ᐃᖃᓗᐃᑦ, ᓄᓇᕗᑦ (ᐊᒃᑑᐸ 9, 2012) - ᕼᐊᓐᑐ ᑐᑐ, ᓄᓇᕗᑦ ᒪᓕᒐᓕᐅᕐᕕᐊᓄᑦ ᐅᖃᖅᑎ, ᖁᕕᐊᓱᒃᑐᖅ ᓇᓗᓇᐃᖅᓯᔪᓐᓇᕋᒥ 2012-ᒥ ᓄᓇᕗᑦ ᒪᒃᑯᒃᑐᑦ ᒪᓕᒐᓕᐅᖅᑎᓐᖑᐊᖑᓂᐊᕐᓂᖏᓐᓂᒃ ᐃᖃᓗᖕᓂ ᓄᕕᐱᕆ 22, 2012-ᖑᓕᖅᐸᑦ.
ᓄᓇᕗᒻᒥ ᐃᓕᓐᓂᐊᕐᕕᐊᓗᖕᓂ ᐃᓕᓐᓂᐊᖅᑐᑦ ᑕᑕᑎᕆᖁᔭᐅᒐᓗᐊᖅᐳᑦ ᐃᓚᐅᔪᒪᒍᑎᒃ ᒪᒃᑯᒃᑐᑦ ᒪᓕᒐᓕᐅᖅᑎᓐᖑᐊᖑᓂᐊᕐᓂᖏᓐᓂᒃ. ᑐᓴᐅᒪᔾᔪᑏᑦ ᐸᐃᑉᐹᑦ ᐃᓘᓐᓇᖏᓐᓄᑦ ᓄᓇᕗᒻᒥ ᐃᓕᓐᓂᐊᕐᕕᐊᓗᖕᓄᑦ ᐊᐅᓪᓚᖅᑎᑕᐅᓯᒪᓕᖅᑐᑦ.
ᓄᓇᕗᒻᒥ ᒪᒃᑯᒃᑐᑦ ᒪᓕᒐᓕᐅᖅᑎᓐᖑᐊᖑᓗᑎᒃ ᑲᑎᒪᕐᔪᐊᕐᓂᐊᖅᑐᑦ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᖓᓂ. ᒪᒃᑯᒃᑐᑦ ᒪᓕᒐᓕᐅᖅᑎᓐᖑᐊᖑᓂᖏᑦᑕ ᑲᑎᒪᕐᔪᐊᕐᓂᖓ ᐱᒋᐊᕐᓂᐊᖅᑐᖅ ᓄᕕᐱᕆ 22, 2012-ᖑᓕᖅᐸᑦ 1:30-ᒥ ᐅᓐᓄᓴᒃᑯᑦ. ᑕᖅᑲᒃᑯᐊ ᑭᒃᑯᑐᐃᓐᓇᐃᑦ ᖁᓐᖏᐊᕆᐊᕈᒪᔪᑦ ᖃᐃᖁᔭᐅᕗᑦ, ᐊᒻᒪ ᑲᑎᒪᕐᔪᐊᖅᑎᓪᓗᒋᑦ ᓄᓇᕗᓕᒫᒥ ᒪᓕᒐᓕᐅᕐᕕᐅᑉ ᑕᑯᒃᓴᐅᕝᕕᒋᖃᑦᑕᖅᑕᖓᒍᑦ ᓴᖅᑭᔮᕐᓂᐊᖅᖢᑎᒃ ᐃᕐᖐᓐᓇᖅ.
“ᖁᕕᐊᓱᒃᑐᖓ ᑐᓐᖓᓱᒃᑎᑦᑎᔪᓐᓇᕋᒪ ᑎᓴᒪᒋᓕᖅᑕᖓᓂᒃ ᓄᓇᕗᑦ ᒪᒃᑯᒃᑐᑦ ᒪᓕᒐᓕᐅᖅᑎᓐᖑᐊᖑᓗᑎᒃ ᑲᑎᒪᓂᕆᓂᐊᖅᑕᖓᓄᑦ.” ᑕᐃᒪᓐᓇ ᐅᖃᓚᐅᖅᑐᖅ ᐅᖃᖅᑎ ᑐᑐ. “ᒪᒃᑯᒃᑐᑦ ᐃᓕᑉᐹᓪᓕᕐᓂᐊᖅᑐᑦ ᖃᓄᖅ ᐃᓱᒪᖅᓱᕐᓂᕐᒥᒃ ᑐᓐᖓᕕᖃᕐᓗᑎᒃ ᒐᕙᒪᐃᑦ ᐊᐅᓚᔾᔪᓯᖏᓐᓂᒃ ᐊᒻᒪ ᐅᖃᐅᓯᖃᕈᓐᓇᕐᓂᐊᖅᖢᑎᒃ ᐃᓱᒪᒋᔭᒥᓂᒃ, ᐃᓱᒫᓘᑎᒋᔭᒥᓂᒃ ᐊᒻᒪ ᐃᓱᒻᒥᐅᑎᒃᓴᓂᒃ ᐱᔾᔪᑕᐅᓗᓂ ᓄᓇᕗᑦ ᓯᕗᓂᒃᓴᖓ.”
| Attachment | Size |
|---|---|
| ᐅᖃᖅᑎ ᓇᓗᓇᐃᖅᓯᕗᖅ 2012-ᒥ ᓄᓇᕗᑦ ᒪᒃᑯᒃᑐᑦ ᒪᓕᒐᓕᐅᖅᑎᓐᖑᐊᖑᓂᐊᕐᓂᖏᑦᑕ ᐅᓪᓗᐊᓂᒃ | 100.66 KB |