IQALUIT, Nunavut (Saptaipa 10, 2013) – Uqqaqti tatvani Maligaliurvikmi uvalu Ihivautauvluni haffuminga Iliitagiyauhimayunik Nunavumi Uqqautjijiuvutik Katimayiitni Hunter Tootoo ublumi uqqalaqtuq tatva ukkua Jimmy Akavak, Louis Angalik, Sr. uvalu Davidee Arnakak tuniyauniaktut Iliitagiyaulutik Nunavumi tatvani qungiaqtaulutiq Hitamiutimi Saptaipa 12, 2013, ublurhiut 5:00pm unnukpat tatvani Pulariaqviatni Maligaliurviup.
Una Tiquaqtaulutiq Nalunaiqtauniaqtut angmaumaniaktuq kitunut inuknun qungiaqatauyumanigumik uvalu qungialiuktauniaqtuq Nunavumi tamaitnun nunaliitnun Maligaliurviup tiiviitkut qungiaqviatni.
Tatvani Januali 1, 2010-mi, Una Iliitagiyaunik Nunavumi Maligak aullarutauhimayuq. Hamna ihumarhutauhimayuq Iliitarhinniq iliitagiyumavlugit hapkua kittut Inuit iqqayuttiarhimayut hapkuninga iliitquhiliqiniqut, inulirinniqut uvalunin pivalialirinniqut ikkayutauqpata Nunavummiutnun. Una Iliitarhinniq qulliqpanguyuq hamani Nunavumi uvalu ihumagiyauluakluni hivuliutjuqtauyagiaqqaqtuq tamaitnin iliitagiyautjutinnit uvalunin pinniqutinnit piyauhimayunit tatvanga Nunavut Kavamatkunit.
Uvani June-mi attuktumi ukkiumi, ukkua Iliitagiyauhimayut Nunavumi Uqqautjijiuvutik Katimayiit naunairhimaliktait hapkua 2013-mi Iliitagiyauniaktut.
Una Jimmy Akavak Iqaluit-ningaqtuq havakparhimayuq tatvani Palihimatkuni ukkiut kittitlugit 30-nik ukkiut kaffinik Nunavumi nunaliitni taimaktitnani tatvanga havakvigihimayaminnit ukkiumi 2012-mi. Mr. Akavak iliitagiyauhimaliqtuq kaffiirhuni hivulikpanguvluni havagihimayaminnik havagihimavlugit hapkua nunaliitni palihimauqqatauvluni, ikkayuqparhuni anniktauhimayunniq uvalu quarhaqnaqtunniq havagiyaqqarhuni.
Louis Angalik, Sr.Arviaqmiutaq taimaknialiqtuq ukkiumi attuktumi havagiyaminik tatvani Iliitquhiliqiniqut uvalu Ingilraqnitaliqiniqut Ukkaujijiuvluni tatvani Havakviatni Ilihaktulikiyiit . Mr. Angalik illauqqatauhimayuq kaffinik havagiyauhimayunik maniqqiaqattaqtuni mamihaknikut ayurhaktunik ikkayurhaktunik inulgamiit uvalu innikninik ihuinarhimayunik, Tatvalu havaqqatigihimangmiyait hapkua allaat ilihimayautiaktut Innikniit, ilaliutivlugu una huirhimaliktuk Mark Kalluak, una tuniyauhimayuq Iliitagiyautjuttimik Nunavumi ukkiumi 2011-mi, havaqqarhimagaluagami tatvani Arviatni Innituqliitniq uvalu Unipqattuqaqniq Havagiyauhimayunik.
Davidee Arnakak Pangnirtung-miutaq una Hivulikpanguvluni Ihivauttauhimayuq tatvani Nunavumi Timmiluqtutnik Makinnasuaqtiit Katimayiitni, una arhuqpiaqpaqtuq ikkayugaluarhuni timmiluqtunniq uvalu Mayanguhimavaqhimayuq tatvani Pangnirtung-mi.
Una Kamisinauyuq Nunavumi Edna Ekhivalak Elias ihivyautauniaqtuq tatvani tikkuaktauhimayunik kungiaktittilugit inmi havagigamiuk hamna Iliitarhinnik Nunavumi.