ᑲᑎᒪᔨᕋᓛᑦ ᓇᓗᓇᐃᖅᓯᕗᑦ ᑕᓚᕖᓴᒃᑯᑦ
ᑕᑯᒃᓴᐅᑲᐅᑎᒋᓗᑎᒃ ᓈᓚᖕᓂᖃᕐᓂᐊᕐᓂᕐᒥᓂᒃ ᐱᖁᔭᒃᓴᖅ 25 ᐱᓪᓗᒍ
ᐃᖃᓗᐃᑦ, ᓄᓇᕗᑦ (ᓄᕕᐱᕆ 8, 2019) - ᒪᓕᒐᓕᐅᕐᕕᐅᑉ ᑲᑎᒪᔨᕋᓛᖏᑦ ᐱᖁᔭᓕᕆᓂᕐᒧᑦ ᐅᓪᓗᒥ ᓇᓗᓇᐃᖅᓯᖅᑲᐅᕗᑦ ᑕᓚᕖᓴᒃᑯᑦ ᓴᖅᑭᔮᑲᐅᑎᒋᓗᑎᒃ ᓈᓚᖕᓂᐊᕐᓂᐊᕐᓂᕐᒥᑕ ᐱᖁᔭᒃᓴᖅ 25 ᐱᓪᓗᒍ, ᐱᖁᔭᓐᖑᖅᑎᑕᐅᔪᒪᔪᖅ ᐱᖁᔭᕐᔪᐊᖅ ᐋᖅᑭᒋᐊᖅᓯᔾᔪᑕᐅᓂᐊᖅᑐᖅ ᐃᓕᓐᓂᐊᕐᓂᓕᕆᓂᕐᒧᑦ ᐱᖁᔭᕐᔪᐊᕐᒥᒃ ᐊᒻᒪ ᐃᓄᐃᑦ ᐅᖃᐅᓯᖏᑕ ᓴᐳᒻᒥᐅᓯᖅᑕᐅᓯᒪᓂᖏᓐᓄᑦ ᐱᖁᔭᕐᔪᐊᖅ.
ᐃᖅᑲᓇᐃᔮᖅᑖᕈᒪᔪᑦ ᓄᓇᕗᒻᒥ ᐅᖃᐅᓯᓕᕆᓂᕐᒧᑦ ᑲᒥᓴᓇᐅᑉ ᐃᓂᖓᓄᑦ ᑐᓐᖓᓱᒃᑎᑕᐅᕗᑦ. ᑖᓐᓇ ᐃᖅᑲᓇᐃᔮᖅ ᑕᓪᓕᒪᓄᑦ ᐊᕐᕌᒍᓄᑦ ᐋᖅᑭᒃᓯᒪᔪᖅ, ᐊᒻᒪ ᐃᖅᑲᓇᐃᔭᐃᓐᓇᖃᑦᑕᕐᓂᐊᖅᖢᓂ ᐱᖁᔭᖅᑎᒍᓪᓗ ᑎᒃᑯᐊᖅᑕᐅᓯᒪᓂᐊᖅᖢᓂ.
ᐅᖃᐅᓯᓕᕆᓂᕐᒧᑦ ᑲᒥᓴᓇ ᐃᒻᒥᒃᑰᖅᐳᖅ ᐊᒃᑐᐊᓂᖃᓐᖏᖢᓂ ᒪᓕᒐᓕᐅᕐᕕᖕᒧᑦ. ᑕᐃᓐᓇ ᐃᖅᑲᓇᐃᔮᖅᑖᖅᑐᖅ ᑎᒃᑯᐊᖅᑕᐅᓂᐊᖅᑐᖅ ᒪᓕᒃᑕᐅᓗᑎᒃ ᒪᓕᒐᓕᐅᖅᑏᑦ ᐊᑐᓕᖁᔭᓕᐊᖓ, ᒪᓕᒃᖢᒍ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐱᖁᔭᕐᔪᐊᖓ. ᑖᓐᓇ ᐃᖅᑲᓇᐃᔮᖅ ᐊᔾᔨᒌᓐᖏᑦᑐᓂᒃ ᓴᓐᖏᓂᖅᑖᖅᑎᑕᐅᓯᒪᔪᖅ ᐊᒻᒪ ᐱᔭᒃᓴᖅᑖᖅᑐᖅᑎᑕᐅᓯᒪᓪᓗᓂ ᐊᑐᖅᖢᒍ ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᐱᖁᔭᕐᔪᐊᖓ ᐊᒻᒪ ᐃᓄᐃᑦ ᐅᖃᐅᓯᖏᑦᑕ ᓴᐳᒻᒥᐅᓯᖅᑕᐅᓯᒪᓂᖏᓐᓄᑦ ᐱᖁᔭᕐᔪᐊᖅ. ᐱᖁᔭᕐᔪᐊᑦ ᐊᔾᔨᖏᓐᓂᒃ ᑕᑯᒋᐊᕈᓐᓇᖅᑐᑎᑦ ᐅᕘᓇ: www.nunavutlegislation.ca.
ᐱᒐᓱᐊᕈᒪᔪᑦ ᑐᓐᖓᓱᑦᑎᑕᐅᕗᑦ ᐃᖅᑲᓇᐃᔮᒧᑦ ᑐᑭᓯᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇᐅᓗᓂ ᓄᓇᕗᒧᑦ. ᑖᓐᓇ ᑕᓪᓕᒪᓄᑦ ᐊᕐᕌᒍᓄᑦ, ᒪᓕᒐᖅᑎᒍᑦ ᑎᒃᑯᐊᖅᑕᐅᓯᒪᓂᐅᔪᖅ.
ᑖᓐᓇ ᑐᑭᓯᐅᒪᔾᔪᑎᓕᕆᓂᕐᒧᑦ ᑲᓐᖑᓇᖅᑐᓕᕆᓂᕐᒧᓪᓗ ᑲᒥᓴᓇ ᐃᒻᒥᑰᖓᓪᓗᓂ ᐱᓕᕆᔨᐅᔪᖅ ᒪᓕᒐᓕᐅᖅᕕᒻᒧᑦ. ᑖᓐᓇ ᑲᒥᓴᓇ ᐃᓂᖓᓄᑦ ᑎᒃᑯᐊᖅᑕᐅᓲᖅ ᒪᓕᑦᑐᑎᒃ ᐊᑐᓕᖁᔭᓕᐊᒥᓂᕐᒥᒃ ᒪᓕᒐᓕᐅᖅᕕᒻᒥ, ᒪᓕᑦᑐᒋᑦ ᐃᓯᕈᓐᓇᐅᑎᑦ ᑐᑭᓯᐅᒪᔾᔪᑎᓄᑦ ᐊᒻᒪ ᓴᐳᔾᔭᐅᓂᖏᓐᓄᑦ ᑲᓐᖑᓇᖅᑐᑦ ᐱᖁᔭᖓᓂᒃ. ᑖᓐᓇ ᐃᖅᑲᓇᐃᔮᖅ ᐱᔪᓐᓇᐅᑎᖃᖅᕕᐅᔪᖅ ᐱᓕᕆᐊᖃᕆᐊᖃᕐᓂᖃᖅᑐᓂᓗ ᐱᓕᕆᐊᖑᒋᐊᓕᓐᓂᑦ ᐊᑖᓃᑦᑐᓂᒃ ᐃᓯᕈᓐᓇᐅᑎᑦ ᑐᑭᓯᐅᒪᔾᔪᑎᓄᑦ ᐊᒻᒪ ᓴᐳᔾᔭᐅᓂᖏᓐᓄᑦ ᑲᓐᖑᓇᖅᑐᑦ ᐱᖁᔭᖓᑕ. ᐊᔾᔨᖏᑦ ᐱᖁᔭᐅᑉ ᐱᔭᐅᔪᓐᓇᖅᑐᑦ ᐅᕙᓐᖓᑦ:
ᐃᖃᓗᐃᑦ, ᓄᓇᕗᑦ (ᐅᑐᐱᕆ 7, 2019) - ᐅᖃᖅᑎ ᓯᒥᐊᓐ ᒥᑭᓐᖑᐊᖅ ᐅᓪᓗᒥ ᐃᒫᒃ ᑐᓴᖅᑕᐅᑎᑦᑎᖅᑲᐅᔪᖅ:
“ᖁᓲᒥᖅᑲᐅᔪᖓ ᐅᑉᓗᒥ ᑐᓴᕋᒪ ᐃᓅᔪᓐᓃᕐᓂᖓᓂᒃ, ᐊᑯᓂ ᐋᓐᓂᐊᖃᓚᐅᖅᑐᓂ, ᒪᓕᒐᓕᐅᖅᕕᒻᒥ ᒪᓕᒐᓕᐅᖅᑎᐅᓚᐅᖅᓯᒪᔪᖅ ᐆᕕᑦ ᐊᓚᑲᓐᓂᐊᖅ, ᑖᓐᓇ ᑭᒡᒐᖅᑐᐃᖃᑦᑕᔪᔪᖅ ᐊᑯᓪᓕᖅ ᓂᕈᐊᖅᑕᐅᓯᒪᕕᖓᓂᒃ ᓯᕗᓪᓕᖅᐹᖑᔪᒥ ᓄᓇᕗᑦ ᒪᓕᒐᓕᐅᖅᕕᖓᓂ. ᐆᕕᑦ ᐊᓚᒃᑲᓐᓄᐊᖅ ᐃᓐᓇᒻᒪᕆᐅᓚᐅᖅᑐᖅ ᐅᒃᐱᕆᔭᐅᑦᑎᐊᖅᑐᓂ ᑰᒑᕐᔪᒻᒥ, ᐊᒻᒪᓗ ᓴᓐᖏᔪᐊᓗᓐᓂᒃ ᐅᖃᐅᓯᖃᖃᑦᑕᓚᐅᖅᑐᖅ ᐃᑲᔪᖅᓰᓪᓗᓂ ᐃᓄᐃᑦ ᐱᖅᑯᓯᖏᓐᓂᑦ, ᐅᖃᐅᓯᖏᓐᓂᑦ ᐅᒃᐱᕆᔭᖏᓐᓂᓪᓗ ᑲᑎᒪᔨᐅᖃᑦᑕᓂᕐᒥᓂ. ᒪᓕᒐᓕᐅᖅᑎᓕᒫᑦ ᒪᓕᒐᓕᐅᖅᕕᒻᒥ ᐅᖃᕈᑎᓪᓗᒋᑦ, ᐅᖃᕈᒪᔪᖓ ᐃᓱᒪᒋᔭᐅᓂᐊᕐᒪᑕ ᐃᓚᒋᔭᖏᑦ ᐊᒻᒪᓗ ᑭᒡᒐᑐᖅᐸᓚᐅᖅᑕᖏᑦ.”
ᓴᐃᒻᒪᑎᖓ ᒥᔅᑕ ᐊᓚᒃᑲᓐᓄᐊᑉ ᓄᓇᖓᓂ ᐊᑉᐸᕆᐊᖅᑕᐅᓯᒪᕗᖅ ᐃᔪᓐᓃᕐᓂᖓᓂᒃ ᐃᓕᑕᖅᓯᔾᔪᑎᐅᓪᓗᓂ.
-30-
ᐃᖃᓗᐃᑦ, ᓄᓇᕗᑦ (ᓯᑎᐱᕆ 25, 2019) - ᒪᓕᒐᓕᕆᓂᕐᒧᑦ ᑲᑎᒪᔨᕋᓛᑦ ᐅᓪᓗᒥ ᑐᓴᖅᑎᑦᑎᕗᑦ ᐊᑐᖅᑕᐅᒃᑲᓐᓂᕐᓂᐊᖅᑐᓂᒃ ᐃᓱᒪᒃᓴᖅᓯᐅᕈᑕᐅᑎᓪᓗᒍ ᐱᖁᔭᒃᓴᖅ 25, ᐱᖁᔭᖅ ᐊᓯᔾᔨᕆᐊᕈᑕᐅᔪᖅ ᐃᓕᓐᓂᐊᖅᑐᓕᕆᓂᕐᒧᑦ ᐱᖁᔭᕐᒧᑦ ᐊᒻᒪ ᐃᓄᐃᑦ ᐅᖃᐅᓯᖏᑦᑕ ᓴᐳᒻᒥᔭᐅᓂᖏᓐᓄᑦ ᐱᖁᔭᖅ. ᐱᖁᔭᒃᓴᖅ 25 ᓴᖅᑭᑕᐅᕚᓪᓗᓚᐅᖅᑐᖅ ᐃᓕᓐᓂᐊᖅᑐᓕᕆᓂᕐᒧᑦ ᒥᓂᔅᑕᒧᑦ ᔫᓂ 4, 2019-ᖑᑎᓪᓗᒍ, ᑭᖑᓂᖓᒍᓪᓗ ᑐᓂᔭᐅᓚᐅᕐᖢᓂ ᑲᑎᒪᔨᕋᓛᓄᑦ ᐃᓱᒪᒃᓴᖅᓯᐅᕈᑕᐅᓂᐊᕐᒪᑦ.
ᔭᓗᓇᐃ, ᓄᓇᑦᓯᐊᖅ ᐊᒻᒪᓗ ᐃᖃᓗᐃᑦ, ᓄᓇᕗᑦ (ᔪᓚᐃ 2, 2019) - ᐅᖃᖅᑎᐅᔫᒃ ᔮᒃᓴᓐ ᓛᐳᑎ ᐊᒻᒪᓗ ᓯᒥᐊᓐ ᒥᑭᓐᖑᐊᖅ ᐅᓪᓗᒥ ᑭᒃᓵᒃᐴᒃ ᐃᓅᔪᓐᓃᕐᒪᑦ ᒪᓕᒐᓕᐅᖅᑎᐅᓚᐅᖅᒪᔪᖅ ᓘᑎ ᐸᓪᓗᖅ, ᑖᓐᓇᐃᓛᒃ ᐊᓂᕐᓂᖃᕈᓐᓃᓚᐅᕐᒪᑦ ᓇᒡᒐᔾᔭᐅᖑᑎᓪᓗᒍ ᐊᑯᓂ ᐋᓐᓂᐊᖃᓚᐅᖅᑐᓂ.
ᓘᑎ ᐸᓪᓗᖅ ᒪᓕᒐᓕᐅᖅᑎᐅᓚᐅᖅᒪᔪᖅ ᓄᓇᑦᓯᐊᑉ ᒪᓕᒐᓕᐅᖅᕕᖓᓂ 1975-ᒥᑦ−1995-ᒧᑦ. ᑕᐃᒃᓱᒪᓂᑲᓂ ᓂᕈᐊᖅᑕᐅᓯᒪᓪᓗᓂ, ᓘᑎ ᐸᓪᓗᖅ ᑭᒡᒐᖅᑐᐃᕙᓚᐅᖅᑐᖅ ᖁᑦᑎᑦᑑᑉ ᓄᓇᓕᖏᓐᓂᑦ ᐊᒻᒪᓗ ᓄᓇᕗᒥᒃ ᓴᖅᑮᒐᓱᐊᖅᑐᓄᑦ ᐱᒋᐊᖅᑎᑦᑎᖃᑕᐅᓪᓚᕆᑦᑐᒥᓂᐅᓪᓗᓂ.
ᐃᖃᓗᐃᑦ, ᓄᓇᕗᑦ (ᔫᓂ 6, 2019) - ᐅᓪᓗᒥ ᒪᓕᒐᓕᐅᕐᕕᒃ ᐱᖁᔨᕗᖔᕐᒥᒃ ᐊᖏᖅᓯᖅᑲᐅᕗᑦ, ᒥᐅᕆᓕᓐ ᔭᐃᓐ ᐸᐃᑦᔅ ᐊᑐᓕᖁᔭᖅᑎᒍᑦ ᑎᒃᑯᐊᖅᑕᐅᖁᓪᓗᒍ ᓄᓇᕗᒻᒥ ᓱᕈᓯᕐᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᐅᑉ ᐃᓂᖓᓄᑦ. ᐱᖁᔨᕗᖔᕈᑦ ᐃᓐᓇᐃᓐᓄᑦ ᐊᖏᖅᑕᐅᖅᑲᐅᔪᖅ.
ᐅᑭᐅᖅᑕᖅᑐᒥ ᓱᕈᓯᕐᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᑦ ᐱᖁᔭᕐᔪᐊᖓ ᐊᑐᖅᖢᒍ ᑭᒡᒐᖅᑐᐃᔨ ᐃᓂᒥᓄᑦ ᐃᓕᓯᒪᔪᓐᓇᖅᑐᖅ ᑕᓪᓕᒪᓄᑦ ᐊᕐᕌᒍᓄᑦ. ᒥᔅ ᐸᐃᑦᔅ ᑎᒃᑯᐊᖅᑕᐅᓂᖓ ᐊᑐᓯᒋᐊᕐᓂᐊᖅᑐᖅ ᔪᓚᐃ 22, 2019−ᒥ.
ᑕᒪᑐᒪᓂ ᐊᕐᕌᒍᒥ ᔭᓄᐊᕆᐅᑎᓪᓗᒍ, ᒪᓕᒐᓕᐅᕐᕕᐅᑉ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑦ ᑕᖅᑲᐅᖓ ᓇᓗᓇᐃᖅᓯᓚᐅᖅᓯᒪᔪᑦ ᐆᒃᑐᕈᒪᔪᓂᒡᓗ ᑐᓐᖓᓵᕆᓪᓗᑎᒃ ᓱᕈᓯᕐᓄᑦ ᒪᒃᑯᒃᑐᓄᓪᓗ ᑭᒡᒐᖅᑐᐃᔨᓐᖑᕈᒪᔪᓂᒃ.
ᐃᖃᓗᐃᑦ, ᓄᓇᕗᑦ (ᒪᐃ 30, 2019) - ᐅᖃᖅᑎ ᒪᓕᒐᓕᐅᕐᕕᖕᒥ ᐊᒻᒪᓗ ᐃᒃᓯᕙᐅᑕᖅ ᓄᓇᕗᒻᒥ ᐃᓕᓴᖅᓯᔾᔪᑦ ᐅᔭᒥᖕᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᖏᓐᓄᑦ ᓯᒥᐊᓐ ᒥᑭᓐᖑᐊᖅ ᐅᓪᓗᒥ ᑐᓴᖅᑎᑦᑎᖅᑲᐅᖕᒪᑕ ᑖᓐᓇ ᓴᒃᑲᕆᐊᓯ ᑯᓄᒃ ᐅᔭᒥᒃᑕᐅᓂᐊᕐᒪᑦ ᓄᓇᕗᒻᒥ ᐃᓕᓴᖅᓯᔾᔪᑦ ᐅᔭᒥᖕᒧᑦ ᑲᑎᖃᑎᒌᖕᓂᐅᓂᐊᖅᑐᒥ ᐊᐃᑉᐱᕐᒥ, ᔫᓂ 4, 2019-ᖑᓕᖅᐸᑦ, ᐅᕙᓂ 6:00 ᐅᓐᓄᓴᒃᑯᑦ (ᑲᓇᖕᓇᕐᒥ) ᑲᑎᒪᕐᔪᐊᕐᕕᖓᓂ ᒪᓕᒐᓕᐅᕐᕕᐅᑦ.
ᑖᓐᓇ ᑐᓂᓯᓂᕐᒧᑦ ᑲᑎᖃᑎᒌᖕᓂᖅ ᒪᑐᐃᖓᓂᐊᖅᐳᖅ ᑭᒃᑯᑐᐃᓐᓇᕐᓄᑦ ᖁᖖᒋᐊᕈᒪᔪᓄᑦ ᓇᖕᒥᓂᖅ ᐳᓛᕆᐊᖅᓯᒪᔪᒃᑯᕕᐊᓂ ᑕᓚᕖᓴᒃᑯᓪᓗ ᑕᑯᒃᓴᐅᑲᐅᑎᒋᓂᐊᖅᑐᖅ ᓄᓇᕗᓕᒫᕐᒥ ᓄᓇᓕᖕᓂ ᑕᓚᕖᓴᖃᐅᑎᖏᑦᑎᒍᑦ ᐊᒻᒪᓗ ᖃᖓᑦᑕᖅᑎᑕᐅᓯᒪᔪᒃᑯᑦ ᐊᖏᕐᕋᒥ ᐅᕘᓇ ᕕᐅᓪ (ᓈᓴᐅᑎᖓ 513) ᐊᒻᒪ ᓵ (ᓈᓴᐅᑎᖓ 289 - ᐱᑐᖃᒃᑯᑦ / ᓈᓴᐅᑎᖓ 489 - ᓄᑖᒃᑯᑦ). ᑐᓂᓯᓂᕐᒧᑦ ᑲᑎᖃᑎᒌᖕᓂᖅ ᑕᑯᒃᓴᐅᑲᐅᑎᒋᓂᐊᕐᒥᔪᖅ ᐃᑭᐊᖅᑭᕕᒃᑯᑦ ᐅᕘᓇ: http://video.isilive.ca/nunavut/.
ᐃᖃᓗᐃᑦ, ᓄᓇᕗᑦ (ᒪᐃ 29, 2019 - ᔮᓐ ᒪᐃᓐ, ᐃᒃᓯᕙᐅᑕᖅ ᒪᓕᒐᓕᐅᕐᕕᒃᒥ ᒪᓕᒐᓕᐅᖅᑎᑐᐃᓐᓇᐃᑦ ᑲᑎᒪᔨᖏᓐᓄᑦ, ᐅᓪᓗᒥ ᓴᖅᑭᑦᑎᖃᐅᖕᒪᑦ ᓯᕗᓪᓕᖅᐹᑦᑎᐊᕐᒥᒃ ᓂᕆᐅᒋᔭᖃᕐᓂᕐᒧᑦ ᑎᑎᖅᑲᕐᒥᒃ ᑖᒃᑯᓄᖓ ᓯᕗᓕᖅᑏᑦ ᑲᑎᒪᔨᖏᓐᓄᑦ ᓄᓇᕗᒻᒥ.
ᐃᒃᓯᕙᐅᑕᖅ ᒪᐃᓐ ᐅᖃᓚᐅᖅᐳᖅ, “ᑕᐃᑦᓱᒪᓂ ᒪᓕᒐᓕᐅᕐᕕᖕᒥ ᒪᓕᒐᓕᐅᖅᑎᐅᖃᑕᐅᔪᓕᒫᑦ ᑲᑎᒪᓂᖃᖅᑎᓪᓗᒋᑦ ᒥᑦᑎᒪᑕᓕᒃᒥ 2017−ᒥ ᓂᕈᐊᕕᔾᔪᐊᕐᓇᐅᓚᐅᖅᑎᓪᓗᒍ, ᐋᖅᑭᒍᑎᖃᒪᐅᕐᓯᒪᒐᑦᑕ ᑲᔪᓯᖁᖏᖢᒍ ᐊᑯᓐᓂᖓᒍᑦ ᕿᒥᕐᕈᓂᖃᕐᓂᖅ ᓯᕗᓕᖅᑏᑦ ᑲᑎᒪᔨᖏᓐᓂᒃ. ᑕᐃᒪ ᑎᑭᐅᑎᕙᓪᓕᐊᓕᕐᖢᑕ ᓂᕈᐊᖅᑕᐅᓯᒪᓂᑦᑕ ᐊᑯᓐᓂᓪᓗᐊᖓᓄᑦ, ᑖᓐᓇ ᓂᕆᐅᒋᔭᖃᕐᓂᕐᒧᑦ ᑎᑎᖅᑲᖅ ᑖᒃᑯᓇᓐᖕᒐᑦ ᒪᓕᒐᓕᐅᖅᑎᑐᐃᓐᓇᐃᑦ ᑲᑎᒪᔨᖏᓐᓂᑦ ᑐᓂᔭᐅᓯᒪᔪᑦ ᓯᕗᓕᖅᑎᒧᑦ ᓇᓗᓇᐃᔭᐃᑦᑎᐊᕐᒪᑦ ᓂᕆᐅᒋᔭᑦᑎᓐᓂᒃ ᑖᒃᑯᓇᖕᒐᓕᒫᖅ ᒥᓂᔅᑕᓂᑦ ᐊᒻᒪᓗ ᑐᑭᓯᓇᑦᑎᐊᕐᖢᓂ ᐱᓕᕆᓂᖏᑦ ᖃᐅᔨᓴᖅᑕᐅᖏᓐᓴᕐᓂᐊᕐᓂᖏᓐᓂᒃ ᑲᔪᓰᓐᓇᖅᑐᒥᒃ ᑖᒃᑯᐊ
ᒪᓕᒐᓕᐅᖅᑎᑦ ᓂᕈᐊᖅᑕᐅᓯᒪᓂᓕᒫᖓᓐᓂ.”
ᐃᖃᓗᐃᑦ, ᓄᓇᕗᑦ (ᒪᐃ 27, 2019) - ᑖᓐᓇ ᓄᓇᕗᒻᒥ ᓯᕗᓕᖅᑎᒥᒃ ᑲᑎᒪᔾᔪᑎᖃᕐᓂᖅ ᐱᒋᐊᕐᓂᐊᖅᐳᖅ 10:30-ᐅᓪᓛᒃᑯᑦ (ᑲᓇᖕᓇᖅ) ᑕᕝᕙᓂ ᐊᐃᑉᐱᕐᒥ, ᒪᐃ 28, 2019, ᓂᕈᐊᕐᓂᐅᓗᑎᒃ ᓄᑖᕐᒥᒃ ᐅᖃᖅᑎᑦᑎᔨᒥᒃ ᓄᓇᕗᒻᒥ ᒪᓕᒐᓕᐅᕐᕕᖕᒧᑦ.
ᑲᑎᒪᓂᖓᑦ ᑖᒃᑯᐊ ᓄᓇᕗᒻᒥ ᓯᕗᓕᖅᑎᒥᒃ ᑲᑎᒪᔾᔪᑎᖃᕐᓂᐅᑦ ᑲᔪᓯᓂᐊᖅᐳᖅ ᑲᑎᒪᕐᔪᐊᕐᕕᒃᒥ ᑕᐃᑲᓂ ᓄᓇᕗᒻᒥ ᒪᓕᒐᓕᐅᕐᕕᒃᒥ ᒪᑐᐃᖓᓂᐊᕐᖢᓂᓗ ᑭᒃᑯᓕᒫᓄᑦ ᑕᑯᓐᓈᕐᓗᑎᒃ ᐳᓛᕆᐊᖅᓯᒪᔪᒃᑯᕕᖕᒥᑦ. ᑲᑎᒪᓃᑦ ᑕᓚᕖᓴᒃᑯᑦ ᑕᑯᒃᓴᐅᓂᐊᖅᐳᖅ ᓄᓇᓕᖕᓂ ᑕᓚᕖᓴᖃᖅᑎᑦᑎᔨᖏᑦᑎᒍᑦ ᐊᒻᒪ ᐊᖏᕐᕋᒥ ᖃᖓᑦᑕᖅᑎᑕᐅᓯᒪᔪᒃᑯᑦ ᐅᕙᖖᒐᑦ ᕕᐅᓪ (ᓈᓴᐅᑎᖓ 513) ᐊᒻᒪᓗ ᓵ (ᓈᓴᐅᑎᖓ 289 - ᐱᑐᖃᐃᑦ / ᓈᓴᐅᑎᖓ 489 - ᓄᑖᒃᑯᑦ). ᑲᑎᒪᓂᐅᔪᑦ ᑕᑯᒃᓴᐅᑲᐅᑎᒋᓂᐊᕆᓪᓗᑎᒃ ᐃᑭᐊᕐᒃᑭᕕᒃᑯᑦ ᐅᕘᓇ: http://video.isilive.ca/nunavut/.