ᑕᓪᓕᒪᖓᓐᓂ ᒪᓕᒐᓕᐅᖅᑎᑦ ᑲᑎᒪᔨᖏᑦ ᓇᓗᓇᐃᖅᓯᕗᑦ ᑐᕌᒐᒃᓴᒥᖕᓂᒃ ᓯᕗᓪᓕᐅᑎᑕᒥᖕᓂᒡᓗ

ᐃᖃᓗᐃᑦ, ᓄᓇᕗᑦ (ᕕᕗᐊᕆ 26, 2018) - ᓄᓇᕗᑦ ᒪᓕᒐᓕᐅᕐᕕᐊᑕ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᐃᓱᓕᑦᑎᓚᐅᖅᐳᑦ ᒥᑦᑎᒪᑕᓕᖕᒥ ᐊᕗᑎᓯᒪᓪᓗᑎᒃ ᑲᑎᒪᓂᕐᒥᓂᒃ ᕕᕗᐊᕆ 23, 2018−ᖑᑎᓪᓗᒍ.

ᓯᕗᓕᖅᑎ ᐸᐅᓕ ᖁᐊᓴ ᐃᒪᐃᓕᓚᐅᖅᑐᖅ, “ᑐᕌᖅᑕᕗᑦ ᓴᖅᑭᑦᑎᕗᖅ ᑲᑐᔾᔨᖃᑎᖕᓂᒃᑯᑦ ᐱᓕᕆᐊᖃᕐᓂᐊᕐᓂᕐᒥᓂᒃ ᓇᓗᓇᐃᖅᓯᓇᓱᒃᑎᓪᓗᒋᑦ ᒐᕙᒪᒃᑯᑦ ᐱᓕᕆᐊᕆᓂᐊᖅᑕᖏᓐᓂᒃ ᐊᕐᕌᒍᓂ ᑎᓴᒪᓂ ᐊᒡᒋᖅᑐᓂ. ᒥᑦᑎᒪᑕᓕᖕᒥ ᑲᑎᒪᓂᕆᓚᐅᖅᑕᕗᑦ ᑐᓐᖓᕕᖃᖅᐳᑦ ᒥᓂᔅᑕᐃᑦ ᑲᑎᒪᔨᖏᑦᑕ ᐃᖅᑲᓇᐃᔮᕆᓯᒪᔭᕕᓂᖏᓐᓂᒃ ᐅᓪᓗᒥᒧᑦ ᑎᑭᖢᒍ, ᐊᒻᒪ ᒪᓕᒐᓕᐅᖅᑎᓕᒫᑦ ᑲᑎᑦᑐᓐᓇᖅᓯᓚᐅᖅᑐᑦ ᑐᕌᒐᓕᐊᕆᔭᐅᓚᐅᖅᑐᑦ ᖃᓄᖅ ᐋᖅᑭᒋᐊᖅᑕᐅᒃᑲᓐᓂᕈᓐᓇᕐᓂᐊᕐᒪᖔᖏᑦ ᐊᒻᒪ ᖃᓄᖅ ᓂᕈᐊᖅᑕᐅᓯᒪᔪᓄᑦ ᓄᓇᕗᒻᒥᐅᓄᓪᓗ ᓯᕗᓪᓕᐅᔾᔭᐅᓯᒪᔪᑦ ᓯᕗᒧᐊᒃᑎᑕᐅᒃᑲᓐᓂᕈᓐᓇᕐᓂᐊᕐᒪᖔᖏᓐᓂᒃ”.

ᑐᕌᖅᑕᕗᑦ ᓴᖅᑭᑦᑎᕗᖅ ᐊᑕᐅᓯᐅᓐᖏᑦᑐᓂᒃ ᐊᒡᒍᖅᑐᖅᓯᒪᔪᓂᒃ ᓯᕗᓪᓕᐅᔾᔭᐅᓯᒪᔪᓂᒃ, ᐃᓚᓕᐅᓪᓗᒋᑦ ᐅᑯᐊ:

• ᐃᖅᑲᓇᐃᔭᕐᓗᑎᒃ ᓄᓇᓖᑦ ᐊᒻᒪ ᐃᓅᓯᕆᔭᖏᑦ ᖃᓄᐃᖏᑦᑎᐊᕐᓗᑎᒃ ᐊᑐᕐᓗᑎᒃ ᐃᓅᓯᕗᑦ ᑐᕌᒐᒃᓴᖓ;
• ᓴᓇᓗᑎᒃ ᓄᓇᕗᒥ ᑮᓇᐅᔭᓕᐅᕈᑎᒃᓴᐅᔪᓂᒃ ᐊᒻᒪᓗ ᐱᖁᑎᕐᔪᐊᓂᒃ ᐊᑐᕐᓗᑎᒃ ᐱᕚᓪᓕᕈᑎᕗᑦ ᑐᕌᖓᒃᓴᖓ;
• ᓴᓐᖓᒃᑎᒋᐊᕐᓗᒍ ᐃᓕᓐᓂᐊᖅᑐᓕᕆᓂᖅ ᐊᒻᒪᓗ ᐱᓕᒻᒪᒃᓴᐃᓂᖅ ᐊᖅᑯᑎᒋᓗᒍ ᓯᕗᒧᐊᒃᐸᓪᓕᐊᔾᔪᑎᕗᑦ ᑐᕌᒐᒃᓴᖓ; ᐊᒻᒪᓗ
• ᑲᓇᑕᓕᒪᒥ ᐊᒻᒪ ᓄᓇᕐᔪᐊᓕᒪᒥ ᓄᓇᕗᑦ ᐊᔾᔨᐅᓐᖏᓐᓂᖓ ᐃᓕᓴᕆᓗᒍ, ᐊᖅᑯᑎᒋᓗᒍ ᐃᓅᓂᕗᑦ; ᐊᒻᒪ
• ᖃᓂᒌᓂᖅᓴᐅᓕᖅᑎᓪᓗᒋᑦ ᐱᓕᕆᖃᑎᖃᕐᓂᖓᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᒻᒪᓗ ᐃᓄᐃᑦ ᑎᒥᖁᑎᖏᓐᓂᒃ ᐊᑐᖅᑕᐅᓗᓂ ᑲᑐᔾᔨᖃᑎᒌᖕᓂᕗᑦ ᑐᕌᒐᒃᓴᖓ;

ᑐᕌᖅᑕᕗᑦ ᓴᖅᑭᑕᐅᓂᐊᖅᑐᖅ ᒪᓕᒐᓕᐅᕐᕕᖕᒥ ᒪᑐᐃᖅᑕᐅᓕᖅᐸᑦ ᑐᒡᓕᐊᓂ ᑲᑎᒪᕐᔪᐊᕐᓂᖓ ᑕᓪᓕᒪᖓᓂ ᓂᕈᐊᖅᑕᐅᓯᒪᔪᑦ ᒪᓕᒐᓕᐅᖅᑎᑦ ᑲᑎᒪᔨᖏᑦ ᑲᑎᒪᕐᔪᐊᖅᑎᓪᓗᒋᑦ, ᑕᒃᑯᐊ ᒪᓕᒃᓯᒪᓂᐊᖅᑐᑦ ᑲᑎᒪᔾᔪᑕᐅᓂᕆᔭᖏᓐᓄᑦ ᑐᒃᓯᕋᐅᑕᐅᔪᑦ 2018-2019 ᐊᕐᕌᒍᐊᓄᑦ ᐊᑭᑐᔪᖅᑐᕈᑎᒃᓴᓂᒃ ᑲᑎᒪᔾᔪᑎᖃᓕᖅᑎᓪᓗᒋᑦ ᐅᑭᐅᒃᑯᑦ ᑲᑎᒪᕐᔪᐊᕐᓂᖃᖅᑎᓪᓗᒋᑦ ᒪᓕᒐᓕᐅᕐᕕᖕᒥ.

ᑲᑎᒪᔨᐅᖃᑕᐅᔪᑦ ᓇᓗᓇᐃᖅᓯᒃᑲᓐᓂᓚᐅᕐᒥᔪᑦ ᐱᖁᔭᖅᑎᒍᑦ ᕿᒥᕐᕈᓇᖃᑦᑕᕆᐊᖃᕐᓂᕐᒥᖕᓂᒃ ᐃᓕᓴᕆᔭᐅᓯᒪᔪᑦ ᐅᖃᐅᓯᑦ ᐱᖁᔭᕐᔪᐊᖏᓐᓂᒃ, ᐃᓄᐃᑦ ᐅᖃᐅᓯᖏᓐᓂᒃ ᓴᐳᒻᒥᐅᓯᖅᓯᓯᒪᓂᕐᒧᑦ ᐱᖁᔭᕐᔪᐊᖏᓐᓂᒃ ᐊᒻᒪᓗ ᑭᒡᒐᖅᑐᖅᑎᖓᑦ ᓄᑕᖅᑲᑦ ᐊᒻᒪ ᒪᒃᑯᒃᑐᑦ ᐱᖁᔭᕐᔪᐊᖓᓐᓂᒃ ᕿᒥᕐᕈᓇᖕᓂᐊᖅᑐᑦ ᑕᓪᓕᒪᖓᓐᓂ ᓂᕈᐊᖅᑕᐅᓯᒪᔪᑦ ᒪᓕᒐᓕᐅᖅᑎᐅᓂᖏᓐᓂ. ᕿᒥᕈᓂᐅᔪᖅ ᐃᓱᒪᒃᓴᖅᓯᐅᕈᑎᖃᕐᓂᐊᕐᒥᔪᑦ ᓴᖅᑭᑦᑎᔪᓐᓇᕐᒪᖓᑕ ᒐᕙᒪᒃᑯᑦ ᐱᔨᑦᓯᕈᑎᖏᓐᓂᒃ ᐊᒻᒪ ᐱᓕᕆᐊᖏᓐᓄᑦ ᐅᓐᓂᕐᓗᒃᓴᕐᕕᐅᑉ ᐃᓂᒃᓴᖓᓂᒃ ᐃᖅᑲᓇᐃᔮᖑᓕᕐᓗᓂ ᓄᓇᕗᒥ.

ᐃᒃᓯᕙᐅᖓᑦ ᒪᓕᒐᓕᐅᖅᑎᑐᐃᓐᓇᐃᑦ ᑲᑎᒪᔨᖏᑕ ᐊᒻᒪᓗ ᒪᓕᒐᓕᐅᖅᑎᐅᓪᓗᓂ ᐊᕐᕕᐊᓄᑦ ᑎᑭᕋᕐᔪᐊᓪᓗ ᐅᐊᖕᓇᖓᓄᑦ ᔮᓐ ᒪᐃᓐ ᐅᖃᓚᐅᖅᑐᖅ ᐃᒪᓐᓇ, “ᒪᓕᒐᓕᐅᖅᑎᐅᖃᑎᒃᑯ ᐅᕙᖓᓗ ᓂᕆᐅᑦᑎᐊᖅᑐᒍᑦ ᒐᕙᒪᒃᑯᑦ ᑭᐅᔪᓐᓇᖅᑎᑦᑐᒪᓪᓗᑎᒍ ᓯᕗᒧᐊᑦᑎᐊᕐᓂᕆᔭᖏᑦ ᐆᒃᑐᖅᑕᐅᔪᓐᓇᕐᓂᐊᕐᒪᑕ ᖃᐅᔨᓴᖅᑕᐅᓗᑎᒃ ᓯᕗᒧᐊᖕᓂᕆᔭᖓᑦ ᐊᒻᒪᓗ ᓴᖅᑭᔮᑦᑎᐊᕋᓗᐊᕐᒪᖓᑕ ᐊᑑᑎᖃᑦᑎᐊᕋᓗᐊᕐᒪᖔᑕ ᐊᒻᒪᓗ ᓱᒃᑲᔾᔫᒥᔪᒃᑯᑦ ᐱᓕᕆᔭᐅᖃᑦᑕᕐᓗᑎᒃ.”

ᒥᑦᑎᒪᑕᓕᖕᒦᑎᑎᓪᓗᒋᑦ, ᒪᓕᒐᓕᐅᖅᑏᑦ ᑐᓐᖓᓱᒃᑎᑕᐅᓚᐅᖅᑐᑦ ᐅᖃᖅᑎᒧᑦ ᐊᒻᒪ ᑐᓄᓂᕐᒧᑦ ᒪᓕᒐᓕᐅᖅᑎᒧᑦ, ᔫᓯᐱ ᐃᓄᖕᒧᑦ ᐊᒻᒪ ᑲᑎᒪᔨᑦ ᑲᑎᒪᖃᑎᖃᓚᐅᖅᑐᖅ ᓄᓇᓕᑦ ᓯᕗᓕᖅᑎᖏᓐᓂᒃ ᐊᒻᒪ ᐅᓂᒃᑲᕐᕕᐅᖃᑦᑕᓚᐅᖅᑐᑦ ᓄᓇᓕᑦ ᐃᓱᒫᓗᒍᑎᒋᔭᖏᓐᓂᒃ. ᑲᑎᒪᔨᑦ ᐅᓂᒃᑳᕐᕕᐅᓚᕐᒥᔪᑦ ᐊᖓᔪᖅᑲᐅᑎᖏᓐᓄᑦ ᓄᓘᔮᖕᓂ ᐅᔭᕋᖕᓂᐊᕐᕕᖁᑎᖏᓐᓄᑦ ᐸᕙᓐᓛᓐ ᑯᐊᐳᕇᓴᖏᓐᓄᑦ ᐅᓂᒃᑳᕐᕕᐅᓪᓗᑎᒃ ᓇᒦᓕᕐᒪᖔᑕ ᓄᓘᔮᖕᓂ ᐅᔭᕋᖕᓂᐊᕐᓂᖅ, ᐅᓂᒃᑲᐅᓯᐅᓚᐅᕐᒥᔪᑦ ᐱᓕᒻᒪᒃᓴᐃᓂᕐᒧᑦ ᐊᒻᒪᓗ ᐃᓕᓐᓂᐊᖅᑎᑦᑎᓂᕐᒧᑦ ᐱᓕᕆᐊᖑᓂᐊᖅᑐᑦ ᐊᑐᖅᑕᐅᔪᒪᔪᑦ ᓄᓇᕗᒥ ᐃᓄᖁᑎᖏᓐᓄᑦ.

ᓯᕗᓪᓕᖅᐹᕐᒥ ᑲᑎᒪᕐᔪᐊᕐᓂᕆᔭᖓᑦ ᑕᓪᓕᒪᖓᓐᓂ ᓂᕈᐊᖅᑕᐅᓯᒪᔪᑦ ᒪᓕᒐᓕᐅᖅᑎᑦ ᑲᑎᒪᔨᖏᑦ ᑲᑎᒪᕐᔪᐊᕆᐊᕐᓂᐊᖅᑐᑦ ᒫᔾᔨ 6, 2018−ᒥ. ᑲᑎᒪᕐᔪᐊᕐᓂᕆᔭᐅᔪᑦ ᒪᓕᒐᓕᐅᕐᕕᖕᒥ ᑭᓇᒃᑯᑐᐃᓐᓇᕐᓄᑦ ᐅᐸᒃᑕᐅᔪᓐᓇᕐᓂᐊᖅᑐᑦ ᑯᓐᖏᐊᕆᐊᕈᓐᓇᖅᑐᑦ ᐳᓛᕐᕕᖓᓂ ᐃᒃᓯᕙᓗᑎᒃ ᑲᑎᒪᕐᔪᐊᕐᕕᖕᒥ ᐊᒻᒪᓗ ᑕᓚᕖᓴᒃᑯᑦ ᑕᑯᒃᓴᐅᓂᐊᕐᒥᔪᑦ ᓄᓇᕗᓕᒫᒥ ᓄᓇᓕᖕᓂ ᑕᓚᕖᓴᕈᓐᓇᐅᑎᖏᑎᒍᑦ ᐊᒻᒪᓗ ᖁᒻᒧᐊᒃᑎᑕᐅᓯᒪᔪᒃᑯᑦ ᑕᓚᕖᓴᕈᓐᓇᐅᑎᖏᑎᒍᑦ ᐅᑯᑎᒎᓇᖅ ᐱᐅᒃᑯ (ᑕᓚᕖᓴᕐᕕᐊᒍᑦ 513) ᐊᒻᒪᓗ Shaw (ᑕᓚᕖᓴᕐᕕᐊᒍ 289 − ᑕᓚᕖᓴᕐᕕᑐᖃᖅ /ᑕᓚᕖᓴᕐᕕᐊᒍᑦ 489 − ᓄᑕᖅ ᑕᑯᒃᓴᐅᕕᖓ) ᑕᓚᕖᓴᒃᑯᑦ.

-30-

ᑐᓴᒐᒃᓴᒃᑲᓐᓂᕐᓂᒃ ᐱᔪᒪᒍᕕᑦ ᑐᓴᖅᑎᓪᓗᒍ:

ᐸᑎᖅ ᓇᑦᓯᖅ, ᒪᓕᒐᓕᐅᖅᑎ (ᐊᐃᕕᓕᖕᒧᑦ)
ᐃᒃᓯᕙᐅᑕᖅ, ᒪᓕᒐᓕᐅᖅᑎᓕᒫᓐ ᑲᑎᒪᔨᖏᓐᓄᑦ
ᐅᖄᓚᐅᑕ: (867) 925-9890