ᐃᖃᓗᐃᑦ, ᓄᓇᕗᑦ (ᓯᑎᐱᕆ 20, 2022) - ᒪᓕᒐᓕᐅᖅᕕᐅᑉ ᑲᑎᒪᔨᕋᓛᖁᑎᖏᑦ ᓇᐅᑦᓯᖅᑐᖅᑎᐅᔪᑦ ᒐᕙᒪᒃᑯᑦ ᐊᐅᓚᓂᖏᓐᓄᑦ ᑮᓇᐅᔭᖅᑐᕈᑎᖏᓐᓄᓪᓗ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᖅᑎᑦᑎᓛᕐᒪᑕ ᓯᑎᐱᕆ 26ᒥᑦ−27−ᒧᑦ, 2022−ᒥ ᐱᔾᔪᑎᖃᕐᓗᑎᒃ 2020-2021-ᒥ ᐊᒻᒪᓗ 2021-2022-ᒥ ᐊᕐᕌᒍᑕᒫᖅᓯᐅᑎᖏᓐᓂᑦ ᐅᓂᒃᑳᓕᐊᒥᓂᖏᓐᓂᑦ ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᖓᑕ ᓄᓇᕗᒻᒥ.
ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᑉ ᒫᓐᓇᓕᓴᐅᓛᖑᔪᑦ ᐅᓂᒃᑳᓕᐊᒥᓂᖏᑦ ᐲᖅᑕᐅᔪᓐᓇᖅᑐᑦ ᐅᑯᓇᓂ ᑲᕋᓴᐅᔭᒃᑯᑦ ᑐᕌᕈᑎᓂ:
https://assembly.nu.ca/sites/default/files/TD-004-6(2)-IN-IPC-Annual-Report-2021-22.pdf
ᐊᒻᒪᓗ
https://atipp-nu.ca/sites/default/files/NUIPC%20Annual%20Report%202021-22.pdf
ᓄᓇᕗᑦ ᒐᕙᒪᒃᑯᓪᓄᑦ ᐃᖅᑲᓇᐃᔭᖅᑏᑦ ᑕᓚᕖᓴᒃᑯᑦ ᓈᓚᖕᓂᖃᖅᑎᓪᓗᒋᑦ ᓵᖓᓐᓃᓐᓂᐊᕐᒥᔪᑦ.
“ᑲᑎᒪᔨᕋᓛᑦ ᑕᓚᕖᓴᒃᑰᖅᑐᑎᒃ ᓈᓚᓐᓂᖃᖅᑎᑦᑎᓂᖓ ᐱᕕᖃᖅᑎᑦᑎᓛᖅᑐᖅ ᒪᓕᒐᓕᐅᖅᑎᐅᖃᑕᐅᔪᓂᒃ ᒪᓕᒐᓕᐅᖅᕕᒻᒥ ᐃᓱᒪᒃᓴᖅᓯᐅᕈᑎᖃᕈᓐᓇᓂᕐᒥᒃ ᖃᓄᑎᒋ ᓄᓇᕗᑦ ᒐᕙᒪᖓ ᐱᓕᕆᒐᓱᓐᓂᖃᕐᒪᖔᖅ ᐱᓪᓗᒋ ᑐᓴᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᑉ ᐊᑐᓕᖁᔭᓕᐊᒥᓂᖏᓐᓂᑦ,” ᐅᖃᖅᑐᖅ ᑲᑎᒪᔨᕋᓛᑦ ᐃᒃᓯᕙᐅᑕᖓ ᔪᐊᔾ ᕼᐃᒃᔅ, ᒪᓕᒐᓕᐅᖅᑎᐅᔪᖅ ᐃᖃᓗᐃᑦ−ᑕᓯᓗᒻᒧᑦ.
ᓈᓚᓐᓂᖃᖅᑎᑦᑎᓂᖅ ᐱᒋᐊᓛᖅᑐᑦ 1:30-ᐸᑦ ᓇᒡᒐᔾᔭᐅᒥ, ᓯᑎᐱᕆ 26, 2022. ᓈᓚᓐᓂᖃᖅᑎᑦᑎᔪᑦ ᑕᓚᕖᓴᒃᑰᓛᖅᑐᑦ ᐊᖅᑯᑎᖃᕐᓗᑎᒃ ᓄᓇᓕᓐᓂ ᑕᓚᕕᓴᓕᕆᔨᒃᑯᖏᓐᓂᑦ ᐊᒻᒪᓗ ᐊᖏᕐᕋᒥ ᖃᖓᑦᑕᖅᑎᑕᐅᓯᒪᔪᒃᑯᑦ ᑕᓚᕖᓴᓕᓐᓄᑦ ᕕᐊᓪᑯᓐᓂ (ᓈᓴᐅᑎᖓ 513) ᐊᒻᒪᓗ ᓵᒃᑯᑦ (ᓈᓴᐅᑎᖓ 289 ᐱᑐᖃᑦ / ᓈᓴᐅᑎᓕᒃ 489 ᓄᑖᓂ ᓴᖅᑭᔮᓲᓂ). ᐃᒃᓯᕙᓂᐅᔪᑦ ᑕᑯᒃᓴᐅᑦᑕᐅᑎᒋᓲᖑᒻᒥᔪᑦ ᖃᕋᓴᐅᔭᒃᑯᑦ ᐅᕙᓂ: http://video.isilive.ca/nunavut/. ᐃᖃᓗᒻᒥᐅᑕᐃᑦ ᓈᓚᐅᑎᒃᑯᑦ ᓈᓚᒍᓐᓇᕐᒥᔪᑦ ᑐᓴᖅᓴᐅᑦᑕᐅᑎᒋᔪᓂᒃ ᑲᑎᒪᔪᓂᒃ FM−ᒥ ᓇᑭᖅᑕᐅᑎᒥ ᐅᑯᓂᖓ - ᐅᖃᐅᓯᕐᒥᓂᒃ ᐊᑐᖅᑐᑎᒃ ᐅᖃᖅᑐᓂᒃ: 92.5−ᒥ / ᐃᓄᒃᑎᑑᖅᑐᓂᒃ: 94.7−ᒥ / ᖃᓪᓗᓈᑎᑑᖅᑐᓂᒃ: 102.1−ᒥ.
-30-
ᑐᑭᓯᒋᐊᕈᒪᒍᒃᓯ: ᔮᓐ ᑯᕘᒃ
ᑎᑎᕋᖅᑎᐅᔪᖅ ᓄᓇᕗᑦ ᒪᓕᒐᓕᐅᖅᕕᖓᓂ
ᐅᖄᓚᐅᑎᖓ: (867) 975-5105