ᐱᒐᓱᐊᕈᒪᔪᓄᑦ ᑐᓐᖓᓱᑦᑎᑎᔾᔪᑎ ᑐᑭᓯᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ

ᐱᒐᓱᐊᕈᒪᔪᑦ ᑐᓐᖓᓱᑦᑎᑕᐅᕗᑦ ᐃᖅᑲᓇᐃᔮᒧᑦ ᑐᑭᓯᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᓗᓂ ᓄᓇᕗᒧᑦ. ᑖᓐᓇ ᑕᓪᓕᒪᓄᑦ ᐊᕐᕌᒍᓄᑦ, ᒪᓕᒐᖅᑎᒍᑦ ᑎᒃᑯᐊᖅᑕᐅᓯᒪᓂᐅᔪᖅ.

ᑖᓐᓇ ᑐᑭᓯᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ ᐃᒻᒥᑰᖓᓪᓗᓂ ᐱᓕᕆᔨᐅᔪᖅ ᒪᓕᒐᓕᐅᖅᕕᒻᒧᑦ. ᑖᓐᓇ ᑲᒥᓴᓇ ᐃᓂᖓᓄᑦ ᑎᒃᑯᐊᖅᑕᐅᓲᖅ ᒪᓕᑦᑐᑎᒃ ᐊᑐᓕᖁᔭᓕᐊᒥᓂᕐᒥᒃ ᒪᓕᒐᓕᐅᖅᕕᒻᒥ, ᒪᓕᑦᑐᒋᑦ ᐃᓯᕈᓐᓇᐅᑎᑦ ᑐᑭᓯᐅᒪᔾᔪᑎᓄᑦ ᐊᒻᒪ ᓴᐳᔾᔭᐅᓂᖏᓐᓄᑦ ᑲᓐᖑᓇᖅᑐᑦ ᐱᖁᔭᖓᓂᒃ. ᑖᓐᓇ ᐃᖅᑲᓇᐃᔮᖅ ᐱᔪᓐᓇᐅᑎᖃᖅᕕᐅᔪᖅ ᐱᓕᕆᐊᖃᕆᐊᖃᕐᓂᖃᖅᑐᓂᓗ ᐱᓕᕆᐊᖑᒋᐊᓕᓐᓂᑦ ᐊᑖᓃᑦᑐᓂᒃ ᐃᓯᕈᓐᓇᐅᑎᑦ ᑐᑭᓯᐅᒪᔾᔪᑎᓄᑦ ᐊᒻᒪ ᓴᐳᔾᔭᐅᓂᖏᓐᓄᑦ ᑲᓐᖑᓇᖅᑐᑦ ᐱᖁᔭᖓᑕ. ᐊᔾᔨᖏᑦ ᐱᖁᔭᐅᑉ ᐱᔭᐅᔪᓐᓇᖅᑐᑦ ᐅᕙᓐᖓᑦ:

ᑕᐃᓐᓇ ᑎᒃᑯᐊᖅᑕᐅᔪᖅ ᐃᖅᑲᓇᐃᔭᓚᐅᖅᓯᒪᒋᐊᓕᒃ ᒪᓕᒐᕐᓂᐅᖅᑎᐅᓗᓂ ᖃᐅᔨᒪᓂᖃᑦᑎᐊᕐᓗᓂ ᐊᓪᓚᕝᕕᓕᕆᓂᐅᑉ ᐱᖁᔭᖏᓐᓂᑦ, ᐱᖃᓯᐅᑎᓗᒋᑦ ᑲᓇᑕᒥ ᓴᖑᕙᓪᓕᐊᓂᐅᓯᒪᔪᑦ ᐃᓯᕈᓐᓇᐅᑎᓂ ᑐᑭᓯᐅᒪᔾᔪᑎᓄᑦ ᐊᒻᒪᓗ ᓴᐳᔾᔭᐅᓂᖏᓐᓄᑦ ᑲᓐᖑᓇᖅᑐᑦ ᐱᖁᔭᖏᓐᓂ. ᐃᖅᑲᓇᐃᔭᓚᐅᖅᓯᒪᓂᖓ ᐃᓚᖃᕆᐊᖃᕐᒥᔪᖅ ᐊᐅᓚᑦᑎᑦᑎᐊᓚᐅᖅᓯᒪᓂᕐᒥᒃ ᑮᓇᐅᔭᓂᒃ ᐃᖅᑲᓇᐃᔭᖅᑎᓂᓪᓗ.

ᓇᓗᓇᐃᖅᑐᖅᓯᒪᔪᑦ ᐃᖅᑲᓇᐃᔮᑉ ᓇᓗᓇᐃᖅᑐᕈᑎᖓ ᐱᔭᐅᔪᓐᓇᖅᑐᖅ ᐊᓪᓚᕝᕕᖓᓂᑦ ᒪᓕᒐᓕᐅᖅᕕᐅᑉ ᐊᒻᒪᓗ ᐲᖅᑕᐅᔪᓐᓇᖅᑐᓂ ᒪᓕᒐᓕᐅᖅᕕᐅᑉ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓂᒃ ᐅᕙᓂ www.assembly.nu.ca. ᐊᕐᕌᒍᑕᒫᖅᓯᐅᑎᑦ ᐅᓂᒃᑳᓕᐊᒥᓃᑦ ᐊᓯᖏᓪᓗ ᐅᖃᓕᒫᒐᓕᕆᓯᒪᔭᖏᑦ ᐊᓪᓚᕝᕕᖓᑕ ᑐᑭᓯᐅᒪᔾᔪᑎᓕᕆᓂᕐᒧᑦ ᐊᒻᒪᓗ ᑲᓐᖑᓇᖅᑐᓕᕆᓂᕐᒧᑦ ᑲᒥᓴᓇᐅᑉ ᐊᑐᐃᓐᓇᐅᒻᒥᔪᑦ ᐅᕙᓂ: www.atipp-nu.ca.

ᑐᒃᓯᕋᐅᑎᑦ ᓇᓗᓇᐃᖅᓯᓯᒪᑦᑎᐊᕆᐊᓖᑦ ᖃᓄᖅ ᐱᓯᒪᒻᒪᖔᕐᒥᒃ ᐱᒋᔭᐅᖅᑳᕆᐊᓕᓐᓂᒃ ᐊᔪᓐᖏᓐᓂᐅᔭᕆᐊᓕᓐᓂᓪᓗ ᓇᓗᓇᐃᖅᓯᒪᔪᓂᒃ ᐃᖅᑲᓇᐃᔮᑉ ᓇᓗᓇᐃᖅᑐᕈᑎᖓᓂ. ᑮᓇᐅᔾᔭᓵᒃᓴᖏ ᑕᒫᓃᑦᑐᑦ $129,468-ᒥᑦ ᑕᒪᐅᖓ $184,955−ᒧᑦ ᐊᕐᕌᒍᑕᒫᖅ. ᑖᓐᓇᓕ ᓂᕈᐊᖅᑕᐅᔪᖅ ᐃᖃᓗᒻᒥᐅᑕᐅᓐᖏᑉᐸᑦ ᐅᓪᓗᕐᓂ ᓂᕈᐊᖅᑕᐅᕕᖓᓂ, ᐊᐅᓪᓛᖅᑎᕈᑎᒃᓴᓄᑦ ᐃᑲᔪᖅᑕᐅᒐᔭᖅᑐᖅ. ᐃᑲᔫᓯᐊᖅᑕᖅᑐᒥᒃ ᐃᓪᓗᒃᓴᖃᖅᑎᑕᑕᐅᒐᔭᖅᑐᖅ. ᐱᒐᓱᐊᕈᑏᑦ ᐱᔭᐅᖃᑦᑕᕈᓐᓇᓂᐊᖅᑐᑦ ᐃᓱᖃᕐᓗᒍ 5:00 ᐅᓐᓄᓴᒃᑯᑦ ᑕᓪᓕᕐᒥ, ᓅᕖᕝᕙ 29, 2019. ᖃᐅᔨᒪᓂᐊᖅᑯᓯ ᑕᐃᒃᑯᐊᑐᐊᖅ ᐱᒐᓱᐊᖅᑐᑦ ᐊᐱᖅᓱᖅᑕᐅᓂᐊᕐᓂᕐᒧᑦ ᓂᕈᐊᖅᑕᐅᔪᑦ ᖃᐅᔨᑦᑲᖅᑕᑐᐊᖑᓛᕐᒪᑕ.

ᑐᒃᓯᕋᐅᑎᑦ ᐊᐱᖅᑯᑎᓪᓗ ᐅᕗᖓ ᑐᕌᖅᑎᑕᐅᔪᓐᓇᖅᑐᑦ:

ᐊᓪᓚᑦᑎᖓ ᑲᑎᒪᔨᓕᕆᔨᑦ ᑲᑎᒪᔨᖏᓐᓄᑦ
ᐊᔾᓚᕝᕕᖓ ᒪᓕᒐᓕᐅᖅᕕᐅᑉ
ᑎᑎᖅᑲᖃᐅᑎᖓ 1200, ᐃᖃᓗᐃᑦ, ᓄᓇᕗᑦ, X0A 0H0
ᐅᖄᓚᐅᑎᖓ: (867) 975-5000
ᓱᑲᔪᒃᑯᑦ: (867) 975-5191
ᖃᕋᓴᐅᔭᒃᑯᑦ: submissions@assembly.nu.ca