ᐃᖃᓗᐃᑦ, ᓄᓇᕗᑦ (ᓯᑎᐱᕆ 13, 2018) - ᒪᓕᒐᓕᐅᕐᕕᐅᑦ ᑲᑎᒪᔨᕋᓛᖏᑦ ᓇᐅᑦᑎᖅᓱᖅᑏᑦ ᒐᕙᒪᒃᑯᑦ ᐊᐅᓚᓂᖏᓐᓂᒃ ᑮᓇᐅᔭᖅᑐᕈᑎᖏᓐᓂᒃᓗ ᓈᓚᖕᓂᖃᖅᑎᑦᑎᓂᐊᕐᒪᑕ ᑕᓚᕖᓴᒃᑯᑦ ᓯᑎᐱᕆ 27, 2018-ᒥᑦ, ᐅᑐᐱᕆ 2, 2018-ᒧᑦ, ᐅᖃᐅᓯᖃᕐᓗᑎᒃ ᓄᑖᖑᓛᓂᒃ ᐊᕐᕌᒍᑕᒫᕐᓯᐅᑎᑦ ᐅᓂᒃᑳᖏᓐᓂᒃ ᐊᒻᒪ ᐱᔭᒃᓴᐃᑦ ᐸᕐᓇᐅᑎᖏᓐᓂᒃ ᖁᓪᓕᖅ ᐃᑯᒻᒪᖅᑯᑎᓕᕆᔨᒃᑯᑦ ᐊᒻᒪᓗ ᒪᓕᒐᕐᓂᐊᕐᓂᕐᒧᑦ ᐱᔨᑦᑎᖅᑏᑦ ᑲᑎᒪᔨᖏᓐᓄᑦ. ᒪᓕᒐᓕᐅᖅᑎᑐᐃᓐᓇᓕᒫᑦ ᒪᓕᒐᓕᐅᕐᕕᒃᒥ ᐃᒃᓯᕚᖃᑕᐅᕗᑦ ᑲᑎᒪᔨᕋᓛᕐᓂ.
ᖁᓪᓕᖅ ᐃᑯᒻᒪᖅᑯᑎᓕᕆᔨᒃᑯᑦ ᑲᑎᒪᔨᕋᓛᑦ ᓵᖓᓐᓃᓐᓂᖓᑦ ᐱᒋᐊᕐᓂᐊᖅᐳᖅ 1:30 ᐅᓐᓄᓴᒃᑯᑦ ᑎᓴᒻᒥᕐᒥ, ᓯᑎᐱᕆ 27, 2018-ᖑᓕᖅᐸᑦ. ᓄᑖᖑᓛᖑᔪᑦ ᐊᕐᕌᒍᑕᒫᕐᓯᐅᑎᑦ ᐅᓂᒃᑳᖏᑦ ᐊᒻᒪ ᐱᔭᒃᓴᐃᑦ ᐸᕐᓇᐅᑎᖏᑦ ᓴᖅᑭᑎᑕᒃᓴᐅᔪᑦ ᐅᕙᖖᒐᑦ: http://assembly.nu.ca/sites/default/files/TD-363-4(3)-IN-QEC-16th-Annual-Report-2016-2017.pdf ᐊᒻᒪ http://assembly.nu.ca/sites/default/files/TD-360-4(3)-IN-QEC-2017-2022-Corporate-Plan.pdf.
“ᑲᑎᒪᔨᕋᓛᑦ ᑕᓚᕖᓴᒃᑯᑦ ᓈᓚᒃᑎᑦᑎᓂᕆᕋᑖᓚᐅᖅᑕᖓᑦ ᑲᓇᑕᒥ ᑕᒻᒪᖅᓯᒪᔪᖅᓯᐅᖅᑎᕐᔪᐊᑦ ᐅᓂᒃᑳᖏᓐᓄᑦ ᒪᓕᒐᓕᐅᕐᕕᒃᒧᑦ ᒪᑐᒧᖓ ᓯᓚᐅᑦ ᐊᓯᔾᔨᖅᐸᓪᓕᐊᓂᖓᓄᑦ ᓄᓇᕗᒻᒥ ᐱᕕᖃᕐᕕᐊᔪᓐᓇᓚᐅᕐᒪᑦ ᓂᕈᐊᖅᑕᐅᓯᒪᔪᓄᑦ ᒪᓕᒐᓕᐅᖅᑎᓄᑦ ᐃᓱᒪᒃᓴᖅᓯᐅᕈᑕᐅᓪᓗᓂ ᖁᓪᓕᖅ ᐃᑯᒻᒪᖅᑯᑎᓕᕆᔨᒃᑯᑦ ᐱᓕᕆᕙᓪᓕᐊᓂᖓᑦ ᑕᒪᑐᒧᖓ ᐊᑐᒃᑲᓐᓂᕈᓐᓇᖅᑐᓄᑦ ᐆᒻᒪᖅᑯᑎᑦ ᒥᒃᓵᓄᑦ,” ᐅᖃᓚᐅᖅᐳᖅ ᑲᑎᒪᔨᕋᓛᓄᑦ ᐃᒃᓯᕙᐅᑕᐅᖃᑕᐅᔪᖅ ᔮᓐ ᒪᐃᓐ, ᒪᓕᒐᓕᐅᖅᑎ ᐊᒃᕕᐊᑦ ᐅᐊᖕᓇᖓᓄᑦ-ᑎᑭᕋᕐᔪᐊᕐᒧᑦ. “ᓈᓚᒃᑎᑦᑎᓂᕆᓂᐊᖅᑕᕗᑦ ᐱᕕᖃᕐᕕᐊᒃᑲᓐᓂᕐᓂᐊᕐᒪᑦ ᓇᓗᓇᐃᔭᖅᓯᒪᒃᑲᓐᓂᖅᑐᓂᒃ ᕿᒥᕐᕈᐊᖅᑕᐅᔪᓐᓇᕐᓗᑎᒃ [ᐃᑯᒻᒪᖅᑯᑎᓕᕆᔨᒃᑯᑦ] ᐊᐅᓚᑦᑎᔾᔪᓯᖏᓐᓂᒃ ᐊᔾᔨᒌᖏᑦᑐᓂ ᐱᓕᕆᐊᖏᑦᑕ ᐃᓗᐊᓂ.”
ᒪᓕᒐᕐᓂᐊᕐᓂᕐᒧᑦ ᐱᔨᑦᑎᖅᑏᑦ ᑲᑎᒪᔨᖏᑦᑕ ᑲᑎᒪᔨᕋᓛᑦ ᓵᖓᓐᓃᓐᓂᖏᑦ ᐱᒋᐊᓛᖅᐳᖅ 1:30 ᐅᓐᓄᓴᒃᑯᑦ ᓇᒡᒐᔾᔭᐅᒥ, ᐅᑐᐱᕆ 1, 2018-ᖑᓕᖅᐸᑦ. ᓄᑖᖑᓛᖑᔪᑦ ᐊᕐᕌᒍᑕᒫᕐᓯᐅᑎᑦ ᐅᓂᒃᑳᖏᑦ ᐊᒻᒪ ᐱᔭᒃᓴᐃᑦ ᐸᕐᓇᐅᑎᖏᑦ ᓴᖅᑭᑎᑕᒃᓴᐅᔪᑦ ᐅᕙᖖᒐᑦ: http://assembly.nu.ca/sites/default/files/TD-48-5(2)-IN-Legal-Services-Board-of-Nunavut-2016-2017-Annual-Report.pdf.
“ᓄᓇᕗᑦ ᒐᕙᒪᖏᑦᑕ 2018-2019 ᑮᓇᐅᔭᖅᑐᕈᑎᒃᓴᖏᑦ ᐱᖃᓯᐅᔾᔨᖕᒪᑕ ᐃᒪᓐᓇᕈᔪᖕᓂᒃ $11.8-ᒥᓕᐊᓐ ᒐᕙᒪᒃᑯᑦ ᑮᓇᐅᔭᖁᑎᖏᓐᓂᑦ ᑖᒃᑯᓄᖓ ᒪᓕᒐᕐᓂᐊᕐᓂᕐᒧᑦ ᐱᔨᑦᑎᖅᑏᑦ ᑲᑎᒪᔨᖏᓐᓄᑦ,” ᐅᖃᖅᐳᖅ ᒥᔅᑕ ᒪᐃᓐ. “ᑲᑎᒪᔨᕋᓛᑦ ᓈᓚᒃᑎᑦᑎᓂᕆᓂᐊᖅᑕᖓᑦ ᑕᓚᕖᓴᒃᑯᑦ ᓯᕗᓪᓕᖅᐸᐅᓂᖓᓄᑦ ᓇᓗᓇᐃᒃᑯᑕᐅᓂᐊᕐᒪᑦ ᑲᑎᒪᔩᑦ ᓯᕗᓕᖅᑎᖏᑦᑕ ᖃᐃᖁᔭᐅᓂᖏᓐᓂᒃ ᑭᐅᔾᔪᑎᖃᖁᔭᐅᓪᓗᑎᒃ ᓂᕈᐊᖅᑕᐅᓯᒪᔪᓄᑦ ᒪᓕᒐᓕᐅᖅᑎᓄᑦ ᑕᐃᒪᓐᓇ ᑎᒥᐅᔫᑦ ᐱᓕᕆᔾᔪᓯᖏᑦᑕ ᒥᒃᓵᓄᑦ, ᑮᓇᐅᔭᐃᔭᕈᑎᖏᓐᓄᑦ ᐊᒻᒪᓗ ᐱᓕᕆᐊᖑᑎᑕᖏᓐᓄᑦ ᓲᕐᓗ ᒪᑐᒨᓇ ᓄᓇᕗᒻᒥᐅᓄᑦ ᒪᓕᒐᖅᑎᒍᑦ ᐊᑐᐃᓐᓇᖃᕐᓂᖅ ᐱᐅᓯᕚᓪᓕᖁᓪᓗᒍ.”
ᑲᑎᒪᔨᕋᓛᑦ ᑕᓚᕖᓴᒃᑯᑦ ᓈᓚᒃᑎᑦᑎᓂᖏᑦ ᑲᔪᓯᓂᐊᖅᐳᑦ ᒪᓕᒐᓕᐅᕐᕕᐅᑦ ᑲᑎᒪᕐᔪᐊᖅᕕᖓᓂ ᒪᑐᐃᖓᓂᐊᖅᖢᓂᓗ ᑭᒃᑯᑐᐃᓐᓇᕐᓄᑦ ᖁᖖᒋᐊᕈᒪᔪᓄᑦ. ᓈᓚᒃᑎᑦᑎᓂᐅᔪᑦ ᑕᓚᕖᓴᒃᑯᑦ ᑕᑯᒃᓴᐅᓂᐊᖅᐳᑦ ᓄᓇᓕᖕᓂ ᑕᓚᕖᓴᓕᕆᔨᖏᑦᑎᒍᑦ ᐊᒻᒪᓗ ᓇᖕᒥᓂᕆᔭᐅᔪᑎᒍᑦ ᖃᖓᑦᑕᖅᑎᑕᐅᓯᒪᔪᒃᑯᑦ ᐅᑯᑎᒎᓇᖅ ᕕᐅᓪ (Bell) (513) ᐊᒻᒪ ᓵ (Shaw) (289) - ᐱᑐᖃᒃᑯᑦ / 489 - ᓄᑖᒃᑯᑦ).
-30-
ᖃᐅᔨᒋᐊᒃᑲᓐᓂᕈᒪᒍᕕᑦ:
ᔮᓐ ᑯᐊᒃ, ᑎᑎᕋᖅᑎ ᓄᓇᕗᒻᒥ ᒪᓕᒐᓕᐅᕐᕕᒃᒥ
ᐅᖄᓚᐅᑖ: (867) 975-5000
| Attachment | Size |
|---|---|
| OGOPA Televised Hearings News Release - September 2018 - Inuktitut.pdf | 129.13 KB |