ᐃᖃᓗᐃᑦ, ᓄᓇᕗᑦ (ᒪᐃ 30, 2019) - ᐅᖃᖅᑎ ᒪᓕᒐᓕᐅᕐᕕᖕᒥ ᐊᒻᒪᓗ ᐃᒃᓯᕙᐅᑕᖅ ᓄᓇᕗᒻᒥ ᐃᓕᓴᖅᓯᔾᔪᑦ ᐅᔭᒥᖕᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᓐᓄᑦ ᓯᒥᐊᓐ ᒥᑭᓐᖑᐊᖅ ᐅᓪᓗᒥ ᑐᓴᖅᑎᑦᑎᖅᑲᐅᖕᒪᑕ ᑖᓐᓇ ᓴᒃᑲᕆᐊᓯ ᑯᓄᒃ ᐅᔭᒥᒃᑕᐅᓂᐊᕐᒪᑦ ᓄᓇᕗᒻᒥ ᐃᓕᓴᖅᓯᔾᔪᑦ ᐅᔭᒥᖕᒧᑦ ᑲᑎᖃᑎᒌᖕᓂᐅᓂᐊᖅᑐᒥ ᐊᐃᑉᐱᕐᒥ, ᔫᓂ 4, 2019-ᖑᓕᖅᐸᑦ, ᐅᕙᓂ 6:00 ᐅᓐᓄᓴᒃᑯᑦ (ᑲᓇᖕᓇᕐᒥ) ᑲᑎᒪᕐᔪᐊᕐᕕᖓᓂ ᒪᓕᒐᓕᐅᕐᕕᐅᑦ.
ᑖᓐᓇ ᑐᓂᓯᓂᕐᒧᑦ ᑲᑎᖃᑎᒌᖕᓂᖅ ᒪᑐᐃᖓᓂᐊᖅᐳᖅ ᑭᒃᑯᑐᐃᓐᓇᕐᓄᑦ ᖁᖖᒋᐊᕈᒪᔪᓄᑦ ᓇᖕᒥᓂᖅ ᐳᓛᕆᐊᖅᓯᒪᔪᒃᑯᕕᐊᓂ ᑕᓚᕖᓴᒃᑯᓪᓗ ᑕᑯᒃᓴᐅᑲᐅᑎᒋᓂᐊᖅᑐᖅ ᓄᓇᕗᓕᒫᕐᒥ ᓄᓇᓕᖕᓂ ᑕᓚᕖᓴᖃᐅᑎᖏᑦᑎᒍᑦ ᐊᒻᒪᓗ ᖃᖓᑦᑕᖅᑎᑕᐅᓯᒪᔪᒃᑯᑦ ᐊᖏᕐᕋᒥ ᐅᕘᓇ ᕕᐅᓪ (ᓈᓴᐅᑎᖓ 513) ᐊᒻᒪ ᓵ (ᓈᓴᐅᑎᖓ 289 - ᐱᑐᖃᒃᑯᑦ / ᓈᓴᐅᑎᖓ 489 - ᓄᑖᒃᑯᑦ). ᑐᓂᓯᓂᕐᒧᑦ ᑲᑎᖃᑎᒌᖕᓂᖅ ᑕᑯᒃᓴᐅᑲᐅᑎᒋᓂᐊᕐᒥᔪᖅ ᐃᑭᐊᖅᑭᕕᒃᑯᑦ ᐅᕘᓇ: http://video.isilive.ca/nunavut/.
ᔮᓐᓄᐊᕆ 1, 2010-ᖑᑎᓪᓗᒍ, ᓄᓇᕗᒻᒥ ᐃᓕᓴᖅᓯᔾᔪᑦ ᐅᔭᒥᖕᒧᑦ ᐱᖁᔭᕐᔪᐊᖅ ᐊᑐᓕᖅᑎᑕᐅᓚᐅᕐᐳᖅ. ᑐᕌᒐᕆᖕᒪᒍ ᐅᔭᒥᒃᑕᐅᓂᐅᑦ ᐃᓕᓴᖅᓯᔾᔪᑕᐅᓪᓗᓂ ᐃᓄᖕᓂᒃ ᐱᓕᕆᑦᑎᐊᖅᓯᒪᔪᒻᒪᕆᐅᔪᓄᑦ ᐃᑲᔪᕐᓂᒃᑯᑦ ᐱᖅᑯᓯᕐᒧᑦ, ᐃᓅᓯᕐᒧᑦ ᐅᕝᕙᓘᓐᓃᑦ ᑮᓇᐅᔭᓕᐅᕋᓱᖕᓂᕐᒧᑦ ᐃᓗᐊᕐᓇᖅᑐᓄᑦ ᓄᓇᕗᒻᒥ. ᑖᓐᓇ ᐅᔭᒥᒃᑕᐅᓂᖅ ᐳᖅᑐᓂᖅᐹᖑᖕᒪᑦ ᐅᐱᒍᓯᖕᓂᐅᔪᓂ ᓄᓇᕗᒻᒥ ᐊᒻᒪᓗ ᐳᖅᑐᓂᖅᐹᖑᓪᓗᓂ ᐊᓯᓕᒫᖏᓐᓂᑦ ᑐᓂᓯᓂᐅᔪᓂᑦ, ᑕᖅᓴᓕᖅᑕᐅᓂᕐᓂᑦ ᐅᔭᒥᒃᑕᐅᓂᕐᓂᕐᓪᓗ ᑐᓂᔭᐅᔪᓂᑦ ᓄᓇᕗᒻᒥ ᒐᕙᒪᒃᑯᓐᓂᑦ.
ᓄᓇᕗᒻᒧᑦ ᑲᒥᓯᓇ ᓂᐊᓕ ᑯᓱᒐᖅ ᐊᐅᓚᑦᑎᓂᐊᖅᑐᖅ ᑐᓂᓯᓂᕐᒧᑦ ᑲᑎᖃᑎᒌᖕᓂᕐᒥᒃ ᑖᓐᓇᐅᓪᓗᓂ ᓯᕗᓕᖅᑎᒻᒪᕆᒃ ᐱᓕᕆᑦᑎᐊᖅᓯᒪᔪᓕᕆᓂᕐᒧᑦ ᓄᓇᕗᒻᒥ.
-30-
ᖃᐅᔨᒋᐊᒃᑲᓐᓂᕈᒪᒍᕕᑦ:
ᔮᓐ ᑯᐊᒃ, ᒪᓕᒐᓕᐅᕐᕕᖕᒧᑦ ᑎᑎᕋᖅᑎ ᐊᒻᒪᓗ ᑎᑎᕋᖅᑎ ᐱᓕᕆᑦᑎᐊᖅᓯᒪᔪᓄᑦ ᓄᓇᕗᒻᒥ
ᐅᖃᐅᔾᔨᒋᐊᖅᑏᑦ ᑲᑎᒪᔨᖏᓐᓄᑦ
ᐅᖄᓚᐅᑖ: (867) 975-5000
| Attachment | Size |
|---|---|
| ᓄᓇᕗᒻᒥ ᐃᓕᓴᖅᓯᔾᔪᑦ ᐅᔭᒥᖕᒥᒃ ᑐᓂᓯᓂᕐᒧᑦ ᑲᑎᖃᑎᒌᖕᓂᖅ ᐊᑐᕐᓂᐊᖅᑐᖅ ᔫᓂ 4, 2019 | 128.07 KB |