ᒪᓕᒐᓕᐅᖅᑏᑦ ᑲᑎᒪᔨᖏᑦ ᑐᓴᖅᑎᑦᑎᕗᑦ ᖃᖓᐅᓂᐊᕐᒪᖔᑦ ᐅᓪᓗᖅ ᐊᒻᒪ ᐋᖅᑭᒡᓯᒪᓂᕆᓂᐊᖅᑕᖓᓂᒃ ᓄᓇᕗᒥ ᓯᕗᓕᖅᑎᒃᓴᐅᓂᐊᖅᑐᓂᒃ ᑲᑎᒪᔾᔪᑎᖃᕐᓂᐅᑉ

ᐃᖃᓗᐃᑦ, ᓄᓇᕗᑦ (ᓄᕕᐱᕆ 14, 2017) - ᒪᓕᒐᓕᐅᖅᑏᑦ ᑲᑎᒪᔨᖏᑦ ᐅᓪᓗᒥ ᑐᓴᖅᑎᑦᑎᖅᑲᐅᕗᑦ ᖃᖓᐅᓂᐊᕐᒪᖔᑦ ᐅᓪᓗᖓ ᐊᒻᒪᓗ ᐋᖅᑭᒡᓯᒪᓂᕆᓂᐊᖅᑕᖓ ᓄᓇᕗᒥ ᓯᕗᓕᖅᑎᐅᖃᑕᐅᓂᐊᖅᑐᓂᒃ ᑲᑎᒪᔾᔪᑎᖃᕐᓂᐅᑉ. ᑖᒃᑯᐊ ᑕᐃᒪᓐᓇ ᑲᑎᒪᑎᓪᓗᒋᑦ ᐃᓘᓐᓇᖏᑦ ᒪᓕᒐᓕᐅᖅᑏᑦ ᑲᑎᒪᖃᑕᐅᖃᑦᑕᖅᐳᑦ.

ᑲᑎᒪᓂᐊᖅᑐᑦ ᑲᑎᒪᕐᔪᐊᕐᕕᖓᓐᓂ ᒪᓕᒐᓕᐅᖅᑏᑦ ᑲᑎᒪᔨᖏᑕ, ᐱᒋᐊᕐᓂᐊᖅᑐᑦ ᐅᓪᓛᒃᑯᑦ 10:00-ᒧᐊᖅᐸᑦ ᑕᓪᓕᕐᒥᕐᒥ (ᐅᓪᓗᑐᐃᓐᓇᕐᒥ), ᓄᕕᐱᕆ 17, 2017-ᒥ. ᑲᑎᒪᔪᑦ ᑭᓇᒃᑯᑐᐃᓐᓇᕐᓄᑦ ᐅᐸᒃᑕᐅᔪᓐᓇᕐᓂᐊᖅᑐᑦ ᑕᑯᓐᓇᕆᐊᖅᑐᕈᒪᔪᓄᑦ ᐃᒃᓯᕙᓗᑎᒃ ᐳᓛᖅᑏᑦ ᐃᒃᓯᕙᐅᑕᖏᓐᓂ. ᑖᒃᑯᐊ ᑲᑎᒪᑎᓪᓗᒋᑦ ᑕᓚᕖᓴᒃᑯᑦ ᑕᑯᒃᓴᐅᑎᑕᐅᓂᐊᖅᑐᑦ ᓄᓇᕗᓕᒫᒥ ᓄᓇᓖᑦ ᑕᓚᕖᕈᓐᓇᐅᑎᖏᑎᒍᑦ ᐊᒻᒪᓗ ᐊᖏᕐᕋᒥ ᖁᒻᒧᐊᒃᑎᑕᐅᓯᒪᔪᒃᑯᑦ ᑕᑯᓐᓇᖅᑕᐅᔪᓐᓇᕐᓂᐊᖅᑐᑦ ᐅᑯᑎᒎᓇᖅ Bell (ᓵᓄ 513) ᐊᒻᒪᓗ Shaw (ᓵᓄ 289) – classic]/489 – ᑖᒃᑯᐊ ᓄᑖᑦ) ᑕᓚᕖᓴᕈᓐᓇᐅᑏᑦ.

ᓂᕈᐊᖅᑕᐅᓂᖏᑦ ᐅᖃᖅᑎᐅᓂᐊᖅᑑᑉ, ᓯᕗᓕᖅᑎᐅᓂᐊᖅᑑᑉ ᐊᒻᒪᓗ ᑲᑎᒪᔨᒋᓂᐊᖅᑕᖏᑕ ᐊᐅᓚᑦᓯᔨᑦ ᑲᑎᒪᔨᖏᑕ (ᒥᓂᔅᑕᐃᑦ ᑲᑎᒪᔨᖏᑦ) ᑲᓐᖑᓇᖅᑐᒃᑯᑦ ᓂᕈᐊᕈᑕᐅᓂᐊᖅᑐᑦ. ᓯᕗᓪᓕᖅᐹᕐᒥ ᑲᑎᒪᔾᔪᑎᒃᓴᕆᓂᐊᖅᑕᖓᑦ ᓂᕈᐊᕐᖠᕐᓗᑎᒃ ᐅᖃᖅᑎᐅᓂᐊᖅᑐᒥᒃ. ᑖᓐᓇ ᐅᖃᖅᑎ ᓂᕈᐊᖅᑕᐅᔪᖅ ᑲᑎᒪᑎᑦᑎᓂᐊᕐᒪᑦ ᐃᒃᓯᕙᐅᑕᕆᔭᐅᓗᓂ ᓯᕗᓕᖅᑎᒃᓴᐅᓂᐊᖅᑐᓂᒃ ᑲᑎᒪᔾᔪᑎᖃᓕᖅᑎᓪᓗᒋᑦ.

ᑐᒡᓕᐊᓂ ᑲᑎᒪᔾᔪᑕᐅᓂᐊᖅᑐᖅ ᓂᕈᐊᕐᖠᕐᓗᑎᒃ ᓯᕗᓕᖅᑎᐅᓂᐊᖅᑐᒥᒃ. ᐊᑐᓂ ᓂᕈᐊᒐᒃᓴᓐᖑᖅᑎᑕᐅᔪᑦ ᐅᖃᓪᓚᒍᓐᓇᖅᑎᑕᐅᓂᐊᖅᑐᑦ ᓂᕈᐊᖅᑕᐅᔪᒪᔾᔪᑎᖏᓐᓂᒃ. ᒪᓕᒐᓕᐅᖅᑏᑦ ᑲᑎᒪᔨᖏᑦ ᑕᐃᒃᑯᐊ ᓯᕗᓕᖅᑎᒃᓴᒧᑦ ᓂᕈᐊᒐᒃᓴᐅᖏᑦᑐᑦ ᐊᐱᖅᓱᕈᓐᓇᖅᑎᑕᐅᓂᐊᖅᑐᑦ ᓂᕈᐊᒐᒃᓴᐅᔪᓄᑦ. ᓇᓗᓇᐃᖅᑎᖅᓯᒪᔪᑦ ᐊᑐᖅᑕᐅᓂᐊᖅᑐᑦ ᑲᑎᒪᓗᑎᒃ ᓂᕈᐊᖠᓕᖅᑎᓪᓗᒋᑦ ᑐᓂᔭᐅᓂᐊᖅᑐᑦ ᑲᑎᒪᓂᐅᑉ ᐱᒋᐊᕐᓂᖓᓂ.

ᑲᑎᒪᔨᑦ ᐊᖏᖅᓯᒪᔪᑦ ᐊᐅᓚᑦᓯᔨᑦ ᑲᑎᒪᔨᖏᑦ ᐅᑯᓂᖓ ᑲᑎᒪᔨᖃᕐᓂᐊᕐᓂᖏᓐᓂᒃ 8 ᐃᓚᒋᔭᐅᔪᓂᒃ (ᓯᕗᓕᖅᑎ ᐊᒻᒪᓗ 7 ᒥᓂᔅᑕᐃᑦ). ᑖᒃᑯᐊ ᒪᓕᒐᓕᐅᖅᑎᑦ ᑲᑎᒪᔨᖏᑦ ᐊᒻᒪᓗ ᐊᐅᓚᑦᓯᔨᑦ ᑲᑎᒪᔨᖏᑕ ᐱᖁᔭᕐᔪᐊᖏᑦ ᒪᓕᒐᖃᖅᑎᑦᑎᔪᑦ ᓯᕗᓕᖅᑎ ᐃᓱᒪᖅᓱᖅᑎᑕᐅᓪᓗᓂ ᑐᓂᓯᐅᖅᑲᐃᓂᕐᒧᑦ ᓇᓕᐊᖕᓄᑦ ᒥᓂᔅᑕᐅᕕᖃᕐᓂᐊᕐᒪᖔᑕ.

ᐊᖏᖅᑎᑕᐅᓂᐊᖅᑐᑦ ᑲᑎᒪᔨᕈᖅᑎᑕᐅᓗᑎᒃ ᓂᕈᐊᖅᑕᐅᕋᑖᖅᑐᑦ ᑕᓪᓕᒪᒋᓕᖅᑕᖓᓂ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ 10:00−ᒧᐊᖅᐸᑦ ᐅᓪᓛᒃᑯᑦ (ᑲᓇᖕᓇᒥᐅᑦ ᓯᕿᓐᖑᔭᖓ ᐊᑐᕐᓗᒍ) ᐊᐃᑉᐱᕐᒥ, ᓄᕕᐱᕆ 21, 2017−ᒥ, ᒪᓕᒐᓕᐅᖅᑏᑦ ᑲᑎᒪᕐᔪᐊᕐᕕᖓᓐᓂ. ᐱᖁᔨᕗᖔᕈᑎᑎᒍᑦ ᑎᒃᑯᐊᖅᑕᐅᖃᑦᑕᕐᓂᐊᖅᑐᑦ ᐅᖃᖅᑎ, ᓯᕗᓕᖅᑎ ᐊᒻᒪᓗ ᒥᓂᔅᑕᐃᑦ ᑲᑎᒪᔨᖏᑦ ᓯᕗᓪᓕᖅᐹᕐᒥ ᐅᓪᓗᕐᒥ ᑲᑎᒪᕐᔪᐊᖅᑎᓪᓗᒋᑦ ᑕᓪᓕᒪᖓᓐᓂ ᓂᕈᐊᖅᑕᐅᓯᒪᔪᑦ ᒪᓕᒐᓕᐅᖅᑎᑦ ᑲᑎᒪᔨᖏᑦ, ᑖᒃᑯᐊ ᑲᑎᒪᓂᐅᖅᑐᑦ ᐊᐃᑉᐹᓂ, ᓄᕕᐱᕆ 21, 2017-ᒥ, ᐅᓐᓄᓴᒃᑯᑦ 1:30−ᒥ (ᑲᓇᖕᓇᒥᐅᑦ ᓯᕿᓐᖑᔭᖓ ᐊᑐᕐᓗᒍ).