ᐃᖃᓗᐃᑦ, ᓄᓇᕗᑦ (ᕕᕗᐊᕆ 26, 2013) - ᖁᑦᑎᒃᑐᕐᒧᑦ ᒪᓕᒐᓕᐅᖅᑎ ᕌᓐ ᐃᓕᐊᑦ ᐅᓪᓗᒥ ᓴᖅᑭᑦᑎᕗᖅ ᐱᖁᔭᒃᓴᖅ 46-ᒥᒃ, ᓂᕿᓂᒃ ᑐᓐᓂᖅᑯᑎᖃᕐᓂᕐᒧᑦ ᐱᖁᔭᕐᔪᐊᕐᒥᒃ.
“ᓂᕿᓂᒃ ᑐᓐᓂᖅᑯᑎᖃᕐᓂᕐᒧᑦ ᐱᖁᔭᕐᔪᐊᒃᓴᖅ ᐃᓄᖕᓂᒃ ᓂᕿᓂᒃ ᑐᓐᓂᖅᑯᑎᖃᖃᑦᑕᖅᑐᓂᒃ ᑐᓂᐅᖅᑲᐃᖃᑦᑕᖅᑐᓂᒡᓘᓐᓃᑦ ᐃᖅᑲᖅᑐᒐᒃᓴᐅᑎᑕᐅᔪᓐᓇᓐᖏᓚᖅ ᐋᓐᓂᐊᑖᕐᓂᕐᒧᑦ, ᐋᓐᓂᐊᑖᕐᓂᕐᒧᑦ, ᐋᓐᓂᕐᓂᕐᒧᑦ, ᐃᓅᔪᓐᓃᕐᓂᕐᒧᑦ ᐅᕝᕙᓘᓐᓃᑦ ᐊᓯᐊᒍᖔᖅ ᖃᓄᐃᓕᓂᕐᓗᖕᓂᕐᒧᑦ ᓂᕆᔪᕕᓂᐅᑎᓪᓗᒍ, ᑭᓯᐊᓂ ᑖᓐᓇ ᓂᕿᓂᒃ ᑐᓐᓂᖅᑯᑎᓕᒃ ᐱᔮᕆᓗᓂ ᑲᒪᑦᑎᐊᓐᖏᓗᐊᕐᓗᓂᓘᓐᓃᑦ ᑐᓐᓂᖅᑯᑎᖃᕐᓂᖅᐸᑦ ᑐᓂᐅᖅᑲᐃᓐᓂᖅᐸᓪᓘᓐᓃᑦ ᓂᕿᓂᒃ. ᐊᔾᔨᐸᓗᖏᑦ ᒪᓕᒐᑦ ᐊᑐᕐᒥᔪᑦ ᑲᑎᒪᔨᓄᑦ, ᑲᒪᔨᓄᑦ, ᑭᒡᒐᖅᑐᐃᔨᓄᑦ, ᐃᖅᑲᓇᐃᔭᖅᑎᓄᑦ ᐊᑭᓕᖅᓱᖅᑕᐅᓐᖏᑦᑐᓂᓪᓗ ᓂᕿᓂᒃ ᑐᓐᓂᖅᑯᑎᖃᖃᖅᑕᖅᑐᓄᑦ ᑐᓂᐅᖅᑲᐃᖃᑦᑕᖅᑐᓄᓪᓘᓐᓃᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᔅᑐ ᐃᓕᐊᑦ.
ᐊᓯᓕᒫᖏᑦ ᑲᓇᑕᒥ ᐊᕕᒃᑐᖅᓯᒪᔪᑦ ᐅᑭᐅᖅᑕᖅᑐᒥᓗ ᒐᕙᒪᖃᕐᕖᑦ ᐊᔾᔨᐸᓗᖏᓐᓂᒃ ᐱᖁᔭᕐᔪᐊᖃᖅᑐᑦ.
“ᖁᕕᐊᓱᑦᑎᐊᖅᑐᖓ ᒪᓕᒐᓕᐅᖅᑎᑐᐃᓐᓇᐅᑉ ᐱᖁᔭᒃᓴᖓ ᐃᑲᔪᖅᓱᖅᑕᐅᑦᑎᐊᕐᒪᑦ ᐊᒻᒪ ᓯᕗᓪᓕᐅᔾᔭᐅᓗᓂ ᐊᐅᓚᔾᔭᒃᓴᐅᖁᔭᐅᓚᐅᖅᖢᓂ ᓄᓇᕗᒻᒥ ᓂᕿᓕᕆᓂᕐᒥᒃ ᑲᑎᒪᕐᔪᐊᖅᑎᓪᓗᒋᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᔅᑐ ᐃᓕᐊᑦ. “ᑎᑎᖅᑲᓂᒃ ᒪᓕᒐᓕᐅᕐᕕᖕᒧᑦ ᓴᖅᑭᑦᑎᓚᐅᕐᓂᓐᓂᒃ, ᐱᔾᔪᑕᐅᑎᓪᓗᒍ ᐱᖁᔭᒃᓴᖅ 46 ᐱᓚᐅᖅᑕᒃᑲ ᓄᓇᕗᒻᒥ ᐃᓚᒃᑲ ᓂᕆᑎᑕᐅᓂᖏᑦ, ᐱᓕᒻᒪᒃᓴᐃᔩᑦ ᓄᓇᕗᒻᒥ/ᑲᓇᑕᒥᓗ ᓂᕿᓕᐅᕆᐅᖅᓴᖅᑏᑦ, ᖃᔪᖅᑐᕐᕕᖕᒥᑦ, ᓄᓇᕗᑦ ᑐᓐᖓᕕᒃᑯᓐᓂᑦ, ᕗᕉᕕᓱ ᐃᓐ ᓯᓂᒃᑕᕐᕕᖓᓂ, ᓂᐅᕕᖅᑎᒃᑯᓐᓂᑦ ᐊᒻᒪ ᑯᐊᐸᒃᑯᓐᓂᑦ.”
ᐱᖁᔭᒃᓴᖅ 46 ᐊᔾᔨᖏᑦ ᐊᑐᐃᓐᓇᐅᔪᑦ ᒪᓕᒐᓕᐅᕐᕕᐅᑉ ᖃᕆᓴᐅᔭᒃᑰᖅᑎᓯᒪᔭᖓᒍᑦ, ᐅᕝᕙ ᑐᕌᕈᑖ: www.assembly.nu.ca.
“ᓂᕆᐅᒃᐳᖓ ᒪᓕᒐᓕᐅᖅᑎᓕᒫᓄᑦ ᑲᑎᒪᕐᔪᐊᓕᕈᑦᑕ ᐃᑲᔪᖅᓱᖅᑕᐅᓂᐊᕐᓂᓐᓂᒃ ᑖᓐᓇ ᐱᖁᔭᒃᓴᖅ ᐱᕐᔪᐊᖑᑎᓪᓗᒍ, ᐊᒻᒪ ᐊᖅᑯᑕᐅᓗᓂ ᓄᓇᕗᑦ ᐃᓗᐊᓂ ᓂᕿᓂᒃ ᑐᓐᓂᖅᑯᑎᖃᕈᒪᒃᑲᓐᓂᖃᑦᑕᓛᕐᓂᐊᕐᓂᖏᓐᓂᒃ ᑕᐃᒃᑯᐊ ᐊᔪᖅᓴᓗᐊᖅᑐᓄᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᔅᑐ ᐃᓕᐊᑦ.
| Attachment | Size |
|---|---|
| ᖁᑦᑎᒃᑐᕐᒧᑦ ᒪᓕᒐᓕᐅᖅᑎ ᓴᖅᑭᑦᑎᕗᖅ ᓂᕿᓂᒃ ᑐᓐᓂᖅᑯᑎᖃᕐᓂᕐᒧᑦ ᐱᖁᔭᕐᔪᐊᕐᒥᒃ | 120.07 KB |