ᐃᖃᓗᐃᑦ, ᓄᓇᕗᑦ (ᔫᓂ 18, 2013) - ᒪᓕᒐᓕᐅᕐᕕᖕᒧᑦ ᐅᖃᖅᑎ ᐊᒻᒪ ᓄᓇᕗᒻᒥ ᖃᐅᔨᒪᔨᑕᕆᔭᑦ ᑲᑎᒪᔨᖏᓐᓄᑦ ᐃᒃᓯᕙᐅᑕᖅ ᕼᐊᓐᑐ ᑐᑐ ᐅᓪᓗᒥ ᓇᓗᓇᐃᖅᓯᕗᑦ ᑭᒃᑯᑦ 2013-ᒥ ᐅᔭᒥᒃᑕᐅᓂᐊᕐᒪᖔᖏᑦ ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᒻᒥᒃ.
ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᒻᒥᒃ ᐅᔭᒥᒃᑕᐅᓂᐊᖅᑐᑦ ᔨᒥ ᐋᑲᕚᒃ, ᓗᐃ ᐊᖓᓚᒃ ᐊᖓᔪᒃᖠᖅ ᐊᒻᒪ ᑕᐃᕕᑎ ᐊᕐᓇᒃᑲᖅ.
ᔭᓄᐊᕆ 1, 2010-ᖑᑎᓪᓗᒍ, ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᑎᐅᑉ ᐱᖁᔭᕐᔪᐊᖓ ᐊᑐᓯᒋᐊᓚᐅᖅᓯᒪᔪᖅ. ᐃᓕᓴᕆᔭᐅᔾᔪᑎ ᓴᖅᑭᑕᐅᓚᐅᖅᓯᒪᔪᖅ ᑕᐃᒃᑯᐊ ᐃᓄᐃᑦ ᐱᖅᑯᓯᓕᕆᓂᒃᑯᑦ, ᐃᓅᓯᒃᑯᑦ ᐅᕝᕙᓘᓐᓃᑦ ᑮᓇᐅᔭᓕᐅᕋᓱᐊᕐᓂᒃᑯᑦ ᓄᓇᕗᒻᒥ ᐱᓕᕆᑦᑎᐊᕐᓂᑯᕕᓃᑦ ᐃᓕᓴᕆᔭᐅᔪᓐᓇᕐᓂᐊᕐᒪᑕ. ᑖᓐᓇ ᐃᓕᓴᕆᔭᐅᔾᔪᑦ ᓄᓇᕗᒻᒥ ᖁᑦᑎᖕᓂᖅᐹᖑᔪᖅ ᐊᒻᒪᓗ ᐃᓇᖐᓂᐊᖅᖢᓂ ᐊᓯᓕᒫᖏᓐᓂᒃ ᐃᓕᓴᕆᔭᐅᔾᔪᑎᓂᒃ, ᓇᓗᓇᐃᒃᑯᑕᓂᒃ ᐅᕝᕙᓘᓐᓃᑦ ᐅᔭᒥᖕᓂᒃ ᓴᖅᑭᑕᐅᓯᒪᔪᕕᓂᐅᒐᓗᐊᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ.
ᔨᒥ ᐋᑲᕚᒃ ᐃᖃᓗᖕᒥᐅᑕᖅ ᐊᒻᒪ ᐸᓖᓯᐅᓚᐅᖅᓯᒪᓪᓗᓂ ᑕᒫᓂ ᐊᕐᕌᒍᑦ 30-ᓂ ᐊᔾᔨᒌᓐᖏᑦᑐᓂ ᓄᓇᕗᑦ ᓄᓇᓕᖏᓐᓂ ᓄᖅᑲᕕᓚᐅᓐᖏᓐᓂᕐᒥᓂ 2012-ᒥ. ᔨᒥ ᐋᑲᕚᒃ ᐊᑕᐅᓯᐊᕐᓇᓂ ᐃᓕᓴᕆᔭᐅᖃᑦᑕᖅᓯᒪᔪᖅ ᓄᓇᓕᖕᓂ ᐸᓖᓯᐅᓂᕐᒥ ᐊᑐᖅᑕᐅᓚᐅᖅᓯᒪᓐᖏᑦᑐᓂᒃ ᐱᒋᐊᖅᑎᑦᑎᖃᑦᑕᖅᓯᒪᓂᖓᓄᑦ, ᐱᕋᔭᒃᑕᕕᓂᕐᓂᒃ ᐃᑲᔪᖃᑦᑕᕐᓂᖓᓄᑦ ᐊᒻᒪ ᐅᓗᕆᐊᓇᖅᑐᖃᓕᖅᑎᓪᓗᒍ ᐊᐅᓚᑦᓯᔨᐅᖃᑦᑕᓚᐅᕐᓂᖓᓄᑦ.
ᓗᐃ ᐊᖓᓚᒃ ᐊᖓᔪᒃᖠᖅ ᐊᕐᕕᐊᕐᒥᐅᑕᖅ ᑕᒪᑐᒪᓂ ᐊᕐᕌᒍᒥ ᓄᖅᑲᕕᓚᐅᖅᑐᖅ ᐃᓕᓐᓂᐊᖅᑐᓕᕆᔨᒃᑯᑦ ᐱᖅᑯᓯᓕᕆᔨᖏᓐᓂ. ᓗᐃ ᐊᖓᓚᒃ ᐊᑕᐅᓯᐅᓐᖏᑦᑐᓂ ᓄᓇᑐᐃᓐᓇᕐᒥ ᐊᓐᓇᐅᒪᔪᓐᓇᕐᓂᕐᒥᒃ ᐃᓕᓐᓂᐊᖅᑎᑦᑎᖃᑕᐅᖃᑦᑕᖅᓯᒪᔪᖅ ᑐᕌᖓᓪᓗᐊᑕᖅᑐᓂᒃ ᒪᒃᑯᒃᑐᓄᑦ ᐃᓐᓇᕐᓄᓪᓗ ᐱᕋᔭᖃᑦᑕᖅᓯᒪᔪᕕᓂᕐᓂᒃ. ᐃᖅᑲᓇᐃᔭᖃᑎᖃᖃᑦᑕᖅᓯᒪᖕᒥᔪᖅ ᖃᐅᔨᒪᔭᐅᑦᑎᐊᖅᑐᓂᒃ ᐃᓐᓇᕐᓂᒃ, ᐃᓚᒋᔭᐅᖃᑕᐅᓪᓗᓂ ᒫᒃ ᖃᓗᐊᖅ, ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᕆᔭᐅᔾᔪᒻᒥᒃ ᐱᑎᑕᐅᓚᐅᖅᓯᒪᔪᒥᒃ 2011-ᒥ ᐱᓕᕆᖃᑕᐅᑎᓪᓗᒋᒃ ᐊᕐᕕᐊᓂ ᐃᑦᑕᕐᓂᓴᓕᕆᓂᕐᒥᒃ ᐊᒻᒪ ᐅᓂᒃᑳᖅᑎᑦᑎᖃᑦᑕᖅᑎᓪᓗᒋᑦ ᖃᓄᖅ ᐱᕙᓪᓕᐊᓚᐅᖅᓯᒪᖕᒪᖔᑦ ᐊᕐᕕᐊᑦ.
ᑕᐃᕕᑎ ᐊᕐᓇᒃᑲᖅ ᐸᖕᓂᖅᑐᖅᒥᐅᑕᐅᓪᓗᓂ ᓴᖅᑭᑎᑦᑎᕐᖓᓚᐅᖅᓯᒪᔪᖅ ᓄᓇᕗᒻᒥ ᑎᒥᒥᒍᑦ ᐊᔪᕈᑎᓖᑦ ᒪᑭᓐᓇᓱᐊᖅᑏᑦ ᑲᑐᔾᔨᖃᑎᒌᖏᓐᓂᒃ, ᐊᒻᒪ ᐊᔭᐅᖅᑐᐃᓪᓚᕆᐅᓯᒪᓪᓗᓂ ᓯᕐᓈᖅᑎᐅᓪᓗᓂᓗ ᑎᒥᒥᒍᑦ ᐊᔪᕈᑎᓕᖕᓂᒃ ᐊᒻᒪ ᐸᖕᓂᖅᑑᕐᒥ ᒪᐃᔭᒋᔭᐅᓚᐅᖅᓯᒪᓪᓗᓂ.
“ᑕᒪᑐᒪᓂ ᐊᕐᕌᒍᒥ, ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᕆᔭᐅᔾᔪᑎᑖᖅᑐᑦ ᐊᔾᔨᒌᓐᖏᑦᑐᓂᒃ ᐃᑲᔪᖃᑦᑕᖅᓯᒪᓂᑯᑦ, ᓄᓇᓕᖕᓂ ᐊᑦᑕᓇᔾᔭᐃᖅᓯᓯᒪᓂᒃᑯᑦ, ᐃᓅᓯᖃᑦᑎᐊᕐᓂᒃᑯᑦ ᐊᒻᒪ ᐃᓕᓐᓂᐊᕐᓂᓕᕆᓂᒃᑯᑦ,” ᑕᐃᒪᓐᓇ ᐅᖃᓚᐅᖅᑐᖅ ᐅᖃᖅᑎ ᑐᑐ. “ᐃᖅᑲᓇᐃᔮᕆᖃᑦᑕᖅᓯᒪᔭᖏᑦ ᒪᓕᒃᓴᖅᑕᐅᔪᓐᓇᑦᑎᐊᖅᑐᑦ ᓄᓇᕗᒻᒥᐅᑦ ᒪᒃᑯᒃᑐᖁᑎᖏᓐᓄᑦ ᐃᖅᑲᓇᐃᔮᖅᑖᕈᒪᒍᑎᒃ ᐃᓄᖕᓄᑦ ᐱᕚᓪᓕᐅᑕᐅᒃᑲᓐᓂᕈᓐᓇᖅᑐᓂᒃ.”
2013-ᒥ ᐃᓕᓴᕆᔭᐅᓂᐊᖅᑐᑦ ᓯᑎᐱᕆ 12, 2013-ᒥ, ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᖓᓂ ᐊᒻᒪ ᓯᕿᕐᖑᔭᖅ ᖃᔅᓯᒧᐊᖅᐸᑦ ᓇᓗᓇᐃᖅᑕᐅᓛᑐᐃᓐᓇᖅᖢᓂ. ᓄᓇᕗᒻᒥ ᑲᒥᓴᓇᕆᔭᐅᔪᖅ ᑐᓂᐅᖅᑲᐃᔨᐅᓂᐊᖅᑐᖅ ᑎᒍᒥᐊᖅᑎᐅᓂᓂ ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᑎᓂᒃ ᐊᑐᕐᓗᓂᐅᒃ.
| Attachment | Size |
|---|---|
| ᓄᓇᕗᒻᒥ ᖃᐅᔨᒪᔨᑕᕆᔭᑦ ᑲᑎᒪᔨᖏᑦ ᓇᓗᓇᐃᖅᓯᕗᑦ ᑭᒃᑯᑦ 2013-ᒥ ᐅᔭᒥᒃᑕᐅᓂᐊᕐᒪᖔᖏᑦ ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᒻᒥᒃ | 112.18 KB |