ᑲᑎᒪᔨᕋᓛᑦ ᐱᖓᓱᓂᒃ ᐱᔭᒃᓴᖅᑖᖅᑎᑕᐅᓯᒪᓪᓗᐊᑕᖅᐳᑦ: ᐱᖁᔭᒃᓴᓂᒃ ᕿᒥᕐᕈᓇᖃᑦᑕᕐᓂᕐᒥᒃ, ᖃᐅᔨᓴᐃᖃᑦᑕᕐᓂᖅ ᐊᑐᐊᒐᓕᕆᓂᕐᒧᑦ ᑐᕌᖓᔪᓂᒃ ᐊᒻᒪᓗ ᕿᒥᕐᕈᓇᖃᑦᑕᖅᐳᑦ ᒐᕙᒪᒃᑯᑦ ᑮᓇᐅᔭᖅᑐᕈᑎᒋᔪᒪᔭᖏᓐᓂᒃ.
ᑲᑎᒪᔨᕋᓛᑦ ᐃᓄᓕᒫᖅᑎᑦᑎᖃᑦᑕᕐᓂᒃᑯᑦ ᑐᓴᖅᑎᑦᑎᖃᑦᑕᖅᑐᑦ ᑕᐃᒃᑯᓂᖓ ᑕᒪᒃᑯᓂᖓ ᑐᓴᕈᒪᔪᓂᑦ ᐊᒻᒪᓗ ᐊᒃᑐᖅᑕᐅᓂᖃᕐᓂᐊᖅᑐᓂᒃ, ᐃᓱᒪᒋᔭᒥᖕᓂᒡᓗ ᓂᓪᓕᕈᓐᓇᕐᕕᖃᖅᑎᑦᑎᓪᓗᑎᒃ ᐊᒻᒪᓗ ᐃᓚᐅᑎᑦᑎᖃᑦᑕᕈᓐᓇᖅᖢᑎᒃ ᑕᖅᑲᒃᑯᓄᖓ ᑐᕌᖓᔪᓂᒃ ᐊᑐᐊᒐᒃᓴᓂᒃ ᐱᓕᕆᐊᖃᖅᑎᓪᓗᒋᑦ. ᑲᑎᒪᔨᕋᓛᑦ ᐅᓂᒃᑲᐅᓯᖃᖃᑦᑕᖅᐳᑦ ᖃᐅᔨᔭᒥᖕᓂᒃ ᐊᒻᒪᓗ ᐊᑐᓕᖁᔭᓕᐅᓲᖑᓪᓗᑎᒃ ᒪᓕᒐᓕᐅᕐᕕᖕᒧᑦ ᐃᓱᒪᒃᓴᖅᓯᐅᕈᑕᐅᔪᒃᓴᓂᒃ. ᐃᓛᓐᓂᓚᐅᓱᖓᖅ, ᒪᓕᒐᓕᐅᕐᕕᒃ ᐱᔪᒪᒍᑎᒃ, ᑲᑎᒪᔨᕋᓛᖑᑲᐃᓐᓇᖅᑐᓂᒃ ᓴᖅᑭᑦᑎᔪᓐᓇᖅᑐᑦ ᐊᑕᐅᓯᕐᒧᑦ ᑐᕌᖓᔪᒥᒃ ᐱᓕᕆᐊᖃᕐᓂᐊᖅᑐᓂᒃ ᐊᑐᐊᒐᓕᕆᓂᕐᒨᖓᔪᓂᒡᓘᓐᓃᑦ ᑐᑭᓯᓇᓱᒃᑎᐅᓂᐊᖅᑐᓂᒃ. ᑕᒪᒃᑯᐊ ᑲᑎᒪᔨᕋᓛᑦ ᐃᓱᓕᓲᖑᕗᑦ ᐱᔭᒃᓴᖅᑖᕆᓯᒪᔭᕐᒥᓂᒃ ᐱᔭᕇᖅᓯᔭᕌᖓᒥᒃ. ᑐᑭᓯᒃᑲᓐᓂᕈᒪᒍᕕᑦ ᑭᒃᑯᑦ ᑲᑎᒪᔨᕋᓛᓄᑦ ᐃᓚᒋᔭᐅᖃᑕᐅᖕᒪᖔᖏᓐᓂᒃ ᐊᒻᒪᓗ ᖃᓄᐃᑦᑐᓂᒃ ᐱᔭᒃᓴᖅᑖᖅᑎᑕᐅᓯᒪᖕᒪᖔᖏᑦ, ᐅᑯᐊ ᐊᑖᓂ ᑎᑎᕋᖅᓯᒪᔪᑦ ᑕᐃᔭᐅᓯᒪᔪᑦ ᑐᑭᓯᒋᐊᕐᕕᒋᓂᐊᖅᐸᑎᑦ.