᓱᒐᖅ, ᑲᒥᓯᓇ ᓄᓇᕘᒧᑦ. ᑲᓇᑕᐅᑉ ᒐᕙᒪᒃᑯᖏᓐᓄᑦ ᑎᒃᑯᐊᖅᑕᐅᓯᒪᓪᓗᓂ, ᑲᒥᓯᓇᒋᔭᖅ ᐃᓄᓕᕆᔨᑐᖃᒃᑯᑦ ᒥᓂᔅᑕᖓᑦᑕ ᑎᓕᖃᑦᑕᖅᐹ ᖃᓄᐃᓕᐅᕐᓗᓂᐅᒃ.
Attachment Size
ᐱᓕᕆᐊᒃᓴᖏᑦ ᑲᒥᓴᓇᖓᑦᑕ ᓄᓇᕗᑦ 53.8 KB
Back to Top
ᒪᓕᒐᓕᐅᖅᑏᑦ ᑲᑎᒪᕐᔪᐊᖅᑎᓪᓗᒋᑦ ᓇᓕᐊᖕᓂᒃ ᐅᖃᐅᓯᕐᓂᒃ ᐊᑐᖃᑦᑕᖅᐸᑦ?

Submitted by webadmin on Thu, 05/27/2010 - 17:25

ᐃᓄᒃᑎᑐᑦ, ᐃᓄᐃᓐᓇᖅᑐᑦ ᐊᒻᒪᓗ ᖃᓪᓗᓈᑦ ᐅᖃᐅᓯᖓᑦ ᐊᑐᖅᑕᐅᓪᓗᐊᑕᖃᑦᑕᖅᑐᑦ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᖓᓂ.  ᐅᐃᕖᑦ ᐅᖃᐅᓯᖓᑦ ᓄᓇᕗᒻᒥ ᐃᓕᓴᕆᔭᐅᖃᑕᐅᓯᒪᔪᖅ ᐊᒻᒪᓗ ᐊᑐᖅᑕᐅᔪᓐᓇᕆᓪᓗᓂ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᖓᓂ.

Back to Top
ᑲᓇᑕᒥ ᐊᕕᒃᑐᖅᓯᒪᔪᑦ ᒐᕙᒪᖃᕐᕖᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᖃᓄᖅ ᐊᔾᔨᒌᓐᖏᓐᓂᖃᖅᐸᑦ?
Back to Top
ᓄᓇᕗᑦ ᖃᓄᖅ ᓴᖅᑭᑕᐅᓚᐅᖅᓯᒪᕙ?

Submitted by webadmin on Thu, 05/27/2010 - 17:33

ᓄᓇᕗᑦ ᐱᓐᖑᖅᑎᑕᐅᓚᐅᖅᓯᒪᕗᖅ ᐊᒃᓱᕉᑎᒋᔭᐅᓪᓗᓂ ᐊᕐᕌᒍᑦ 30 ᐅᖓᑖᓄᑦ, ᑭᓯᐊᓂ ᐱᓕᕆᐊᕆᔭᐅᖏᓐᓇᕋᒥ ᐃᓄᖕᓄᑦ, ᑎᒥᓐᖑᖅᑎᑕᐅᓯᒪᔪᓄᑦ ᐊᒻᒪᓗ ᒐᕙᒪᓄᑦ, ᑕᒪᕐᒥᒃ ᑕᑯᓐᓇᓐᖑᐊᒐᖃᓚᐅᖅᓯᒪᖕᒪᑕ ᐊᒻᒪᓗ ᐊᒃᓱᕉᑎᖃᓚᐅᖅᓯᒪᖕᒪᑕ ᐱᓐᖑᖅᑎᑦᑎᔪᒪᓂᕐᒥᒃ ᓯᓐᓇᒃᑑᒪᑐᐃᓐᓇᐅᖅᑰᔨᔪᒥᒃ.

ᓄᓇᑦᓯᐊᖅ ᐊᕕᒃᑕᐅᔪᒪᓂᖓ ᐃᓱᒪᒋᔭᐅᕙᓪᓕᐊᓕᓚᐅᖅᓯᒪᔪᖅ 1950 ᐊᑐᖅᑎᓪᓗᒋᑦ, ᓄᓇᑦᓯᐊᑉ ᐅᐊᓕᓂᖓᓂᕐᒥᐅᑦ ᒪᑲᓐᔨ ᕚᓕᒥᐅᑦ ᖃᓪᓗᓈᖏᑦ ᐊᕕᒃᓯᔪᒪᓕᖅᑎᓪᓗᒋᑦ, ᐊᐃᕙᐅᑖ ᑐᑭᑖᖅᑎᑕᐅᓯᒪᓪᓗᓂ ᐊᕕᒃᑕᐅᒃᐸᑦ ᐅᐊᓕᓂᕐᒥᐅᑦ ᓇᖕᒥᓂᖅ ᒐᕙᒪᑖᖅᓴᕋᐃᓐᓂᖅᓴᐅᓂᐊᕐᓂᕋᖅᑕᐅᓪᓗᓂ.

ᓄᓇᑦᓯᐊᖅ ᒪᕐᕈᐃᓕᑎᑕᐅᔪᒪᓂᖓ ᓯᕗᓪᓕᖅᐹᒥ ᓴᖅᑭᑕᐅᓚᐅᖅᓯᒪᔪᖅ ᐱᖁᔭᒃᓴᐅᓪᓗᓂ ᑲᓇᑕᐅᑉ ᒐᕙᒪᒃᑯᖏᑦᑕ ᒪᓕᒐᓕᐅᕐᕕᒡᔪᐊᖓᓂ 1963-ᖑᑎᓪᓗᒍ.  ᑕᐃᒪᐃᒃᑲᓗᐊᖅᑎᓪᓗᒍ, ᑖᓐᓇ ᐱᖁᔭᒃᓴᖅ ᐲᖅᑕᐅᓚᐅᖅᓯᒪᔪᖅ ᓯᕗᓪᓕᖅᐹᒥᒃ ᐅᖃᓕᒫᖅᑕᐅᓯᒪᓕᕋᓗᐊᖅᑎᓪᓗᒍ.

1971-ᖑᑎᓪᓗᒍ, ᐃᓄᐃᑦ ᑕᐱᕇᒃᓴᑦ ᑲᓇᑕᒥ ᑎᒥᓐᖑᖅᑎᑕᐅᓚᐅᖅᓯᒪᔪᖅ ᐱᔭᒃᓴᖃᕐᓂᐊᕐᒪᑕ ᐊᒻᒪᓗ ᐋᔩᖅᑎᒋᔭᐅᓂᐊᕐᒪᑕ ᓄᓇᑖᕐᓂᕐᒧᑦ ᐊᖏᕈᑎᓕᐊᕆᔭᐅᔪᒪᔪᒥᒃ ᑲᓇᑕᐅᑉ ᒐᕙᒪᒃᑯᓐᓄᑦ, ᑭᒡᒐᖅᑐᕐᓗᒋᑦ ᐃᓄᓪᓚᕇᑦ ᑲᓇᑕᐅᑉ ᐅᑭᐅᖅᑕᖅᑐᖓᓂᕐᒥᐅᑕᐃᑦ.  1973-ᒥ, ᐃᓄᐃᑦ ᑕᐱᕇᒃᓴᒃᑯᑦ ᑲᓇᑕᒥ ᖃᐅᔨᓴᓯᒋᐊᓚᐅᖅᓯᒪᔪᑦ ᐃᓄᐃᑦ ᓄᓇᓂᒃ ᐊᑐᖃᑦᑕᕈᓯᖏᓐᓂᒃ ᐊᒻᒪᓗ ᓇᔪᒐᖃᕐᓂᖏᓐᓂᒃ, ᑖᒃᑯᐊᓗ ᖃᐅᔨᔭᖏᑦ ᑐᓐᖓᕕᒋᔭᐅᓪᓗᑎᒃ ᓄᓇᑖᕋᓱᓕᓚᐅᖅᓯᒪᓪᓗᑎᒃ ᓄᓇᕗᒻᒥᒃ.  ᐱᖓᓱᑦ ᐊᕐᕌᒍᑦ ᐊᓂᒍᖅᑎᓪᓗᒋᑦ, ᐃᓄᐃᑦ ᑕᐱᕇᓴᒃᑯᑦ ᑲᓇᑕᒥ ᑐᒃᓯᕋᐅᓯᐅᓕᓚᐅᖅᓯᒪᔪᑦ ᓴᖅᑭᑦᑎᔪᒪᓂᕐᒥᒃ ᓄᓇᕗᒻᒥᒃ.

ᑲᓇᑕᐅᑉ ᐅᑭᐅᖅᑕᖅᑐᖓᓂ ᒐᕙᒪᖃᕐᕖᒃ ᒪᕐᕈᓐᖑᖅᑎᑕᐅᔪᒪᓕᖅᑎᓪᓗᒍ ᐊᐃᕙᐅᑎᖃᓪᓗᐊᑕᓚᐅᖅᓯᒪᔪᑦ ᓄᓇᕗᒻᒥᐅᑦ ᓇᖕᒥᓂᖅ ᒐᕙᒪᑖᕈᒪᓂᖏᓐᓂᒃ, ᐃᓄᖕᓄᑦ ᖃᓂᓐᓂᖅᓴᐅᓂᐊᖅᑐᓂᒃ ᐊᒻᒪᓗ ᐱᖅᑯᓯᑐᖃᖏᓐᓂᒃ ᑐᓐᖓᕕᖃᕋᔭᖅᑐᓂᒃ, ᐃᓚᓕᐅᖢᒍ ᐃᓄᐃᑦ ᐅᖃᐅᓯᖓᑦ ᐊᑐᖅᑕᐅᖃᑦᑕᕐᓂᐊᕐᓂᖓ ᒐᕙᒪᑖᓵᑦ ᐃᓗᐊᓂ.

1982-ᒥ, ᓄᓇᕗᑦ ᑐᓐᖓᕕᒃᑯᑦ ᑎᒥᓐᖑᖅᑎᑕᐅᓚᐅᖅᓯᒪᔪᖅ ᓄᓇᑖᕋᓱᖕᓂᕐᒥᒃ ᐋᔩᕈᑎᖃᖅᑎᐅᔪᓐᓇᕐᓂᐊᕐᒪᑕ ᑭᒡᒐᖅᑐᕐᓗᒋᑦ ᓄᓇᕗᒻᒥᐅᑦ ᐃᓄᓪᓚᕆᖁᑎᖏᑦ, ᐃᓄᐃᑦ ᑕᐱᕇᒃᓴᒃᑯᑦ ᑲᓇᑕᒥ ᐱᔭᒃᓴᖅᑖᕆᓯᒪᓚᐅᖅᓯᒪᔭᕋᓗᐊᖓᑦ ᑎᒍᖔᖅᖢᓂᔾᔪᒃ.

ᓄᓇᕗᑦ ᓇᐅᒃᑯᑦ ᑭᒡᓕᖃᕐᓂᐊᕐᒪᖔᖓ ᓂᕈᐊᕈᑕᐅᑎᓪᓗᒍ, 56 ᐳᓴᓐᑏᑦ ᓄᓇᑦᓯᐊᕐᒥᐅᑦ ᓂᕈᐊᓚᐅᖅᓯᒪᔪᑦ ᐱᓐᖑᖅᑎᑦᑎᖁᔨᓪᓗᑎᒃ ᓄᓇᕗᒻᒥᒃ ᐊᐃᕐᕆᓕ 14, 1982-ᒥ, ᐊᒻᒪᓗ ᑕᕝᕙᓂᔅᓴᐃᓐᓇᖅ ᐊᕐᕌᒍᒥ ᓄᕕᐱᕆᐅᓕᖅᑎᓪᓗᒍ, ᑲᓇᑕᐅᑉ ᒐᕙᒪᒃᑯᖏᑦ ᓇᓗᓇᐃᖅᓯᓚᐅᖅᓯᒪᔪᑦ ᓄᓇᕗᑦ ᐱᓐᖑᖅᑎᑕᐅᓂᐊᕐᓂᕋᖅᑕᐅᓪᓗᓂ.

ᒪᐃ 14, 1992-ᒥ, ᐅᓄᕐᓂᖅᓴᐃᑦ ᓄᓇᑦᓯᐊᕐᒥᐅᑦ ᓂᕈᐊᓚᐅᖅᓯᒪᔪᑦ ᓄᓇᕗᑦ ᐊᒻᒪᓗ ᐅᐊᓕᓂᕐᒥᐅᑦ ᓄᓇᖏᑦᑕ ᑭᒡᓕᖓ ᓇᐅᒃᑰᕐᓂᐊᕐᒪᖓᖓᓂᒃ.

ᓄᓇᕗᒻᒥᐅᑦ ᐃᓄᓪᓚᕆᖏᑦ ᐊᖏᓚᐅᖅᓯᒪᔪᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ ᓄᕕᐱᕆ 1992-ᖑᑎᓪᓗᒍ.  ᑭᖑᕐᖓᓂ, ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᐊᑎᓕᐅᖅᑕᐅᓕᓚᐅᖅᓯᒪᔪᑦ ᑲᓇᑕᐅᑉ ᐳᕋᐃᒻ ᒥᓂᔅᑕᖓᓐᓄᑦ ᒪᐃ 25, 1993-ᒥ ᐃᖃᓗᖕᓂ, ᐊᒻᒪᓗ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓐᓄᑦ ᐱᖁᔨᕗᖔᒃᑯᑦ ᑲᔪᓯᑎᑕᐅᓚᐅᖅᓯᒪᓪᓗᓂ ᔫᓂᐅᓕᖅᑎᓪᓗᒍ ᑕᕝᕙᓂᔅᓴᐃᓐᓇᖅ ᐊᕐᕌᒍᒥ.  $1.1 ᐱᓕᐊᓐ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᓇᓗᓇᐃᖅᑕᐅᓚᐅᖅᓯᒪᔪᑦ ᖁᕕᐊᓲᑎᒋᔭᐅᓂᒃᑯᑦ ᖁᕐᓗᖅᑐᕐᒥ ᔪᓚᐃ 9, 1993-ᒥ.  ᓄᓇᕗᑦ ᐱᖁᔭᕐᔪᐊᖓᓄᑦ ᐃᓚᒋᔭᐅᓪᓗᓂ, ᑲᓇᑕᐅᑉ ᒐᕙᒪᒃᑯᖏᑦ ᐊᖏᓚᐅᖅᓯᒪᔪᑦ ᐊᑐᐃᓐᓇᕈᐃᓂᐊᕐᓂᕋᖅᖢᑎᒃ $150 ᒥᓕᐊᓐᓂᒃ ᐊᑭᓕᖅᑕᐅᔪᓐᓇᕐᓂᐊᕐᒪᑕ ᑮᓇᐅᔭᖅᑐᕈᑎᕕᓃᑦ ᓄᓇᕗᑦ ᐱᓐᖑᖅᑎᑕᐅᔾᔪᑎᖏᓐᓄᑦ.

ᓄᓇᕗᑦ ᐱᓐᖑᖅᑎᑕᐅᓚᐅᖅᓯᒪᔪᖅ ᐊᐃᕐᕆᓕ 1, 1999-ᒥ.  ᑲᓇᑕᐅᑉ ᐅᑭᐅᖅᑕᖅᑐᖓ ᒪᕐᕈᓐᖑᖅᑎᑕᐅᓚᐅᖅᓯᒪᔪᑦ, ᓄᑖᕐᒥᒃ ᓄᓇᑦᓯᐊᖅᑕᖃᓕᖅᖢᓂ ᐊᒻᒪᓗ ᓗᓄᓇᕗᑦᑕᖃᓕᖅᖢᓂ.  ᓄᓇᕗᑦ ᐊᕗᑎᖕᒪᑦ, ᑲᓇᑕᐅᑉ ᓄᓇᓐᖑᐊᖓ ᓴᓇᔭᐅᒃᑲᓐᓂᓕᑕᐃᓐᓇᓚᐅᖅᓯᒪᔪᖅ ᑕᐃᒪᓐᖓᓂᑦ 1949-ᒥᑦ, ᓂᐅᕙᐅᓐᓛᓐ ᐃᓚᓕᐅᑎᖕᒪᑦ ᑯᐃᓐ ᓄᓇᖁᑎᖏᓐᓄᑦ.

Back to Top
ᐱᓕᕆᐊᒃᓴᖏᑦ ᐃᒻᒥᒃᑰᖅᑐᑦ ᐃᖅᑲᓇᐃᔭᖅᑎᖏᑦ ᒪᓕᒐᓕᐅᖅᑎᑦ ᑲᑎᒪᔨᖏᑕ
Back to Top
ᐱᓕᕆᐊᒃᓴᖏᑦ ᑲᑎᒪᔨᓕᕆᔨᒃᑯᑦ ᑲᑎᒪᔨᖁᑎᖏᑕ ᒪᓕᒐᓕᐅᖅᑎᑦ ᑲᑎᒪᔨᖁᑎᖏᑦ
Back to Top