ᔭᓗᓇᐃ, ᓄᓇᑦᓯᐊᖅ ᐊᒻᒪᓗ ᐃᖃᓗᐃᑦ, ᓄᓇᕗᑦ (ᔪᓚᐃ 2, 2019) - ᐅᖃᖅᑎᐅᔫᒃ ᔮᒃᓴᓐ ᓛᐳᑎ ᐊᒻᒪᓗ ᓯᒥᐊᓐ ᒥᑭᓐᖑᐊᖅ ᐅᓪᓗᒥ ᑭᒃᓵᒃᐴᒃ ᐃᓅᔪᓐᓃᕐᒪᑦ ᒪᓕᒐᓕᐅᖅᑎᐅᓚᐅᖅᒪᔪᖅ ᓘᑎ ᐸᓪᓗᖅ, ᑖᓐᓇᐃᓛᒃ ᐊᓂᕐᓂᖃᕈᓐᓃᓚᐅᕐᒪᑦ ᓇᒡᒐᔾᔭᐅᖑᑎᓪᓗᒍ ᐊᑯᓂ ᐋᓐᓂᐊᖃᓚᐅᖅᑐᓂ.
ᓘᑎ ᐸᓪᓗᖅ ᒪᓕᒐᓕᐅᖅᑎᐅᓚᐅᖅᒪᔪᖅ ᓄᓇᑦᓯᐊᑉ ᒪᓕᒐᓕᐅᖅᕕᖓᓂ 1975-ᒥᑦ−1995-ᒧᑦ. ᑕᐃᒃᓱᒪᓂᑲᓂ ᓂᕈᐊᖅᑕᐅᓯᒪᓪᓗᓂ, ᓘᑎ ᐸᓪᓗᖅ ᑭᒡᒐᖅᑐᐃᕙᓚᐅᖅᑐᖅ ᖁᑦᑎᑦᑑᑉ ᓄᓇᓕᖏᓐᓂᑦ ᐊᒻᒪᓗ ᓄᓇᕗᒥᒃ ᓴᖅᑮᒐᓱᐊᖅᑐᓄᑦ ᐱᒋᐊᖅᑎᑦᑎᖃᑕᐅᓪᓚᕆᑦᑐᒥᓂᐅᓪᓗᓂ.
ᓘᑎ ᐸᓪᓗᖅ, ᒥᑦᑎᒪᑕᓕᐅᑉ ᖃᓂᒋᔭᖓᓃᓐᖔᖅᑐᒥᓂᖅ, ᐊᒻᒪᓗ ᐃᓅᓯᓕᒫᐸᓗᖓ ᐊᑐᖅᑕᒥᓂᕆᓪᓗᓂᐅᒃ ᖃᐅᓱᐃᑦᑑᑉ ᓄᓇᖓᓂ ᑕᑉᐸᐅᖓ ᐊᐅᓪᓛᖅᑎᑕᐅᓚᐅᖅᑐᓂ 1950−ᖏᓐᓂ. ᐊᕙᑎᓂᒃ (20) ᐊᕐᕌᒍᓂᒃ ᒪᓕᒐᓕᐅᖅᑎᐅᓂᕐᒥᒃ ᐱᓕᕆᐊᖃᓚᐅᖅᑐᓂ, ᓘᑎ ᐸᓪᓗᖅ ᒪᐃᔭᖑᖃᑦᑕᓕᔪᒻᒥᔪᖅ ᖃᐅᓱᐃᑦᑐᒥ ᐊᒻᒪᓗ ᐃᓚᒋᔭᐅᓪᓗᓂ ᐊᒥᓱᑲᓪᓚᓐᓄᑦ ᓄᓇᓕᓐᓂ ᑎᒥᐅᔪᓄᑦ. ᐃᓕᑕᕆᔭᐅᔾᔪᑎᑖᓚᐅᖅᑐᖅ ᓄᓇᕗᒥ ᐱᓕᕆᑦᑎᐊᖅᓯᒪᔪᓄᑦ ᐃᓕᑕᕆᔭᐅᔾᔪᑎᒥᒃ 2018-ᖑᑎᓪᓗᒍ.
”ᐅᖃᖅᑎ ᓛᐳᑎ ᐅᖃᖅᑐᖅ, "ᐅᕙᓂ ᒪᓕᒐᓕᐅᖅᕕᑎᓐᓂ ᒪᓕᒐᓕᐅᖅᑏᑦ ᐅᖃᕈᑎᓗᒋᑦ, ᑭᒃᓵᑐᒻᒪᕆᐅᓪᓗᑕ ᓇᓪᓕᒍᓱᓐᓂᕋᖅᐳᒍᑦ ᐱᖃᑎᒋᓚᐅᖅᑕᖏᓐᓂᑦ, ᐃᓚᖏᓐᓂᑦ ᐊᒻᒪᓗ ᓇᓪᓕᒋᔭᖏᓐᓂᑦ ᓘᑎ ᐸᓪᓘᑉ. ᑖᓐᓇᐃᓛᒃ ᓘᑎ ᐸᓪᓗᖅ ᐊᖏᖅᓯᒪᓂᖃᑦᑎᐊᓪᓚᕆᑦᑐᓂ ᐅᖃᖅᑎᐅᕙᓚᐅᕐᒪᑦ ᐅᑭᐅᖅᑕᖅᑐᒧᑦ, ᓴᓐᖏᔪᐊᓘᓪᓗᓂᓗ ᓯᓚᐅᑉ ᐊᓯᔾᔨᐸᓪᓕᐊᓂᖓᓂᒃ ᓱᒋᐊᖅᑕᐅᖁᔨᕙᓚᐅᖅᑐᖅ, ᐊᒻᒪᓗ ᐊᖏᔪᐊᓗᒻᒥᒃ ᐃᓕᐅᖅᑲᐃᖃᑕᐅᓯᒪᓪᓗᓂ ᓄᓇᕗᑦ ᓴᖅᑭᖅᑕᐅᒐᓱᑦᑎᓪᓗᒍ."
ᐅᖃᖅᑎ ᒥᑭᓐᖑᐊᖅ ᐅᖃᖅᑐᖅ, "ᓘᑎ ᐸᓪᓗᖅ ᐃᓕᑕᕆᔭᐅᔾᔪᑎᑖᔪᒻᒪᑦ ᓄᓇᕗᒥ ᐱᓕᕆᑦᑎᐊᖅᓯᒪᓂᖓᓄᑦ ᐊᕐᕌᓂ ᐃᓕᑕᕆᔭᐅᓪᓗᓂ ᐃᓅᓯᓕᒫᖅ ᑭᒃᑯᓕᒫᓂᑦ ᐱᔨᑦᑎᕋᖅᒪᓂᕆᔭᖓᓄᑦ. ᒪᓕᒐᓕᐅᖅᑎᐅᖃᑎᒃᑲᓗ ᑭᒃᓵᖃᑎᖃᖅᐳᑦ ᐃᓚᖏᓐᓂᑦ, ᐱᖃᓐᓇᕆᔭᖏᓐᓂᑦ ᐊᒻᒪᓗ ᒪᓕᒐᓕᐅᖅᑎᐅᖃᑎᒥᓂᖏᑦ ᐃᓅᔪᓐᓃᕐᓂᖓᓂᒃ."
ᓴᐃᒻᒪᑏᑦ ᐊᑉᐸᕆᐊᖅᑎᑕᐅᓯᒪᓛᖅᑐᑦ ᓄᓇᑦᓯᐊᑉ ᒪᓕᒐᓕᐅᖅᕕᖓᓂ ᔭᓗᓇᐃᒥ ᐅᓪᓗᖓᓂ ᓘᑎ ᐸᓪᓗᖅ ᐃᖅᑲᐅᒪᔭᐅᓗᓂ ᑐᒃᓯᐅᔾᔭᐅᓕᖅᑲᑦ.
-30-
ᑐᑭᓯᒋᐊᕈᒪᒍᒃᓯ:
ᑎᒻ ᒨᓱ, ᑎᑎᕋᖅᓯ ᓄᓇᑦᓯᐊᑉ ᒪᓕᒐᓕᐅᖅᕕᖓᓂ - (867) 767-9130
ᔮᓐ ᑯᕘᒃ, ᑎᑎᕋᖅᑎ ᓄᓇᕗᑦ ᒪᓕᒐᓕᐅᖅᕕᖓᓂ - (867) 975-5000
| Attachment | Size |
|---|---|
| ᓄᓇᑦᓯᐊᕐᒥ ᓄᓇᕗᒥᓗ ᒪᓕᒐᓕᐅᖅᕕᖏᑕ ᐅᖃᖅᑎᖏᒃ ᑭᒃᓵᒍᑎᖃᖅᐳᒃ ᐃᓅᔪᓐᓃᕐᓂᖓᓂᒃ ᒪᓕᒐᓕᐅᖅᑎᐅᓚᐅᖅᓯᒪᔪᖅ ᓘᑎ ᐸᓪᓗᖅ | 116.19 KB |