ᐃᖃᓗᐃᑦ, ᓄᓇᕗᑦ (ᓅᕖᕝᕙ 20, 2018) – ᐅᐱᓐᓇᖅᑐᖅ ᔫ ᐃᓄᒃ, ᐅᖃᖅᑎᒋᔭᐅᔪᖅ ᓄᓇᕗᑦ ᒪᓕᒐᓕᐅᖅᕕᖓᓂ, ᐅᓪᓗᒥ ᐅᖃᖅᑲᐅᕗᖅ ᑖᓐᓇ 7−ᒋᔭᖓ ᒪᒃᑯᑦᑐᓄᑦ ᒪᓕᒐᓕᐅᖅᕕᒃ ᑏᕖᒃᑯᑦ ᑕᑯᒃᓴᐅᑦᑕᐅᑎᒋᓛᕐᒪᑦ ᓄᓇᕗᓕᒫᒧᑦ ᑎᓴᒻᒥᐅᓕᖅᑲᑦ, ᓅᕖᕝᕙ 22, 2018, 1:30−ᒥ ᐅᓐᓄᓴᒃᑯᑦ (ᑲᓇᓐᓇᐅᑉ ᓯᕿᓐᖑᔭᖓᒍᑦ).
ᑲᑎᒪᓂᕆᔭᖏᑦ ᐊᕐᕌᒍᒥᒃ ᐊᓪᓗᐃᑕᖅᑐᖅ ᒪᒃᑯᑦᑐᓄᑦ ᒪᓕᒐᓕᐅᖅᕕᒃ ᐊᑐᖅᑕᐅᓛᖅᑐᖅ ᒪᓕᒐᓕᐅᖅᕕᐅᑉ ᑲᑎᒪᕐᔪᐊᖅᕕᖓᓂ ᐊᒻᒪᓗ ᑭᒃᑯᑐᐃᓐᓇᕐᓄᑦ ᒪᑐᐃᖓᓛᖅᑐᓂ ᒪᓕᒐᓕᐅᖅᕕᐅᑉ ᐳᓛᖅᕕᖓᓂᑦ ᑕᑯᕋᓐᓈᕆᐊᖅᑐᕈᒪᔪᓄᑦ. ᒪᒃᑯᑦᑐᑦ ᒪᓕᒐᓕᐅᖅᕕᖓ ᑏᕖᒃᑯᑦ ᑕᑯᒃᓴᐅᓛᖅᑐᑦ ᓄᓇᓖᑦ ᑏᕖᓕᕆᔨᖏᑎᒍᑦ ᐊᒻᒪᓗ ᖃᖓᑦᑕᖅᑎᑕᐅᓯᒪᔪᒃᑯᑦ ᑏᕖᖃᖅᑐᓄᑦ ᐊᑐᕐᓗᑎᒃ ᕕᐊᓪ (ᓈᓴᐅᑎᖓ 513) ᐊᒻᒪᓗ ᓵ (ᓈᓴᐅᑎᖓ 289 - ᐱᑐᖃᐅᓂᖅᓴᒃᑯᑦ / 489 − ᓄᑖᖑᓂᖅᓴᒃᑯᑦ) ᑕᑯᒃᓴᐅᑎᑦᑎᕕᖏᒍᑦ.
ᒥᓂᔅᑕ ᑕᐃᕕᑦ ᔪᐊᓇᓯ, ᒪᓕᒐᓕᐅᖅᑎ ᕿᑭᖅᑖᓘᑉ ᓂᒋᐊᓄᑦ, ᓴᖅᑭᓛᖅᑐᖅ ᒪᒃᑯᑦᑐᑦ ᒪᓕᒐᓕᐅᖅᕕᖓᓄᑦ ᐃᓕᓐᓂᐊᖅᑏᑦ ᐊᐱᖅᑯᑎᖏᓐᓂᑦ ᑭᐅᔭᖅᑐᕐᓗᓂ ᐱᔾᔪᑎᖃᖅᑐᓂᒃ ᐱᒋᐊᖅᑎᑕᐅᓯᒪᔪᓂᒃ ᒥᓂᔅᑕᐅᕕᖓᓂ. ᒥᓂᔅᑕ ᔪᐊᓇᓯ ᒥᓂᔅᑕᐅᔪᖅ ᐃᓕᓐᓂᐊᖅᑐᓕᕆᓂᕐᒧᑦ, ᐅᖃᐅᓯᕐᓄᑦ, ᐱᖅᑯᓯᓕᕆᓂᕐᒧᑦ ᐃᑦᑕᕐᓂᓴᓕᕆᓂᕐᒧᓪᓗ.
ᐃᓕᓐᓂᐊᖅᑏᑦ ᐃᓚᐅᖃᑕᐅᔪᑦ ᒪᒃᑯᑦᑐᓄᑦ ᒪᓕᒐᓕᐅᖅᕕᒻᒥ ᐃᓕᓐᓂᐊᖅᑐᑦ ᒪᓕᒐᓕᐅᖅᕕᐅᑉ ᐊᐅᓚᓂᕆᓲᖏᓐᓂᒃ, ᑕᕝᕙᓂᒃᓴᐃᓐᓇᕐᓗ ᑎᒍᒥᐊᕐᓗᑎᒃ ᐱᔭᕆᐊᑐᔪᓂᒃ ᐃᓂᒋᔭᐅᔪᓂᒃ ᓂᕈᐊᖅᑕᐅᓯᒪᔪᓄᑦ ᒪᓕᒐᓕᐅᖅᑎᐅᔪᓄᑦ ᒪᓕᒐᓕᐅᖅᕕᒻᒥ.” ᐅᖃᖅᑎ ᐃᓄᒃ ᐅᖃᓚᐅᖅᑐᖅ. "ᓄᓇᕗᒻᒥᐅᑕᓕᒫᑦᑎᐊᑦ ᑐᓐᖓᓱᑦᑎᑉᐸᒃᑲ ᑕᓚᕖᓴᓛᖅᑯᓪᓗᒋᑦ ᐊᖏᕐᕋᖏᓐᓂ ᑕᑯᕋᓐᓈᕐᓗᑎᒃ ᓯᕗᓂᕆᓛᖅᑕᑎᓐᓂ ᓯᕗᓕᖅᑎᒋᓛᖅᑕᑎᓐᓂᑦ ᐱᓕᕆᔪᓂᒃ ᑲᑎᒪᕐᔪᐊᖅᕕᖁᑎᒃᓯᓐᓂ".
ᑕᕝᕙᓂ ᐊᕐᕌᒍᑦᑎᓐᓂ ᒪᒃᑯᑦᑐᑦ ᒪᓕᒐᓕᐅᖅᑏᑦ ᐃᓕᓐᓂᐊᖃᑕᐅᕗᑦ ᖁᑦᑎᓂᖅᓴᒥ ᐃᓕᓴᕕᓐᓂ ᓄᓇᕗᓕᒫᒥ. ᐃᓕᓐᓂᐊᖅᑏᑦ ᓂᕈᐊᖅᑕᐅᓚᐅᖅᑐᑦ ᑭᒡᒐᖅᑐᐃᓂᐊᕐᓗᑎᒃ ᓄᓇᕗᒥ 22−ᖑᔪᓂᒃ ᓂᕈᐊᖅᑕᐅᓯᒪᕕᐅᔪᓂᒃ, ᐃᓚᐅᒐᓱᐊᕈᑎᓂᒃ ᑕᑕᑎᕆᓪᓗᑎᒃ ᑐᒃᓯᕋᐅᑎᓕᐅᓚᐅᖅᓯᒪᔪᑦ ᐃᓕᓐᓂᐊᖅᕕᖏᓐᓂ, ᐱᖃᑕᐅᔪᒪᓪᓗᑎᒃ ᒪᒃᑯᑦᑐᑦ ᒪᓕᒐᓕᐅᖅᕕᖓᓂ.
-30-
ᑐᑭᓯᒋᐊᕈᒪᒍᒃᓯ: ᔮᓐ ᑯᕉᒃ
ᑎᑎᕋᖅᑎ ᓄᓇᕗᑦ ᒪᓕᒐᓕᐅᖅᕕᖓᓂ
ᐅᖄᓚᐅᑎᖓ: (867) 975-5100
| Attachment | Size |
|---|---|
| 2018 ᐅᖃᖅᑎᐅᑉ ᒪᒃᑯᑦᑐᓄᑦ ᒪᓕᒐᓕᐅᖅᕕᖓ ᑕᕝᕙᑦᑕᐅᑎᒋ ᑏᕖᒃᑯᑦ ᑕᑯᒃᓴᐅᓛᖅᑐᖅ ᓄᓇᕗᓕᒫᒥ | 106 KB |