ᐃᖃᓗᐃᑦ, ᓄᓇᕗᑦ (ᓅᕖᕝᕙ 22, 2017 – ᒪᓕᒐᓕᐅᖅᕕᒻᒥ ᐅᖃᖅᑎ ᐊᒻᒪᓗ ᐃᒃᓯᕙᐅᑕᖓ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᑕᖅᓯᔾᔪᑎᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᓐᓄᑦ, ᔫ ᐃᓄᒃ, ᐅᓪᓗᒥ ᐅᖃᖅᑲᐅᒻᒪᑎᒃ ᓄᓇᕗᒥ ᐱᓕᕆᑦᑎᐊᓂᖁᓄᑦ ᐃᓕᑕᖅᓯᔾᔪᑎᓄᑦ ᓂᕈᐊᕋᒃᓴᓕᐅᕐᓃᑦ ᒪᑐᐃᒃᑲᓂᕐᒥᒻᒪᑕᒎᖅ.
ᔮᓐᓄᐊᓕ 1, 2010−ᒥ, ᑖᓐᓇ ᓄᓇᕗᒥ ᐱᓕᕆᑦᑎᐊᕐᓂᑯᓂᑦ ᐃᓕᑕᖅᓯᔾᔪᑎ ᐊᑐᓕᓚᐅᖅᓯᒪᒻᒪᑦ. ᑖᓐᓇ ᒪᓕᒐᖅᑎᒍᑦ ᐱᔾᔪᓯᐊᕐᓂᐅᔪᖅ ᓴᖅᑭᔮᖅᑎᑕᐅᕗᖅ “ᐅᐱᒍᓱᔾᔪᑎᐅᓂᐊᕐᒪᑦ ᑭᒃᑯᑐᐃᓐᓇᕐᓂᒃ ᐃᑲᔪᕐᓂᖃᓪᓗᐊᑲᓪᓚᒃᓯᒪᔪᓂᒃ ᐱᖅᑯᓯᓕᕆᓂᕐᒧᑦ, ᐃᓅᓯᔨᕆᓂᕐᒧᑦ, ᐅᕝᕙᓘᓐᓃᑦ ᒪᑭᒪᐅᑎᓕᕆᓂᕐᒧᑦ ᓄᓇᕗᒥ.” ᑖᓐᓇ ᐃᓕᑕᕆᔭᐅᓪᔪᑎ ᖁᑦᑎᓂᖅᐹᖑᔪᖅ ᓄᓇᕗᒥ ᐱᔾᔪᓯᐊᖑᔪᓐᓇᖅᑐᓂᒃ, ᐊᒻᒪᓗ ᓴᓐᖏᓂᖅᓴᐅᓪᓗᓂ ᐃᓘᓐᓇᖏᓐᓂᑦ ᐊᓯᖏᓐᓂᑦ ᐱᔾᔪᓯᐊᖑᓲᓂᒃ, ᐅᔭᒥᑦᑕᐅᓲᓂᒃ, ᐃᓕᑕᕆᔭᐅᓂᐅᓲᓂᒃ ᓄᓇᕗᑦ ᒐᕙᒪᖓᓄᑦ.
ᑖᒃᑯᐊ ᓄᓇᕗᒥ ᐱᓕᕆᑦᑎᐊᕐᓂᑯᓂᒃ ᐅᖃᐅᔾᔨᒋᐊᖅᑏᑦ ᑲᑎᒪᔩᑦ ᐃᓱᒪᒃᓴᖅᓯᐅᕈᑎᖃᓲᑦ ᓂᕈᐊᕋᒃᓴᓕᐊᖑᓯᒪᔪᓂᒃ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᑕᕆᔭᐅᔾᔪᑎᒧᑦ, ᐊᑐᓕᖁᔭᓕᐅᓕᖅᑐᑎᓪᓗ ᓄᓇᕗᑦ ᑲᒥᓴᓇᖓᓄᑦ, ᑖᓐᓇᐃᓛᒃ ᑲᒥᓴᓇ ᑖᔅᓱᒧᖓ ᐱᔾᔪᓯᐊᒧᑦ ᐊᖏᔪᖅᑳᖑᒻᒪᑦ. ᑖᒃᑯᐊ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᑦ ᐃᓄᖃᖅᑐᑦ ᒪᓕᒐᓕᐅᖅᑎᐅᑉ ᐅᖃᖅᑎᖓᓂᑦ, ᐃᖅᑲᖅᑐᐃᔩᑦ ᖁᑦᑎᓂᖅᐹᖓᓂᒃ ᓄᓇᕗᒥ ᐊᒻᒪᓗ ᓄᓇᕗᑦ ᑐᓐᖓᕕᒃᑯᑦ ᑎᒥᑯᑖᑕ ᐊᖏᔪᖅᑳᖓᓂᑦ.
ᓂᕈᐊᕋᒃᓴᓕᐅᕈᑏᑦ ᑕᑕᑎᕆᐊᓖᑦ ᐊᑐᐃᓐᓇᐅᔪᑦ ᒪᓕᒐᖠᐅᖅᑏᑦ ᐊᓪᓚᕝᕕᖏᓐᓂ ᐊᒻᒪᓗ ᐲᔭᖅᑕᐅᔪᓐᓇᕐᒥᔪᑦ ᒪᓕᒐᓕᐅᖅᕕᐅᑉ ᖃᕋᓴᐅᔭᒃᑯᑦ ᐃᑭᐊᖅᓯᕕᖓᓂᑦ ᐅᕙᓐᖓᑦ www.assembly.nu.ca. ᓂᕈᐊᕋᒃᓴᓕᐅᕈᑏᑦ ᐱᔭᐅᓯᒪᔭᕆᐊᓖᑦ ᐃᓱᓕ ᕕᖃᖅᑐᓂ 5:00 ᐅᓐᓄᓴᒃᑯᑦ ᐱᖓᑦᓯᕐᒥ, ᕖᕝᕗᐊᕆ 28, 2018. ᐱᔾᔪᓯᐊᖅᑎᑦᑎᓃᑦ ᐃᓕᑕᕆᔭᐅᔾᔪᑎᓂᒃ ᐊᑐᖅᑕᐅᓛᖅᑐᑦ ᐅᓪᓗᕐᒥ ᑕᐃᔭᐅᓛᑐᐃᓐᓇᖅᑐᒥ.
ᐅᓪᓗᒥᒧᑦ, ᑲᑎᑦᑐᒋᑦ 15 ᐱᓯᒪᕗᑦ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᑕᕆᔭᐅᔾᔪᑎᒥᒃ ᐃᑲᔪᖅᓯᒪᓂᖏᓐᓄᑦ ᑭᒃᑯᑐᐃᓐᓇᕐᓂᒃ ᓄᓇᓕᓐᓂᓪᓗ ᐱᔨᑦᑎᕋᕐᓂᖏᓐᓄᑦ, ᓴᓇᖃᑦᑕᓂᕐᒧᑦ, ᐃᓕᓐᓂᐊᖅᑐᓕᕆᓂᕐᒧᑦ, ᐅᖃᐅᓯᕐᓂᒃ ᓴᖅᑭᔮᖅᑎᑦᑎᓂᕐᒧᑦ, ᐅᑉᐱᖅᑐᓕᕆᓂᕐᓄᑦ ᐊᒻᒪᓗ ᓇᒻᒥᓂᖃᐅᑎᓂᒃ ᐱᕙᓪᓕᐊᑎᑦᑎᓂᕐᒧᑦ.
“ᑲᑎᒪᔩᑦ ᑲᔪᖏᑦᑎᐊᖅᑐᑦ ᐃᓱᒪᒃᓴᖅᓯᐅᕈᑎᖃᓛᕐᓂᕐᒥᓂᒃ ᓂᖁᐊᕋᒃᓴᓕᐊᖑᓯᒪᔪᓂᒃ ᓄᓇᕗᒥᐅᑕᑦᑎᐊᕚᓗᓐᓂᒃ, ᐅᖃᖅᑲᐅᔪᖅ ᐅᖃᖅᑎᑦᑎᔨ ᐃᓄᒃ.
-30-
ᑐᑭᓯᒋᐊᕈᓐᓇᖅᑐᓯ ᐅᕗᖓ:
ᔮᓐ ᖁᕘᒃ, ᒪᓕᒐᓕᐅᖅᕕᐅᑉ ᑎᑎᕋᖅᑎᖓ
ᐊᒻᒪᓗ ᑎᑎᕋᖅᑎᐅᓪᓗᓂ ᓄᓇᕗᒥ ᐱᓕᕆᑦᑎᐊᕐᓂᑯᓂᒃ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᓐᓂ
ᐅᖄᓚᐅᑎᖓ: (867) 975-5000
| Attachment | Size |
|---|---|
| 2017−ᒥ ᓄᓇᕗᒥ ᐱᓕᕆᑦᑎᐊᕐᓂᑯᓂᒃ ᐃᓕᑕᖅᓯᒍᑎ | 123.62 KB |
| ᓄᓇᕗᒻᒥ ᐱᓕᕆᑦᑎᐊᕐᓂᑯᓂᒃ ᐃᓕᓴᖅᓯᔾᔪᑦ 2017−ᒥ ᓂᕈᐊᒐᒃᓴᓐᖑᖅᑎᑦᑎᓂᕐᒧᑦ ᑕᑕᑎᕈᑏᑦ | 138.45 KB |