ᐃᖃᓗᐃᑦ, ᓄᓇᕗᑦ (ᓯᑎᐱᕆ 10, 2013) - ᐅᖃᖅᑎᑦᑎᔨ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ ᐊᒻᒪ ᐃᒃᓯᕙᐅᑕᖅ ᐃᓕᓴᖅᓯᓂᕐᒧᑦ ᓄᓇᕗᒥ ᐅᖃᐅᔾᔨᒋᐊᖅᑎᑦ ᑲᑎᒪᔨᖏᓐᓄᑦ ᕼᐊᓐᑐ ᑐᑐ ᐅᓪᓗᒥ ᑐᓴᖅᑎᑦᑎᖅᑲᐅᔪᖅ ᐅᑯᐊ ᔨᒥ ᐊᑲᕙᒃ, ᓗᐃ ᐊᖓᓕᒃ, ᐊᖓᔪᒃᓯᖅ ᐊᒻᒪ ᑕᐃᕕᑎ ᐊᕐᓇᒃᑲᖅ ᐃᓕᓴᕆᔭᐅᖃᑕᐅᓂᐊᕐᓂᖏᓐᓂᒃ ᓄᓇᕗᒥ ᐃᓕᓴᖅᓯᔾᔪᑎᑦ ᐊᑐᕐᓗᒋᑦ ᖁᕕᐊᓱᒍᑎᖃᕐᓂᐊᖅᑐᑦ ᑎᓴᒻᒥᕐᒥ, ᓯᑎᐱᕆ 12, 2013−ᖑᓕᖅᐸᑦ, ᐅᓐᓄᓴᒃᑯᑦ 5:00 ᒪᓕᒐᓕᐅᖅᑎᑦ ᑲᑎᒪᕐᔪᐊᕐᕕᐊᓂ.
ᐃᓕᓴᖅᓂᕐᒧᑦ ᖁᕕᐊᓱᒍᑎᖃᕐᓂᖅ ᒪᑐᐃᖓᓂᐊᖅᑐᖅ ᑭᓇᒃᑯᑐᐃᓐᓇᑦᓯᐊᓄᑦ ᑕᑯᔭᖅᑐᕈᒪᔪᓄᑦ ᐊᒻᒪ ᑕᑯᒃᓴᐅᑎᑕᐅᓂᐊᖅᑐᖅ ᑕᓚᕖᓴᒃᑯᑦ ᐃᕐᖐᓐᓇᖅ ᑕᑯᒃᓴᐅᓗᓂ ᓄᓇᕗᓕᒫᒥ ᒪᓕᒐᓕᐅᖅᑎᑦ ᑲᑎᒪᔨᖏᑕ ᑲᑎᒪᕐᔪᐊᖅᑎᓪᓗᒋᑦ ᑕᑯᒃᓴᐅᕝᕕᐊᒍᑦ.
ᐅᓪᓗᐊᓂ ᔮᓐᓄᐊᕆ 1, 2010, ᐱᓕᕆᑦᑎᐊᖅᓯᒪᓂᑯᓂᒃ ᐃᓕᓴᖅᓯᓂᕐᒧᑦ ᓄᓇᕗᒥ ᐱᖁᔭᕐᔪᐊᖅ ᐊᓂᒍᖅᑎᑕᐅᓚᐅᖅᓯᒪᔪᖅ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ ᑎᓯᐱᕆ 2009ᖑᑎᓪᓗᒍ ᐊᒻᒪ ᐊᑐᓕᖅᑎᑕᐅᓪᓗᓂ ᔮᓐᓄᐊᕆ 1, 2010. ᑐᕌᒐᒃᓴᖓ ᐃᓕᓴᖅᓯᔾᔪᑎᐅᑉ ᐅᐱᒍᓱᖁᓪᓗᒋᑦ ᑭᓇᒃᑯᑐᐃᓐᓇᕐᓂᒃ ᐱᓕᕆᑦᑎᐊᖅᓯᒪᔪᓂᒃ ᐃᑲᔪᕐᓂᖃᖅᑐᓂᒃ ᐃᓕᖅᑯᓯᕐᒧᑦ, ᐃᓅᓯᕐᒧᑦ ᐅᕝᕙᓗ ᑮᓇᐅᔭᓕᐅᕋᓱᐊᕐᓂᒃᑯᑦ ᖃᓄᐃᖏᑦᑎᐊᖁᓪᓗᒍ ᓄᓇᕗᑦ. ᐃᓕᓴᕆᔭᐅᔾᔪᑎ ᖁᕝᕙᓯᖕᓂᖅᐹᖑᔪᖅ ᐅᐱᒋᔭᐅᔾᔪᑎᓂ ᓄᓇᕗᒥ ᐊᒻᒪ ᓴᓐᖏᓂᖅᓴᐅᔪᖅ ᐊᓯᖏᓐᓄᑦ ᐃᓕᓴᕆᔭᐅᔾᔪᑎᓄᑦ ᑎᓕᓯᔾᔪᑎᓄᑦ, ᐅᔭᒥᖕᓄᑦ, ᓴᒡᕕᖕᒥᖕᓄᑦ ᓴᖅᑭᑕᐅᖃᑦᑕᖅᑐᓂ ᐃᓕᓴᕆᔭᐅᔾᔪᑎᓂ ᓄᓇᕗᑦ ᒐᕙᒪᒃᑯᖏᓐᓂ.
ᐊᕐᕌᒍᒋᔭᑦᑎᓐᓂ ᔫᓂᒥ, ᐃᓕᓴᕆᔭᐅᔾᔪᑎᓄᑦ ᓄᓇᕗᒥ ᐅᖃᐅᔾᔨᒋᐊᖅᑎᑦ ᑲᑎᒪᔨᖏᑦ ᑐᓴᖅᑎᑦᑎᓚᐅᖅᓯᒪᔪᑦ 2013-ᒥ ᑐᓂᔭᐅᓂᐊᖅᑐᓂᒃ ᐃᓕᓴᕆᔭᐅᔾᔪᑎᓂᒃ.
ᔨᒥ ᐋᑲᕙᒃ ᐃᖃᓗᖕᒥᐅᑕᖅ ᐸᓖᓯᐅᓚᐅᖅᓯᒪᔪᖅ ᐊᕐᕌᒍᓄᑦ 30−ᓄᑦ ᓄᓇᕗᑦ ᓄᓇᖁᑎᖏᓐᓂ ᐊᔾᔨᒋᖏᑦᑐᓂ ᕿᑲᓕᓚᐅᖅᑳᕋᓂ ᐃᓐᓇᐅᓂᕐᒧᑦ ᐊᕐᕌᒍᐊᓂ 2012−ᒥ. ᒥᔅᑕ ᐋᑲᕙᒃ ᐃᓕᓴᕆᔭᐅᔾᔪᑎᑖᖃᑦᑕᖅᓯᒪᔪᖅ ᐅᓄᑲᓪᓚᒃᑐᓂᒃ ᐊᔾᔨᒌᖏᑦᑐᓂᒃ ᓯᕗᓕᖅᑎᐅᖃᑦᑕᕐᓂᖓᓄᑦ ᐃᖅᑲᓇᐃᔭᖅᑕᖓᒍᑦ ᓄᓇᓕᖕᓂ ᐸᓖᓯᐅᓪᓗᓂ, ᐱᕋᔭᒃᑕᐅᓯᒪᔪᓪᓗ ᐃᑲᔪᖅᑐᖅᑕᐅᓂᖏᑎᒍᑦ ᐊᒻᒪ ᐊᒃᓱᕐᓇᖅᑐᖃᖅᑎᓪᓗᒍ ᒥᐊᓂᖅᓯᓂᕐᒥᒃ.
ᓗᐃ ᐊᖓᓕᒃ, ᐊᖓᔪᒃᓯᖅ ᐊᕐᕕᐊᕐᒥᐅᑕᖅ ᓄᖅᑲᕐᓂᐊᓕᖅᑐᖅ ᐃᓐᓇᐅᓂᕐᒥᓄᑦ ᐃᓕᖅᑯᓯᓕᕆᓂᕐᒧᑦ ᐱᖅᑯᓯᓕᕆᓂᕐᒧᓪᓗ ᐅᖃᐅᔾᔨᒋᐊᖅᑎᐅᓪᓗᓂ ᐱᓕᕆᕝᕕᖓᓐᓂ ᐃᓕᓐᓂᐊᖅᑐᓕᕆᔨᒃᑯᑦ. ᒥᔅᑕ ᐊᖓᓕᒃ ᐅᓄᑲᓪᓚᒃᑐᓂ ᐱᒋᐊᖅᑎᑕᐅᓯᒪᔪᓂ ᐃᓚᐅᖃᑦᑕᖅᓯᒪᔪᖅ ᓄᓇᒥᓗ ᒪᒥᓴᐃᓂᕐᒧᑦ ᐱᓕᕆᔾᔪᑎᒃᓴᓂᒃ ᒪᒃᑯᒃᑐᓄᑦ ᐊᒻᒪ ᐃᓐᓇᕐᓄᑦ ᐱᕋᔭᒃᓯᒪᔪᓄᑦ. ᐃᖅᑲᓇᐃᔭᖃᑎᖃᖅᓯᒪᖕᒥᔪᖅ ᐃᓐᓇᐅᔪᓂᒃ ᐃᓕᓴᕆᔭᐅᓯᒪᔪᓂᒃ, ᒪᒃ ᑲᓗᐊᖑᓚᐅᖅᑐᒥᒃ, ᑕᐃᓐᓇᑦᑕᐅᖅ ᐃᓕᓴᕆᔭᐅᔾᔪᑎᒥᒃ ᓄᓇᕗᒥ ᑐᓂᔭᐅᓚᐅᖅᑐᖅ 2011−ᖑᑎᓪᓗᒍ, ᐱᒋᐊᖅᑎᓯᒪᔭᖏᓐᓄᑦ ᐊᕐᕕᐊᓂ ᐃᑦᑕᕐᓂᓴᓕᕆᓂᖅ ᐊᒻᒪ ᐅᓂᒃᑳᕐᓂᖅ ᐃᒻᒪᕐᓂᓴᐅᔪᓂᒃ ᐱᓕᕆᐊᖃᕐᓂᖅ.
ᑕᐃᕕᑎ ᐊᕐᓇᒃᑲᖅ ᐸᖕᓂᖅᑑᕐᒥᐅᑕᖅ ᐃᒃᓯᕙᐅᑕᕆᔭᐅᔪᖅ ᓴᖅᑭᑦᑎᖃᑕᐅᓯᒪᓪᓗᓂᓗ ᓄᓇᕗᒥ ᒪᑭᓐᓇᓱᐊᖅᑎᑦ ᑲᑐᔾᔨᖃᑎᒌᖏᓐᓂᒃ, ᑖᓐᓇ ᑎᒥᒥᒍᑦ ᐱᒡᒐᕈᑎᖃᖅᑐᓂᒃ ᐃᑲᔪᖅᑐᐃᔨᒻᒪᕆᒃ ᐊᒻᒪ ᒪᐃᔭᒋᔭᐅᓚᐅᖅᓯᒪᔪᖅ ᐸᖕᓂᖅᑑᕐᒥ.
ᑲᒥᓴᓇᖓᑦ ᓄᓇᕗᒥ ᐃᐊᑦᓇ ᐃᒃᕼᐃᕙᓪᓚᒃ ᐃᓚᐃᐊᔅ ᐃᒃᓯᕙᐅᑕᕆᔭᐅᓂᐊᖅᑐᖅ ᐃᓕᓴᖅᓯᓗᑎᒃ ᖁᕕᐊᓱᒍᑎᖃᖅᑎᓪᓗᒋᑦ ᐊᑐᕐᓗᓂᐅᒃ ᓯᕗᒃᑲᖅᑕᖅᑎᐅᓂᓂ ᐃᓕᓴᕆᔭᐅᔾᔪᑎᖃᕐᓂᕐᒧᑦ ᓄᓇᕗᒥ.
| Attachment | Size |
|---|---|
| ᐱᓕᕆᑦᑎᐊᖅᓯᒪᓂᑯᓂᒃ ᐃᓕᓴᖅᓯᓂᖅ ᓄᓇᕗᒥ ᖁᕕᐊᓱᒍᑎᖃᕐᓂᐊᖅᑐᑦ ᓯᑎᐱᕆ 12, 2013−ᖑᓕᖅᐸᑦ | 239.61 KB |