ᐃᖃᓗᐃᑦ, ᓄᓇᕗᑦ (ᓄᕕᐱᕆ 15, 2013) - ᓄᓇᕗᑦ ᐅᖃᖅᑎᖁᑎᖓᑦ, ᓯᕗᓕᖅᑎᒃᓴᖓ ᐊᒻᒪ ᐊᐅᓚᑦᑎᔨᑦ ᑲᑎᒪᔨᒃᓴᖏᑦ ᐅᓪᓗᒥ ᓂᕈᐊᖅᑕᐅᖃᐅᕗᑦ ᓄᓇᕗᒥ ᓯᕗᓕᖅᑎᓂᒃ ᑲᑎᒪᕐᔪᑎᖃᖅᑎᓪᓗᒋᑦ. ᑲᑎᒪᑎᓪᓗᒋᑦ ᐃᓘᓐᓇᖏᑦ ᒪᓕᒐᓕᐅᖅᑎᑦ ᑲᑎᒪᔨᖏᑦ.
ᔪᐊᔾ ᖁᓚᐅᑦ, ᒪᓕᒐᓕᐅᖅᑎ ᐊᒥᑦᑐᕐᒧᑦ, ᐃᓄᑖᓪᓗᓂ ᓂᕈᐊᒐᒃᓴᐅᒐᒥ ᐅᖃᖅᑎᐅᑉ ᐃᓂᖓᓄᑦ ᐃᓕᔭᐅᑦᓴᐅᑎᒋᖅᑲᐅᔪᖅ.
ᐲᑕ ᑕᑉᑑᓇ ᒪᓕᒐᓕᐅᖅᑎᖓᑦ ᖁᕐᓗᖅᑐᕐᒧᑦ, ᓂᕈᕋᖅᑕᐅᖅᑕᐅᔪᖅ ᓯᕗᓕᖅᑎᐅᑉ ᐃᓂᖓᓄᑦ.
ᐃᖃᓗᐃᑦ, ᓄᓇᕗᑦ (ᓄᕕᐱᕆ 8, 2013) - ᒪᓕᒐᓕᐅᖅᑏᑦ ᑲᑎᒪᔨᖏᑦ ᐅᓪᓗᒥ ᓇᓗᓇᐃᖅᓯᖅᑲᐅᕗᑦ ᑐᓴᖅᑎᑦᑎᓪᓗᑎᒃ ᐅᓪᓗᖓᓂᒃ ᐊᒻᒪ ᐋᖅᑭᒡᓱᖅᓯᒪᓂᕆᓂᐊᖅᑕᖓᓂᒃ 2013-ᒥ ᓯᕗᓕᖅᑎᒃᓴᓂᒃ ᓂᕈᐊᓕᖅᐸᑕ. ᓯᕗᓕᖅᑎᒃᓴᓂᒃ ᓂᕈᐊᓕᖅᐸᑕ ᐃᓘᓐᓇᖏᑦ ᒪᓕᒐᓕᐅᖅᑎᑦ ᐃᓚᐅᖃᑦᑕᖅᐳᑦ.
ᑕᒪᓐᓇ ᑲᑎᒪᓂᖅ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᖓᓐᓃᓐᓂᐊᖅᑐᖅ, ᐱᒋᐊᕐᓗᓂ 10-ᒥ ᐅᓪᓛᒃᑯᑦ ᑕᓪᓕᒥᕐᒥ, ᓄᕕᐱᕆ 15, 2013. ᑕᖅᑲᒃᑯᐊ ᑕᑯᓐᓇᕆᐊᕈᒪᔪᑦ ᑐᓐᖓᓱᒃᑎᑕᐅᑦᑎᐊᖅᑐᑦ. ᑕᒪᓐᓇ ᑲᑎᒪᓂᖅ ᓄᓇᕗᓕᒫᒥ ᑕᓚᕖᓴᒃᑯᑦ ᑕᑯᒃᓴᐅᓂᐊᖅᑐᖅ ᐊᖅᑯᑕᐅᓗᓂ ᒪᓕᒐᓕᐅᕐᕕᐅᑉ ᑕᓚᕖᓴᒃᑰᖅᑎᑦᑎᕝᕕᖏᑦ.
ᐸᐃᑉᐹᑎᒍᑦ ᓂᕈᐊᖃᑦᑕᕐᓗᑎᒃ ᓂᕈᐊᕐᓂᐊᖅᑐᑦ ᐅᖃᖅᑎᒥᒃ, ᓯᕗᓕᖅᑎᒥᒃ ᐊᒻᒪ ᒥᓂᔅᑕᐃᑦ ᑲᑎᒪᔨᖏᓐᓄᑦ ᐃᒃᓯᕚᕐᓂᐊᖅᑐᓂᒃ. ᓯᕗᓪᓕᖅᐹᒥᒃ ᑲᑎᒪᔾᔪᑕᐅᓂᐊᖅᑐᖅ ᐅᖃᖅᑎᒥᒃ ᓂᕈᐊᕐᓂᖅ. ᐅᖃᖅᑎ ᓂᕈᐊᖅᑕᐅᓵᖅᑐᖅ ᐃᓕᑐᐊᕈᓂ ᑲᑎᒪᓂᕐᒧᑦ ᑐᑭᒧᐊᒃᑎᒋᔭᐅᓕᕐᓂᐊᖅᑐᖅ.
ᐃᖃᓗᐃᑦ, ᓄᓇᕗᑦ (ᓯᑎᐱᕆ 10, 2013) - ᐅᖃᖅᑎᑦᑎᔨ ᒪᓕᒐᓕᐅᖅᑎᑦ ᑲᑎᒪᔨᖏᓐᓄᑦ ᐊᒻᒪ ᐃᒃᓯᕙᐅᑕᖅ ᐃᓕᓴᖅᓯᓂᕐᒧᑦ ᓄᓇᕗᒥ ᐅᖃᐅᔾᔨᒋᐊᖅᑎᑦ ᑲᑎᒪᔨᖏᓐᓄᑦ ᕼᐊᓐᑐ ᑐᑐ ᐅᓪᓗᒥ ᑐᓴᖅᑎᑦᑎᖅᑲᐅᔪᖅ ᐅᑯᐊ ᔨᒥ ᐊᑲᕙᒃ, ᓗᐃ ᐊᖓᓕᒃ, ᐊᖓᔪᒃᓯᖅ ᐊᒻᒪ ᑕᐃᕕᑎ ᐊᕐᓇᒃᑲᖅ ᐃᓕᓴᕆᔭᐅᖃᑕᐅᓂᐊᕐᓂᖏᓐᓂᒃ ᓄᓇᕗᒥ ᐃᓕᓴᖅᓯᔾᔪᑎᑦ ᐊᑐᕐᓗᒋᑦ ᖁᕕᐊᓱᒍᑎᖃᕐᓂᐊᖅᑐᑦ ᑎᓴᒻᒥᕐᒥ, ᓯᑎᐱᕆ 12, 2013−ᖑᓕᖅᐸᑦ, ᐅᓐᓄᓴᒃᑯᑦ 5:00 ᒪᓕᒐᓕᐅᖅᑎᑦ ᑲᑎᒪᕐᔪᐊᕐᕕᐊᓂ.
ᐃᓕᓴᖅᓂᕐᒧᑦ ᖁᕕᐊᓱᒍᑎᖃᕐᓂᖅ ᒪᑐᐃᖓᓂᐊᖅᑐᖅ ᑭᓇᒃᑯᑐᐃᓐᓇᑦᓯᐊᓄᑦ ᑕᑯᔭᖅᑐᕈᒪᔪᓄᑦ ᐊᒻᒪ ᑕᑯᒃᓴᐅᑎᑕᐅᓂᐊᖅᑐᖅ ᑕᓚᕖᓴᒃᑯᑦ ᐃᕐᖐᓐᓇᖅ ᑕᑯᒃᓴᐅᓗᓂ ᓄᓇᕗᓕᒫᒥ ᒪᓕᒐᓕᐅᖅᑎᑦ ᑲᑎᒪᔨᖏᑕ ᑲᑎᒪᕐᔪᐊᖅᑎᓪᓗᒋᑦ ᑕᑯᒃᓴᐅᕝᕕᐊᒍᑦ.
ᐃᖃᓗᐃᑦ, ᓄᓇᕗᑦ (ᓯᑎᐱᕆ 9, 2013) - ᐅᓪᓗᒥ ᒪᓕᒐᓕᐅᖅᑏᑦ ᐱᖁᔨᕗᖔᕐᒥᒃ ᐊᓂᒍᐃᓚᐅᖅᐳᑦ ᐊᑐᓕᖁᔭᓕᐅᖅᓯᒪᔪᒥᒃ ᑖᓐᓇ ᑕᑦ ᕆᓵᑦ ᑎᒃᑯᐊᖅᑕᐅᖁᓪᓗᒍ ᓄᓇᕗᒻᒥ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᓂᐊᓄᑦ. ᑖᓐᓇ ᐱᖁᔨᕗᖔᕈᑦ ᐃᓘᓐᓇᖏᓐᓄᑦ ᒪᓕᒐᓕᐅᖅᑎᓄᑦ ᐊᖏᖅᑕᐅᓚᐅᖅᑐᖅ.
ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᐅᖃᖅᓯᒪᔪᖅ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᓂᐊᓃᑦᑐᑦ ᐃᓕᓯᒪᔪᓐᓇᖅᑎᑕᐅᓪᓗᑎᒃ ᑕᓪᓕᒪᓄᑦ ᐊᕐᕌᒍᓄᑦ. ᒫᓐᓇ ᓱᓕᑦᑎᐊᕐᓂᕐᒧᑦ ᑲᒥᓴᓇᕆᔭᐅᔫᑉ ᑎᒃᑯᐊᖅᑕᐅᓯᒪᓂᖓ ᐃᓱᓕᓐᓂᐊᖅᑐᖅ ᓯᑎᐱᕆ 9, 2013-ᒥ. ᒥᔅᑐ ᕆᓵᑉ ᑎᒃᑯᐊᖅᑕᐅᓂᖓ ᐊᑐᓯᒋᐊᕐᓂᐊᖅᑐᖅ ᓯᑎᐱᕆ 10, 2013-ᒥ.
ᑕᒪᑐᒪᓂ ᐊᕐᕌᒍᒥ ᔫᓂᐅᑎᓪᓗᒍ, ᒪᓕᒐᓕᐅᕐᕕᐅᑉ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑦ ᑕᖅᑲᒃᑯᓂᖓ ᑐᓐᖓᓵᕆᓚᐅᖅᑐᑦ ᐆᒃᑐᕈᒪᔪᓂᒃ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᓂᖓᓄᑦ.
ᐃᖃᓗᐃᑦ, ᓄᓇᕗᑦ ᐊᒻᒪ ᔭᓗᓇᐃᕝ, ᓄᓇᑦᓯᐊᖅ (ᐋᒡᒌᓯ 8, 2013) ᐅᖃᖅᑎᑦ ᕼᐊᓐᑐ ᑐᑐ ᐊᒻᒪ ᔭᑭ ᔭᐃᑯᑉᓴᓐ ᐅᓪᓗᒥ ᑐᓐᖓᓱᒃᑎᑦᓯᖅᑲᐅᔪᑦ ᑲᓇᑕᒥ ᓈᓚᐅᓯᕆᔨᑦ ᐊᒻᒪ ᑕᓚᕖᓴᓕᕆᓕᔨᑦ ᐊᒻᒪ ᑐᓴᐅᒪᔾᔪᓯᕆᔨᑦ ᑲᑎᒪᔨᖏᓐᓂᒃ ᑎᓕᔭᐅᓯᒪᔾᔪᑎᖃᓕᕐᒪᑕ ᑐᓴᖅᓴᐅᑎᑦᓯᓂᕐᒧᑦ ᑕᑯᒃᓴᐅᑎᑦᓯᓂᕐᒧᓪᓗ ᒪᓕᒐᓕᐅᖅᑎᑦ ᑲᑎᒪᕐᔪᐊᖅᑎᓪᓗᒋᑦ ᐊᖏᕐᕋᕆᔭᐅᔪᓂ ᑕᑯᒃᓴᐅᔪᓐᓇᖅᓯᓗᑎᒃ ᖁᒻᒧᐊᒃᑎᑕᐅᓯᒪᔪᒃᑯᑦ ᐱᔨᑦᓯᖅᑐᓄᑦ ᓄᓇᕗᒥ ᐊᒻᒪ ᓄᓇᑦᓯᐊᕐᒥ.
ᐃᓱᒪᓕᐅᕈᑎᒋᓯᒪᔭᖓᑦ ᐅᓪᓗᒥ, ᑐᓴᐅᒪᔾᔪᑎᓕᕆᔨᑦ ᑲᑎᒪᔨᖏᑦ ᑐᓴᖅᑎᑦᑎᖅᑲᐅᔪᑦ ᐃᒪᓐᓇ, "ᐅᑭᐅᖅᑕᖅᑐᕐᒥᐅᑦ ᐱᔨᑦᓯᖅᑕᐅᑦᑎᐊᕐᓂᖅᓴᐅᓂᐊᓕᖅᐳᑦ ᑐᓵᖃᑦᑕᕐᓗᑎᒃ ᑕᐅᑐᖃᑦᑕᕐᓗᑎᒡᓗ ᑲᑎᒪᕐᔪᐊᖅᑎᓪᓗᒋᑦ ᒪᓕᒐᓗᓕᐅᖅᑎᑦ ᓄᓇᕗᒥ ᐊᒻᒪ ᓄᓇᑦᑎᐊᕐᒥ ᑕᒪᒃᑯᓄᖓ ᐱᔨᑦᓯᕈᑎᐅᔪᑦ ᐃᓕᔭᐅᓂᐊᖅᑐᑦ ᖁᒻᒧᐊᒃᑎᑕᐅᓯᒪᔪᒃᑯᑦ ᑕᓚᕖᓴᖃᑦᑕᖅᑐᓄᑦ ᒪᕐᕉᖕᓂ ᐅᑭᐅᖅᑕᖅᑐᕐᒥᐅᑦ ᓄᓇᖏᓐᓂ."
ᐃᖃᓗᐃᑦ, ᓄᓇᕗᑦ (ᔫᓂ 18, 2013) - ᒪᓕᒐᓕᐅᕐᕕᖕᒧᑦ ᐅᖃᖅᑎ ᐊᒻᒪ ᓄᓇᕗᒻᒥ ᖃᐅᔨᒪᔨᑕᕆᔭᑦ ᑲᑎᒪᔨᖏᓐᓄᑦ ᐃᒃᓯᕙᐅᑕᖅ ᕼᐊᓐᑐ ᑐᑐ ᐅᓪᓗᒥ ᓇᓗᓇᐃᖅᓯᕗᑦ ᑭᒃᑯᑦ 2013-ᒥ ᐅᔭᒥᒃᑕᐅᓂᐊᕐᒪᖔᖏᑦ ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᒻᒥᒃ.
ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᒻᒥᒃ ᐅᔭᒥᒃᑕᐅᓂᐊᖅᑐᑦ ᔨᒥ ᐋᑲᕚᒃ, ᓗᐃ ᐊᖓᓚᒃ ᐊᖓᔪᒃᖠᖅ ᐊᒻᒪ ᑕᐃᕕᑎ ᐊᕐᓇᒃᑲᖅ.
ᔭᓄᐊᕆ 1, 2010-ᖑᑎᓪᓗᒍ, ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᑎᐅᑉ ᐱᖁᔭᕐᔪᐊᖓ ᐊᑐᓯᒋᐊᓚᐅᖅᓯᒪᔪᖅ. ᐃᓕᓴᕆᔭᐅᔾᔪᑎ ᓴᖅᑭᑕᐅᓚᐅᖅᓯᒪᔪᖅ ᑕᐃᒃᑯᐊ ᐃᓄᐃᑦ ᐱᖅᑯᓯᓕᕆᓂᒃᑯᑦ, ᐃᓅᓯᒃᑯᑦ ᐅᕝᕙᓘᓐᓃᑦ ᑮᓇᐅᔭᓕᐅᕋᓱᐊᕐᓂᒃᑯᑦ ᓄᓇᕗᒻᒥ ᐱᓕᕆᑦᑎᐊᕐᓂᑯᕕᓃᑦ ᐃᓕᓴᕆᔭᐅᔪᓐᓇᕐᓂᐊᕐᒪᑕ. ᑖᓐᓇ ᐃᓕᓴᕆᔭᐅᔾᔪᑦ ᓄᓇᕗᒻᒥ ᖁᑦᑎᖕᓂᖅᐹᖑᔪᖅ ᐊᒻᒪᓗ ᐃᓇᖐᓂᐊᖅᖢᓂ ᐊᓯᓕᒫᖏᓐᓂᒃ ᐃᓕᓴᕆᔭᐅᔾᔪᑎᓂᒃ, ᓇᓗᓇᐃᒃᑯᑕᓂᒃ ᐅᕝᕙᓘᓐᓃᑦ ᐅᔭᒥᖕᓂᒃ ᓴᖅᑭᑕᐅᓯᒪᔪᕕᓂᐅᒐᓗᐊᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ.
ᐃᖃᓗᐃᑦ, ᓄᓇᕗᑦ (ᕕᕗᐊᕆ 26, 2013) - ᖁᑦᑎᒃᑐᕐᒧᑦ ᒪᓕᒐᓕᐅᖅᑎ ᕌᓐ ᐃᓕᐊᑦ ᐅᓪᓗᒥ ᓴᖅᑭᑦᑎᕗᖅ ᐱᖁᔭᒃᓴᖅ 46-ᒥᒃ, ᓂᕿᓂᒃ ᑐᓐᓂᖅᑯᑎᖃᕐᓂᕐᒧᑦ ᐱᖁᔭᕐᔪᐊᕐᒥᒃ.
“ᓂᕿᓂᒃ ᑐᓐᓂᖅᑯᑎᖃᕐᓂᕐᒧᑦ ᐱᖁᔭᕐᔪᐊᒃᓴᖅ ᐃᓄᖕᓂᒃ ᓂᕿᓂᒃ ᑐᓐᓂᖅᑯᑎᖃᖃᑦᑕᖅᑐᓂᒃ ᑐᓂᐅᖅᑲᐃᖃᑦᑕᖅᑐᓂᒡᓘᓐᓃᑦ ᐃᖅᑲᖅᑐᒐᒃᓴᐅᑎᑕᐅᔪᓐᓇᓐᖏᓚᖅ ᐋᓐᓂᐊᑖᕐᓂᕐᒧᑦ, ᐋᓐᓂᐊᑖᕐᓂᕐᒧᑦ, ᐋᓐᓂᕐᓂᕐᒧᑦ, ᐃᓅᔪᓐᓃᕐᓂᕐᒧᑦ ᐅᕝᕙᓘᓐᓃᑦ ᐊᓯᐊᒍᖔᖅ ᖃᓄᐃᓕᓂᕐᓗᖕᓂᕐᒧᑦ ᓂᕆᔪᕕᓂᐅᑎᓪᓗᒍ, ᑭᓯᐊᓂ ᑖᓐᓇ ᓂᕿᓂᒃ ᑐᓐᓂᖅᑯᑎᓕᒃ ᐱᔮᕆᓗᓂ ᑲᒪᑦᑎᐊᓐᖏᓗᐊᕐᓗᓂᓘᓐᓃᑦ ᑐᓐᓂᖅᑯᑎᖃᕐᓂᖅᐸᑦ ᑐᓂᐅᖅᑲᐃᓐᓂᖅᐸᓪᓘᓐᓃᑦ ᓂᕿᓂᒃ. ᐊᔾᔨᐸᓗᖏᑦ ᒪᓕᒐᑦ ᐊᑐᕐᒥᔪᑦ ᑲᑎᒪᔨᓄᑦ, ᑲᒪᔨᓄᑦ, ᑭᒡᒐᖅᑐᐃᔨᓄᑦ, ᐃᖅᑲᓇᐃᔭᖅᑎᓄᑦ ᐊᑭᓕᖅᓱᖅᑕᐅᓐᖏᑦᑐᓂᓪᓗ ᓂᕿᓂᒃ ᑐᓐᓂᖅᑯᑎᖃᖃᖅᑕᖅᑐᓄᑦ ᑐᓂᐅᖅᑲᐃᖃᑦᑕᖅᑐᓄᓪᓘᓐᓃᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᔅᑐ ᐃᓕᐊᑦ.
ᐊᓯᓕᒫᖏᑦ ᑲᓇᑕᒥ ᐊᕕᒃᑐᖅᓯᒪᔪᑦ ᐅᑭᐅᖅᑕᖅᑐᒥᓗ ᒐᕙᒪᖃᕐᕖᑦ ᐊᔾᔨᐸᓗᖏᓐᓂᒃ ᐱᖁᔭᕐᔪᐊᖃᖅᑐᑦ.