Yes

ᐃᖃᓗᐃᑦ, ᓄᓇᕗᑦ (ᓄᕕᐱᕆ 30, 2021) - ᒪᓕᒐᓕᐅᖅᕕᖓᑦ ᓄᓇᕗᒻᒥ ᐃᓚᐅᖃᑕᐅᓛᕐᒪᑦ ᐊᓯᖏᓐᓄᑦ ᒐᕙᒪᖃᖅᕕᐅᔪᓄᑦ ᑲᓇᑕᒥ ᐃᑭᑦᑎᓂᖃᖅᑎᓪᓗᒋᑦ ᖃᐅᒪᖁᑎᒋᓂᐊᖅᑕᖏᓐᓂᑦ ᖁᕕᐊᓱᒃᕕᒻᒥ ᐃᓚᒋᔭᐅᓗᑎᒃ 2021-ᒥ ᖁᕕᐊᓱᒃᕕᒃᓯᐅᑏᑦ ᖃᐅᒻᒪᖅᑯᑏᑦ ᑲᓇᑕᓕᒫᒥ ᐊᑕᐅᑦᑎᒃᑯᑦ ᐃᑭᑦᑕᐅᓂᖏᑦ.

ᐅᖃᖅᑎ ᑑᓂ ᐋᖁᐊᖅ ᓇᓗᓇᐃᖅᓯᖅᑲᐅᔪᖅ ᐃᒪᓐᓇ, “ᐊᕐᕌᒍᑕᒫᖅ ᖁᕕᐊᓱᒃᕕᒃᓯᐅᑎᓂᑦ ᐃᑭᑦᑎᓂᐅᔪᖅ ᐱᒋᐊᓛᖅᑐᖅ 5:15-ᒥ ᐅᓐᓄᓴᒃᑯᑦ ᑎᓴᒻᒥᐅᓕᖅᑲᑦ, ᑎᓯᐱᕆ 2, 2021. ᓄᓇᕗᒻᒥᐅᑕᐃᑦ ᑐᓐᖓᓱᑦᑎᑕᐅᑦᑎᐊᖅᐳᑦ ᑲᑎᓯᖁᔭᐅᓪᓗᑎᒃ ᓯᕗᓕᖅᑎ ᐊᕿᐊᕈᕐᒥᑦ ᖁᕕᐊᓱᒃᕕᐅᓂᐊᖅᑐᖅ ᑐᓐᖓᓱᐊᑎᑕᐅᑎᓪᓗᒍ.”

ᑖᓐᓇ ᑲᑎᓐᓂᐅᓛᖅᑐᖅ ᓯᓚᒥᐅᓛᖅᑑᒐᓗᐊᖅ, ᑭᓯᐊᓂᓕ ᐅᐸᒃᓯᒪᔪᑦ ᑲᒪᑦᑎᐊᖁᔭᐅᕗᑦ ᑭᒃᑯᓕᒫᓄᑦ ᒪᓕᑦᑕᐅᖁᔭᐅᓯᒪᔪᓂᒃ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᑲᓂᒌᓗᐊᕆᐊᖃᓐᖏᓂᕐᒧᑦ ᐊᒻᒪᓗ ᑮᓇᒃᑯᑦ ᒪᑐᐊᖅᓯᒪᒋᐊᖃᕐᓂᐅᔪᓂᑦ.

ᐃᖃᓗᐃᑦ, ᓄᓇᕗᑦ, (ᓄᕕᐱᕆ 22, 2021) – ᐅᖃᖅᑎ ᑑᓂ ᐊᖁᐊᖅ ᐅᓪᓗᒥ ᑐᓴᖅᑕᐅᑎᑦᑎᒃᑲᐅᕗᖅ ᑕᐃᒃᑯᐊ ᒪᓕᒐᓕᐅᖅᕕᐅᑉ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᓇᓗᓇᐃᖅᓯᓯᒪᓕᕐᓂᕋᖅᑐᒋ ᑲᑎᒪᕐᔪᐊᖅᑐᑦ ᐱᒋᐊᒃᑲᓐᓂᓛᕐᒪᑦ ᓇᒡᒐᔾᔭᐅᖑᓕᖅᐸᑦ, ᕕᕝᕗᐊᕆ 21, 2022−ᒥ, ᐅᑭᐅᒃᑯᑦ ᐃᒃᓯᕙᓂᖏᓐᓄᑦ. ᑖᓐᓇ ᐅᓪᓗᖅ ᓇᓗᓇᐃᖅᑕᐅᑦᑎᐊᓛᖅᑐᖅ ᒪᓕᒐᓕᐅᖅᕕᒻᒥᑦ ᑐᓴᖅᑕᐅᑎᑦᑎᔾᔪᑎᑎᒍᑦ.

ᓯᕗᓕᖅᑎ ᐸᐅᓗᓯ ᐊᕿᐊᕈᖅ ᐅᖃᖅᑐᖅ, “ᑲᑎᒪᕐᔪᐊᕕᒻᒥ ᑭᖑᓪᓕᕐᒥ ᐃᒃᓯᕙᓂᖅ ᐱᒋᐊᓚᐅᓐᖏᓐᓂᖓᓂ, ᒪᓕᒐᓕᐅᖅᑎᓕᒫᑦ ᑲᑎᓛᖅᑐᑦ ᒪᓕᒐᓕᐅᖅᑎᓕᒫᑦ ᑲᑎᒪᔨᖏᑦ ᐱᓕᕆᐊᖃᕆᐊᓕᖅᐸᑕ ᐱᒻᒪᕆᐊᓘᔪᒥᒃ ᖃᑐᑎᔭᐅᔪᒥᒃ ᓇᓗᓇᐃᖅᑐᐃᓂᕐᒥᒃ ᑐᕌᖅᑕᕆᓂᐊᖅᑕᖏᓐᓂᑦ ᓂᕈᐊᖅᑕᐅᓯᒪᕕᖏᓐᓂ ᐊᑕᑎᓪᓗᒋᑦ. ᓂᕆᐅᑦᑎᐊᖅᐳᖓ ᒪᓕᒐᓕᐅᖅᕕᒻᒧᑦ ᓴᖅᑭᖅᓯᓛᕐᓂᕆᔭᓐᓂᒃ ᒐᕙᒪᒃᑯᑦ ᑐᕌᖅᑕᕆᓂᐊᖅᑕᖏᓐᓂᑦ ᐱᔪᓐᓇᖅᓯᑐᐊᕈᒪ.”

ᐃᖃᓗᐃᑦ, ᓄᓇᕗᑦ (ᓄᕕᐱᕆ 17, 2021) - ᓄᓇᕗᑦ ᐅᖃᖅᑎᒋᓂᐊᖅᑕᖓᑦ, ᓯᕗᓕᖅᑎᒋᓂᐊᖅᑕᖓᓪᓗ ᐊᒻᒪᓗ ᐊᐅᓚᑦᓯᔩᑦ ᑲᑎᒪᔨᒃᓴᖏᑦ ᐅᓪᓗᒥ ᓂᕈᐊᖅᑕᐅᖅᑲᐅᕗᑦ ᓄᓇᕗᒥ ᒪᓕᒐᓕᐅᖅᑏᑦ ᑲᑎᒪᔨᖏᑦ ᓯᕗᓕᖅᑎᒃᓴᓄᑦ ᑲᑎᒪᔾᔪᑎᖃᖅᑎᓪᓗᒋᑦ. ᑲᑎᒪᑎᓪᓗᒋᑦ ᓯᕗᓕᖅᑎᒃᓴᓄᑦ ᑲᑎᒪᖃᑕᐅᓚᐅᖅᑐᑦ ᐃᓘᓐᓇᑦᓯᐊᖏᑦ ᒪᓕᒐᓕᐅᖅᑎᐅᖃᑕᐅᔪᑦ.

ᑑᓂ ᐋᖁᐊᖅ, ᒪᓕᒐᓕᐅᖅᑎᖓᑦ ᐅᖅᓱᖅᑑᕐᒧᑦ, ᓂᕈᐊᖅᑕᐅᓚᐅᖅᑐᖅ ᓂᕈᐊᒐᒃᓴᑑᓪᓗᓂ ᐅᖃᖅᑎᓐᖑᖅᑐᖅ.

ᐱᖓᓱᑦ ᒪᓕᒐᓕᐅᖅᑏᑦ ᓂᕈᐊᒐᒃᓴᓐᖑᖅᑎᑕᐅᓚᐅᖅᑐᑦ ᓯᕗᓕᖅᑎᐅᓂᕐᒧᑦ, ᐸᐅᓗᓯ ᐊᕿᐊᕈᖅ, ᒪᓕᒐᓕᐅᖅᑎ ᐃᖃᓗᐃᑦ−ᓂᐊᖁᓐᖒᒧᑦ, ᓯᕗᓕᖅᑎᐅᓂᕐᒧᑦ ᓂᕈᐊᖅᑕᐅᓚᐅᖅᑐᖅ.

ᐃᖃᓗᐃᑦ, ᓄᓇᕗᑦ (ᓄᕕᐱᕆ 15, 2021) - ᒪᓕᒐᓕᐅᖅᑏᑦ ᑲᑎᒪᔨᖏᑦ ᐅᓪᓗᒥ ᓇᓗᓇᐃᖅᓯᕗᑦ 2021−ᒥ ᓄᓇᕗᒻᒥ ᓯᕗᓕᐅᖅᑎᓂᒃ ᕿᒥᕐᕈᓇᖕᓂᐅᓂᐊᖅᑑᑉ ᐅᓪᓗᖓᓐᓂᒃ ᖃᓄᕐᓗ ᐋᖅᑭᒃᓯᒪᓂᐊᕐᒪᖔᕐᒥᓂᒃ. ᑲᑎᒪᔨᐅᓂᕋᖅᑕᐅᕗᑦ ᒪᓕᒐᓕᐅᖅᑎᓕᒫᑦ ᐃᓚᐅᔪᐃᓐᓇᐅᑎᓪᓗᒋᑦ.

ᑖᓐᓇ ᑲᑎᒪᓂᖅ ᐊᑐᖅᑕᐅᓂᐊᖅᐳᖅ ᑲᑎᒪᕐᔪᐊᕐᕕᐊᓂ ᒪᓕᒐᓕᐅᕐᕕᐅᑦ, ᐱᒋᐊᕐᓗᓂ 10:00-ᒥ ᐅᓪᓛᒃᑯᑦ (ᑲᓇᖕᓇᐅᑦ ᓯᕿᖖᒍᔭᖓ) ᐱᖓᑦᑎᕐᒥ, ᓄᕕᐱᕆ 17, 2021-ᖑᓕᖅᐸᑦ. ᐅᖃᖅᑎᐅᑉ, ᓯᕗᓕᖅᑎᐅᑉ ᐊᒻᒪ ᒥᓂᔅᑕᐃᑦ ᑲᑎᒪᔨᖏᑦ ᐸᐃᑉᐹᑎᒍᑦ ᓂᕈᐊᖅᑕᐅᓂᐊᖅᑐᑦ. ᓯᕗᓪᓕᖅᐹᖅ ᐱᓕᕆᐊᖑᓂᐊᖅᑐᖅ ᐅᖃᖅᑎᐅᑉ ᓂᕈᐊᖅᑕᐅᓂᖓ. ᐅᖃᖅᑎᓐᖑᖅᑎᑕᖅ ᐊᐅᓚᑦᓯᔨᐅᓂᐊᖅᑐᖅ ᑲᑎᒪᔩᑦ ᑲᑎᒪᓂᖓᓐᓂᒃ.

ᐃᖃᓗᐃᑦ, ᓄᓇᕗᑦ (ᓯᑎᐱᕆ 8, 2021) - ᐃᓱᓕᑦᑎᕙᓪᓕᐊᓕᖅᑎᓪᓗᒋᑦ ᑲᑎᒪᕐᔪᐊᕐᓇᖅ ᐱᒋᐊᕐᓂᐊᖅᑐᖅ 1:30−ᒥ ᐅᓐᓄᓴᒃᑯᑦ ᑎᓴᒻᒥᕐᒥ, ᓯᑎᐱᕆ 9, 2021−ᖑᓕᖅᐸᑦ.

ᑭᒃᑯᑐᐃᓐᓇᐃᑦ ᐃᓯᑐᐃᓐᓇᕈᓐᓇᔾᔮᓐᖏᑦᑐᑦ ᐳᓛᕆᐊᕐᕕᖕᒦᑦᑐᓐᓇᔾᔮᕋᑎᒡᓗ ᓄᕙᒡᔪᐊᕐᓇᖅ 19 ᐱᔾᔪᑎᒋᓪᓗᒍ ᐊᒻᒪ ᒪᓕᒋᐊᓕᖕᓂᒃ ᒪᓕᒋᐊᖃᕐᓃᑦ ᐊᑐᖅᑎᓪᓗᒋᑦ, ᒪᓕᒐᓕᐅᖅᑎᓕᒫᑦ ᐅᐸᒃᑐᐃᓐᓇᐅᓂᐊᖅᑐᑦ. ᑕᓪᓕᒪᖓᓐᓂ ᒪᓕᒐᓕᐅᕐᕕᒃ ᓄᖑᑎᑕᐅᓂᐊᖅᑐᖅ ᓈᑦᑏᖑᔭᒥ, ᓯᑎᐱᕆ 19, 2021-ᒥ.

ᐃᖃᓗᐃᑦ, ᓄᓇᕗᑦ (ᐋᒡᒌᓯ 17, 2021) - ᐹᑦ ᐊᕐᓇᒃᑲᖅ, ᒪᓕᒐᓕᐅᖅᑎᐅᖃᑕᐅᔪᖅ ᒪᓕᒐᓕᐅᖅᕕᒻᒥ ᐃᖃᓄᐃᑦ−ᓂᐊᖁᓐᖒᒧᑦ, ᐅᓪᓗᒥ ᑐᓴᖅᑎᑎᖅᑲᐅᒻᒪᑦ ᐃᓱᒪᑖᕆᓯᒪᔭᖓᓂᒃ ᓄᖅᑲᕐᓂᕋᖅᑐᓂ ᐃᒃᓯᕙᐅᑕᕐᒥᓂᒃ ᒪᓕᒐᓕᐅᖅᑎᐅᖃᑕᐅᓪᓗᓂ ᒪᓕᒐᓕᐅᖅᕕᒻᒥ, ᒫᓐᓇᑦᑕᐅᑎᒋᓗ ᐊᑐᓕᕐᓗᓂ.

ᒥᔅ ᐊᕐᓇᒃᑲᖅ ᐅᖃᖅᑲᐅᔪᖅ, “ᐅᐱᓐᓇᕖᓐᖓᖅᓯᒪᔪᖅ ᐱᔨᑦᑎᕋᕆᐊᒃᓴᖅ ᒪᓕᒐᓕᐅᖅᑎᐅᓪᓗᖓ ᐃᖃᓗᐃᑦ−ᓂᐊᖁᓐᖒᒧᑦ. ᐊᒃᓱᐊᓗᒃ ᐃᓱᒪᒃᓴᖅᓯᐅᕈᑎᒋᓚᐅᖅᑐᒍ ᐊᒻᒪᓗ ᐃᓚᒃᑲ ᓂᕈᐊᖅᑎᒋᓯᒪᔭᒃᑲᓗ ᖃᐅᔨᒋᐊᖅᕕᒋᓚᐅᖅᑐᒋᑦ, ᐃᓱᒪᑖᖅᓯᒪᓕᕋᒪ ᐅᑉᐱᕆᔭᐅᒐᓱᐊᕈᒪᓪᓗᖓ ᓄᓇᕗᒻᒥᐅᓄᑦ ᑭᒡᒐᖅᑐᐃᔨᒋᔭᐅᔪᒪᓪᓗᖓ ᑲᓇᑕᐅᑉ ᑲᑎᒪᕐᔪᐊᖅᕕᖓᓂ.”

ᑕᓪᓕᒪᒋᔭᖓᑦ ᒪᓕᒐᓕᐅᖅᕕᒃ ᔭᒐᑎᑕᐅᓛᓕᕐᒪᑦ ᓯᑎᐱᕆ 19, 2021-ᒥ. 6−ᒋᔭᖓᑦ ᒪᓕᒐᓕᐅᖅᕕᒃ ᓂᕈᐊᕈᑎᐅᓛᓕᖅᑐᓂ ᐊᒃᑑᕝᕙ 25, 2021-ᒥ. ᑕᒪᓐᓇᓗ ᐱᔾᔪᑎᒋᓪᓗᒍ, ᓂᕈᐊᕐᓇᐅᑉ ᐊᑯᓐᓂᖓᒍᑦ ᓂᕈᐊᖅᑐᖃᕆᐊᖃᔾᔮᖏᑦᑐᖅ.

-30-

ᑐᑭᓯᒋᐊᕈᒪᒍᒃᓯ:

ᐃᖃᓗᐃᑦ, ᓄᓇᕗᑦ (May 26, 2021) - 2021−ᒥ ᐅᐱᕐᒑᒃᑯᑦ ᒪᓕᒐᓕᐅᕐᕕᖕᒥ ᐃᒃᓯᕙᓂᖓᑦ 1:30−ᒥ ᑎᓴᒻᒥᕐᒥ, ᒪᐃ 27, 2021. ᐃᒃᓯᕙᓛᖅᑐᑦ ᑕᓪᓕᒥᕐᒥ, ᒪᐃ 28, 2021, ᐱᒋᐊᕐᕕᑦᓴᖃᕐᓗᑎᒃ 2-ᒥ.

ᓄᕙᒡᔪᐊᕐᓇᖅ 19 ᓴᖅᑭᖅᓯᒪᓂᖓ ᐱᔾᔪᑕᐅᓪᓗᓂ, ᐅᐱᕐᒑᒥ ᐃᒃᓯᕙᓂᖓᑦ ᒪᕐᕈᐊᓕᖓᓂᖃᕐᓂᐊᖅᑐᖅ. ᐃᓚᖏᑦ ᒪᓕᒐᓕᐅᖅᑎᑦ ᑲᑎᒪᖃᑕᐅᓇᔭᖅᖢᑎᒃ ᐅᖓᓯᑦᑐᒥᑦ Zoom-ᑎᒍᑦ ᑲᓱᖅᓯᒪᓗᑎᒃ. ᒪᓕᒐᓕᐅᕐᕕᖕᒥ ᐃᒃᓯᕙᖃᑦᑕᕐᓂᐊᖅᑐᑦ ᐃᑲᕐᕋᖏᑦ ᐋᖅᑭᒋᐊᖅᓯᒪᕙᓪᓗᑎᒃ ᒪᕐᕈᐃᓕᖅᑲᖓᓂᐊᕐᓂᖏᓐᓄᑦ. ᑭᒃᑯᑐᐃᓐᓇᕐᓄᑦ ᓱᓕ ᐅᐸᒃᑕᐅᔪᓐᓇᔾᔮᖏᑦᑐᑦ ᐃᓯᕐᕕᖓ ᐳᓛᕐᕕᖓᓗ.

ᐃᖃᓗᐃᑦ, ᓄᓇᕗᑦ (ᐄᐳᕈ 15, 2021) - ᐱᔾᔪᑎᖃᖅᑐᑎᒃ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᒪᓕᑦᑕᐅᖁᓂᐊᓕᖅᑕᖏᓐᓂᑦ ᐅᖃᐅᓯᐅᓯᒪᔪᓂᒃ ᐋᓐᓂᐊᖃᕐᓇᖏᑦᑐᓕᕆᔨᒻᒪᕆᐅᑉ ᐊᓪᓚᕝᕕᖓᓄᑦ, ᑲᑎᒪᔨᕋᓛᑦ ᓇᐅᑦᓯᖅᑐᖅᑎᐅᔪᑦ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐊᒻᒪᓗ ᑮᓇᐅᔭᖅᑐᕈᑎᖏᓐᓄᑦ ᑭᖑᕙᕆᐊᖅᑎᑦᑎᕗᑦ ᑕᓚᕖᓴᒃᑰᕐᓗᑎᒃ ᓈᓚᓐᓂᖃᖅᑎᑦᑎᓂᕆᓂᐊᓚᐅᖅᑕᒥᓂᒃ ᐋᖅᑭᑦᑕᐅᓯᒪᔪᔪᒥᒃ ᐊᑐᖅᑕᐅᓂᐊᕐᓗᓂ ᐄᐳᕈ 19-ᒥᑦ 20-ᒧᑦ, 2021. ᑖᓐᓇ ᓈᓚᓐᓂᖅ ᖃᖓ ᐊᑐᖅᑕᐅᖔᓛᕐᒪᖔᖅ ᑕᖅᑲᐅᖓ ᐅᖃᐅᓯᐅᓛᑐᐃᓐᓇᖅᑐᖅ.

-30-

ᑐᑭᓯᒋᐊᕈᒪᒍᒃᓯ:
ᔮᓐ ᑯᕘᒃ, ᑎᑎᕋᖅᑎ ᒪᓕᒐᓕᐅᖅᕕᒻᒥ
ᐅᖄᓚᐅᑎᖓ: (867) 975-5000

ᐃᖃᓗᐃᑦ, ᓄᓇᕗᑦ (ᐄᐳᕈ 12, 2021) - ᒪᓕᒐᓕᐅᖅᕕᐅᑉ ᑲᑎᒪᔨᕋᓛᖏᑦ ᓇᐅᑦᓯᖅᑐᖅᑎᐅᔪᑦ ᒐᕙᒪᒃᑯᑦ ᐊᐅᓚᓂᖏᓐᓄᑦ ᐊᒻᒪᓗ ᑮᓇᐅᔭᖅᑐᕈᑎᖏᓐᓄᑦ ᑕᓚᕖᓴᒃᑯᑦ ᑕᑯᒃᓴᐅᑦᑕᐅᑎᒋᓗᑎᒃ ᓈᓚᓐᓂᖃᖅᑎᑦᑎᓛᕐᒪᑕ ᐄᐳᕈ 19-20, 2021, ᕿᒥᕐᕈᓂᖃᕐᓗᑎᒃ ᒫᓐᓇᓕᓴᐅᓛᖑᔪᓂᒃ ᐊᕐᕌᒍᑕᒫᖅᓯᐅᑎᓂᒃ ᐅᓂᒃᑳᓕᐊᒥᓂᕐᓂᒃ ᑭᒡᒐᖅᑐᐃᔨᐅᔪᒧᑦ ᓱᕈᓯᕐᓄᑦ ᒪᒃᑯᑦᑐᓄᓪᓗ. ᐅᓂᒃᑳᓕᐊᒥᓃᑦ ᖃᕋᓴᐅᔭᒃᑯᑦ ᐲᖅᑕᐅᔪᓐᓇᖅᑐᑦ ᐅᕙᓐᖓᑦ:

https://assembly.nu.ca/sites/default/files/TD-286-5(2)-EN-RCYNU-Annual-Report-2019-20.pdf

ᐊᒻᒪᓗ

https://rcynu.ca/sites/rcynu.ca/files/RCYO%202019-20%20Annual%20Report_English_web.pdf

ᐃᖃᓗᐃᑦ, ᓄᓇᕗᑦ (ᒫᔾᔨ 5, 2021) - ᒪᓕᒐᓕᐅᕐᕕᖕᒧᑦ ᐅᖃᖅᑎ ᐊᒻᒪ ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᖃᐅᔨᒪᔨᑕᑦ ᑲᑎᒪᔨᖏᑦᑕ ᐃᒃᓯᕙᐅᑕᖓᑦ, ᐹᐅᓕ ᖁᐊᓴ, ᐅᓪᓗᒥ ᓇᓗᓇᐃᖅᓯᖅᑲᐅᔪᖅ ᐲᑕ ᑖᐸᑕ ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᒻᒥᒃ ᐅᔭᒥᒃᑕᐅᓂᐊᖅᑐᖅ ᓇᒡᒐᔾᔭᐅᒥ, ᒫᔾᔨ 8, 2021−ᒥ, 6-ᒧᐊᖅᐸᑦ ᐅᓐᓄᒃᑯᑦ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᐊᓂ.