ᐃᖃᓗᐃᑦ, ᓄᓇᕗᑦ (ᓯᑎᐱᕆ 24, 2018) - ᔫᓯᐱ ᐃᓄᒃ, ᓄᓇᕗᑦ ᒪᓕᒐᓕᐅᕐᕕᐊᓄᑦ ᐅᖃᖅᑎᒋᔭᐅᔪᖅ, ᐅᓪᓗᒥ ᓇᓗᓇᐃᖅᓯᖅᑲᐅᕗᖅ ᐃᒻᒥᒃᑰᖅᑐᑦ ᑲᒥᓴᖏᓐᓄᑦ ᑎᒃᑯᐊᖅᓯᓚᐅᕐᓂᕐᒥᓂᒃ, ᕿᒥᕐᕈᔨᐅᓂᐊᖅᑐᓂᒃ ᒪᓕᒐᓕᐅᖅᑏᑦ ᑮᓇᐅᔾᔭᒃᓵᖏᓐᓂᒃ, ᐃᑲᔫᓯᐊᖏᓐᓂᒃ, ᑮᓇᐅᔭᖅᑐᕈᑎᕕᓂᖏᓐᓂᒃ ᐊᒻᒪ ᐃᑲᔫᑎᑖᕆᖃᑦᑕᖅᑕᖏᓐᓂᒃ. ᒪᓕᒐᓕᐅᖅᑏᑦ ᐊᒻᒪ ᐊᐅᓚᑦᓯᔩᑦ ᐱᖁᔭᕐᔪᐊᖓᓐᓃᑦᑐᖅ ᓈᓴᐅᑎᓕᒃ 37 ᑕᐃᒪᐃᑦᑐᓂᒃ ᑲᒥᓴᓂᒃ ᓴᖅᑭᑦᑎᔪᓐᓇᖅᑎᑦᑎᔪᖅ
ᐃᖅᑲᖅᑐᐃᔨ ᐆᓪ ᔮᓐᓴᓐ ᑲᒥᓴᓄᑦ ᐃᒃᓯᕙᐅᑕᕆᔭᐅᓂᐊᖅᑐᖅ. ᐃᖅᑲᖅᑐᐃᔨ ᔮᓐᓴᓐ ᐅᑭᐅᖅᑕᖅᑐᒥ ᒪᓕᒐᕐᓂᐊᕐᓂᓕᕆᓂᕐᒥᒃ ᐃᖅᑲᓇᐃᔮᖃᖅᓯᒪᔪᖅ 1974−ᒥᓂᑦ. ᑯᐃᓐ ᒪᓕᒐᕐᓂᐊᖅᑎᖏᓐᓄᑦ ᑎᒃᑯᐊᖅᑕᐅᓚᐅᖅᓯᒪᔪᖅ 1992−ᒥᑦ, ᐊᒻᒪ ᓄᓇᕗᒻᒥ ᐃᖅᑲᖅᑐᐃᕕᖕᒥ ᐃᖅᑲᖅᑐᐃᖃᑦᑕᖅᓯᒪᓪᓗᓂ 2002-ᒥᓂᑦ ᓄᖅᑲᕕᖕᓂᕐᒥᓄᑦ ᑎᑭᓪᓗᒍ 2016−ᒥ. ᒫᓐᓇ ᓄᓇᕗᒻᒥ ᒪᓕᒐᓕᕆᔨᒃᑯᓐᓄᑦ ᐃᖅᑲᖅᑐᐃᔩᑦ ᑐᖏᓕᕆᔭᖓ.
ᓈᓐᓯ ᖃᕆᑕᖅ−ᓕᓐᑎᐅᓪ ᑲᓇᑕᒥ ᒪᓕᒐᓕᐅᕐᕕᒡᔪᐊᕐᒥ ᒪᓕᒐᓕᐅᖅᑎᐅᖃᑕᐅᓚᐅᖅᑐᖅ 1997−ᒥᑦ 2008−ᒧᑦ ᑎᑭᖢᒍ, ᐊᒻᒪ ᐃᓄᐃᑦ ᓄᓇᕐᔪᐊᕐᒥ ᑲᑎᒪᔨᖏᓐᓄᑦ (ᑲᓇᑕ) ᐊᖓᔪᖅᑳᖑᓚᐅᖅᖢᓂ 2016-ᒥᑦ 2018−ᒧᑦ ᑎᑭᖢᒍ. ᒐᕙᒪᒃᑯᑦ ᑎᑎᕋᕐᕕᖓᓐᓃᓚᐅᓐᖏᓐᓂᕐᒥᓂ ᐊᑕᐅᓯᐅᓐᖏᑦᑐᓂᑦ ᐊᖓᔪᖅᑲᐅᑕᐅᓂᕐᓂ ᐃᖅᑲᓇᐃᔮᖃᖅᓯᒪᔪᖅ ᐊᕐᕕᐊᓂ, ᐊᓯᖏᓐᓂᑦᑕᐅᖅ ᐱᓕᕆᒋᓪᓗᓂ ᓄᓇᓕᒻᒥᓂᒃ ᐱᔨᑦᑎᕋᖅᑐᓂ. ᐅᓪᓗᒥᐅᔪᕐᓕ ᒥᔅ ᖃᕆᑕᖅ−ᓕᓐᑎᐅᓪ ᑲᑎᒪᔨᐅᖃᑕᐅᔪᖅ ᐅᑭᐅᖅᑕᖅᑐᒥ ᖃᐅᔨᒪᔭᐅᔪᐃᑦ ᑲᑎᒪᔨᖏᓐᓂ ᑲᓇᑕᒥ.
ᑮᑦ ᐲᑐᓴᓐ ᐃᖃᓗᒃᑑᑦᑎᐊᕐᒥ ᑭᒡᒐᖅᑐᐃᓪᓗᓂ ᒪᓕᒐᓕᐅᖅᑎᐅᓯᒪᓚᐅᖅᑐᖅ 2004−ᒥᓂᑦ ᓄᖅᑲᕕᖕᓂᕐᒥᓄᑦ 2017−ᒧᑦ ᑎᑭᖢᒍ. ᒥᔅᑐ ᐲᑐᓴᓐ ᐊᔾᔨᐅᓐᖏᓐᓂᖄᕐᔪᖕᓂᖓ ᓄᓇᕗᒻᒥ ᐊᑯᓂᐅᓂᖅᐹᖅ ᑮᓇᐅᔭᓕᕆᓂᕐᒧᑦ ᒥᓂᔅᑕᐅᓚᐅᕐᓂᕐᒥᒍᑦ. ᐊᑕᐅᓯᐅᓐᖏᑦᑐᓂᒃ ᒥᓂᔅᑕᖃᕐᕕᖃᓚᐅᕐᒥᔪᖅ, ᐃᓚᓕᐅᓪᖢᒍ ᐋᓐᓂᐊᖃᕐᓇᓐᖏᑦᑐᓕᕆᓂᖅ, ᒪᓕᒐᓕᕆᓂᖅ ᐊᒻᒪ ᐃᓱᒪᖅᓱᕐᓂᕐᒥᒃ ᑐᓐᖓᕕᓖᑦ ᑎᒥᖁᑎᖏᓐᓄᑦ. ᒥᔅᑐ ᐲᑐᓴᓐ ᐃᖃᓗᒃᑑᑦᑎᐊᕐᒧᑦ ᒪᐃᔭᐅᖃᑦᑕᖅᓯᒪᔪᖅ ᐊᒻᒪ ᕿᑎᕐᒥᐅᑦ ᑯᐊᐳᕇᓴᒃᑯᖏᓄᑦ ᑎᑎᕋᖅᑎ−ᑮᓇᐅᔭᓕᕆᔨᐅᓯᒪᓪᓗᓂ.
ᕌᓂ ᑳᒻᐳᓪ ᑲᓇᑕᒥ ᑕᒻᒪᖅᓯᒪᔪᖅᓯᐅᖅᑎᕐᔪᐊᑉ ᑐᖏᓕᕆᓯᒪᔭᖓ 2003−ᒥᓂᑦ ᓄᖅᑲᕕᖕᓂᕐᒧᑦ ᑎᑭᖢᒍ 2015−ᒥ. ᑕᒻᒪᖅᓯᒪᔪᖅᓯᐅᖅᑎᕐᔪᐊᕐᒧᑦ ᑐᑭᓕᕆᔭᐅᓪᓗᓂ, ᐱᔭᒃᓴᖅᑖᖅᑎᑕᐅᓯᒪᓚᐅᖅᑐᖅ ᑕᒻᒪᖅᓯᒪᔪᖅᓯᐅᕐᓂᕐᒥᒃ ᓄᓇᕗᑦ ᒐᕙᒪᒃᑯᖏᓐᓂᒃ. ᑕᒻᒪᖅᓯᒪᔪᖅᓯᐅᖅᑎᕐᔪᐊᑉ ᑎᑎᕋᕐᕕᐊᓄᐊᓚᐅᓐᖏᓐᓂᕐᒥᓂ 1985−ᒥ, ᒥᔅᑐ ᑳᒻᐳᓪ ᓄᓇᕗᒻᒥ ᐊᑕᐅᓯᐅᓐᖏᑦᑐᓂ ᐃᖅᑲᓇᐃᔭᖃᑦᑕᖅᓯᒪᔪᖅ ᓂᐅᕕᖅᑎᒃᑯᓐᓄᑦ ᐊᖓᔪᖅᑳᕆᔭᐅᓪᓗᓂ. ᒥᔅᑐ ᑳᒻᐳᓪ ᒫᓐᓇ ᑲᑎᒪᔨᐅᖃᑕᐅᔪᖅ ᖁᓪᓕᒃᑯᑦ ᐆᒻᒪᖅᑯᑎᓕᕆᔨᖏᑦᑕ ᑎᒥᖁᑖᓂ.
ᐅᖃᖅᑎ ᐃᓄᒃ ᐃᒪᐃᓕᓚᐅᖅᑐᖅ, “ᑕᒪᑐᒪᓂ ᐊᕐᕌᒍᒥ ᑕᖅᑲᒃᑯᓄᖓ ᐅᖃᓚᐅᕐᓂᕋ ᒪᓕᒃᖢᒍ, ᑖᒃᑯᐊ ᑲᒥᓴᐃᑦ ᑐᕌᒐᖃᖅᑐᑦ ᐊᑐᓕᖁᔭᓂᒃ ᓴᖅᑭᑦᑎᓛᕐᓂᐊᕐᓂᖏᓐᓂᒃ ᑮᓇᐅᔭᖅᑐᓐᖏᓐᓂᖅᓴᐅᓂᕐᒥᒃ ᑐᓐᖓᕕᖃᕐᓗᑎᒃ ᐊᒻᒪ ᐃᓚᔮᕇᖕᓄᑦ ᑐᓐᖓᓇᕐᓂᖅᓴᐅᖁᓪᓗᒋᑦ. ᓇᓗᖅᑯᑎᓐᖏᑦᑐᖓ ᑖᒃᑯᐊ ᑲᒥᓴᓄᑦ ᐃᓚᒋᔭᐅᖃᑕᐅᔪᑦ, ᐃᓘᓐᓇᖏᓪᓗ ᐅᐱᓐᓇᖅᑐᓂᒃ ᐃᖅᑲᓇᐃᔮᖃᖅᓯᒪᓪᓗᑎᒃ, ᐊᒃᓱᐊᓗᒃ ᐃᑲᔫᑎᖃᖅᑐᓂᒃ ᓴᖅᑭᑦᑎᓂᐊᕐᓂᖏᓐᓂᒃ.”
ᒪᓕᒐᓕᐅᖅᑏᑦ ᐊᒻᒪ ᐊᐅᓚᑦᓯᔩᑦ ᐱᖁᔭᕐᔪᐊᖓᑦ ᐅᖃᖅᓯᒪᔪᖅ ᐃᒻᒥᒃᑰᖅᑐᑦ ᑲᒥᓴᐃᑦ ᐅᓂᒃᑳᖏᑦ ᐅᖃᖅᑎᒧᑦ
ᒪᓕᒐᓕᐅᕐᕕᖕᒧᑦ ᓴᖅᑭᑕᐅᔭᕆᐊᖃᕐᓂᖏᓐᓂᒃ.
-30-
ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒋᔪᓐᓇᖅᑕᐃᑦ:
ᔮᓐ ᑯᐊᒃ, ᒪᓕᒐᓕᐅᕐᕕᖕᒧᑦ ᑎᑎᕋᖅᑎ
Tel: (867) 975-5000