Yes

ᐃᖃᓗᐃᑦ, ᓄᓇᕗᑦ (ᒫᑦᓯ 28, 2022) - ᒪᓕᒐᓕᐅᖅᕕᐅᑉ ᐅᖃᖅᑎᖓ ᑑᓂ ᐋᖁᐊᖅ ᐅᓪᓗᒥ ᓴᖅᑭᖅᓯᕗᖅ ᐅᓂᒃᑳᓕᐊᒥᓂᖏᓐᓂᑦ ᓱᓕᑦᑎᐊᕆᐊᖃᕐᓂᕐᒧᑦ ᑲᒥᓴᓇᐅᔫᑉ ᓄᓇᕗᒻᒧᑦ ᑐᕌᖓᔪᑦ ᐅᖃᖅᑎᖓᓄᑦ ᒪᓕᒐᓕᐅᖅᕕᐅᑉ ᐱᔾᔪᑎᖃᖅᑐᑦ ᐱᓕᕆᐊᖑᔪᒥᒃ ᐃᒻᒥᒧᑦ ᖃᓂᒃᓴᓗᐊᕐᓂᐅᑐᐃᓐᓇᕆᐊᓕᒻᒥᒃ ᐱᔾᔪᑎᖃᖅᑐᒥᒃ ᑎᒃᑯᐊᖅᑕᐅᓂᖓᓂᒃ ᐊᑕᑲᐃᓐᓇᖅᑐᖅ ᒥᓂᔅᑕᐅᑉ ᑐᖏᓕᖓ ᐃᖅᑲᓇᐃᔭᖅᑐᓕᕆᔨᒃᑯᑦ ᐱᓕᕆᕕᖓᓕ.

ᐃᓗᓕᖏᑦ ᑎᑎᕋᖅᓯᒪᔪᑦ ᓈᓴᐅᑎᓖᑦ 48-ᒥᑦ ᓱᓕᑦᑎᐊᕆᐊᖃᕐᓂᕐᒧᑦ ᐱᖁᔭᕐᔪᐊᕐᒥ ᐱᒋᐊᖃᖅᑎᑎᒻᒪᑕ ᑖᓐᓇ ᒪᓕᒐᓕᐅᖅᕕᒻᒥᑦ ᐃᒫᒃ: “ᐃᓱᒪᒃᓴᖅᓯᐅᕈᑎᖃᕐᓂᐊᖅᐳᖅ ᐅᓂᒃᑳᓕᐊᒥᓂᕐᓂᒃ ᒪᓕᒐᓕᐅᖅᕕᐅᑉ ᓵᖓᓅᖅᑕᐅᓚᐅᖅᑎᓪᓗᒋᑦ ᐃᓗᐊᓂ ᐅᓪᓗᐃᑦ ᖁᓖᑦ (10), ᐊᒻᒪᓗ ᑭᐅᔾᔪᑎᓕᐅᕐᓂᐊᖅᐳᖅ ᐅᓂᒃᑳᓕᐊᒥᓂᕐᓄᑦ ᑲᑎᒪᕐᔪᐊᕐᓂᖓ ᓴᖅᑭᖅᓯᕕᐅᔪᖅ ᐅᓂᒃᑳᓕᐊᒥᓂᕐᓂᒃ ᓵᖏᓐᓄᑦ, ᐃᓱᓕᓚᐅᖅᑎᓐᓇᒍ.”

ᐊᔾᔨᖏᑦ ᐅᓂᒃᑳᓕᐊᒥᓂᐅᑉ ᐲᔭᖅᑕᐅᔪᓐᓇᖅᑐᑦ ᒪᓕᒐᓕᐅᖅᕕᐅᑉ ᖃᕋᓴᐅᔭᒃᑯᑦ ᐃᑭᐊᖅᑭᕕᖓᓂᑦ ᐅᕙᓐᖓᑦ www.assembly.nu.ca.

ᐃᖃᓗᐃᑦ, ᓄᓇᕗᑦ (ᒫᔾᔨ 1, 2022) – ᒪᑐᕕᒃᓴᖓ ᓂᕈᐊᕋᒃᓴᓕᐅᕈᒪᔪᓄᑦ ᓄᓇᕗᒻᒥ ᐱᓕᕆᑦᑎᐊᖅᓯᒪᔪᓂᒃ ᐃᓕᑕᖅᓯᔾᔪᑎᒧᑦ ᐅᔭᒥᑦᑕᐅᖁᔨᓂᕐᒧᑦ ᐅᖓᕙᕆᐊᖅᑕᐅᓯᒪᓕᖅᑯᖅ ᑕᐃᑯᖓ ᒫᑦᓯ 31, 2022.

ᔮᓐᓄᐊᕆ 1, 2010−ᒥ, ᓄᓇᕗᒻᒥ ᐃᓕᓴᖅᓯᔾᔪᑦ ᐅᔭᒥᐅᑉ ᐱᖁᔭᕐᔪᐊᖓᑦ ᐊᑐᓕᓚᐅᖅᓯᒪᕗᖅ. ᑖᓐᓇ ᐃᓕᓴᖅᓯᔾᔪᑦ ᒪᓕᒐᖅᑎᒍᑦ ᑐᕌᒐᖃᖅᑎᑕᐅᔪᖅ ᐅᑯᓂᖓ “ᐅᐱᓗᒋᑦ ᐃᓄᐃᑦ ᐃᑲᔪᕐᓂᖃᓪᓚᕆᒃᓯᒪᔪᑦ ᐱᖅᑯᓯᑐᖃᖅᑎᒍᑦ, ᐃᓅᓯᓕᕆᓂᒃᑯᑦ ᐅᕝᕙᓘᓐᓃᑦ ᑮᓇᐅᔭᓕᐅᕋᓱᐊᕐᓂᒃᑯᑦ ᓄᓇᕗᒻᒥ.” ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᑦ ᓄᓇᕗᒻᒥ ᖁᕝᕙᓯᖕᓂᖅᐹᖑᕗᖅ ᐊᒻᒪ ᖁᑦᑎᓂᖅᐹᖑᓪᓗᓂ ᐃᓘᓐᓇᖏᓐᓂᒃ ᐊᓯᖏᓐᓂᒃ ᐃᓕᓴᖅᓯᔾᔪᑎᓂᒃ, ᐅᔭᒥᖕᓂᒃ ᐅᕝᕙᓘᓐᓃᑦ ᓴᕝᕕᒻᒥᐅᑕᕐᓂᒃ ᑐᓐᓂᖅᑯᑕᕕᓂᕐᓂᒃ ᓄᓇᕗᑦ ᒐᕙᒪᒃᑯᓐᓂᑦ. ᐃᓚᒋᔭᐅᓕᕐᓂᖓ ᓄᓇᕗᒻᒥ ᐱᓕᕆᑦᑎᐊᕐᓂᑯᓂᒃ ᐃᓕᓴᖅᓯᔾᔪᑎᑦ ᑕᕝᕙᓂ ᑲᓇᑕᒥ ᐃᓕᓴᕆᔭᐅᖃᑦᑕᖅᓯᒪᔪᓄᑦ ᓇᓗᓇᐃᖅᑕᐅᓚᐅᖅᓯᒪᒻᒪᑦ 2018-ᒥ ᒐᕙᒪᑐᖃᒃᑯᑦ ᒪᓕᑦᑕᐅᖁᔭᖓᒍᑦ ᑲᑎᒪᓂᕐᒥ ᐊᖏᖅᑕᐅᔪᔪᒧᑦ ᑯᐃᓐ ᑭᒡᒐᑐᖅᑎᖓᓄᑦ.

ᐃᖃᓗᐃᑦ, ᓄᓇᕗᑦ (ᕕᕗᐊᕆ 18, 2022) - 6−ᒋᔭᖓᓐᓂ ᒪᓕᒐᓕᐅᖅᑏᑦ ᓯᕗᓪᓕᖅᐹᒥᒃ ᐅᑭᐅᖅᓯᐅᒻᒥᒃ ᑲᑎᒪᕐᔪᐊᓯᒋᐊᕐᓂᐊᖅᑐᑦ 1:30−ᒥ ᐅᓐᓄᓴᒃᑯᑦ, ᓇᒡᒐᔾᔭᐅᒥ, ᒫᔾᔨ 7, 2022−ᒥ, ᒪᓕᒃᖢᒍ ᓇᓗᓇᐃᖅᓯᔾᔪᑦ ᑕᒪᑐᒪᓂ ᐱᓇᓱᐊᕈᓯᕐᒥ ᐊᑎᓕᐅᖅᑕᐅᓚᐅᖅᑐᖅ ᓄᓇᕗᑦ ᑲᒥᓴᓇᖓᓐᓄᑦ.

ᐃᖃᓗᒃᑑᑦᑎᐊᖅ, ᓄᓇᕗᑦ (ᑎᓯᐱᕆ 13, 2021) - ᓄᓇᕗᑦ ᒪᓕᒐᓕᐅᕐᕕᐊᑕ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᐊᕗᑎᓯᒪᓪᓗᑎᒃ ᐸᕐᓇᐃᓂᕐᒧᑦ ᑲᑎᒫᓂᑦᑎᐊᓚᐅᖅᐳᑦ ᑎᓯᐱᕆ 10, 2021−ᒥ.

“ᐊᕗᑎᓯᒪᓪᓗᑕ ᑲᑎᒪᓂᕗᑦ ᐱᒋᐊᕈᑎᖃᓚᐅᖅᐳᑦ ᐊᑐᖅᑕᐅᓚᐅᖅᓯᒪᓐᖏᑦᑐᓂᒃ ᐅᖃᖃᑎᒌᖕᓂᖃᖅᖢᑎᒃ ᒪᓕᒐᓕᐅᖅᑏᑦ ᐊᒻᒪ ᓯᕗᒃᑲᖅᑕᖅᑎᒋᔭᐅᔪᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖁᑕᓄᑦ ᐊᒻᒪ ᐃᓚᐅᔪᓕᒫᖑᓪᓗᑎᒃ ᐊᕕᒃᑐᖅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖏᑦᑕ ᓯᕗᒃᑲᖅᑕᖅᑎᖏᑦ,” ᑕᐃᒪᓐᓇ ᐅᖃᓚᐅᖅᐳᖅ ᓯᕗᓕᖅᑎ ᐸᐅᓗᓯ ᐊᕿᐊᕈᖅ. “ᐊᖏᖅᓯᒪᑦᑎᐊᖅᐳᒍᑦ ᓄᑖᓐᖑᕆᐊᖅᑎᑦᑎᔪᒪᓂᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒥᒡᓗ ᐃᖅᑲᓇᐃᔭᖃᑎᒌᖕᓂᕐᒥᒃ ᐅᐱᒌᒡᓗᑕ ᐊᒻᒪ ᐊᖏᖃᑎᒌᒃᓯᒪᓗᑕ ᑲᑐᔾᔨᖃᑎᒌᖕᓂᒃᑯᓪᓗ ᐱᓯᒋᐊᓯᖅᑎᑦᑎᓇᓱᒡᓗᑕ ᐱᕐᔪᐊᓂᒃ, ᓲᕐᓗ ᐃᒡᓗᓕᕆᓂᕐᒥᒃ.”

ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᑕᓪᓕᒪᓪᓗᐊᑕᕐᓂᒃ ᓯᕗᓪᓕᐅᔾᔨᓯᒪᕗᑦ ᓄᑖᑦ ᒐᕙᒪᒃᑯᑦ ᐱᓕᕆᐊᓪᓗᐊᑕᕆᓂᐊᖅᑕᖏᓐᓂᒃ:

ᐃᖃᓗᐃᑦ, ᓄᓇᕗᑦ (ᑎᓯᐱᕆ1, 2021) - ᒪᓕᒐᓕᐅᖅᕕᐅᑉ ᒪᓕᒐᓕᐅᖅᑎᓕᒫᖏᑕ ᑲᑎᒪᔨᖏᑦ ᑲᑎᒪᖃᑦᑕᓛᖅᑐᑦ ᑎᓯᐱᕆ 6-ᒥᑦ−10-ᒧᑦ, 2021-ᒥ, ᑐᑭᒧᐊᒍᑎᒃᓴᕐᓂᑦ ᐸᕐᓇᐅᑎᓕᐅᕐᓗᑎᒃ ᕿᒪᕉᑎᓯᒪᓂᕐᒥ ᑲᑎᒪᓂᖃᕐᓗᑎᒃ.

ᓯᕗᓕᖅᑎ ᐊᕿᐊᕈᖅ ᖃᐃᖅᑯᔨᓚᐅᕐᒥᔪᖅ ᑲᑎᒪᔨᐅᖃᑕᐅᔪᓂᒃ ᓄᓇᕗᑦ ᑐᓐᖓᕕᒃᑯᑦ ᑲᑎᒪᔨᖏᓐᓂ ᑲᑎᒪᖃᑕᐅᖁᓪᓗᒋᑦ ᒪᓕᒐᓕᐅᖅᑎᓕᒫᑦ ᕿᒪᕉᑎᓯᒪᓗᑎᒃ ᑲᑎᒪᓂᖏᑕ ᐅᓪᓗᖓᓂ ᓯᕗᓪᓕᖅᐹᖓᓂ. ᑕᒪᓐᓇ ᓯᕗᓪᓕᐹᑦᑎᐊᖑᔪᖅ ᑖᒃᑯᐊ ᒪᓕᒐᓕᐅᖅᑎᓕᒫᑦ ᐊᒻᒪᓗ ᓄᓇᕗᒻᒥ ᐃᓄᐃᑦ ᑎᒥᖁᑎᖏᑦ ᑲᑎᖁᔭᐅᓯᒪᑎᓪᓗᒋᑦ ᑲᑐᔾᔨᖃᑕᐅᖁᔭᐅᓪᓗᑎᒃ ᑐᑭᒧᐊᒍᑎᒃᓴᕐᓂᑦ ᐸᕐᓇᐅᑎᓕᐅᖅᑎᓪᓗᒋᑦ ᓴᖅᑭᖅᓯᔾᔪᑎᐅᓛᖅᑐᓂᒃ ᓄᓇᕗᑦ ᒐᕙᒪᖓᑕ ᑐᕋᖅᑕᕆᓂᐊᖅᑕᖏᓐᓂᑦ.

ᐃᖃᓗᐃᑦ, ᓄᓇᕗᑦ (ᓄᕕᐱᕆ 30, 2021) - ᒪᓕᒐᓕᐅᖅᕕᖓᑦ ᓄᓇᕗᒻᒥ ᐃᓚᐅᖃᑕᐅᓛᕐᒪᑦ ᐊᓯᖏᓐᓄᑦ ᒐᕙᒪᖃᖅᕕᐅᔪᓄᑦ ᑲᓇᑕᒥ ᐃᑭᑦᑎᓂᖃᖅᑎᓪᓗᒋᑦ ᖃᐅᒪᖁᑎᒋᓂᐊᖅᑕᖏᓐᓂᑦ ᖁᕕᐊᓱᒃᕕᒻᒥ ᐃᓚᒋᔭᐅᓗᑎᒃ 2021-ᒥ ᖁᕕᐊᓱᒃᕕᒃᓯᐅᑏᑦ ᖃᐅᒻᒪᖅᑯᑏᑦ ᑲᓇᑕᓕᒫᒥ ᐊᑕᐅᑦᑎᒃᑯᑦ ᐃᑭᑦᑕᐅᓂᖏᑦ.

ᐅᖃᖅᑎ ᑑᓂ ᐋᖁᐊᖅ ᓇᓗᓇᐃᖅᓯᖅᑲᐅᔪᖅ ᐃᒪᓐᓇ, “ᐊᕐᕌᒍᑕᒫᖅ ᖁᕕᐊᓱᒃᕕᒃᓯᐅᑎᓂᑦ ᐃᑭᑦᑎᓂᐅᔪᖅ ᐱᒋᐊᓛᖅᑐᖅ 5:15-ᒥ ᐅᓐᓄᓴᒃᑯᑦ ᑎᓴᒻᒥᐅᓕᖅᑲᑦ, ᑎᓯᐱᕆ 2, 2021. ᓄᓇᕗᒻᒥᐅᑕᐃᑦ ᑐᓐᖓᓱᑦᑎᑕᐅᑦᑎᐊᖅᐳᑦ ᑲᑎᓯᖁᔭᐅᓪᓗᑎᒃ ᓯᕗᓕᖅᑎ ᐊᕿᐊᕈᕐᒥᑦ ᖁᕕᐊᓱᒃᕕᐅᓂᐊᖅᑐᖅ ᑐᓐᖓᓱᐊᑎᑕᐅᑎᓪᓗᒍ.”

ᑖᓐᓇ ᑲᑎᓐᓂᐅᓛᖅᑐᖅ ᓯᓚᒥᐅᓛᖅᑑᒐᓗᐊᖅ, ᑭᓯᐊᓂᓕ ᐅᐸᒃᓯᒪᔪᑦ ᑲᒪᑦᑎᐊᖁᔭᐅᕗᑦ ᑭᒃᑯᓕᒫᓄᑦ ᒪᓕᑦᑕᐅᖁᔭᐅᓯᒪᔪᓂᒃ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᑲᓂᒌᓗᐊᕆᐊᖃᓐᖏᓂᕐᒧᑦ ᐊᒻᒪᓗ ᑮᓇᒃᑯᑦ ᒪᑐᐊᖅᓯᒪᒋᐊᖃᕐᓂᐅᔪᓂᑦ.

ᐃᖃᓗᐃᑦ, ᓄᓇᕗᑦ, (ᓄᕕᐱᕆ 22, 2021) – ᐅᖃᖅᑎ ᑑᓂ ᐊᖁᐊᖅ ᐅᓪᓗᒥ ᑐᓴᖅᑕᐅᑎᑦᑎᒃᑲᐅᕗᖅ ᑕᐃᒃᑯᐊ ᒪᓕᒐᓕᐅᖅᕕᐅᑉ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᓇᓗᓇᐃᖅᓯᓯᒪᓕᕐᓂᕋᖅᑐᒋ ᑲᑎᒪᕐᔪᐊᖅᑐᑦ ᐱᒋᐊᒃᑲᓐᓂᓛᕐᒪᑦ ᓇᒡᒐᔾᔭᐅᖑᓕᖅᐸᑦ, ᕕᕝᕗᐊᕆ 21, 2022−ᒥ, ᐅᑭᐅᒃᑯᑦ ᐃᒃᓯᕙᓂᖏᓐᓄᑦ. ᑖᓐᓇ ᐅᓪᓗᖅ ᓇᓗᓇᐃᖅᑕᐅᑦᑎᐊᓛᖅᑐᖅ ᒪᓕᒐᓕᐅᖅᕕᒻᒥᑦ ᑐᓴᖅᑕᐅᑎᑦᑎᔾᔪᑎᑎᒍᑦ.

ᓯᕗᓕᖅᑎ ᐸᐅᓗᓯ ᐊᕿᐊᕈᖅ ᐅᖃᖅᑐᖅ, “ᑲᑎᒪᕐᔪᐊᕕᒻᒥ ᑭᖑᓪᓕᕐᒥ ᐃᒃᓯᕙᓂᖅ ᐱᒋᐊᓚᐅᓐᖏᓐᓂᖓᓂ, ᒪᓕᒐᓕᐅᖅᑎᓕᒫᑦ ᑲᑎᓛᖅᑐᑦ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᐱᓕᕆᐊᖃᕆᐊᓕᖅᐸᑕ ᐱᒻᒪᕆᐊᓘᔪᒥᒃ ᖃᑐᑎᔭᐅᔪᒥᒃ ᓇᓗᓇᐃᖅᑐᐃᓂᕐᒥᒃ ᑐᕌᖅᑕᕆᓂᐊᖅᑕᖏᓐᓂᑦ ᓂᕈᐊᖅᑕᐅᓯᒪᕕᖏᓐᓂ ᐊᑕᑎᓪᓗᒋᑦ. ᓂᕆᐅᑦᑎᐊᖅᐳᖓ ᒪᓕᒐᓕᐅᖅᕕᒻᒧᑦ ᓴᖅᑭᖅᓯᓛᕐᓂᕆᔭᓐᓂᒃ ᒐᕙᒪᒃᑯᑦ ᑐᕌᖅᑕᕆᓂᐊᖅᑕᖏᓐᓂᑦ ᐱᔪᓐᓇᖅᓯᑐᐊᕈᒪ.”

ᐃᖃᓗᐃᑦ, ᓄᓇᕗᑦ (ᓄᕕᐱᕆ 17, 2021) - ᓄᓇᕗᑦ ᐅᖃᖅᑎᒋᓂᐊᖅᑕᖓᑦ, ᓯᕗᓕᖅᑎᒋᓂᐊᖅᑕᖓᓪᓗ ᐊᒻᒪᓗ ᐊᐅᓚᑦᓯᔩᑦ ᑲᑎᒪᔨᒃᓴᖏᑦ ᐅᓪᓗᒥ ᓂᕈᐊᖅᑕᐅᖅᑲᐅᕗᑦ ᓄᓇᕗᒥ ᒪᓕᒐᓕᐅᖅᑏᑦ ᑲᑎᒪᔨᖏᑦ ᓯᕗᓕᖅᑎᒃᓴᓄᑦ ᑲᑎᒪᔾᔪᑎᖃᖅᑎᓪᓗᒋᑦ. ᑲᑎᒪᑎᓪᓗᒋᑦ ᓯᕗᓕᖅᑎᒃᓴᓄᑦ ᑲᑎᒪᖃᑕᐅᓚᐅᖅᑐᑦ ᐃᓘᓐᓇᑦᓯᐊᖏᑦ ᒪᓕᒐᓕᐅᖅᑎᐅᖃᑕᐅᔪᑦ.

ᑑᓂ ᐋᖁᐊᖅ, ᒪᓕᒐᓕᐅᖅᑎᖓᑦ ᐅᖅᓱᖅᑑᕐᒧᑦ, ᓂᕈᐊᖅᑕᐅᓚᐅᖅᑐᖅ ᓂᕈᐊᒐᒃᓴᑑᓪᓗᓂ ᐅᖃᖅᑎᓐᖑᖅᑐᖅ.

ᐱᖓᓱᑦ ᒪᓕᒐᓕᐅᖅᑏᑦ ᓂᕈᐊᒐᒃᓴᓐᖑᖅᑎᑕᐅᓚᐅᖅᑐᑦ ᓯᕗᓕᖅᑎᐅᓂᕐᒧᑦ, ᐸᐅᓗᓯ ᐊᕿᐊᕈᖅ, ᒪᓕᒐᓕᐅᖅᑎ ᐃᖃᓗᐃᑦ−ᓂᐊᖁᓐᖒᒧᑦ, ᓯᕗᓕᖅᑎᐅᓂᕐᒧᑦ ᓂᕈᐊᖅᑕᐅᓚᐅᖅᑐᖅ.

ᐃᖃᓗᐃᑦ, ᓄᓇᕗᑦ (ᓄᕕᐱᕆ 15, 2021) - ᒪᓕᒐᓕᐅᖅᑏᑦ ᑲᑎᒪᔨᖏᑦ ᐅᓪᓗᒥ ᓇᓗᓇᐃᖅᓯᕗᑦ 2021−ᒥ ᓄᓇᕗᒻᒥ ᓯᕗᓕᐅᖅᑎᓂᒃ ᕿᒥᕐᕈᓇᖕᓂᐅᓂᐊᖅᑑᑉ ᐅᓪᓗᖓᓐᓂᒃ ᖃᓄᕐᓗ ᐋᖅᑭᒃᓯᒪᓂᐊᕐᒪᖔᕐᒥᓂᒃ. ᑲᑎᒪᔨᐅᓂᕋᖅᑕᐅᕗᑦ ᒪᓕᒐᓕᐅᖅᑎᓕᒫᑦ ᐃᓚᐅᔪᐃᓐᓇᐅᑎᓪᓗᒋᑦ.

ᑖᓐᓇ ᑲᑎᒪᓂᖅ ᐊᑐᖅᑕᐅᓂᐊᖅᐳᖅ ᑲᑎᒪᕐᔪᐊᕐᕕᐊᓂ ᒪᓕᒐᓕᐅᕐᕕᐅᑦ, ᐱᒋᐊᕐᓗᓂ 10:00-ᒥ ᐅᓪᓛᒃᑯᑦ (ᑲᓇᖕᓇᐅᑦ ᓯᕿᖖᒍᔭᖓ) ᐱᖓᑦᑎᕐᒥ, ᓄᕕᐱᕆ 17, 2021-ᖑᓕᖅᐸᑦ. ᐅᖃᖅᑎᐅᑉ, ᓯᕗᓕᖅᑎᐅᑉ ᐊᒻᒪ ᒥᓂᔅᑕᐃᑦ ᑲᑎᒪᔨᖏᑦ ᐸᐃᑉᐹᑎᒍᑦ ᓂᕈᐊᖅᑕᐅᓂᐊᖅᑐᑦ. ᓯᕗᓪᓕᖅᐹᖅ ᐱᓕᕆᐊᖑᓂᐊᖅᑐᖅ ᐅᖃᖅᑎᐅᑉ ᓂᕈᐊᖅᑕᐅᓂᖓ. ᐅᖃᖅᑎᓐᖑᖅᑎᑕᖅ ᐊᐅᓚᑦᓯᔨᐅᓂᐊᖅᑐᖅ ᑲᑎᒪᔩᑦ ᑲᑎᒪᓂᖓᓐᓂᒃ.