ᐃᖃᓗᐃᑦ, ᓄᓇᕗᑦ (ᒫᔾᔨ 19, 2018) - ᐅᖃᖅᑎᑦᓯᔨ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ ᐊᒻᒪᓗ ᐃᒃᓯᕙᐅᑕᕆᔭᐅᔪᖅ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᕆᔭᐅᔾᔪᑎᓄᑦ ᐅᖃᐅᔾᔨᒋᐊᖅᑎᑦ ᑲᑎᒪᔨᖏᓐᓄᑦ ᔫᓯᐱ ᐃᓄᒃ ᐅᓪᓗᒥ ᑐᓴᖅᑎᑦᑎᖃᐅᔪᖅ ᑐᓂᔭᐅᓂᐊᕐᓂᖏᓐᓂᒃ ᐊᕐᕌᒍᒋᔭᑦᑎᓐᓂ ᐱᐊᑎ ᐳᕉᔅᑐ ᐊᒻᒪᓗ ᓘᑎ ᐸᓪᓗᖅ ᐃᓕᓴᕆᔭᐅᔾᔪᑎᓂᒃ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᕆᔭᐅᔾᔪᑎᐅᕙᒃᑐᒥᒃ.
ᔮᓐᓄᐊᕆ 1, 2010−ᖑᑎᓪᓗᒍ, ᐱᖁᔭᕐᔪᐊᖅ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᕆᔭᐅᔾᔪᑎ ᐊᑐᓕᖅᑎᑕᐅᓚᐅᖅᓯᒪᔪᖅ. ᑐᕌᒐᒃᓴᕆᔭᖓ ᐃᓕᓴᕆᔭᐅᔾᔪᑎᐅᑉ ᐃᓕᓴᖅᓯᖁᓪᓗᒋᑦ ᑭᓇᒃᑯᑐᐃᓐᓇᕐᓂᒃ ᐱᓕᕆᑦᑎᐊᖅᓯᒪᔪᓄᑦ ᐃᑲᔪᖅᓯᓪᓗᑎᒃ ᓄᓇᕗᒥᒃ. ᐃᓕᓴᕆᔭᐅᔾᔪᑎ ᑖᓐᓇ ᖁᕝᕙᓯᖕᓂᖅᐹᖑᓪᓗᓂ ᓄᓇᕗᒥ ᐃᓕᓴᕆᔭᐅᔾᔪᑎᐅᕗᖅ ᐊᒻᒪᓗ ᐊᓯᖏᓐᓂᑦ ᐃᓕᓴᕆᔭᐅᔾᔪᑎᓂᑦ ᖁᑦᑎᖕᓂᖅᐹᖑᓪᓗᓂ, ᐅᔭᒥᖕᓂᑦ ᐅᕝᕙᓘᓐᓃᑦ ᓴᒡᕕᖕᒥᖕᓂᑦ ᑐᓂᔭᐅᕙᒃᑐᓂᑦ ᓄᓇᕗᑦ ᒐᕙᒪᒃᑯᖏᓐᓂᑦ.
ᐱᐊᑎ ᐳᕉᔅᑐ ᖃᐅᔨᒪᔭᐅᑦᑎᐊᖅᑐᖅ ᑐᓵᔨᐅᖃᑦᑕᖅᓯᒪᓂᖓᓂᒃ ᐊᒻᒪᓗ ᑐᑭᓕᐅᕆᔨᐅᓂᖓᓂᒃ ᐊᕐᕌᒍᓄᑦ ᐅᓄᖅᑐᒻᒪᕆᐅᔪᓄᑦ ᑐᓵᔨᐅᓯᒪᓕᖅᑐᖅ. 2016−ᖑᑎᓪᓗᒍ ᐃᓕᓴᕆᔭᐅᓚᐅᖅᓯᒪᔪᖅ ᑐᓵᔨᐅᖃᑎᖏᓐᓂᑦ ᐃᓅᓯᓕᒫᖅ ᐃᑲᔪᖅᓯᓯᒪᓂᖓᓄᑦ ᑐᓵᔨᐅᓪᓗᓂ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᑦ ᐅᖃᐅᓯᓕᕆᔨᐅᓂᖓᓄᑦ ᑐᓐᓂᖅᑯᓯᐊᖅᑖᖅᑎᑕᐅᓪᓗᓂ
ᓘᑎ ᐸᓪᓗᖅ ᒪᓕᒐᓕᐅᖅᑎᐅᓚᐅᖅᓯᒪᔪᖅ ᓄᓇᑦᓯᐊᕐᒥ 1975-ᒥᑦ 1995−ᒧᖅ. ᐊᕐᕌᒍᓄᑦ ᐅᓄᖅᑐᓄᑦ ᐱᔨᑦᓯᖅᓯᒪᓪᓗᓂ, ᒥᔅᑕ ᐸᓪᓗᖅ ᑭᒡᒐᖅᑐᐃᓚᐅᖅᓯᒪᔪᖅ ᖁᑦᓯᒃᑐᕐᒥᐅᓂᒃ ᐊᒻᒪ ᐱᓕᕆᕐᔪᐊᕐᓂᑰᓪᓗᓂ ᓄᓇᕗᑦ ᐊᕗᑎᓂᐊᓕᖅᑎᓪᓗᒍ ᐱᓕᕆᖃᑕᐅᓪᓗᓂ.
“ᐊᕐᕌᒍᒋᔭᑦᑎᓐᓂ ᑐᓂᔭᐅᔪᑦ ᐃᓕᓴᕆᔭᐅᔾᔪᑎᒥᓂᒃ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ ᑕᒪᕐᒥᒃ ᖃᐅᔨᒪᔭᐅᑦᑎᐊᖅᑑᒃ,” ᑕᐃᒪᓐᓇ ᐅᖃᓚᐅᖅᑐᖅ ᐅᖃᖅᑎᑦᓯᔨᐃᓄᒃ. “ᓘᑎ ᐸᓪᓗᖅ ᐃᓕᓴᕆᔭᐅᓯᒪᑦᑎᐊᖅᑐᖅ ᒪᓕᒐᓕᐅᖅᑎᐅᓪᓗᓂ ᐃᑲᔪᖅᓯᓂᖃᒻᒪᕆᖕᓂᖓᓄᑦ ᓴᖅᑭᑕᐅᒐᓱᐊᓕᖅᑎᓪᓗᒍ ᓄᓇᕗᑦ ᐊᒻᒪᓗ ᐱᐊᑎ ᐳᕉᔅᑐ ᐃᖅᑲᒋᔭᐅᑦᑎᐊᖅᑐᖅ ᐱᒋᐊᖅᑳᓐᖓᐅᑕᐅᖃᑕᐅᓚᐅᖅᓯᒪᖕᒪᑦ ᑐᓵᔨᐅᔪᓄᑦ ᓴᓐᖓᒃᑎᒋᐊᖅᑎᑦᑎᓯᒪᓪᓗᓂ ᐃᓄᐃᑦ ᐅᖃᐅᓯᖏᓐᓂᒃ ᐃᓅᓯᑦᑎᓐᓂ ᐊᒻᒪᓗ ᐱᓕᕆᕕᖕᒥ.”
ᑖᒃᑯᐊᒃ ᐃᓕᓴᕆᔭᐅᔾᔪᑎᑖᖅᑎᑕᐅᓛᖅᑑᒃ ᒥᔅᑕ ᐳᕉᔅᑐ ᐊᒻᒪᓗ ᒥᔅᑕ ᐸᓪᓗᖅ ᐅᐱᕐᖔᒃᑯᑦ ᑲᑎᒪᕐᔪᐊᓕᖅᐸᑕ 2018−ᒥ ᒪᓕᖓᓕᐅᖅᑎᑦ ᑲᑎᒪᔨᖏᑦ ᐅᓪᓗᐊ ᓇᓗᓇᐃᖅᑕᐅᔪᒫᖅᑐᖅ. ᐃᓕᓴᕆᔭᐅᔾᔪᑎᓂᒃ ᑐᓂᓯᓂᐊᖅᑐᑦ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᐊᓂ ᐊᒻᒪᓗ ᑕᓚᕖᓴᒃᑯᑦ ᑕᑯᒃᓴᐅᑎᑕᐅᓛᖅᑐᑦ ᓄᓇᕗᓕᒫᒥ. ᑲᒥᓴᓇᖓ ᓄᓇᕗᑦ ᓇᓕ ᑯᓱᒐᖅ ᑐᓂᓯᓛᖅᑐᖅ ᐃᓕᓴᕆᔭᐅᔾᔪᑎᒥᒃ ᐊᑐᕐᓗᒍ ᑎᒍᒥᐊᖅᑎᐅᓂᖓᓂᒃ ᐊᑐᕐᓗᒍ ᓄᓇᕗᒥ ᐃᓕᓴᕆᔭᐅᔾᔪᑎᑖᖑᕙᒃᑐᓂᒃ.
-30-
ᑐᓴᕆᐊᒃᑲᓐᓂᕈᒪᒍᕕᑦ ᐅᓇ ᖃᐅᔨᒃᑲᕐᓗᒍ:
ᔮᓐ ᑯᐊᒃ, ᑎᑎᕋᖅᑎ ᒪᓕᒐᓕᐅᖅᑎᑦ ᑲᑎᒪᔨᖏᑕ ᐊᒻᒪᓗ ᑎᑎᕋᖅᑎ ᐃᓕᓴᕆᔭᐅᔾᔪᑎᑖᕐᓂᕐᒧᑦ ᓄᓇᕗᒥ ᐅᖃᐅᔾᔨᒋᐊᖅᑎᑦ ᑲᑎᒪᔨᖏᑕ / (867) 975-5000
| Attachment | Size |
|---|---|
| ᐅᖃᐅᔾᔨᒋᐊᖅᑎᑦ ᑲᑎᒪᔨᖏᑦ ᑐᓴᖅᑎᑦᑎᕗᑦ ᑐᓂᔭᐅᓂᐊᖅᑐᓂᒃ ᐃᓕᓴᖅᓯᔾᔪᑎᒥᒃ ᓄᓇᕗᒥ ᐱᓕᕆᑦᑎᐊᕐᓂᑯᓄᑦ | 116.72 KB |