Yes

ᐃᖃᓗᐃᑦ, ᓄᓇᕗᑦ (ᓯᑎᐱᕆ 9, 2013) - ᐅᓪᓗᒥ ᒪᓕᒐᓕᐅᖅᑏᑦ ᐱᖁᔨᕗᖔᕐᒥᒃ ᐊᓂᒍᐃᓚᐅᖅᐳᑦ ᐊᑐᓕᖁᔭᓕᐅᖅᓯᒪᔪᒥᒃ ᑖᓐᓇ ᑕᑦ ᕆᓵᑦ ᑎᒃᑯᐊᖅᑕᐅᖁᓪᓗᒍ ᓄᓇᕗᒻᒥ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᓂᐊᓄᑦ. ᑖᓐᓇ ᐱᖁᔨᕗᖔᕈᑦ ᐃᓘᓐᓇᖏᓐᓄᑦ ᒪᓕᒐᓕᐅᖅᑎᓄᑦ ᐊᖏᖅᑕᐅᓚᐅᖅᑐᖅ.

ᓱᓕᑦᑎᐊᕐᓂᕐᒧᑦ ᐱᖁᔭᕐᔪᐊᖅ ᐅᖃᖅᓯᒪᔪᖅ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᓂᐊᓃᑦᑐᑦ ᐃᓕᓯᒪᔪᓐᓇᖅᑎᑕᐅᓪᓗᑎᒃ ᑕᓪᓕᒪᓄᑦ ᐊᕐᕌᒍᓄᑦ. ᒫᓐᓇ ᓱᓕᑦᑎᐊᕐᓂᕐᒧᑦ ᑲᒥᓴᓇᕆᔭᐅᔫᑉ ᑎᒃᑯᐊᖅᑕᐅᓯᒪᓂᖓ ᐃᓱᓕᓐᓂᐊᖅᑐᖅ ᓯᑎᐱᕆ 9, 2013-ᒥ. ᒥᔅᑐ ᕆᓵᑉ ᑎᒃᑯᐊᖅᑕᐅᓂᖓ ᐊᑐᓯᒋᐊᕐᓂᐊᖅᑐᖅ ᓯᑎᐱᕆ 10, 2013-ᒥ.

ᑕᒪᑐᒪᓂ ᐊᕐᕌᒍᒥ ᔫᓂᐅᑎᓪᓗᒍ, ᒪᓕᒐᓕᐅᕐᕕᐅᑉ ᑲᑎᒪᔨᓕᕆᔨᒃᑯᑦ ᑲᑎᒪᔨᖏᑦ ᑕᖅᑲᒃᑯᓂᖓ ᑐᓐᖓᓵᕆᓚᐅᖅᑐᑦ ᐆᒃᑐᕈᒪᔪᓂᒃ ᓱᓕᑦᑎᐊᕐᓂᕐᒧᑦ ᑲᒥᓴᓇᐅᑉ ᐃᓂᖓᓄᑦ.

ᐃᖃᓗᐃᑦ, ᓄᓇᕗᑦ ᐊᒻᒪ ᔭᓗᓇᐃᕝ, ᓄᓇᑦᓯᐊᖅ (ᐋᒡᒌᓯ 8, 2013) ᐅᖃᖅᑎᑦ ᕼᐊᓐᑐ ᑐᑐ ᐊᒻᒪ ᔭᑭ ᔭᐃᑯᑉᓴᓐ ᐅᓪᓗᒥ ᑐᓐᖓᓱᒃᑎᑦᓯᖅᑲᐅᔪᑦ ᑲᓇᑕᒥ ᓈᓚᐅᓯᕆᔨᑦ ᐊᒻᒪ ᑕᓚᕖᓴᓕᕆᓕᔨᑦ ᐊᒻᒪ ᑐᓴᐅᒪᔾᔪᓯᕆᔨᑦ ᑲᑎᒪᔨᖏᓐᓂᒃ ᑎᓕᔭᐅᓯᒪᔾᔪᑎᖃᓕᕐᒪᑕ ᑐᓴᖅᓴᐅᑎᑦᓯᓂᕐᒧᑦ ᑕᑯᒃᓴᐅᑎᑦᓯᓂᕐᒧᓪᓗ ᒪᓕᒐᓕᐅᖅᑎᑦ ᑲᑎᒪᕐᔪᐊᖅᑎᓪᓗᒋᑦ ᐊᖏᕐᕋᕆᔭᐅᔪᓂ ᑕᑯᒃᓴᐅᔪᓐᓇᖅᓯᓗᑎᒃ ᖁᒻᒧᐊᒃᑎᑕᐅᓯᒪᔪᒃᑯᑦ ᐱᔨᑦᓯᖅᑐᓄᑦ ᓄᓇᕗᒥ ᐊᒻᒪ ᓄᓇᑦᓯᐊᕐᒥ.

ᐃᓱᒪᓕᐅᕈᑎᒋᓯᒪᔭᖓᑦ ᐅᓪᓗᒥ, ᑐᓴᐅᒪᔾᔪᑎᓕᕆᔨᑦ ᑲᑎᒪᔨᖏᑦ ᑐᓴᖅᑎᑦᑎᖅᑲᐅᔪᑦ ᐃᒪᓐᓇ, "ᐅᑭᐅᖅᑕᖅᑐᕐᒥᐅᑦ ᐱᔨᑦᓯᖅᑕᐅᑦᑎᐊᕐᓂᖅᓴᐅᓂᐊᓕᖅᐳᑦ ᑐᓵᖃᑦᑕᕐᓗᑎᒃ ᑕᐅᑐᖃᑦᑕᕐᓗᑎᒡᓗ ᑲᑎᒪᕐᔪᐊᖅᑎᓪᓗᒋᑦ ᒪᓕᒐᓗᓕᐅᖅᑎᑦ ᓄᓇᕗᒥ ᐊᒻᒪ ᓄᓇᑦᑎᐊᕐᒥ ᑕᒪᒃᑯᓄᖓ ᐱᔨᑦᓯᕈᑎᐅᔪᑦ ᐃᓕᔭᐅᓂᐊᖅᑐᑦ ᖁᒻᒧᐊᒃᑎᑕᐅᓯᒪᔪᒃᑯᑦ ᑕᓚᕖᓴᖃᑦᑕᖅᑐᓄᑦ ᒪᕐᕉᖕᓂ ᐅᑭᐅᖅᑕᖅᑐᕐᒥᐅᑦ ᓄᓇᖏᓐᓂ."

ᐃᖃᓗᐃᑦ, ᓄᓇᕗᑦ (ᔫᓂ 18, 2013) - ᒪᓕᒐᓕᐅᕐᕕᖕᒧᑦ ᐅᖃᖅᑎ ᐊᒻᒪ ᓄᓇᕗᒻᒥ ᖃᐅᔨᒪᔨᑕᕆᔭᑦ ᑲᑎᒪᔨᖏᓐᓄᑦ ᐃᒃᓯᕙᐅᑕᖅ ᕼᐊᓐᑐ ᑐᑐ ᐅᓪᓗᒥ ᓇᓗᓇᐃᖅᓯᕗᑦ ᑭᒃᑯᑦ 2013-ᒥ ᐅᔭᒥᒃᑕᐅᓂᐊᕐᒪᖔᖏᑦ ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᒻᒥᒃ.

ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᒻᒥᒃ ᐅᔭᒥᒃᑕᐅᓂᐊᖅᑐᑦ ᔨᒥ ᐋᑲᕚᒃ, ᓗᐃ ᐊᖓᓚᒃ ᐊᖓᔪᒃᖠᖅ ᐊᒻᒪ ᑕᐃᕕᑎ ᐊᕐᓇᒃᑲᖅ.

ᔭᓄᐊᕆ 1, 2010-ᖑᑎᓪᓗᒍ, ᓄᓇᕗᒻᒥ ᐱᓕᕆᑦᑎᐊᕐᓂᑯᓄᑦ ᐃᓕᓴᖅᓯᔾᔪᑎᐅᑉ ᐱᖁᔭᕐᔪᐊᖓ ᐊᑐᓯᒋᐊᓚᐅᖅᓯᒪᔪᖅ. ᐃᓕᓴᕆᔭᐅᔾᔪᑎ ᓴᖅᑭᑕᐅᓚᐅᖅᓯᒪᔪᖅ ᑕᐃᒃᑯᐊ ᐃᓄᐃᑦ ᐱᖅᑯᓯᓕᕆᓂᒃᑯᑦ, ᐃᓅᓯᒃᑯᑦ ᐅᕝᕙᓘᓐᓃᑦ ᑮᓇᐅᔭᓕᐅᕋᓱᐊᕐᓂᒃᑯᑦ ᓄᓇᕗᒻᒥ ᐱᓕᕆᑦᑎᐊᕐᓂᑯᕕᓃᑦ ᐃᓕᓴᕆᔭᐅᔪᓐᓇᕐᓂᐊᕐᒪᑕ. ᑖᓐᓇ ᐃᓕᓴᕆᔭᐅᔾᔪᑦ ᓄᓇᕗᒻᒥ ᖁᑦᑎᖕᓂᖅᐹᖑᔪᖅ ᐊᒻᒪᓗ ᐃᓇᖐᓂᐊᖅᖢᓂ ᐊᓯᓕᒫᖏᓐᓂᒃ ᐃᓕᓴᕆᔭᐅᔾᔪᑎᓂᒃ, ᓇᓗᓇᐃᒃᑯᑕᓂᒃ ᐅᕝᕙᓘᓐᓃᑦ ᐅᔭᒥᖕᓂᒃ ᓴᖅᑭᑕᐅᓯᒪᔪᕕᓂᐅᒐᓗᐊᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ.

ᐃᖃᓗᐃᑦ, ᓄᓇᕗᑦ (ᕕᕗᐊᕆ 26, 2013) - ᖁᑦᑎᒃᑐᕐᒧᑦ ᒪᓕᒐᓕᐅᖅᑎ ᕌᓐ ᐃᓕᐊᑦ ᐅᓪᓗᒥ ᓴᖅᑭᑦᑎᕗᖅ ᐱᖁᔭᒃᓴᖅ 46-ᒥᒃ, ᓂᕿᓂᒃ ᑐᓐᓂᖅᑯᑎᖃᕐᓂᕐᒧᑦ ᐱᖁᔭᕐᔪᐊᕐᒥᒃ.

“ᓂᕿᓂᒃ ᑐᓐᓂᖅᑯᑎᖃᕐᓂᕐᒧᑦ ᐱᖁᔭᕐᔪᐊᒃᓴᖅ ᐃᓄᖕᓂᒃ ᓂᕿᓂᒃ ᑐᓐᓂᖅᑯᑎᖃᖃᑦᑕᖅᑐᓂᒃ ᑐᓂᐅᖅᑲᐃᖃᑦᑕᖅᑐᓂᒡᓘᓐᓃᑦ ᐃᖅᑲᖅᑐᒐᒃᓴᐅᑎᑕᐅᔪᓐᓇᓐᖏᓚᖅ ᐋᓐᓂᐊᑖᕐᓂᕐᒧᑦ, ᐋᓐᓂᐊᑖᕐᓂᕐᒧᑦ, ᐋᓐᓂᕐᓂᕐᒧᑦ, ᐃᓅᔪᓐᓃᕐᓂᕐᒧᑦ ᐅᕝᕙᓘᓐᓃᑦ ᐊᓯᐊᒍᖔᖅ ᖃᓄᐃᓕᓂᕐᓗᖕᓂᕐᒧᑦ ᓂᕆᔪᕕᓂᐅᑎᓪᓗᒍ, ᑭᓯᐊᓂ ᑖᓐᓇ ᓂᕿᓂᒃ ᑐᓐᓂᖅᑯᑎᓕᒃ ᐱᔮᕆᓗᓂ ᑲᒪᑦᑎᐊᓐᖏᓗᐊᕐᓗᓂᓘᓐᓃᑦ ᑐᓐᓂᖅᑯᑎᖃᕐᓂᖅᐸᑦ ᑐᓂᐅᖅᑲᐃᓐᓂᖅᐸᓪᓘᓐᓃᑦ ᓂᕿᓂᒃ. ᐊᔾᔨᐸᓗᖏᑦ ᒪᓕᒐᑦ ᐊᑐᕐᒥᔪᑦ ᑲᑎᒪᔨᓄᑦ, ᑲᒪᔨᓄᑦ, ᑭᒡᒐᖅᑐᐃᔨᓄᑦ, ᐃᖅᑲᓇᐃᔭᖅᑎᓄᑦ ᐊᑭᓕᖅᓱᖅᑕᐅᓐᖏᑦᑐᓂᓪᓗ ᓂᕿᓂᒃ ᑐᓐᓂᖅᑯᑎᖃᖃᖅᑕᖅᑐᓄᑦ ᑐᓂᐅᖅᑲᐃᖃᑦᑕᖅᑐᓄᓪᓘᓐᓃᑦ,” ᑕᐃᒪᓐᓇ ᐅᖃᓚᐅᖅᑐᖅ ᒥᔅᑐ ᐃᓕᐊᑦ.

ᐊᓯᓕᒫᖏᑦ ᑲᓇᑕᒥ ᐊᕕᒃᑐᖅᓯᒪᔪᑦ ᐅᑭᐅᖅᑕᖅᑐᒥᓗ ᒐᕙᒪᖃᕐᕖᑦ ᐊᔾᔨᐸᓗᖏᓐᓂᒃ ᐱᖁᔭᕐᔪᐊᖃᖅᑐᑦ.

ᐃᖃᓗᐃᑦ, ᓄᓇᕗᑦ (ᐊᒃᑑᐸ 9, 2012) - ᕼᐊᓐᑐ ᑐᑐ, ᓄᓇᕗᑦ ᒪᓕᒐᓕᐅᕐᕕᐊᓄᑦ ᐅᖃᖅᑎ, ᖁᕕᐊᓱᒃᑐᖅ ᓇᓗᓇᐃᖅᓯᔪᓐᓇᕋᒥ 2012-ᒥ ᓄᓇᕗᑦ ᒪᒃᑯᒃᑐᑦ ᒪᓕᒐᓕᐅᖅᑎᓐᖑᐊᖑᓂᐊᕐᓂᖏᓐᓂᒃ ᐃᖃᓗᖕᓂ ᓄᕕᐱᕆ 22, 2012-ᖑᓕᖅᐸᑦ.

ᓄᓇᕗᒻᒥ ᐃᓕᓐᓂᐊᕐᕕᐊᓗᖕᓂ ᐃᓕᓐᓂᐊᖅᑐᑦ ᑕᑕᑎᕆᖁᔭᐅᒐᓗᐊᖅᐳᑦ ᐃᓚᐅᔪᒪᒍᑎᒃ ᒪᒃᑯᒃᑐᑦ ᒪᓕᒐᓕᐅᖅᑎᓐᖑᐊᖑᓂᐊᕐᓂᖏᓐᓂᒃ. ᑐᓴᐅᒪᔾᔪᑏᑦ ᐸᐃᑉᐹᑦ ᐃᓘᓐᓇᖏᓐᓄᑦ ᓄᓇᕗᒻᒥ ᐃᓕᓐᓂᐊᕐᕕᐊᓗᖕᓄᑦ ᐊᐅᓪᓚᖅᑎᑕᐅᓯᒪᓕᖅᑐᑦ.

ᓄᓇᕗᒻᒥ ᒪᒃᑯᒃᑐᑦ ᒪᓕᒐᓕᐅᖅᑎᓐᖑᐊᖑᓗᑎᒃ ᑲᑎᒪᕐᔪᐊᕐᓂᐊᖅᑐᑦ ᒪᓕᒐᓕᐅᕐᕕᐅᑉ ᑲᑎᒪᕐᔪᐊᕐᕕᖓᓂ. ᒪᒃᑯᒃᑐᑦ ᒪᓕᒐᓕᐅᖅᑎᓐᖑᐊᖑᓂᖏᑦᑕ ᑲᑎᒪᕐᔪᐊᕐᓂᖓ ᐱᒋᐊᕐᓂᐊᖅᑐᖅ ᓄᕕᐱᕆ 22, 2012-ᖑᓕᖅᐸᑦ 1:30-ᒥ ᐅᓐᓄᓴᒃᑯᑦ. ᑕᖅᑲᒃᑯᐊ ᑭᒃᑯᑐᐃᓐᓇᐃᑦ ᖁᓐᖏᐊᕆᐊᕈᒪᔪᑦ ᖃᐃᖁᔭᐅᕗᑦ, ᐊᒻᒪ ᑲᑎᒪᕐᔪᐊᖅᑎᓪᓗᒋᑦ ᓄᓇᕗᓕᒫᒥ ᒪᓕᒐᓕᐅᕐᕕᐅᑉ ᑕᑯᒃᓴᐅᕝᕕᒋᖃᑦᑕᖅᑕᖓᒍᑦ ᓴᖅᑭᔮᕐᓂᐊᖅᖢᑎᒃ ᐃᕐᖐᓐᓇᖅ.