ᐃᖃᓗᐃᑦ, ᓄᓇᕗᑦ ᐊᒻᒪ ᔭᓗᓇᐃ, ᓄᓇᑦᓯᐊᖅ (ᐋᒡᒌᓯ 22, 2018) – ᐅᖃᖅᑎᐅᔫᒃ ᔫ ᐃᓄᒃ ᐊᒻᒪᓗ ᔮᒃᓴᓐ ᓛᐳᑎ ᐅᓪᓗᒥ ᑐᓐᖓᓱᑦᑎᑦᑎᖅᑲᐅᔫᒃ ᐋᖅᑭᑦᑕᐅᔪᒥᓂᐅᔪᒥᒃ ᑲᓇᑕᒥ ᓈᓚᐅᓯᕆᓂᕐᒧᑦ−ᑕᓚᕖᓴᓕᕆᓂᕐᒧᑦ ᐊᒻᒪᓗ ᑐᓴᐅᑎᓕᕆᓂᕐᒧᑦ ᑲᑎᒪᔨᕐᔪᐊᖓᓄᑦ (ᑲᑎᒪᔨᕐᔪᐊᑦ) ᓄᑖᕈᕆᐊᖅᑎᑦᑎᒍᒪᓪᓗᑎᒃ ᐊᓯᐊᒎᖅᕕᖃᕋᓂ ᓴᖅᑭᔮᕆᐊᖃᖅᑎᑎᓪᓗᑎᒃ ᓄᓇᕗᒥ ᓄᓇᑦᓯᐊᕐᒥᓗ ᒪᓕᒐᓕᐅᖅᕕᖏᓐᓂᑦ. ᑖᓐᓇ ᓄᑖᕈᕆᐊᖅᑕᐅᓂᖓ ᑐᓂᕐᕈᑎᐅᔪᖅ ᐃᓱᓕᒃᕕᒃᓴᖃᕋᓂ.
ᐃᓱᒪᑖᖓᓂ, ᑖᒃᑯᐊ ᑲᑎᒪᔨᕐᔪᐊᑦ ᐅᖃᖅᑐᑦ "...ᑐᓴᖅᑕᒥᓂᒃ ᓈᒻᒪᓴᕐᒪᑕ ᑕᒪᒃᑯᐊ ᐱᔨᑦᑎᕋᐅᑏᑦ ᓱᓕ ᒪᓕᑦᑎᐊᕐᒪᑕ ᐊᑐᐊᒐᐅᔪᓂᒃ ᓇᓗᓇᐃᖅᓯᔾᔪᑎᐅᕙᑦᑐᓂᒃ ᐊᓯᐊᒎᖅᕕᖃᕋᑎᒃ ᓴᖅᑭᔮᕆᐊᖃᕐᓂᖃᖅᑐᓄᑦ... ᓴᖅᑭᔮᖅᑎᑦᑎᔭᒻᒪᑕ ᐊᔾᔨᖐᓐᖏᑦᑐᓂᒃ ᐃᓕᖅᑯᓯᖃᐅᕐᓂᖏᓐᓂᑦ ᑲᓇᑕᒥ ᐊᒻᒪᓗ ᑕᑯᒃᓴᐅᑎᑦᑎᕙᑦᑐᑎᒃ ᑐᓴᖅᑕᐅᔭᕆᐊᓕᓐᓂᒃ ᐅᑭᐅᖅᑕᖅᑐᒥᐅᓄᑦ ᐊᒻᒪᓗ ᐊᓯᐊᒍᑦ ᓴᖅᑭᔮᖅᑎᑎᔾᔪᑎᑎᒍᑦ ᑐᓴᐅᑎᓕᕆᔾᔪᑎᑎᒍᑦ ᐊᑐᐃᓐᓇᐅᖏᑦᑎᐊᖅᑐᑎᒃ."
ᐊᔾᔨᖏᑦ ᑎᑎᕋᖅᓯᒪᔪᑦ ᐃᔾᔪᑎᖃᖅᑐᑦ ᑲᑎᒪᔨᕐᔪᐊᑦ ᐋᖅᑭᑦᑕᒥᓂᖓᓂᑦ ᐊᑐᐃᓐᓇᐅᕗᑦ ᐃᑭᐊᖅᓯᕕᖓᓂ ᐅᕙᓂ: https://crtc.gc.ca/eng/archive/2018/2018-295.htm.
ᐅᖃᖅᑎ ᓛᐳᑎ ᐅᖃᖅᑐᖅ, ᑖᒃᑯᐊ ᑲᑎᒪᔨᕐᔪᐊᑦ ᐃᓱᒪᑖᖓ ᓄᑖᕈᕆᐊᖅᓯᒍᒪᓪᓗᑎᒃ ᐊᓯᐊᒎᖅᕕᖃᕋᓂ ᓴᖅᑭᔮᖅᑎᑦᑎᖏᐊᖃᕐᓂᕗᑦ ᖃᐅᔨᒪᑦᑎᐊᕈᑎᐅᓂᐊᖅᐳᖅ ᑕᒪᒃᑯᐊ ᓄᓇᖃᖅᑐᐃᑦ ᑕᒪᒃᑭᓂ ᐊᕕᑦᑐᖅᓯᒪᓃᓐᓂ ᑕᑯᕋᓐᓈᖏᓐᓇᕈᓐᓇᓂᐊᕐᒪᑕ ᓈᓚᓪᓗᑎᓪᓗ ᒪᓕᒐᓕᐅᖅᕕᖏᑕ ᓱᓕᕆᓂᕆᔭᖏᓐᓂᑦ ᑕᒪᒃᑭ ᑲᓱᖅᓯᒪᔪᒃᑯᑦ ᑕᓚᕖᓴᒃᑯᑦ ᐊᒻᒪᓗ ᖃᖓᑦᑕᖅᑎᑕᐅᓯᒪᔪᒃᑯᑦ ᑕᑯᓐᓈᐸᑦᑐᓄᑦ."
ᐄᐳᕈ 2013-ᒥ, ᑭᒡᒐᑐᖅᑏᑦ ᑕᒪᒃᑮᓐᓄᑦ ᒪᓕᒐᓕᐅᖅᕖᓐᓄᒃ ᓴᖅᑭᔮᓚᐅᕐᒪᑕ ᑲᑎᒪᔨᕐᔪᐊᑦ ᓵᖓᓂ ᑕᖅᑲᐅᖓ ᒪᑐᐃᖓᔪᒥ ᓈᓚᓐᓂᖃᖅᑎᓪᓗᖏᑦ ᑕᒪᒃᑭ ᒪᓕᒐᓕᐅᖅᕖᒃ ᑲᑐᔾᔭᖓᓂᒃ ᑐᒃᓯᕋᐅᑎᒥᒃ ᐊᓯᐊᒎᖅᕕᖃᕋᓂ ᓴᖅᑭᔮᖅᑎᑦᑎᒍᓐᓇᕈᒪᓪᓗᑎᒃ. ᑕᐃᒪᓕ ᑖᒃᑯᐊ ᑲᑎᒪᔨᕐᔪᐊᑦ ᑐᓂᓯᓚᐅᖅᓯᒪᕗᑦ ᐊᕐᕌᒍᓄᑦ ᑕᓪᓕᒪᓄᑦ (5) ᐊᑕᓂᐊᖅᑐᒥᒃ ᐊᓯᐊᒎᖅᕕᖃᕋᓂ ᓴᖅᑭᔮᖅᑎᑦᑎᖏᐊᖃᕈᑎᒥᒃ ᐋᒡᒌᓯ 2013-ᒥ. ᑕᒪᒃᑮᒃ ᒪᓕᒐᓕᐅᖅᕖᒃ ᑲᑐᔾᔨᓪᓗᑎᒃ ᑐᒃᓯᕋᐅᑎᓕᐅᓚᐅᖅᑑᒃ ᓄᑖᕈᕆᐊᖅᑕᐅᖁᔨᓪᓗᑎᒃ ᔪᓚᐃ 2017-ᒥ.
”ᐅᖃᖅᑎ ᐃᓄᒃ ᐅᖃᖅᑐᖅ, "ᖁᕕᐊᓱᑦᑐᒍᑦ ᑖᒃᑯᐊ ᑲᑎᒪᔨᕐᔪᐊᑦ ᐋᖅᑭᑦᑕᖓ ᐃᓕᑕᖅᓯᓂᐅᒻᒪᑦ ᐱᒐᓱᐊᕐᓂᐅᓯᒪᔪᓂᒃ ᑕᒪᒃᑮᓐᓄᑦ ᒪᓕᒐᓕᐅᖅᕖᓐᓄᒃ ᑐᓴᖅᓴᐅᑎᑦᑎᕙᑦᑐᑎᒃ ᒪᓕᒐᓕᐅᖅᕕᖏᓐᓂᑦ ᐊᒥᓱᑲᓪᓚᓐᓂᒃ ᓄᓇᖃᖅᑳᖅᑐᒥᓃᑦ ᐅᖃᐅᓯᖏᓐᓂᑦ ᐊᑐᖅᑐᑎᒃ."
-30-
ᑐᑭᓯᒋᐊᒃᑲᓐᓂᕈᒪᒍᒃᓯ:
ᔮᓐ ᑯᐊᒃ, ᓄᓇᕗᒥ ᒪᓕᒐᓕᐅᖅᕕᐅᑉ ᑎᑎᕋᖅᑎᖓ - (867) 975-5000
ᑎᒻ ᒨᓱ, ᓄᓇᑦᓯᐊᕐᒥ ᒪᓕᒐᓕᐅᖅᕕᐅᑉ ᑎᑎᕋᖅᑎᖓ - (867) 767-9130