ᒪᓕᒐᓕᐅᕐᕕᖕᒥ ᓯᐊᐸᖓᓂ ᒪᓕᒐᓕᐅᖅᑏᑦ ᖁᕕᐊᓱᒃᐳᑦ ᐃᓕᖕᓂᒃ ᐊᒻᒪᓗ ᐃᓚᔅᓯᓐᓂᒃ ᑐᓐᖓᓱᒃᑎᑦᑎᔪᓐᓇᕋᒥᒃ ᐊᕐᕌᒍᑕᒫᖅ ᖁᕕᐊᓱᒡᕕᒃᓯᐅᑎᓂᒃ ᐃᑭᑦᑎᓂᕐᒧᑦ ᖁᕕᐊᓲᑎᖃᕐᓂᕐᒧᑦ ᒪᓕᒐᓕᐅᕐᕕᖕᒥ. ᑖᖅᓯᒃᐸᑦ ᖃᐃᓂᐊᖅᐳᓯ ᐃᑯᒪᔪᑯᓘᓕᖅᑎᓪᓗᒋᑦ ᖁᕕᐊᓱᒡᕕᒃᓯᐅᑏᑦ, ᐆᓇᖅᑐᓂᒡᓗ ᓂᐅᖅᑲᕐᓗᓯ, ᐅᓲᔭᖅᑐᕐᓗᓯ ᐊᒻᒪᓗ ᖃᐅᒪᔪᑯᓗᖕᓂᒃ ᑐᓂᐅᖅᑲᖅᑕᐅᓗᑎᒃ ᓱᕈᓯᑦ, ᐅᓇᓕᒃᓴᔭᕋᓛᑦ ᐃᒡᓗᖁᑖᓂ ᐅᓇᓕᒃᓴᔭᕋᓛᓄᑦ.
ᐃᖃᓗᐃᑦ, ᓄᓇᕗᑦ (ᓄᕕᐱᕆ 17, 2025) - ᒪᓕᒐᓕᐅᖅᑏᑦ ᑲᑎᒪᔨᖏᑦ ᐅᓪᓗᒥ ᑐᓴᖅᑎᑦᑎᖅᑲᐅᕗᑦ ᐅᓪᓗᕆᓂᐊᖅᑕᖓᓂᒃ ᐊᒻᒪ ᐋᖅᑭᒡᓯᒪᓂᕆᓂᐊᖅᑕᖓᓂᒃ 2025−ᒥ ᓄᓇᕗᒥ ᓯᕗᓕᖅᑎᐅᓂᐊᖅᑐᓂᒃ ᑲᑎᒪᔾᔪᑎᖃᓕᖅᐸᑕ. ᑖᒃᑯᐊ ᑲᑎᒪᔾᔪᑎᖃᕐᓂᐊᖅᑐᑦ ᒪᓕᒐᓕᐅᖅᑎᓕᒫᑦᑎᐊᑦ.
ᑲᑎᒪᓂᐊᖅᑐᑦ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᐊᓂ, ᐱᒋᐊᕐᓗᑎᒃ 10:00 ᐅᓪᓛᒃᑯᑦ (ᑲᓇᖕᓇᐅᑉ ᖃᐅᔨᓴᐅᑎᖓ ᐊᑐᕐᓗᒍ) ᐊᐃᑉᐱᕐᒥ, ᓄᕕᐱᕆ 18, 2025−ᒥ. ᓂᕈᐊᕐᓂᐊᖅᑐᑦ ᐅᖃᖅᑎᒥᒃ, ᓯᕗᓕᖅᑎᒥᒃ ᐊᒻᒪ ᑲᑎᒪᔨᒋᓂᐊᖅᑕᖏᓐᓂᒃ ᐊᐅᓚᑦᑎᔩᑦ ᑲᑎᒪᔨᖏᑕ (ᒥᓂᔅᑕᐃᑦ ᑲᑎᒪᔨᖏᓐᓂᒃ) ᑖᒃᑯᐊ ᓂᕈᐊᕐᓂᐊᖅᑐᑦ ᑲᓐᖑᓇᖅᑐᒃᑯᑦ ᐸᐃᑉᐹᑎᒍᑦ ᓯᕗᓪᓕᖅᐹᕐᒥ ᑲᑎᒪᔾᔪᑎᒋᔭᐅᓂᐊᖅᑐᖅ ᓂᕈᐊᖅᓯᕐᓗᑎᒃ ᐅᖃᖅᑎᒥᒃ. ᑖᓐᓇ ᐅᖃᖅᑎ ᓂᕈᐊᖅᑕᐅᔪᖅ ᑲᑎᒪᔨᑦᓯᓂᐊᖅᑐᖅ ᑲᑎᒪᔾᔪᑎᖃᖅᑎᓪᓗᒋᑦ ᓯᕗᓕᖅᑎᐅᓂᐊᖅᑐᓂᒃ.
ᐃᖃᓗᐃᑦ, ᓄᓇᕗᑦ (ᐋᒡᒌᓯ 19, 2025) - ᒪᓕᒐᓕᐅᖅᕕᐅᑉ ᑲᑎᒪᔨᕋᓛᖏᑦ ᓇᐅᑦᓯᖅᑐᖅᑎᐅᔪᑦ ᒐᕙᒪᒃᑯᑦ ᐊᐅᓚᓂᖏᓐᓂᑦ ᑮᓇᐅᔭᖅᑐᕈᑎᖏᓐᓂᓪᓗ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᖅᑎᑦᑎᓛᕐᒪᑕ ᓯᑎᐱᕆ 4-5, 2025−ᒥ, ᐱᔾᔪᑎᖃᕐᓗᑎᒃ ᐅᓂᒃᑳᓕᐊᒥᓂᖏᓐᓂᑦ ᑲᓇᑕᐅᑉ ᑕᒻᒪᖅᓯᒪᔪᖅᓯᐅᖅᑎᖓᑕ ᒪᓕᒐᓕᐅᖅᕕᖓᓄᑦ ᓄᓇᕗᑦ, ᐊᑎᖃᖅᑐᒥᑦ: ᑭᒃᑯᓕᒫᓄᑦ ᑐᕌᖓᔪᓂᑦ ᐃᓪᓗᓕᕆᓂᖅ ᓄᓇᕗᒻᒥ.
ᑖᒃᑯᐊ ᐅᓂᒃᑳᓕᐊᒥᓃᑦ ᒪᓕᒐᓕᐅᖅᕕᒻᒧᑦ ᓴᖅᑭᖅᑕᐅᔪᒻᒪᑕ ᐃᒃᓯᕙᓂᖃᖅᑎᓪᓗᒋᑦ ᒪᐃ 26, 2025−ᒥ. ᑖᓐᓇ ᐅᓂᒃᑳᓕᐊᒥᓂᖅ ᐅᑯᓇᓐᖓᑦ ᖃᕋᓴᐅᔭᒃᑯᑦ ᑐᕌᕈᑎᓂᑦ ᐱᔭᐅᔪᓐᓇᖅᑐᖅ:
ᐃᖃᓗᐃᑦ, ᓄᓇᕗᑦ (ᔪᓚᐃ 13, 2023) - ᐅᖃᖅᑎ ᑑᓂ ᐋᖁᐊᖅ ᐅᓪᓗᒥ ᐃᒪᓐᓇ ᐅᖃᐅᓯᒃᓴᖃᖅᑲᐅᕗᖅ:
ᓄᒫᑦᑕᓚᐅᖅᐳᖓ ᑐᓴᖅᑎᑕᐅᒐᒪ ᒫᓐᓇᕈᓘᓚᐅᖅᑐᖅ ᐃᓅᔪᓐᓃᕐᓂᕋᖅᑕᐅᖕᒪᑦ ᑖᒥ ᐃᓄᐊᕋᖅ, ᕿᑭᖅᑖᓘᑉ ᕿᑎᐊᓄᑦ ᑭᒡᒐᖅᑐᐃᔨᒋᔭᐅᓚᐅᖅᑐᖅ ᓄᓇᑦᓯᐊᑉ ᒪᓕᒐᓕᐅᕐᕕᐊᓂ ᓄᓇᕗᑦ ᐊᕗᑎᓚᐅᖅᑎᓐᓇᒍ 1999-ᒥ. ᑖᒥ ᐃᓄᐊᕋᖅ ᐃᓅᔪᓐᓃᓚᐅᖅᐳᖅ ᐋᓐᓂᐊᑯᑖᓚᐅᖅᖢᓂ. ᒥᔅᑐ ᐃᓄᐊᕋᖅ ᐃᓕᓴᐃᔨᐅᓚᐅᖅᑐᖅ, ᐅᖃᓕᒫᒐᓕᐅᖅᑎᐅᓚᐅᖅᑐᖅ ᐊᒻᒪ ᓯᕗᒃᑲᖅᑕᖅᑎᒋᔭᐅᓚᐅᖅᖢᓂ ᓂᕈᐊᖅᑎᒥᓂᒃ ᑭᒡᒐᖅᑐᐃᓪᓗᓂ. ᒪᓕᒐᓕᐅᕐᕕᖕᒧᑦ ᒪᓕᒐᓕᐅᖅᑎᓕᒫᑦ ᑭᒡᒐᖅᑐᖅᖢᒋᑦ, ᐃᓚᑯᓗᖏᑦ ᓇᒡᓕᒋᕙᕗᑦ ᐃᓱᒪᒋᕙᕗᓪᓗ.
ᒪᓕᒐᓕᐅᕐᕕᐅᑉ ᓵᑦᑎᐊᖓᓃᑦᑐᑦ ᑲᖏᖅᑐᒑᐱᐅᑉ, ᐸᖕᓂᖅᑑᑉ ᐊᒻᒪ ᕿᑭᖅᑕᕐᔪᐊᑉ ᓴᐃᒻᒪᑎᖏᑦ ᐊᑦᑎᒃᓯᒋᐊᖅᑕᐅᓂᐊᖅᑐᑦ ᑖᒥ ᐃᓄᐊᕋᐅᑉ ᐃᓅᔪᓐᓃᓚᐅᕐᓂᖓ ᐃᓱᒪᒋᓪᓗᒍ.
-30-
ᐃᖃᓗᐃᑦ, ᓄᓇᕗᑦ (ᐄᐳᕈ 17, 2023) - ᐅᖃᖅᑎ ᑑᓂ ᐋᖁᐊᖅ ᐅᓪᓗᒥ ᐆᒥᖓ ᑐᓴᖅᑕᐅᖁᔭᒥᓂᒃ ᓴᖅᑭᖅᑕᐅᑎᑦᑎᖅᑲᐅᕗᖅ:
ᕿᒃᓵᓕᓚᐅᖅᑐᖓ ᑐᓴᕋᒪ ᐃᓅᔪᓐᓃᕐᓂᕋᖅᑕᐅᑎᓪᓗᒍ ᒪᓕᒐᓕᐅᖅᑎᐅᖃᑦᑕᓚᐅᖅᓯᒪᔪᖅ ᐊᒻᒪᓗ ᑲᒥᓴᓇᒧᑦ ᑐᖏᓕᕆᐅᖃᑦᑕᓚᐅᖅᓯᒪᔪᖅ ᓄᓇᕗᒻᒥ ᕆᕕᐊᑲ ᐅᕿ ᐅᐃᓕᐊᒻᔅ, ᑖᓐᓇ ᑭᒡᒐᖅᑐᐃᖃᑦᑕᓚᐅᖅᓯᒪᒻᒪᑦ ᓂᕈᐊᖅᑕᐅᓯᒪᕕᖓᓂᑦ ᖁᑦᑎᑦᑑᑉ, ᓯᕗᓪᓕᖅᐹᕆᔭᖓ ᓄᓇᕗᒻᒥ ᒪᓕᒐᓕᐅᖅᕕᒃ ᐊᑕᑎᓪᓗᒍ. ᒥᔅ ᐅᐃᓕᐊᒻᔅ ᑲᔪᓯᓚᐅᕐᒪᑦ ᐊᑯᓂᐊᓗᒃ ᐋᓐᓂᐊᖃᓚᐅᖅᑐᓂ. ᒥᔅ ᐅᐃᓕᐊᒻᔅ ᐅᐱᓐᓇᒻᒪᕆᑦᑐᒥᑦ ᐃᖅᓇᐃᔭᖅᓯᒪᓚᐅᑐᖅ ᐃᓅᓯᓕᒫᒥᓂ ᑭᒃᑯᓕᒫᓂᑦ ᐱᔨᑦᑎᕋᖅᐸᑦᑐᓂ ᐊᒻᒪᓗ ᐅᓄᖅᑐᐊᓗᓐᓂᑦ ᐃᑲᔪᕐᓂᖃᖅᓯᒪᓪᓗᓂ ᓄᓇᓕᖁᑎᒥᓂᒃ ᐊᒻᒪᓗ ᓄᓇᕗᓕᒫᒥᑦ. ᐅᖃᕈᑎᓪᓗᒋᑦ ᒪᓕᒐᓕᐅᖅᑎᐅᖃᑕᐅᔪᓕᒫᑦ ᒪᓕᒐᓕᐅᖅᕕᒻᒥ, ᕆᕕᐊᑲᐅᑉ ᐃᓚᒋᔭᖏᑦ ᓇᓪᓕᒋᕙᕗᑦ.