ᑲᑎᒪᔨᕋᓛᑦ ᑐᓴᖅᑕᐅᑎᑦᑎᕗᑦ ᖃᖓᒃᑰᓛᕐᒪᖔᑕ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᖅᑎᑦᑎᓂᐅᓛᖅᑐᑦ

ᐃᖃᓗᐃᑦ, ᓄᓇᕗᑦ (ᓯᑎᐱᕆ 3, 2026) – ᒪᓕᒐᓕᐅᖅᕕᐅᑉ ᑲᑎᒪᔨᕋᓛᖁᑎᒋᔭᖏᑦ ᓇᐅᑦᓯᖅᑐᖅᑎᐅᔪᑦ ᒐᕙᒪᒃᑯᑦ ᐊᐅᓚᓂᖏᓐᓂᑦ ᑮᓇᐅᔭᓕᕆᔾᔪᑎᖏᓐᓂᓪᓗ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᖅᑎᑦᑎᓛᕐᒪᑕ ᐱᒋᐊᕐᓗᑎᒃ ᓯᑎᐱᕆ 23, 2026−ᒥ ᐃᓱᓕᓪᓗᑎᒃ ᐊᒃᑑᕝᕙ 1 2026-ᒥ, ᐱᔾᔪᑎᖃᖅᑐᓂᒃ ᒫᓐᓇᓕᓴᐅᓛᖑᔪᓂᑦ ᒐᕙᒪᒃᑯᑦ ᑮᓇᐅᔭᓕᕆᔾᔪᑎᒥᓂᖏᓐᓂᑦ ᐊᒻᒪᓗ ᐊᕐᕌᒍᑕᒫᖅᓯᐅᑎᓂᒃ ᐅᓂᒃᑳᓕᐊᒥᓂᖏᓐᓂᑦ ᐃᒻᒥᒃᑯᑦ ᐱᓕᕆᔨᐅᔪᑦ ᒪᓕᒐᓕᐅᖅᕕᒻᒧᑦ, ᐱᖃᓯᐅᔾᔭᐅᓗᑎᒃ ᑐᑭᓯᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᔫᑉ, ᐅᖃᐅᓯᕐᓄᑦ ᑲᒥᓴᓇᐅᔫᑉ ᐊᒻᒪᓗ ᑭᒡᒐᖅᑐᐃᔨᐅᔫᑉ ᓱᕈᓯᕐᓄᑦ ᒪᒃᑯᑦᑐᓄᓪᓗ.

ᐊᖏᔪᖅᑳᒡᒍᑏᑦ ᓄᓇᕗᑦ ᒐᕙᒪᖓᓃᓐᖔᖅᑐᑦ ᑭᐅᖃᑦᑕᕆᐊᖅᑐᖅᓯᒪᓗᑎᒃ ᓴᖅᑭᔮᓛᕐᒥᔪᑦ ᑕᓚᕖᓴᒃᑯᑦ ᓈᓚᓐᓂᖃᖅᑎᑦᑎᓕᖅᐸᑕ.

“ᑕᓚᕖᓴᒃᑰᕐᓗᑕ ᓈᓚᓐᓂᖃᖅᑎᑦᑎᓂᕆᔭᕗᑦ ᐱᕕᖃᖅᑎᑦᑎᓛᖅᑐᑦ ᒪᓕᒐᓕᐅᖅᑎᐅᔪᓂᑦ ᒪᓕᒐᓕᐅᖅᕕᒻᒥ ᐃᓱᒪᒃᓴᖅᓯᐅᕈᑎᖃᕈᓐᓇᓂᕐᒥᑦ ᖃᓄᑎᒋ ᓄᓇᕗᑦ ᒐᕙᒪᖓ ᐱᓕᕆᒋᐊᖅᓯᒪᒻᒪᖔᖅ ᑲᒪᒋᔭᖃᕋᓱᐊᕐᓗᓂ ᐊᑐᓕᖁᔭᓕᐊᖑᓯᒪᔪᓂᑦ ᐊᓪᓚᕝᕕᖓᓄᑦ ᑲᓇᑕᐅᑉ ᑕᒻᒪᖅᓯᒪᔪᖅᓯᐅᖅᑎᖓᑕ, ᐊᓯᖏᑕ ᐃᒻᒥᒃᑯᑦ ᐱᓕᕆᔨᐅᔪᑦ ᒪᓕᒐᓕᐅᖅᕕᒻᒧᑦ ᐊᒻᒪᓗ ᑲᑎᒪᔨᕋᓛᓄᑦ ᑖᒃᑯᓄᖓ ᐊᑐᓕᖁᔭᓕᐊᖑᓯᒪᔪᓂᑦ,” ᐅᖃᖅᑐᖅ ᑲᑎᒪᔨᕋᓛᑦ ᐃᒃᓯᕙᐅᑕᕆᔭᖓ ᐳᕆᐊᑦ ᐲᑐᓴᑦ, ᒪᓕᒐᓕᐅᖅᑎᐅᔪᖅ ᒪᓕᒐᓕᐅᖅᕕᒻᒥ ᐃᖃᓗᑦᑑᑎᐊᕐᒧᑦ.

ᑲᑎᒪᔨᕋᓛᑦ ᓈᓚᓐᓂᖃᖅᑎᑦᑎᓂᕆᔭᖏᑦ ᐱᒋᐊᓛᖅᑐᑦ 1:30−ᒥ ᐅᓐᓄᓴᒃᑯᑦ ᑲᑎᒪᕐᔪᐊᖅᕕᖓᓂ ᒪᓕᒐᓕᐅᖅᕕᐅᑉ ᐱᖓᑦᑎᐅᓕᖅᑲᑦ, ᓯᑎᐱᕆ 23, 2026. ᑖᒃᑯᐊ ᓈᓚᓐᓂᖃᖅᑎᑦᑎᔪᑦ ᑕᓚᕖᓴᒃᑰᓛᖅᑐᑦ ᓄᓇᓕᓐᓂ ᑲᓱᖅᓯᒪᔪᓂ ᑕᓚᕖᓴᒃᑰᕈᑎᓕᓐᓂ ᐊᒻᒪᓗ ᐊᖏᕐᕋᒥ ᖃᖓᑦᑕᖅᑎᑕᐅᓯᒪᔪᒃᑯᑦ ᑕᓚᕖᓴᓕᓐᓂ ᕕᐊᓪᑯᑎᒍᑦ (ᓴᖅᑭᕈᑎᖓ 513) ᐊᒻᒪᓗ ᓵᒃᑯᑎᒍᑦ (ᓴᖅᑭᕈᑎᖓ 181). 

ᓈᓚᓐᓂᖃᖅᑎᑦᑎᔪᑦ ᖃᕋᓴᐅᔭᒃᑯᑦ ᑕᑯᒃᓴᐅᑦᑕᐅᑎᒋᓛᕐᒥᔪᑦ ᐅᕙᓂ: https://assembly.nu.ca/webcasts.

ᐃᖃᓗᒻᒥᐅᑕᐃᑦ ᓈᓚᒍᓐᓇᓛᕐᒥᔪᑦ ᓈᓚᐅᑎᒃᑯᑦ ᑐᓴᖅᓴᐅᑦᑕᐅᑎᒋᔪᓂᑦ ᓈᓚᓐᓂᖃᖅᑎᑦᑎᓕᖅᑲᑕ ᐅᕘᓇ: ᓇᑎᖅ: 92.5 / ᐃᓄᒃᑎᑐᑦ: 94.7 / ᖃᓪᓗᓈᑎᑐᑦ 102.1.

-30-

ᐅᕗᖓ ᑐᑭᓯᒋᐊᖅᕕᒃᓴᖅ:
LegInfo@assembly.nu.ca