ᒪᓕᒐᓕᐅᖅᑏᑦ ᓇᓗᓇᐃᖅᓯᕗᑦ ᖃᖓ ᓄᓇᕗᒻᒥ ᓯᕗᓕᖅᑎᓂᒃ ᕿᒥᕐᕈᓂᖃᕐᓂᐊᕐᒪᖔᑦ ᐊᒻᒪ ᖃᓄᖅ ᐋᖅᑭᒃᓯᒪᓂᐊᕐᒪᖔᑦ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 8, 2013) - ᒪᓕᒐᓕᐅᖅᑏᑦ ᑲᑎᒪᔨᖏᑦ ᐅᓪᓗᒥ ᓇᓗᓇᐃᖅᓯᖅᑲᐅᕗᑦ ᑐᓴᖅᑎᑦᑎᓪᓗᑎᒃ ᐅᓪᓗᖓᓂᒃ ᐊᒻᒪ ᐋᖅᑭᒡᓱᖅᓯᒪᓂᕆᓂᐊᖅᑕᖓᓂᒃ 2013-ᒥ ᓯᕗᓕᖅᑎᒃᓴᓂᒃ ᓂᕈᐊᓕᖅᐸᑕ. ᓯᕗᓕᖅᑎᒃᓴᓂᒃ ᓂᕈᐊᓕᖅᐸᑕ ᐃᓘᓐᓇᖏᑦ ᒪᓕᒐᓕᐅᖅᑎᑦ ᐃᓚᐅᖃᑦᑕᖅᐳᑦ.

ᑕᒪᓐᓇ ᑲᑎᒪᓂᖅ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᖓᓐᓃᓐᓂᐊᖅᑐᖅ, ᐱᒋᐊᕐᓗᓂ 10-ᒥ ᐅᓪᓛᒃᑯᑦ ᑕᓪᓕᒥᕐᒥ, ᓄᕕᐱᕆ 15, 2013. ᑕᖅᑲᒃᑯᐊ ᑕᑯᓐᓇᕆᐊᕈᒪᔪᑦ ᑐᓐᖓᓱᒃᑎᑕᐅᑦᑎᐊᖅᑐᑦ. ᑕᒪᓐᓇ ᑲᑎᒪᓂᖅ ᓄᓇᕗᓕᒫᒥ ᑕᓚᕖᓴᒃᑯᑦ ᑕᑯᒃᓴᐅᓂᐊᖅᑐᖅ ᐊᖅᑯᑕᐅᓗᓂ ᒪᓕᒐᓕᐅᕐᕕᐅᑉ ᑕᓚᕖᓴᒃᑰᖅᑎᑦᑎᕝᕕᖏᑦ.

ᐸᐃᑉᐹᑎᒍᑦ ᓂᕈᐊᖃᑦᑕᕐᓗᑎᒃ ᓂᕈᐊᕐᓂᐊᖅᑐᑦ ᐅᖃᖅᑎᒥᒃ, ᓯᕗᓕᖅᑎᒥᒃ ᐊᒻᒪ ᒥᓂᔅᑕᐃᑦ ᑲᑎᒪᔨᖏᓐᓄᑦ ᐃᒃᓯᕚᕐᓂᐊᖅᑐᓂᒃ. ᓯᕗᓪᓕᖅᐹᒥᒃ ᑲᑎᒪᔾᔪᑕᐅᓂᐊᖅᑐᖅ ᐅᖃᖅᑎᒥᒃ ᓂᕈᐊᕐᓂᖅ. ᐅᖃᖅᑎ ᓂᕈᐊᖅᑕᐅᓵᖅᑐᖅ ᐃᓕᑐᐊᕈᓂ ᑲᑎᒪᓂᕐᒧᑦ ᑐᑭᒧᐊᒃᑎᒋᔭᐅᓕᕐᓂᐊᖅᑐᖅ.

ᐊᐃᑉᐸᖓ ᑲᑎᒪᔾᔪᑕᐅᓂᐊᖅᑐᖅ ᓂᕈᐊᓕᕐᓗᑎᒃ ᓯᕗᓕᖅᑎᒃᓴᒥᒃ. ᑕᐃᒃᑯᐊ ᓂᕈᐊᒐᒃᓴᓐᖑᖅᑎᑕᐅᔪᑦ ᐅᖃᓪᓚᒍᓐᓇᕐᕕᖃᖅᑎᑕᐅᔪᐃᓐᓇᐅᓂᐊᖅᑐᑦ. ᒪᓕᒐᓕᐅᖅᑏᑦ ᓯᕗᓕᖅᑎᐅᑉ ᐃᓂᖓᓄᑦ ᓂᕈᐊᒐᒃᓴᓐᖑᓐᖏᑦᑐᑦ ᓂᕈᐊᒐᒃᓴᓂᒃ ᐊᐱᖅᓱᕈᓐᓇᕐᓂᐊᖅᑐᑦ. ᑲᑎᒪᓂᐅᑉ ᐱᒋᐊᓕᓵᕐᓂᖓᓂ ᖃᓄᖅ ᓂᕈᐊᕐᓂᖅ ᐊᐅᓚᑕᐅᓂᐊᕐᒪᖔᑦ ᐅᓂᒃᑲᐅᓯᕆᔭᐅᑦᑎᐊᕐᓂᐊᖅᑐᖅ.

ᑲᑎᒪᔩᑦ ᐊᖏᖃᑎᒌᓚᐅᖅᑐᑦ ᒥᓂᔅᑕᐃᑦ ᑲᑎᒪᔨᖃᕐᓂᐊᕐᓂᖏᓐᓂᒃ 9-ᓂᒃ (ᓯᕗᓕᖅᑎ ᐊᒻᒪ 8 ᒥᓂᔅᑕᐃᑦ). ᒪᓕᒐᓕᐅᖅᑏᑦ ᐊᒻᒪ ᐊᐅᓚᑦᓯᔨᑦ ᑲᑎᒪᔨᖏᑦᑕ ᐱᖁᔭᕐᔪᐊᖓᑦ ᐅᖃᖅᓯᒪᔪᖅ ᓯᕗᓕᖅᑎ ᒥᓂᔅᑕᐃᑦ ᑭᓱᓂᒃ ᐱᔭᒃᓴᖃᕐᓂᐊᕐᒪᖔᕐᒥᓂᒃ ᑐᓂᐅᖅᑲᐃᔪᓐᓇᖅᑎᑕᐅᓪᓗᓂ ᐃᓱᒪᖅᓲᑎᒋᓗᓂᒋᑦ.

ᑎᓴᒪᖓᓐᓂ ᒪᓕᒐᓕᐅᖅᑏᑦ ᐊᖏᖅᑎᑕᐅᓂᐊᖅᑐᑦ 9:30-ᒥ ᐅᓪᓛᒃᑯᑦ (ᐅᖅᑯᕐᒥᐅᑦ ᓯᕿᕐᖑᔭᖓᒍᑦ) ᐊᐃᑉᐹᓂ, ᓄᕕᐱᕆ 19, 2013-ᒥ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᖓᓂ.

ᐅᖃᖅᑎᐅᑉ, ᓯᕗᓕᖅᑎᐅᑉ ᐊᒻᒪ ᒥᓂᔅᑕᐃᑦ ᑲᑎᒪᔨᖏᓐᓄᑦ ᐃᓕᔪᑦ ᓇᓗᓇᐃᖅᑕᐅᓂᐊᖅᑐᑦ ᐱᖁᔨᕗᖔᖅᑎᒍᑦ ᑎᓴᒪᖓᓐᓂ ᒪᓕᒐᓕᐅᖅᑏᑦ ᓯᕗᓪᓕᕐᒥ ᐅᓪᓗᕐᒥ ᑲᑎᒪᕐᔪᐊᕐᓂᖓᓂ, ᐊᒻᒪ ᑕᐃᒪᐃᓐᓂᐊᖅᖢᑎᒃ ᐊᐃᑉᐱᕐᒥ, ᓄᕕᐱᕆ 19, 2013-ᒥ 1:30-ᒧᐊᖅᐸᑦ ᐅᓐᓄᓴᒃᑯᑦ (ᐅᖅᑯᕐᒥᐅᑦ ᓯᕿᕐᖑᔭᖓᒍᑦ).

ᑕᒪᒃᑯᐊᓕᒫᖅ ᑕᖅᑲᒃᑯᓄᖓ ᒪᑐᐃᖓᓂᐊᖅᑐᑦ ᐊᒻᒪ ᓄᓇᕗᓕᒫᒥ ᑕᓚᕖᓴᒃᑰᖅᑎᑕᐅᓂᐊᖅᖢᑎᒃ ᑕᓚᕖᓴᒃᑰᕈᑎᖏᑦ ᐊᖅᑯᑕᐅᓪᓗᑎᒃ.